‘Nzambi mmusue muena kupa udi ufila ne disanka’

YEHOWA udi tshimanyinu tshia kalolo. Bushuwa, Bible udi wamba ne: yeye ke Mufidi wa ‘kupa kuonso kuimpe ne dipa dionso diakane.’ (Yakobo 1:17) Tshilejilu tangila bintu biakafuka Nzambi. Wakenza biakudia bishême, bikale ne muenya mukana; bilongo bia mekala a bungi, kabiyi bimueneka bu bitundubile; mubuelu wa dîba udi ukemesha, kauyi muenze lubuitshibuitshi. Eyowa, tshitupa tshionso tshia bufuki bua Yehowa tshidi tshileja ne: udi ne dinanga ne kalolo. (Musambu 19:1, 2; 139:14) Kusakidila apu, Yehowa Mmuena kupa udi ufila ne disanka. Udi usanka mu dienzela basadidi bende malu mimpe.​—Musambu 84:11; 149:4.

Bavua batumine bena Izalele dîyi bua kuleja kalolo ka Nzambi mu malanda abu. Mozese wakabambila ne: ‘Kanukoleshi mitshima yenu, kanubuikidi tshianza tshienu kudi muanenu udi mupele. Numupe bintu bulelela; mitshima yenu kayinyingaladi.’ (Dutelonome 15:7, 10) Bu muvua dipa ne bua kufumina mu mutshima, bena Izalele bavua ne bua kusanka mu bienzedi bia kalolo.

Bavua bapeshe bena nkristo mubelu wa muomumue. Bushuwa, Yezu wakamba ne: kudi “disanka dia kupa.” (Malu menza 20:35, MMM) Bayidi ba Yezu bavua bikale ba tshilejilu mu difila ne disanka. Tshilejilu, Bible udi umanyisha ne: mu Yeruzaleme bantu bakalua bena kuitabuja ‘bakapana madimi abu ne bintu, bakabiabanyina bantu bonso bu muakadi muntu yonso nabi bualu.’​—Bienzedi 2:44, 45.

Kadi panyima bena Yuda aba bena kalolo bakalua bapele. Bible kêna usunguluja menemene tshivua tshibafikishe mu nsombelu eu to. Bamue bashikuluji badi bamba ne: nzala idibu batela mu Bienzedi 11:28, 29 ivua mua kuikala mikebeshe nsombelu eu. Nansha bikale mushindu kayi, bena nkristo ba mu Yudeya bavua mu nsombelu mukole menemene, ne Paulo uvua musue kujadika mushindu uvuabu mua kubakumbajila majinga abu. Mmunyi muvuaye mua kuenza nenku?

Disangishila bakengi bintu

Paulo wakakeba diambuluisha dia bisumbu bia kule bu mudi etshi tshia ku Masedoniya, ne wakalongolola bua basangishile bena nkristo aba bapele ba mu Yudeya bintu. Paulo wakafundila bena Kolinto ne: ‘Bu mungakela dîyi kudi ekleziya wa mu Galatia, enzayi bienu muomumue kabidi. Ku dituku dia ku mudilu dia lumingu ne lumingu, muntu ne muntu wa munkatshi muenu adibutshile bintu [“mu nzubu muende,” NW] bu muakabipetaye.’a​—1 Kolinto 16:1, 2.

Paulo wakalongolola bua kutuminabu bana betu ba mu Yeruzaleme mfranga eyi pa lukasa, kadi bena Kolinto bavua ne lujoko mu diandamuna ku mêyi a Paulo. Bua tshinyi? Bavua bapapishe muoyo bua nsombelu mukole wa bana babu ba mu Yudeya anyi? Tòo, bualu Paulo uvua mumanye ne: bena Kolinto bavua ‘bakumbane mu malu onso, ne mu ditabuja, ne mu kuamba [kua dîyi], ne mu lungenyi, ne mu disuminyina dionso.’ (2 Kolinto 8:7) Pamu’apa, bavua mu dikumbaja malu makuabu a bungi a mushinga mukole avua Paulo mubafundile mu mukanda wende wa kumpala. Kadi mpindieu nsombelu wa mu Yeruzaleme uvua ukengela mitalu. Nenku Paulo wakafunda tshilumbu etshi mu mukanda wende muibidi mutumina bena Kolinto.

