“Nnganyi wakela meji mu bikaba bia mavuba”?

“PANUDI numona divuba dijuka kudi diba dibuela, nudi nuamba diakamue ne: ‘Mvula nealoke.’ Bidi bienzeka amu nanku. Kabidi padi lupepele lua ku manda kua ditunga lututa, nudi nuamba ne: ‘Nekuikale luya lukole.’ Bidi bienzeka amu nanku.” Meyi aa a Yezu, mafunda kudi Luka mufundi wa Evanjeliyo, adi bilejilu bia mamanyisha a mvula nansha munya bu muvuabu baenza mu Palestine wa kale. (Lukase 12:54, 55, MMM) Mu imue nsombelu, bantu ba kale bavua mua kujingulula bimanyinu ne kumanyisha malu majalame avua ne bua kuenzeka mu tshitupa tshîpi.

Lelu’eu, bamanyi bapiluke ba malu a mvula nansha munya batu benza mudimu ne biamu bitu bikenketa buloba ne binyungulukaku (satellites), tshiamu tshia Radar Doppler ne ordinatere ya bukole, bua kujadika bimanyinu bia mvula nansha munya munkatshi mua bikondo bile menemene. Kadi misangu mivule malu atubu badianjila kumanyisha kaatu malelela to. Bua tshinyi?

Malu a bungi adi avuija didianjila kumanyisha mvula nansha munya dikole. Tshilejilu, mashintuluka adi kaayi amueneka a mashika nansha luya, tshitalela, bukole bua lupepele ne lubilu lualu pamue ne kudilu luya bidi mua kukolesha muanda eu. Kudi kabidi buenzeji budi pankatshi pa dîba, mavuba ne mbuu, budi bena mamanya a panu kabayi banji kumvua bimpe menemene nansha. Bua kabingila aku, didianjila kumanyisha mvula nansha munya mmudimu udi kauyi mujalame.

Dimanya dishadile dia muntu mu malu a mvula nansha munya didi dituvuluija nkonko yakelabu Yobo ne: “Udi mulele mamata a dibungi nganyi? Mabue a mashika adi apatuka mu difu dia nganyi? . . . Udi mua kutumina mavuba diyi bua mvula wa bungi kulokaye anyi? . . . [“Nnganyi wakela meji mu bikaba bia mavuba, anyi nnganyi wakapesha malu a muulu lungenyi?,” NW] Nganyi udi mutekeshe mua kubadika mavuba, ne kupumuna mayi adi mu milondo ya mu diulu?”​—Yobe 38:28-37, MMM.

Diandamuna ku nkonko yonso eyi didi se: Kakuena muntu udi mua kuenza nanku, pa kumbusha Yehowa Nzambi. Nansha bantu buobu mua kumueneka bikale ne meji, meji a Mufuki wetu adi kule, muulu mule. Nzambi udi bushuwa ne dinanga bua mudiye mutupeshe meji ende ku diambuluisha dia Bible, bua tuetu kuya kumpala mu njila wetu.​—Nsumuinu 5:1, 2.