Bamanyishi ba Bukalenge badi balonda

Muntu uvua muluishi kumpala udi umanya bulelela

MBAMANYISHE malu a bungi mu ngumu idi itangila mvita ya bena ditunga mu Libéria. Bantu bapite pa 20 000 bakajimija muoyo wabu, ne mene bantu bapite bungi bakamuangala. Nansha muvuaku nsombelu eyi mikole, bantu bena mitshima milulame badi batungunuka ne kuitaba bulelela, anu bu mudi bualu budi bulonda ebu buleja.

Patshivuaye ne bidimu dikumi, James uvua mulongesha kudi Ekleziya wa bena Luther. Panyima pa mumane kulua mufundi wa ngumu mu tshikandakanda tshia ekleziya, wakakuata mudimu ne muanzu wende bua kufunda malu a diluisha nawu Bantemu ba Yehowa. Uvua wenza nanku nansha muvuaye kayi muanji kupetangana ne umue wa kudibu.

Mu bungi bua matuku, James wakalekela difunda dia ngumu mu tshikandakanda tshia ekleziya ne kuluaye muena nzubu wa tshilala benyi uvua wenda bimpe. Dimue dituku pavuaye musombe mu tshiala benyi tshia nzubu wende eu, bana betu ba bakaji babidi bavuale bimpe bakalua kumumona. Pakamonaye mvuadilu wabu mulenga, wakababueja. Kadi pakamumvuijabu tshivuabu bavuile, wakamba ne: “Ndi ne mudimu wa bungi, tshiena ne dîba dia kuyukila to.” Bantemu aba bakamulomba bua enzeje abonema wa bibejibeji bia Tshibumba tshia Nsentedi ne Réveillez-vous!, ne wakitaba anu bua bamushile muaba. Munkatshi mua ngondo 12 bavua bamutumina bibejibeji kumbelu, kadi uvua ubiela mu tshibuta tshia kabudimbu kayi nansha ubiumbusha mu mabeji muvuabu babikangile.

Pakafuimakana mvita ya bena ditunga, James wakela mfranga ne bintu bia mushinga mukole mu tshibuta bua kumona mua kunyema padi mvita ilua. Dinda kampanda grenade (kabulubulu ka bombe) wakatayikila mu tshiibi tshia kumfundu kua nzubu wende, ne mu tshipapu amu kuambulaye tshibuta tshiende ne kunyemaye bua kupandisha muoyo wende. Mumane kupetangana ne bantu binunu bivule bavua banyeme mvita, uvua ne bua kupitshila mu miaba ya bungi ivuabu benzela kontololo. Misangu mivule mu miaba ayi bavua banyenga bintu bia bena ditunga ne babashipa kakuyi kabingila ka nsongo.

Mu muaba wa kumpala uvuabu benzela kontololo, bakela James nkonko mikese ne pashishe kumulombabu bua kukangula tshibuta tshiende. Pakatshikangulaye, wakatangila munda muatshi ne wakakema bua tshiakamonaye. Wakabazuka pakamonaye se: tshibuta tshivuaye muambule katshivua etshi tshivua ne bintu biende bia mushinga mukole nansha. Uvua mubakule mu tshipapu tshibuta tshivua ne bibejibeji bionso bia Tshibumba tshia Nsentedi ne Réveillez-vous! kabiyi bianji kukangula. Kadi pavua musalayi mumone bibejibeji ebi ne mubale dîna diende pa tubeji tuvua tulamikapu, wakamba ne: “O, udi Ntemu wa Yehowa. Katuena tunukeba nuenu to, tudi bamanye ne: kanutu nushima nansha.” Panyima pa yeye mumane kupatula ndambu wa bibejibeji mu tshibuta, musalayi kuambilaye James bua apite.

Bualu bua muomumue buakenzeka mu miaba tshitema ivuabu benzela kontololo, banene bonso ba basalayi bavua bela meji ne: James uvua Ntemu wa Yehowa ne bakamupitshisha kakuyi bualu. James uvua mpindieu ne disanka bua muvuaye kayi muambule tshibuta tshia bintu biende bia mushinga mukole, bualu bilondeshile malu avuaye mumone, bavua ne bua kuikala bamushipe bua bintu biende abi.

Ndekelu wa bionso, pakafikaye muaba wa kontololo wa ndekelu uvuabu batamba kutshina, buôwa buakamukuata pakamonaye bitalu bivule biladika panshi. Ne lukanku, kubilaye dîna dia Yehowa. Wakasambila ne: biamuambuluisha Nzambi bua kupita muaba eu wa lufu, uvua ne bua kumusadila mu matuku ende onso a muoyo.

James wakaleja tshibuta tshiende kudi basalayi, ne kumuambabu tshiakabidi ne: “Katuena tukeba bantu aba to.” Bamutangila, kusakidilabu ne: “Muanenu mukuabu mmusombele kuinshi kua kakunakuna aka. Ndaku usombe nende.” Musangu eu James uvua mushintulule menemene mmuenenu uvuaye nende bua Bantemu. Wakamonangana diakamue ne muanetu wa balume au, ne bakalongolola bua kutuadija dilonga dia Bible mu mukanda wa Udi mua kuikala ne muoyo wa kashidi pa buloba bukudimuna mparadizu.a

Panyima pa matuku makese, mvita yakenzeja bua kumbukaye muaba au. Bua eu musangu, James wakanyemena mu tshisuku muambule anu mukanda wende wa Muoyo wa kashidi! Munkatshi mua ngondo 11 ya dibenga kumonangana ne Bantemu, wakalonga mukanda wonso nkong misangu itanu. Ndekelu wa bionso pakapinganaye mu tshimenga, wakabangulula dilonga diende dia Bible ne Bantemu ne wakadiunda pa lukasa. Panyima pa matuku makese, wakatambula, ne mpindieu udi usadila ne lulamatu pamue ne bana babu ba mu nyuma.

[Mêyi adi kuinshi]