Dijudisha kalolo

Tshia kumpala, Paulo wakambila bena Kolinto bua bena Masedoniya, bavua bitabe bua kufila dikuatshisha mu mushindu wa tshilejilu. Paulo wakafunda ne: “Munkatshi mua makenga mavule avua mabakuate, disanka diabo dipite bunene ne bupele buabo mbibapeteshe mpetu ya kalolo mivule.” Bena Masedoniya kabavua bakeba bua babasake bua kushishabu kufila to. Kadi Paulo wakamba ne: “mbatulombe dianyisha ne muoyo mujima bua kusangishabo pabo bintu.” Kalolo ka bena Masedoniya kaleja ne disanka kadi katamba kumueneka patudi tuvuluka se: buobu bine bavua mu “bupele.”​—2 Bena Korente 8:2-4, MMM.

Mu disamuna bena Masedoniya, Paulo uvua ukeba kujula lungenyi lua ditembangana munkatshi mua bena Kolinto anyi? Nansha kakese, bualu uvua mumanye ne: au kauvua mushindu muimpe wa disonsola to. (Galatia 6:4) Kusakidila apu, uvua mumanye se: bena Kolinto kabavua bakengela kubafuisha bundu bua kushishabu kuenza bualu buimpe. Kadi uvua mushindike ne: bulelela bena Kolinto bavua banange bana babu ba mu Yudeya ne bavua bajinga kufila mapa bua kubakuatshisha. Wakabambila ne: ‘Nuenu mbakabanga bualu ebu tshidimu tshia kumpala, ki mbua kuenza nkayaku, kadi mbua kusua kuenza kabidi.’ (2 Kolinto 8:10) Bushuwa, mu imue mishindu ya dikuatshisha edi, bena Kolinto bine bavua ba tshilejilu. ‘Ndi mumanye kudilongolola kuenu kungakatumbisha bua bualu buenu kudi ba mu [Masedoniya],’ ke muakamba Paulo, usakidila ne: “Lukunukunu luenu luakasonsola mitshima ya bantu ba bungi.” (2 Kolinto 9:2, disendamija miaku ndietu.) Kadi mpindieu bivua bikengela bua bena Kolinto baleje lukunukunu ne lungenyi luabu lua didiakaja mu bienzedi.

Bua nanku Paulo wakabambila ne: ‘Muntu ne muntu afile bintu bu muakadisunguilaye mu mutshima wende; kafidi ne kanyinganyinga, anyi bu muenzeja ku bukole; bualu bua Nzambi udi musue muena kupa udi ufila ne disanka.’ (2 Kolinto 9:7) Nenku tshipatshila tshia Paulo katshivua tshia kuenzeja bena Kolinto to, bualu muntu kêna mua kuikala muena kupa udi ufila ne disanka padiye muenzeja ku bukole nansha. Bushuwa, Paulo uvua wela meji ne: lungenyi luimpe lukavuaku ne se: muntu yonso ukavua mudisunguile bua kufila. Paulo wakabambila kabidi ne: ‘Bikala kudilongolola kudiku, bidi bitabujibua bu mudi muntu nabi, ke mbu mudiye kayi nabi.’ (2 Kolinto 8:12) Eyowa, padi kudilongolola kuikalaku​—padi dinanga disaka muntu—​Nzambi neitabe tshintu tshidiye ufila, nansha tshiotshi tshikese.​—Fuanyikija ne Luka 21:1-4.

