Bidia bia ntuadijilu bua kuenda ne Nzambi

‘Semenayi pabuipi ne Nzambi ne yeye neasemene pabuipi nenu.’​—YAKOBO 4:8.

1, 2. Bua tshinyi udi mua kuamba ne: kuenzela Yehowa mudimu ndiakalenga dinene?

MUNTU kukenga mu buloko munkatshi mua bidimu bia bungi. Pashishe kumubikilabu bua kulua kumpala kua mukokeshi wa ditunga. Malu akenzeka lubilu lubilu. Diakamue, muena buloko eu wakadimona ukadi usadila mfumu mutambe bukole uvuaku pa buloba dîba adi. Bakapesha muntu eu uvua muena buloko kumpala muanzu munene ne lumu lua pa bualu. Yozefe​—uvuabu basuike makasa ne nkanu—​uvua mpindieu wenda ne mukalenge!​—Genese 41:14, 39-43; Musambu 105:17, 18.

² Lelu’eu, bantu badi ne diakalenga dia kubuela mu mudimu wa muntu munene kupita Faraone wa mu Ejipitu. Muntu udi ku mutu kua bionso udi utubikila tuetu bonso bua kumuenzela mudimu. Ndiakalenga kayipu dia dikema dia kuenza mudimu eu ne kudia malanda mashême ne Yehowa, Nzambi wa-bukole-buonso! Mu Mifundu badi bamuleja bu wa bukole bunene ne butumbi pamue ne bupole, bulengele ne buimpe. (Yehezekele 1:26-28; Buakabuluibua 4:1-3) Dinanga didi mu malu ende onso. (1 Yone 4:8) Katu ushima nansha. (Nomba 23:19) Ne Yehowa katu wela bantu badi bamulamate mâyi ku makasa. (Musambu 18:25) Mu ditumikila malu-malomba ende a buakane, tudi mua kupeta nsombelu wa disanka ne muikale ne tshipatshila lelu, batekemene kabidi muoyo wa kashidi. (Yone 17:3) Kakuena mukokeshi wa pa buloba udi ufila tshintu tshidi mua kufuanangana ne mabenesha ne diakalenga edi nansha.

3. Mmu mushindu kayi muvua Nowa ‘muende ne Nzambi mulelela’?

³ Kalekale, nkambua Nowa wakapangadija bua kuikala ne nsombelu mumvuangane ne disua ne dilongolola dia Nzambi. Bible udi wamba bua bualu buende ne: ‘Nowa wakadi muntu muimpe, wakadi muakane tshishiki mu tshikondo tshiende; Nowa wakendakana ne Nzambi [“mulelela,” NW].’ (Genese 6:9) Bushuwa, Nowa kavua muende ne Yehowa ku buntu to, bualu muntu nansha umue katu mene muanji “kutangila Nzambi.” (Yone 1:18) Kadi, Nowa wakenda ne Nzambi mu ngumvuilu wa se: wakenza malu avua Nzambi mumuambile bua kuenza. Bualu Nowa wakafila muoyo wende mu dienza disua dia Yehowa, uvua mu malanda mimpe ne mashême ne Nzambi Wa-Bukole-Buonso. Anu bu Nowa, bantu miliyo mivule lelu’eu badi ‘benda ne Nzambi’ pa kuikala ne nsombelu mumvuangane ne mibelu ne mêyi a Yehowa. Mmunyi mudi muntu utuadija luendu elu?

Dimanya dijalame didi ne mushinga wa bungi

4. Mmunyi mudi Yehowa ulongesha bantu bende?

⁴ Bua kuenda ne Yehowa, tudi ne bua kuanji kumumanya. Muprofete Yeshaya wakadianjila kuamba ne: ‘Mu matuku atshidi alua mukuna wa nzubu wa Yehowa neujadikibue bu mukuna mupite mikuabu bule, neubandishibue pa mutu pa mikuna mikese; ne ba mu bisamba bionso nebabuelemu. Bantu ba bungi nebayeku, nebambe ne: Luayi bienu, tubande ku mukuna wa Yehowa, tubuele mu nzubu wa Nzambi wa Yakoba; bua yeye atuyishe bienzedi biende, ne bua tuetu tuende mu njila yende. Bualu bua diyisha dia mikenji nedifume mu Siona, ne dîyi dia Yehowa nedipatuke mu Yeruzaleme.’ (Yeshaya 2:2, 3) Tudi mua kuikala bashindike ne: Yehowa nealongeshe bonso badi bakeba bua kuenda mu njila yende. Yehowa mmufile Bible Dîyi diende, ne udi utuambuluisha bua kudiumvua. Mushindu umue udiye wenza nenku nku butuangaji bua “mupika wa lulamatu ne wa budimu.” (Matayo 24:45-47, NW) Yehowa udi wenza mudimu ne “mupika wa lulamatu” eu bua kufila malongesha a mu nyuma ku diambuluisha dia mikanda mishindamene pa Bible, bisangilu bia bena nkristo, ne malonga a Bible a ku nzubu kakuyi difuta makuta. Nzambi udi kabidi ukuatshisha bantu bende bua kumvua Dîyi diende ku diambuluisha dia spiritu wende munsantu.​—1 Kolinto 2:10-16.

