Fila bibejibeji bidi bimanyisha bulelela
1. Tshibumba tshia Nsentedi ne Réveillez-vous! bidi ne mudimu kayi?
1 Tshibumba tshia Nsentedi ne Réveillez-vous! bidi ne mudimu munene wa kuyisha Bukalenge ne kuvuija bantu bayidi. (Mat. 24:14; 28:19, 20) Tudi ne disanka dia kupesha bantu bibejibeji ebi bitu bilua pa dîba diabi patudi mu buambi bua mishindu yonso.
2. Mmalu kayi akadibu bashintulule bua Tshibumba tshia Nsentedi ne Réveillez-vous!? Bua tshinyi?
2 Mu kupita kua bidimu, mbashintulule bunene bua bibejibeji ebi ne malu adibu bafundamu pamue ne mishindu ya kubifila mu buambi. Mbenze mashintuluka aa bua kumona mua kubivuija bimpe ne kuikalabi bikoka ntema ya bantu bua lumu luimpe lua Bukalenge ludibi bimanyisha lulenge mioyo ya ‘bantu bonso badi mua kusungidibua bua bafike ku dimanya dia malu malelela.’—1 Tim. 2:4.
3. Mmunyi mutuenza mudimu ne bibejibeji mu buambi?
3 Katshia mu ngondo wa kumpala wa 2006, tukadi bibidila ne dienza mudimu ne mishindu mishilangane ya kufila Réveillez-vous! umue mu ngondo mujima. Mpindieu netutuadije kufila kabidi anu Tshibumba tshia Nsentedi tshimue tshia ku bibidi biapatuka mu ngondo mujima mu buambi. Mishindu mipepele ya kufila tshibejibeji tshionso itu mu dibeji dia ndekelu dia Mudimu wetu wa Bukalenge. Mu dibeji edi batu balejamu tshimue tshia ku biena-bualu bia ntuadijilu bidi mu tshibejibeji, kadi imue misangu batu baleja biena-bualu bikuabu bidi mua kusankisha bantu. Bua kuenza mudimu bimpe ne mishindu idibu baleje mu dibeji edi, tudi ne bua kumanya bimpe malu adi mu tshiena-bualu tshidibu balejamu ne kuamba mu mêyi etu bilondeshile bantu ba muaba utudi.
4. Bua tshinyi bidi mua kuikala bimpe bua kufila bibejibeji mu mushindu mukuabu pa kumbusha idibu baleje mu Mudimu wetu wa Bukalenge?
4 Nansha muikala Mudimu wetu wa Bukalenge ne bua kutuleja mishindu ibidi ya kufila tshibejibeji tshionso, tudi mua kuenza mudimu ne mushindu mukuabu mushilangane ne idibu baleje. Tudi tuamba nanku bualu kudi mua kuikala tshiena-bualu tshikuabu mu tshibejibeji tshidi mua kukoka ntema ya bantu ba mu teritware wenu. Anyi pamuapa muntu udi mua kumona ne: udi mua kuyisha bimpe bu yeye mua kuleja bantu tshiena-bualu tshikuabu tshidi tshimusankisha bikole.
5. Ntshinyi tshiudi ne bua kuenza kumpala kua kudilongolola bua kufila tshibejibeji mu buambi?
5 Muudi mua kudilongolola: Tshia kumpala, udi ne bua kuanji kuibidilangana bikole ne tshiena-bualu tshiudi musungule bua kuleja bantu. Pamuapa kuena anu mua kuibidilangana ne biena-bualu bionso bidi mu tshibejibeji kumpala kua kuya kutshifila mu buambi to. Kadi udi ne bua kuleja disanka ne kuakula ne muoyo mujima bua biena-bualu biudi musungule bua kuleja bantu. Bua wewe kuenza nunku, udi ne bua kumanya bimpe malu adi mu biena-bualu abi.
6. Mmunyi mutudi mua kulongolola yetu mishindu ya kufila bibejibeji?
6 Tshibidi, longolola mêyi ebe a ntuadijilu bimpe. Udi mua kuangata lukonko luimpe ludi mu tshiena-bualu ludi mua kujula bantu nyota ya kukuteleja bua kutuadija nalu muyuki. Ikala mumanye misangu yonso ne: Dîyi dia Nzambi didi ne bukole bua kulenga mioyo ya bantu. (Eb. 4:12) Sungula mvese muimpe udi upetangana ne tshiena-bualu tshiudi musungule bua kuleja bantu, nangananga udibu bafile anyi batele mêyi ende mu tshiena-bualu atshi. Keba mushindu wa kulamakaja mvese au ne tshiena-bualu.
7. Mmunyi mutudi mua kulengeja mishindu yetu ya kufila bibejibeji?
7 Dîba dionso didi mpunga umueneka: Bua mushindu wa kufila bibejibeji kuikalawu muimpe menemene, bidi bikengela kuenza nawu mudimu. Yisha ne bena mu tshisumbu mu difila dia bibejibeji mu Disambombo. Pesha bantu bakavua bangate imue ya ku mikanda yetu bibejibeji. Misangu yonso ikala upesha bantu bautu ulonga nabu Bible bibejibeji ne bantu bakuabu baudi usangana ku mabu paudi ubapinganyina. Udi mua kubipesha kabidi bantu baudi uyukila nabu paudi uya mu tshisalu, paudi wenza ngendu anyi paudi muindile munganga mu lupitadi. Lengeja mishindu yebe ya kufila bibejibeji paudi uyisha mu bule bua ngondo.
8. Tshibumba tshia Nsentedi ne Réveillez-vous! mbishilangane ne bibejibeji bikuabu ku tshinyi?
8 Kakuena bibejibeji bitudi mua kufuanyikija ne Tshibumba tshia Nsentedi ne Réveillez-vous! to. Bidi bileja mudi Yehowa muikale mukokeshi wa diulu ne buloba. (Bien. 4:24) Bidi bikolesha bantu ku muoyo ne lumu luimpe lua Bukalenge bua Nzambi ne bibambuluisha bua kuitabuja Yezu Kristo. (Mat. 24:14; Bien. 10:43) Bidi kabidi bileja mudi malu adi enzeka pa buloba akumbaja milayi ya mu Bible. (Mat. 25:13) Ambuluisha bantu ba mu teritware webe ne bibejibeji ebi pa kudilongolola bua kubifila misangu yonso idi mpunga umueneka.
9. Mmunyi mutudi mua kulongolola tshialu bua kupinganyina muntu?
9 Paudi upesha muntu tshibejibeji ne utshitaba anyi uyukila malu a mu Bible bimpe ne muntu, ikala mulongolole lukonko luudi mua kuela anyi mêyi adi mua kujula muntu au dijinga dia kumanya amue malu bua kulongolola tshialu bua musangu udi ulonda. Tuetu tukuna tente ya bulelela ne tshisumi tshia bungi, tumanye ne: Yehowa neabulule mitshima ya bantu badi basue kumumanya ne muoyo mujima ne kumuenzela mudimu.—1 Kol. 3:6.