Bena kupa badi bafila ne disanka lelu’eu

Dikuatshisha dipesha bena nkristo ba mu Yudeya didi difila tshilejilu tshilenga bua matuku etu aa. Bantemu ba Yehowa mbaditue mu kampanye ka diyisha pa buloba bujima, bafila biakudia kudi bantu miliyo mivule badi ne nzala mikole ya mu nyuma. (Yeshaya 65:13, 14) Badi benza nunku bua kutumikila dîyi-dituma dia Yezu dia se: “Nunku ndayi ne nuenze bantu ba mu matunga onso bayidi, nubatambuishe . . . nubalongeshe bua kutumikila malu onso andi munuambile.”​—Matayo 28:19, 20, NW.

Ki mbualu bupepele bua kukumbaja mudimu eu to. Bidi bilomba kukuba nzubu ya ba-misionere ne nzubu ya filiale idi mipite pa lukama pa buloba bujima. Bidi kabidi bilomba kuibaka Nzubu ya Bukalenge ne Nzubu ya Mpuilu bua batendeledi ba Yehowa bikale ne miaba mimpe ya kudisangishila ne kukankamijilangana. (Ebelu 10:24, 25) Imue misangu, Bantemu ba Yehowa batu kabidi bafila dikuatshisha miaba idi mikale minyanga kudi bipupu bia ku bintu bifuka.

Ela kabidi meji bua mfranga mivule idi ituka bua kupatula mikanda. Lumingu luonso, batu bapatula muayene wa Tshibumba tshia Nsentedi bungi bupite pa 22 000 000 anyi Réveillez-vous! mitue ku 20 000 000. Kusakidila ku biakudia bia mu nyuma bia pa tshibidilu, kudi kabidi miliyo mivule ya mikanda, broshire, tusete tua diteleja ne tua video bidibu bapatula tshidimu tshionso.

Mmunyi mudibu bakumbaja mudimu wonso eu? Nku diambuluisha dia mapa a budisuile. Badi bafila mapa, ki mbua kuendesha lumu luabu anyi bua lungenyi lua budisui, kadi mbua kutuma ntendelelu mulelela kumpala. Pa nanku, mapa aa adi apesha mufidi disanka ne dibenesha dia kudi Nzambi. (Malaki 3:10; Matayo 6:1-4) Nansha bana badi munkatshi mua Bantemu ba Yehowa badi badileja bena kalolo, bena kupa badi bafila ne disanka. Tshilejilu, pakumvuaye bua tshinyangu tshikebesha kudi mvunde mukole mu tshimue tshitupa tshia mu États-Unis, Allison muana wa bidimu binayi wakafila dipa dia dolare 2. Wakafunda ne: “Eyi ke mfranga yonso imvua nayi mu tshibutshilu tshianyi. Ndi mumanye se: bana mbajimije bintu biabu bionso bia kunaya nabi ne mikanda ne bana ba popi. Pamu’apa nudi mua kusumbila muana wa bakaji wa mulongo wanyi mukanda ne mfranga eyi.” Maclean, muikale ne bidimu muanda-mukulu, wakafunda ne: uvua ne disanka bua muvua muanetu nansha umue kayi mufue mu tshipepele atshi tshikole. Wakasakidila ne: “Ngakapeta dolare 17 patuvua meme ne tatu basumbishe bibuikidiji bia ku nkata ya vuatire. Mvua mua kusumba tshintu kampanda ne mfranga yanyi eyi, kadi ngakela meji bua bana betu.”​—Tangila kabidi kazubu kadi kuulu.

Bulelela, mutshima wa Yehowa udi usanka bua kumona bana ne bakulumpe bateka bipatshila bia Bukalenge pa muaba wa kumpala pa ‘kumutumbisha ne bintu biabu bia mushinga.’ (Nsumuinu 3:9, 10, NW) Bushuwa, muntu nansha umue kêna mua kuvuija Yehowa mubanji, bualu yeye ke muena bintu bionso. (1 Kulondolola 29:14-17) Kadi kukuatshisha mudimu eu ndiakalenga didi dipesha mutendeledi yonso mushindu wa kuleja dinanga diende bua Yehowa. Tudi ne dianyisha kudi muntu yonso udi mutshima mumusake bua kuenza nunku.

