Bibejibeji bidi bimanyisha Bukalenge
1 Bu mutudi Bantemu ba Yehowa, tudi bamanyike bimpe bua diyisha dietu dia lukunukunu pa Bukalenge bua Nzambi. Bibejibeji bia Tshibumba tshia Nsentedi ne Réveillez-vous ! bitutu tuabanya bidi bikuata mudimu mukole mu diambuluisha miliyo ya bantu bua kumanya malongolola a Nzambi. Mukenji udimu udi bushuwa lumu luimpe, bualu udi umanyisha Bukalenge bua mu diulu bua Nzambi bu ditekemena dimuepele bua bukua-bantu.
2 Bibejibeji ebi bidi biakula bua malu adi bantu bakengela bulelela—a mu mpampakenu, a mu nsombelu, ne a mu nyuma. Bu mudi nsombelu wa tshitembu ne wa mu dîku wenda unyanguka miaba yonso, Tshibumba tshia Nsentedi ne Réveillez-vous! bidi biambuluisha bantu badi babibala bua kuakaja nsombelu wabu mu dibaleja mushindu wa kutumikila mêyi-maludiki a mu Bible. Nebikale disanka dietu dia kufila bibejibeji mu Lumungulu ne Kabalashipu.
3 Bidi bushuwa bikoka: Tshibumba tshia Nsentedi ne Réveillez-vous! bidi bipeteka mu miakulu ya bantu pabuipi ne bonso ba pa buloba bujima. Bua nunku, bibejibeji bietu mbimanyike bimpe. Mona tubingila tudi tuleja bua tshinyi bidi bikoka bantu:
▪ Mudibi bikandakanda bia bululame ne bulelela, bidi bileja patoke dishilangana didi pankatshi pa bimpe ne bibi.
▪ Bidi bifila ditekemena dia mparadizu wa buakane ulualua, bishindamene pa dilaya dia Nzambi dia kuteka buloba muinshi mua bukokeshi bua Bukalenge buende.
▪ Biena-bualu kabukabu biakanyine tshikondo mbilejamu, bikoka bantu ba nsombelu ne nshidimukilu yonso.
▪ Biena-bualu bidi bîpi, bishidimuja, bilonda malu malelela, ne kabiena ne ngenyi midianjila kufumba ne kabiena biashisha malu mabi.
▪ Bimfuanyi bidi bisankisha mêsu bidi bijula diakamue dijinga dia kumanya, ne mfundilu mutokesha udi uvuija bibejibeji bipepele bua kubibala.
4 Biabanyayi bikole: Diabanya dia bibejibeji didi dipatula bipeta ndisuikakaja nangananga ku tshisumi tshietu mu dilongolola maleja etu, dîba dietu, ne mudimu wetu wa bumanyishi. Nebikale bimpe bua kubalulula ne kutumika ne mibelu mikuatshishi ivua mifila mu Mudimu wetu wa Bukalenge wa Lumungulu 1997.
5 Dibidija wewe muine ne bibejibeji: Paudi ubala nimero yonso, ela meji bua muntu kampanda wikala mua kuanyisha bua kumupeta. Keba malu masunguluke anyi mvese iudi mua kutela mu dileja diebe. Ela meji bua lukonko luudi mua kuela bua kutuadija diyuki ne kujula dijinga dia kumanya bivule pa tshiena-bualu.
6 Akaja dileja bilondeshile muntu: Longolola dileja dipepele ne dijoboke, didi mua kuakanyina muntu mulume, muntu mukaji, muntu mukulakaje, anyi nsonga, nansha muikale mumanyangana nende anyi muenyi.
7 Ikala misangu yonso mudiakaje bua kufila Tshibumba tshia Nsentedi ne Réveillez-vous!: Bu mutu bibejibeji bikumbana kakuyi lutatu mu tshibuta, mu kabuta ka ku bianza, anyi mu mpaya, tudi mua kubiangata ndambu patudi tuya mu luendu anyi mu disumba dia bintu. Bifila paudi uyukila ne bena mu dîku, bena mutumba, bena mudimu nebe, balongi nebe, anyi balongeshi. Lama dituku dimue lumingu luonso bua diyisha nangananga ne bibejibeji.
8 Leja dianyisha bua bibejibeji: Kabitu bijika mushinga wabi nansha. Dipita dia matuku kaditu dipuekesha mushinga wa mukenji udi mu bibejibeji. Bushuwa, tuetu mua kuenza madikolela a pa buawu bua kufila bibejibeji bionso bitudi tupeta, nimero ya kale kayakuvula mu tubadi tuetu nansha.
9 Difila bumanyishi mu misesu didi dipatula bipeta: Eu udi umue wa ku mishindu mitambe buimpe ya kufila bibejibeji kudi bantu ba bungi. Bamue bamanyishi batu benza mudimu mu njila minene mudi bantu ba bungi pa tshibidilu mu matuku a bisalu.
10 Teritware ya bungenda idi ne bipeta bimpe: Patutu tuyisha ku magazen ne magazen, katutu tutamba kupangila bantu. Bangenda ba bungi batu ne bukalanga, ne ba bungi batu bitaba bibejibeji ne disanka. Zangika biena-bualu biakanyine bungenda busunguluke budi bantu baudi umonangana nabu benza.
11 Njila ya bibejibeji idi ipetesha mishindu: Bu mudi bibejibeji bipatuka misangu ibidi ku ngondo, mbiakanyine bua kukumbulula bantu badi babibala ne kubatuadila nimero idi ilonda. Tudi ne bua kuenza makumbulula pa tshibidilu, ki ng’anu bua kushiya bibejibeji kadi ne bua kudiundisha dijinga dia muntu dia kumanya bivule pa Bible. Njila ya bibejibeji idi mpokolo mutambe buimpe wa malonga a Bible atudi mua kupeta.
12 Enza muebe muonso mu Lumungulu ne Kabalashipu: Tshibumba tshia Nsentedi ne Réveillez-vous! mbipete dieyemena dia miliyo ya babadi badi ne dianyisha. Bu mudibi bipatula bipeta mu dimanyisha Bukalenge, tudi ne bua kukuatshilapu bua kuendakana nabi ne kubifila musangu wonso udiku mushindu. Ngondo eyi ya Lumungulu ne Kabalashipu itumuenekeleku ya pa buayi bua diabanya dia bibejibeji!