5. Bua tshinyi bulelela bua mu Mifundu mbua mushinga mukole?

⁵ Nansha mutudi katuyi tufuta makuta bua kupeta bulelela bua mu Bible, bulelela ebu mbua mushinga mukole. Patudi tulonga Dîyi dia Nzambi, tudi tumanya malu adi atangila Nzambi nkayende​—dîna diende, bumuntu buende, dilongolola diende ne mushindu utuye wenzela bantu malu. Tudi kabidi tupeta mandamuna adi afila budikadidi a nkonko minene idi itangila muoyo: Bua tshinyi tudi pa buloba? Bua tshinyi Nzambi mmulekele makenga? Ntshinyi tshidi matuku atshilualua matulamine? Bua tshinyi tudi tukulakaja ne tufua? Kudi muoyo kunyima kua lufu anyi? Kabidi, tudi tumanya tshidi disua dia Nzambi bua bualu buetu, mmumue ne: mushindu utudi ne bua kuenda bua kumona mua kumusankisha tshishiki. Tudi tulonga ne: malu-malomba ende nga meji ne adi akuatshisha bikole patudi tuakumbaja. Bu kakuyi malongesha a Nzambi, katuvua mua kumvua malu aa nansha.

6. Dimanya dijalame dia mu Bible didi dituambuluisha bua kuikala ne nsombelu kayi?

⁶ Bulelela bua mu Bible budi ne bukole ne budi butusaka bua kuenza mashintuluka mu nsombelu wetu. (Ebelu 4:12) Kumpala kua kupeta dimanya dia mu Mifundu, tuvua tuenda anu “bilondeshile ndongoluelu wa malu a mu bulongolodi ebu.” (Efeso 2:2, NW) Kadi dimanya dijalame dia mu Dîyi dia Nzambi didi dituleja njila mukuabu bua kumona mua ‘kuenda mu bienzedi bidi biakanangane ne Mukalenge ku dimusankisha dionso.’ (Kolosai 1:10) Ndisanka kayipu bua kuela bidia bietu bia ntuadijilu mu dienda ne Yehowa, Muntu mutambe bunene mu bionso bidiku!​—Luka 11:28.

Bidia bibidi bia mushinga​—Didilambula ne Batismo

7. Patudi tulonga Dîyi dia Nzambi, mbulelela kayi budi butangila bulombodi bua bantu budi bumueneka patoke?

⁷ Padi lumvu luetu lua Bible lukola, tudi tubanga kukonkonona malu a bantu ne nsombelu yetu ku diambuluisha dia bukenke bua mu nyuma bua mu Dîyi dia Nzambi. Nenku bulelela bua mushinga budi bumueneka patoke. Bulelela abu buvua bumvuija kale kudi muprofete Yelemiya, wakafunda ne: ‘Yehowa, ndi mumanye ne: njila wa muntu kêna munda muende; muntu kêna ne bukole munda muende bua kuendesha nabu biendedi biende bimpe.’ (Yelemiya 10:23) Bantu bonso ne tuetu bine​—tudi dijinga ne bulombodi bua Nzambi.

8. (a) Ntshinyi tshidi tshisaka bantu bua kudilambula kudi Nzambi? (b) Didilambula dia bena nkristo ntshinyi?

⁸ Kujingulula bualu ebu bua mushinga mukole kudi kutusaka bua kukeba buludiki kudi Yehowa. Ne dinanga ditudi nadi kudi Nzambi didi ditusaka bua kumulambula muoyo wetu. Kudilambula kudi Nzambi kudi kumvuija kusemena kudiye mu disambila ne kumulaya patoke bua kutumika ne muoyo wetu bua kumuenzela mudimu ne kuenda ne lulamatu mu njila yende. Mu dienza nenku, tudi tulonda tshilejilu tshia Yezu, wakadileja kudi Yehowa ne dipangadika dikole dia kukumbaja disua dia Nzambi.​—Ebelu 10:7.