[Mêyi adi kuinshi]

[Kazubu mu mabeji 26, 27]

Mishindu idi bamue basungula bua kufila mapa bua mudimu wa pa buloba bujima

Bavule batu bateka ku luseke anyi balongolola mfranga idibu bela mu tushete tua mapa tudi ne miaku eyi: “Mapa bua mudimu wa pa buloba bujima wa Société​—Matayo 24:14.” Ngondo yonso bisumbu bitu bituma mfranga eyi ku tshilombuelu tshia buloba bujima ku Brooklyn, mu New York, peshi ku biro bia filiale wa ditunga.

Badi mua kutuma kabidi mapa a budisuile a mfranga buludiludi ku Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, anyi ku biro bia Société bidi biambuluisha ditunga dienu. Badi mua kufila nansha bilengejilu peshi bintu bia mushinga. Badi ne bua kutuma mapa aa pamue ne mukanda mufunda mu tshikoso udi uleja ne: aa mmapa a buludiludi.

Dilongolola dia mapa mafila ne dîyi

Muntu udi mua kupesha Société Watch Tower mfranga bilondeshile dilongolola dia pa buadi, bua se: dîba didi muyifidi muikale nayi dijinga, bamupingajileyi. Bua mamanyisha makuabu, suaku ufundile Treasurer’s Office mu adrese mufunda kuulu eku.

Difila dilongolola

Kusakidila ku mapa mafila buludiludi a mfranga ne mapa mafila ne dîyi, kudi mishindu mikuabu ya difila bua kuambuluisha mudimu wa Bukalenge wa pa buloba bujima. Imue ya kudiyi ng’eyi:

Tshieya: Muntu udi mua kupesha Société Watch Tower bukenji bua kuangata mfranga ya tshieya bua kudiambuluisha anyi kuangata mfranga ya pansio.

Konte ya ku banke: Konte ya ku banke, mikanda ya mfranga mitekesha, anyi konte ya mfranga ya pansio wa muntu, badi mua kuyifunda mu dîna dia anyi kuyivuija ya kufuta dîba dia lufu kudi Société Watch Tower, mu diumvuangana ne malu-malomba a banke wa muaba au.

Lupetu ne nsombu: Badi mua kupesha Société lupetu ne nsombu (titres et obligations) bu dipa dia buludiludi anyi bilondeshile ndongoluelu kampanda muenza bua kutungunuka ne kufuta makasa kudi mufidi.

Nzubu: Badi mua kupesha Société Watch Tower nzubu udiye mua kusumbisha bu dipa dia buludiludi peshi pa kulamina mufidi nzubu, udi mua kutungunuka ne kusombelamu patshidiye ne muoyo. Bidi bikengela kumanyisha Société kumpala kua kumupesha dipa dia nzubu.

Bumpianyi ne bintu bitekeshila mukuabu: Badi mua kushila Société Watch Tower nzubu anyi mfranga ku diambuluisha dia mukanda wa bumpianyi mumanya kudi Mbulamatadi, peshi badi mua kufunda dîna dia Société mu mukanda wa tshipungidi bu udi ne bukenji bua kuangata bintu bitekesha (contrat de fideicommis). Bintu bitekesha mu dîna dia bulongolodi bua malu a Nzambi bidi mua kukepeshisha mushinga wa bitadi.

