Dijingulula dia Bible—Ditu difumina ku buenzeji bua nganyi?
NKONGA-MIAKU kampanda udi umvuija muaku “kujingulula” bu “kumvua bilondeshile mitabuja a muntu, mushindu wende wa dikonkonona malu anyi nsombelu wende.” (Webster’s Ninth New Collegiate Dictionary) Nenku, dijingulula dia bualu kayi buonso ditu pa tshibidilu dienzeja kudi mamanya onso a muntu, tulasa tudiye mulonge ne nkoleshilu wende.
Kadi netuambe tshinyi bua dijingulula dia Bible? Tudiku ne budikadidi bua kumvuija mvese ya mu Bible bilondeshile ‘mitabuja, mushindu wa dikonkonona malu anyi nsombelu’ wetu anyi? Pa tshibidilu, bashikuluji ne bakudimunyi ba Bible ba bungi batu bamba ne: kabatu benza nanku to, kadi Nzambi ke utu ubalombola.
Tshilejilu tshimue ntshia mêyi adi mu note wa kuinshi bua Yone 1:1 mu Bible mupatula mu 1836 kudi John Lingard pa kufundapu dîna dia kudisokoka nadi edi: “Muena Katolike.” Mêyi au adi amba ne: “Bantu ba mu tshitendelelu tshionso batu bamona se: mmuenenu yabu mmijadika mu Mifundu Minsantu. Pabi, ki m’Mifundu itu ibapesha dimanya didibu nadi nansha, kadi buobu nkayabu ke badi bafila diumvuija diabu ku bidi Mifundu yamba.”—A New Version of the Four Gospels.
Nansha mudi bualu ebu buvuaye mufunde buikala bujadika bimpe, ntshipatshila kayi tshivua natshi mufundi eu? Malu avuaye muambe avua bua kubingisha diumvuija divuaye mufile bua mvese au, utudi tubala ne: “Ku tshibangidilu kuvua ‘muaku;’ ne ‘muaku’ uvua ne Nzambi; ne ‘muaku’ uvua Nzambi.” Nkudimuinu eu udi uleja dilongesha dia Busatu Bunsantu patoke.
Ntshinyi tshivua tshifikishe mufundi eu bua kukudimuna Yone 1:1 ne tshipatshila tshia kubingisha dilongesha dia Busatu Bunsantu? ‘Mifundu ke ivua mimupeshe dimanya’ dia kuenza bualu ebu anyi? Tòo, bualu kakuena muaba nansha umue mu Bible utudi mua kusangana dilongesha dia Busatu Bunsantu to. Tangila tshidi tshibungu kampanda tshiamba bua bualu ebu: “Ni mmuaku Busatu Bunsantu peshi dilongesha edi kabiena mu Dipungila Dipiadipia to.” (The New Encyclopædia Britannica) Kabidi, mulongeshi E. Washburn Hopkins wa mu iniversite wa Yale wakamba: “Yezu ne Paulo kabavua bamanye dilongesha dia Busatu Bunsantu nansha; . . . ki mbambe bualu nansha bumue bua dilongesha edi to.”
Nenku ntshinyi tshitudi mua kuamba bua bantu badi babingisha diumvuija didi dileja Busatu Bunsantu difila bua Yone 1:1 anyi bua mvese mukuabu yonso wa mu Bible? Bilondeshile tshivua Muena-muabu Lingard muleje, “ki m’Mifundu idi ibapesha dimanya didibu nadi nansha, kadi buobu nkayabu ke badi bafila diumvuija diabu ku bidi Mifundu yamba.”
Diakalenga, Dîyi dia Nzambi didi ditulombola mu muanda eu. Mupostolo Petelo wakamba ne: ‘Numanye bualu ebu diambedi ne: kakuena diyisha dia baprofete dia mu Mukanda wa Nzambi didi difuma ku dijingulula dia muntu. Bualu bua kakuena diyisha dia baprofete diakanji kulua ku disua dia muntu; kadi bantu bakamba dîyi dia kudi Nzambi benzeja kudi [spiritu munsantu, NW].’—2 Petelo 1:20, 21.