Bakenza disua dia Yehowa

Yezu wakasomba ne bana

MUDIMU wa Yezu wa bidimu bisatu ne tshitupa ukavua mutangile ku ndekelu kuawu. Mu katupa kîpi uvua ne bua kubuela mu Yeruzaleme bua kufua lufu lua tshinyangu. Uvua mumanye bimpe malu avua alua kumpala kuende, bualu ukavua muambile bayidi bende ne: ‘Nebafile Muana wa muntu mu bianza bia bantu, nebamushipe.’​—Mâko 9:31.

Bushuwa, Yezu uvua musue kuenza mudimu bimpe menemene dituku dionso, dîba dionso ne tshikondo tshionso tshivua tshishale. Bitshivua bikengela kutabalela bayidi bende. Yezu wakamona se: batshivua dijinga ne mubelu mukole bua kuikalabu ne budipuekeshi ne bua njiwu ivuaku misangu yonso ya dilenduka. (Mâko 9:35-37, 42-48) Bavua kabidi bakengela kubalongesha malu adi atangila dibaka, dishipa dia dibaka ne bujike. (Matayo 19:3-12) Bu muvuaye mumanye se: ukavua pabuipi ne kufua, kakuyi mpata Yezu wakayukila ne bayidi bende mu tshikoso ne lungenyi lua mitalu. Dîba divua ne mushinga wa bungi menemene ne ke tshiakenzeja bua se: malu akalua Yezu kuenza pashishe ikale matambe kuikala a pa buawu.

Yezu udi wakidila bana

Bible udi wamba ne: ‘Bakadi balua ne bana bakese kudiye bua yeye kubalenga tshianza tshiende.’ Pakamona bayidi bualu ebu, bakaleja diakamue ne: kabavua babuanyishe to. Pamu’apa bavua bela meji ne: Yezu uvua muntu wa mushinga wa bungi anyi uvua ne malu a bungi a kuenza ne kavua ne dîba dia kutabalela bana. Nenku, ela meji muvuabi bikemeshe bayidi pavua Yezu mubafiikile munda! Wakabambila ne: ‘Nuitabuje bua bana bakese kulua kundi, kanubakandi; bualu bua bukalenge bua Nzambi mbua badi bu bana.’ Pashishe Yezu kusakidilaye ne: ‘Bulelela, ndi nnuambila ne: Muntu yonso udi kayi witabuja bukalenge bua Nzambi bu muana mukese, kêna ubuelamu.’​—Mâko 10:13-15.

Yezu wakamona ngikadilu milenga munda mua bana. Pa tshibidilu batu ne dijinga dia kumanya ne batu ne dieyemena. Batu bitaba mêyi a baledi babu ne mene bababingisha kumpala kua bana bakuabu. Ngikadilu wabu wa dikala badiakaje bua kuitaba malongesha ne bua babalongeshe mmuakanyine kumuidikija kudi aba bonso badi basue kubuela mu Bukalenge bua Nzambi. Anu bu muakamba Yezu, ‘bukalenge bua Nzambi mbua badi bu bana.’​—Fuanyikija ne Matayo 18:1-5.

Kadi Yezu kavua ukuata mudimu ne bana aba bua kufila patupu tshilejilu to. Muyuki udi uleja patoke ne: bushuwa Yezu uvua munange kuikala ku luseke luabu. Mâko udi umanyisha ne: Yezu “wakambula bana mu maboko ende ne kutuadijaye kubabenesha, ubatenteka bianza.” (Mâko 10:16, NW) Anu muyuki wa Mâko ke udi ne diumvuija dia luya dia se: Yezu “wakambula bana mu maboko.”a Nenku Yezu wakenza bipitshile ne bivua bantu bakole batekemene, aba bavua balue ne bana kudi Yezu bua ‘abalenge’ tshianana.

Pavua Yezu ‘utenteka [bana] bianza’ bivua ne diumvuija kayi? Muaba eu kawena lungenyi lua mukiya kampanda wa malu a Nzambi, bu mudi batismo to. Nansha pavua, mu bimue bikondo ditenteka bianza dikale diumvuija kupesha muntu mudimu, mu binga bikondo divua diumvuija patupu kubenesha. (Genese 48:14; Bienzedi 6:6) Nenku Yezu uvua mua kuikala ubenesha patupu bana aba.

Nansha bikale mushindu kayi, Mâko udi ukuata mudimu ne muaku ‘dibenesha’ (ka·teu·lo·geʹo), udi ufila lungenyi lua bukole bua bungi. Ebi bidi bileja ne: Yezu wakabenesha bana aba ne lukunukunu, dinanga ne luya. Bushuwa, kavua umona bana bu bualu budi bujimija dîba nansha.

Dilongesha buetu tuetu

Mushindu uvua Yezu wenzela bana ne bantu bakole malu kauvua utshingisha anyi upuekeshangana milongo to. Mukanda kampanda udi wamba ne: “Uvua ne bua kuikala mufukishe mimuemue bipepele ne museke ne disanka.” Kabiena bikemesha muvua bantu ba milongo yonso bumvue bimpe pavuabu ku luseke luende. Mu diela meji pa tshilejilu tshia Yezu, tudi mua kudiebeja ne: ‘Bantu bakuabu batu bammona bu muntu wa kukuatshila bualu anyi?’ ‘Ntu mmueneka bu udi ne malu a bungi a kuenza ne tshiyi ne dîba dia kuditatshisha bua midimu ne majinga a bakuabu anyi?’ Kutabalela bantu ne muoyo mujima nekutusake bua kudifila bu muakenza Yezu. Bakuabu nebamone mutudi tubatabalela bushuwa ne nebakokibue kutudi.​—Nsumuinu 11:25.

Anu bu mudi muyuki wa Mâko uleja, Yezu uvua musue kusomba ne bana. Pamu’apa, uvua upeta dîba dia kutangila muvuabu banaya, bualu wakakula bua manaya abu mu umue wa ku mifuanu yende. (Matayo 11:16-19) Imue misangu banga bana bavua Yezu mubeneshe batshivua bapuekele bikole kabayi mua kumumanya yeye ne malu avuaye ulongesha. Kadi ebi kabiakamufikisha ku diela meji ne: uvua ujimija dîba diende. Uvua usomba ne bana bualu uvua mubanange. Pamu’apa, bavule ba ku bana bavua Yezu mupetangane nabu mu mudimu wende bavua basakibue pashishe bua kuanyisha dinanga diende pa kulua bayidi bende.

Bikala Yezu uvua musombe ne bana mu mbingu mikole ya ndekelu ya muoyo wende, bushuwa tudi mua kubapetela dîba mu ndongamu wetu udi ne malu a bungi a kuenza. Tudi ne bua kuikala tuvuluka nangananga aba badi ne majinga a pa buawu, bu mudi bana ba nshiya. Bushuwa, bana bonso batu bakola bimpe padibu babatabalela, ne dijinga dia Yehowa ndia tuetu kubananga ne kubambuluisha muetu muonso.​—Musambu 10:14.

[Mêyi adi kuinshi]