Tshipupu tshia dishilangana tshidiku lelu

“Tudi tuitaba mudi malelela aa mikale a bushuwa, bua se: bantu bonso mbafukibue bikale diatshimue, bua se: Mufuki wabu mmubapeshe amue manême adi kaayi kushintulula, bua se: munkatshi muawu mudi dikala ne muoyo, budikadidi ne dikeba disanka.”​—Dimanyisha dia Budishikaminyi, dianyisha kudi ditunga dia États-Unis mu 1776.

“Bantu bonso mbaledibue ne budikadidi ne manême a muomumue.”​—Dimanyisha dia Manême a Bantu ne a ba Muena-muabu, dianyisha kudi Tshipangu tshia ditunga dia France mu 1789.

“Bantu bonso mbaledibue ne budikadidi ne bikale ne lumu ne manême a muomumue.”​—Dimanyisha dia Buloba Bujima dia Manême a Bantu, dianyisha kudi bena mu Tshipangu Tshinene tshia Bulongolodi bua Matunga Masanga mu 1948.

KAKUENA mpata nansha mikese pa bualu ebu to. Dijinga dia kuikala mumue didi kudi bantu bonso pa buloba bujima. Kadi muanda wa dibungama udi se: bu mudibi anu bikengela bua kuambulula misangu ne misangu lungenyi lua ne: bantu badi diatshimue, bualu ebu budi bujadika se: too ne mpindieu kuikala diatshimue kudi kubafuka bantu.

Kudiku muntu udi mua kuamba mudi malu malongoloke ku ndekelu kua siekele eu wa 20 anyi? Bena mu États-Unis ne mu France bonso, anyi bena mu ditunga kayi dionso dia ku matunga 185 adi enza Bulongolodi bua Matunga Masanga badiku ne manême a muomumue adibu bamba muvuabu baledibue nawu anyi?

Nansha mudi lungenyi lua se: bantu bonso badi diatshimue mua kumueneka lua “bushuwa,” manême a bantu bua kuikala ne “muoyo, budikadidi, ne dikeba disanka” kaena pabuipi ne kuikala diatshimue bua bantu bonso to. Tshilejilu, mmunyi mutudi mua kuakula bua bunême bua muomumue bua kuikala ne muoyo padi muana umue wa mu Afrike wabanyangana munganga umue ne bantu bakuabu 2 569, eku muana umue wa ku Mputu wabanyangana munganga umue ne bantu 289 patupu? Peshi mmanême kayi a diatshimue a budikadidi ne dikeba disanka adiku padi muana wa balume umue pa basatu ne bana ba bakaji babidi pa basatu ba mu ditunga dia Inde bakola kabayi bamanye mukanda, eku mu matunga bu mudi Japon, Allemagne ne Grande-Bretagne bana bonso bikale ne mushindu wa kulonga?

Bantu ba mu matunga a munkatshi mua Amerike batu ne lupetu lua dolare 1 380 pa muntu yonso ku tshidimu badiku ne “lumu ne manême” a muomumue a mu nsombelu bu mudi bantu ba mu France, badi ne lupetu lua dolare 24 990 pa muntu yonso ku tshidimu anyi? Nnsombelu wa muomumue kayi udi nende muana wa bakaji udi ufuma ku diledibua mu Afrike udi mua kulala anu bidimu 56 pa kufuanyikija ne muana wa bakaji wa ku Amerike wa ku Nord udi yeye mua kulala bidimu 79?

Dishilangana didi mu malu a bungi, ne onso adi abungamija. Dishilangana mu nsombelu ne mu dipeta dia luondapu anyi dia mpunga ya kulonga tulasa mmalu makese a kudiwu. Imue misangu makokangana mu malu a tshididi, a makoba anyi a bitendelelu ke atu atamba kupangisha bantu bunême ne budikadidi buabu. Nansha mudibu bakule bua dikala ne nsombelu ya diatshimue, tudi mu bukua-panu mudi dishilangana. Anu bu tshipupu​—muaku udibu buimvuija se: “tshintu tshidi tshilela dikenga dinene”—​dishilangana didi mu bantu ba nsombelu mishilashilangane. Didi dikebesha dikenga didi dimuenekela ku bupele, masama, dipanga, bulofua ne kansungasunga bidi bitapa ku muoyo.

“Bantu bonso mbafukibue bikale diatshimue.” Elu ndungenyi lulenga lua dikema. Kadi malu adi enzeka adi abungamija bikole.

[Mêyi a dianyisha bua tshimfuanyi mu dibeji 3]

FOTO WA ONU 152113/​SHELLEY ROTNER