Bamanyishi ba Bukalenge badi balonda

Bantemu badi baya kudi bantu mu France

KUBANGILA anu mu dinda dia mu Ditanu dia 29 Tshiongo 1999 too ne mu Dia lumingu, Bantemu ba Yehowa ba mu ditunga dia France bakabanya ne musangelu wonso miliyo 12 ya trakte uvua ne mutu wa bualu wa se: Bena France, badi banushima! Bakabanya trakte eu mu njila ne ku nzubu ne ku nzubu. Bua tshinyi kampanye ka mushindu’eu?

Mu Ditanu adi mu dinda, bakaleja tshivuabu benzele kampanye aka mu tshisangilu tshienza ne ba-kamona-kamba. Ntemu uvuabu batume bu muleji-mpala wakumvuija ne: “Tshitudi basue kuenza lelu nkudimanyisha patoke ne kukamisha mashimi adibu batutangalajile. Katuena tubenga bua batujane to, kadi katuena basue kuteleja kabidi mashimi ne malu adi atunyangila lumu luetu nansha.”

Nansha mudi Bantemu ba Yehowa bikale tshitendelelu tshinene tshisatu mu France, badi bapenda ne batatshisha bana ba bungi ba Bantemu mu tulasa. Mbipate bantu ku midimu ne mbabafunyine anu bua tshitendelelu tshiabu. Bualu bua dikema, nansha bua mapa adibu bafila bua mudimu wa tshitendelelu tshiabu, mbabafundile bua kufuta tshitadi tshidi tshiangata bia pa lukama 60 mu makuta onso adibu bapeta. Ntshinyi tshiakenzabu mu kampanye bua kansungasunga aka?

Trakte udi wamba ne: “Bantemu ba Yehowa 250 000 ne balunda babu badi mu France KABENA BITABA mushindu mubi udibu bangata tshitendelelu tshiabu tshia bena Kristo tshidi mu France katshia ku tshidimu tshia 1900, batshibala munkatshi mua tusumbusumbu tua malu a Nzambi tua njiwu bituadijile mu 1995. . . . KABENA BITABA mushindu udibu babatatshishe kakuyi dikisha.” Bakela patoke malu avuabu bashiminyine Bantemu ba mu France ne mishindu mikonyangale idi bantu badi babanyangila lumu bakebe bua kubendeshila lumu lubi. Trakte udi wamba ku ndekelu ne: “Lelu’eu, Bantemu ba Yehowa ne balunda babu bapite pa miliyo ibidi mbasombele mu matunga a Mputu. Badi banemeka mikenji ya mbulamatadi idi ibalombola pa kubingisha malu a mushinga a mu Evanjeliyo. Bena France, ke mudi malu nanku. Tudi ne bujitu bua kualeja anu mushindu udiwu!”

Bantu bakanyisha pa lukasa

Dituku dia kumpala bakabanya trakte miliyo mivule. Mu tshimenga tshia Paris nkayamu, Bantemu bapite pa 7 000 bakavua babanyine bantu trakte mipite pa 1 300 000 kumpala kua midi kukumbana. Bua bantu ba bungi, eu uvua musangu wa kumpala wa kumona Bantemu bapite bungi babanya trakte mu njila. Ba-kamona-kamba, bafundi ba bikandakanda ne bakudi ba ku televizion ba mu ditunga edi bakanyisha kampanye aka. Tshikandakanda tshia Le Progrès de Lyon tshiakamba ne: “Muanda eu . . . udi uleja patoke mudi bantu bumvue muaku kampanda bibi. Mu bidimu dikumi bishale ebi, muaku ‘kasumbusumbu’ . . . mmuangate diumvuija dibi ne dia njiwu. . . . Bantemu ba Yehowa ki mbantu ba njiwu bafuanyike kukebesha tshimvundu mu bantu nansha.”

Bantu badi bamanya Bantemu ba Yehowa batu banyisha nsombelu wabu wa ditalala ne kanemu kadibu naku bua bulongame bujadika kudi mbulamatadi. Nenku, bantu ba bungi mu njila bakaleja dianyisha diabu ne kukuatabu ku tshia makumi a binunu bia Bantemu bavua benze kampanye aka. Bu mutantshi mukese panyima bantu ba bungi bakela nshinga, fakse ne kutuma mikanda bela tuasakidila bua trakte eu. Kupita apu, bantu bena muoyo mulenga bakapeta mpunga wa kuteleja malu malelela adi atangila Bantemu adi kaayi apetangana ne malu a dishima kaayi mutu adi bantu bamba. Bantemu bakapeta mushindu wa kuleja mmuenenu wabu bua malu atubu banange bikole.