Anu bu mudi tshiambilu tshia “difila dilongolola” tshiumvuija, mishindu eyi ya mapa idi bia muomumue ilomba dilongolola kampanda didianjila kuenza kudi mufidi. Bua kuambuluisha bantu badi bajinga bua kukuatshisha Société ku butuangaji bua mushindu kansanga wa difila dilongolola, Société mmupatule broshire mu Anglais udi ne tshiena-bualu tshia: Planned Giving to Benefit Kingdom Service Worldwide (Difila dilongolola bua kukuatshisha mudimu wa Bukalenge wa pa buloba bujima). Bavua bafunde broshire eu bua kuandamuna ku nkonko ya bungi idibu bele Société bua mapa, bumpianyi ne bintu bitekesha. Udi kabidi ne mamanyisha a pa mutu adi ne mushinga bua nzubu, mfranga ne dilongolola dia bitadi. Ne mmuenza bua kuambuluisha bantu ba mu États-Unis badi balongolola bua kupesha Société dipa dia pa buadi mpindieu anyi bua kumushila bintu dîba dia lufu, bua kusungula mushindu udi utamba kukuatshisha ne muakanyine bua kufila mapa aa bilondeshile mêku ne nsombelu yabu.

Bamane kubala broshire eu ne bayukile ne aba badi benza mudimu ku biro bia Planned Giving Desk, bantu ba bungi mbambuluishe Société ne kabidi badi bakepeshisha mushinga wa bitadi mu dienza nenku. Bidi bikengela kumanyisha biro bia Planned Giving Desk ne kubitumina mukanda udi ujadika malu adi atangila ndongoluelu eyi. Aba badi basue kupeta broshire eu anyi kumanya ndongoluelu eyi ya difila dionso dilongolola, badi ne bua kufundila biro bia Planned Giving Desk anyi kuela nshinga mu adrese mufila kuinshi eku peshi ku biro bia Société bidi biambuluisha ditunga diabu.

Planned Giving Desk

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telefone: (914) 878-7000

[Kazubu mu dibeji 28]

Bana batu pabu bena kupa badi bafila ne disanka!

Ndi musue kunupesha mfranga eyi bua nutupatuile mikanda ya bungi. Mvua muyipete pamvua ngambuluisha tatu. Tuasakidilayi wa bungi bua mudimu wonso mukole unudi nuenza.​—Pamela, bidimu muanda-mutekete.

Ndi nnutumina dolare 6,85 bua kunuambuluisha mu diasa Nzubu ya Bukalenge mivule. Mvua muyipete mu muvu wa été eu pamvua musumbishe mâyi mashême a bimuma mu musesu.​—Selena, bidimu bisambombo.

Mvua mumune nzolo wa tshikuka wakatoya tshitala ne tshikuka tshikuabu. Ngakalambula Yehowa tshikuka etshi. Ndekelu wa bionso tshiakatoya nzolo isatu ingakasumbisha. Ndi nnutumina mfranga eyi bua mudimu wa Yehowa.​—Thierry, bidimu muanda-mukulu.

Ke mfranga yonso indi nayi! Suayi nuenze nayi mudimu ne meji. Bivua bikole bua kuyilama. Angatayi dolare eyi 21.​—Sarah, bidimu dikumi.

Ngakapeta difutu dia kumpala mu mudimu wa mu kalasa, nenku mvua ne bua kutungunuka mu diteta dia mu tshimenga tshinene. Ngakapatukamu kabidi wa kumpala ne pashishe ngakapeta difutu dia muaba muibidi mu manaya a ndekelu a mu distrike. Bua bionso ebi, bakampesha mfranga. Ndi musue kupesha Société ndambu wa mfranga eyi. Ndi ngela meji ne: ngakapeta makuta aa bua dilongesha dindi mupete mu Kalasa ka Mudimu wa Teokrasi. Tshivua nzakala bua kufila luapolo luanyi kumpala kua balombodi ba manaya to.​—Amber, kalasa kisambombo.

Ndi musue kunupesha mfranga eyi bua Yehowa. Numuebeje tshinudi mua kuenza nayi. Mmumanye malu onso.​—Karen, bidimu bisambombo.

[Bimfuanyi mu dibeji 25]

Midimu ya Bantemu ba Yehowa mmikuatshisha ku diambuluisha dia mapa a budisuile