“Tuetu bena Katolike tudi ne bivule bia kulongela kudibu”

MÊYI aa adi atangila Bantemu ba Yehowa avua mamba kudi mulongeshi wa mu tshimenga tshia Bari, ku Italie, mu dilongesha dia malu a kale a bitendelelu mu kalasa ka bikadilu. Mulongeshi uvua muambile balongi ne: uvua ne bua kukuata mudimu ne tusete tua video bu bintu bia kulongesha nabi. Pakumvuaye bualu abu, umue wa ku balongi aba, Roberto uvua ne bidimu 18, wakalomba pende bua kuakulabu pa tshitendelelu tshiende. Wakapesha mulongeshi kasete ka Les Témoins de Jéhovah​—Un nom, une organisation. Mulongeshi wakakangata, ne kalasa kajima ka balongi batue ku 30 kakamona kasete aku. Roberto udi wamba ne: “Bonso bakakema bua buobumue, bulongolodi, ne dinanga diondoke didi munkatshi mua Bantemu ba Yehowa. Bavua mene bakeme bikole bua kumvua ne: ku ngondo yonso batu bapatula miliyo 40 ya Tshibumba tshia Nsentedi ne miliyo 36 ya Réveillez-vous!”

Bamane kumona kasete aka, balongi bavule bavua balonga ne Roberto bakela nseka bamba ne: “Tshivua ngela meji ne: nuvua ne bulongolodi bua nunku to.” Mulongeshi eu wakambila balongi bua Bantemu ba Yehowa ne: “Tangilayi mudi ditabuja diabu dibasaka bua kuikala mu buobumue ne balongolola. Tuetu bena Katolike tudi ne bivule bia kulongela kudibu.” Kasete aka ne diyuki dia mu kalasa diakalonda biakambuluisha bikole bua kukolesha ngumvuilu mulenga wa malu adi atangila Bantemu ba Yehowa.