9. Bua tshinyi bantu badi balambula Yehowa muoyo wabu?

⁹ Yehowa Nzambi katu wenzeja anyi usuisha muntu ku bukole bua kudilambula kudiye nansha. (Fuanyikija ne 2 Kolinto 9:7.) Kabidi, Nzambi ki mmutekemene bua muntu amulambule muoyo wende bualu mmumvue dijinga mu lupitapita dia kuenza nanku nansha. Kumpala kua kutambula, muntu udi ne bua kudianjila kuikala muyidi, ne bualu ebu budi bulomba madikolela a muoyo umue bua kupeta dimanya. (Matayo 28:19, 20) Paulo wakasengelela bantu bakavua batambule bua ‘bafile mibidi yabu bu mulambu udi ne muoyo, wa tshijila, udi usankisha Nzambi bimpe; [“mudimu wa tshijila ne bukokeshi buabu bua diela meji,” NW].’ (Lomo 12:1) Tudi tudilambula kudi Yehowa Nzambi pa kuenza mudimu bia muomumue ne bukokeshi buetu bua diela meji. Panyima pa bamane kumanya tshidi bualu ebu bumvuija ne kuelelapu meji ne ntema, tudi tulambula Nzambi muoyo wetu ku budisuile ne disanka.​—Musambu 110:3.

10. Mmunyi mudi didilambula disuikakane ne batismo?

¹⁰ Panyima pa bamane kusemena kudi Nzambi mu disambila pa nkayetu bua kumuleja dipangadika dietu dia kuenda mu njila yende, tudi tuela tshidia tshikuabu. Tudi tuleja didilambula dietu patoke ku batismo wetu mu mâyi. Edi ndimanyisha dia patoke dia se: tudi baditshipe bua kuenza disua dia Nzambi. Ku ntuadijilu kua mudimu wende wa pa buloba, Yezu uvua mutambuisha kudi Yone, nenku kutushilaye tshilejilu. (Matayo 3:13-17) Pashishe, Yezu wakatuma balondi bende bua kuvuija bantu bayidi ne kubatambuisha. Pa nanku, didilambula ne batismo mbidia bia mushinga wa bungi bua muntu yonso udi ujinga kuenda ne Yehowa.

11, 12. (a) Mmunyi mutudi mua kufuanyikija batismo ne tshibilu tshia dibaka? (b) Ndifuanangana kayi ditudi mua kuleja pankatshi pa malanda etu ne Yehowa ne adi pankatshi pa mulume ne mukaji?

¹¹ Kulua muyidi mudilambule ne mutambule wa Yezu Kristo nkufuanangane mu mushindu kampanda ne dibuela mu dibaka. Mu matunga a bungi, dituku dia tshibilu tshia dibaka ndidianjidila kudi bidia bivule. Mulume ne mukaji badi bapetangana, bafika ku dimanyangana ne banangangana. Pashishe badi balayangana dibaka. Tshibilu tshia dibaka tshidi tshimanyisha patoke bualu buvuabu basuike pa nkayabu​—bua kubuela mu dibaka ne pashishe kusomba pamue bu mulume ne mukaji. Tshibilu tshia dibaka ke tshidi tshileja patoke ntuadijilu wa malanda au a pa buawu. Dituku adi didi dileja ntuadijilu wa dibaka. Bia muomumue, batismo udi uleja ntuadijilu wa nsombelu wa muntu mudilambule bua kuenda ne Yehowa.

¹² Tangila difuanangana dikuabu. Panyima pa dituku dia tshibilu tshia dibaka diabu, dinanga didi ne bua kuondoka ne kukola pankatshi pa mulume ne mukaji. Bua buobu kutamba kulamatangana, kakuyi budisui, bena dibaka aba badi ne bua kudienzeja bua kulama ne kukolesha malanda abu a mu dibaka. Nansha mutudi katuyi tubuela mu dibaka ne Nzambi, panyima pa batismo wetu tudi ne bua kudienzeja bua kulama malanda mashême ne Yehowa. Udi umona ne wanyisha madikolela etu bua kuenza disua diende ne udi usemena pabuipi netu. Muyidi Yakobo wakafunda ne: ‘Semenayi pabuipi ne Nzambi ne yeye neasemene pabuipi nenu.’​—Yakobo 4:8.

Tuende mu makasa a Yezu

13. Mu dienda ne Nzambi, ntshilejilu tshia nganyi tshitudi ne bua kulonda?

¹³ Bua kuenda ne Yehowa, tudi ne bua kulonda tshilejilu tshishiya kudi Yezu Kristo. Mupostolo Petelo wakafunda ne: ‘Bua nuakabikidibua bua muanda eu, bualu bua Kristo wakakenga bua bualu buenu, wakanushila tshilejilu bua nuenu numulonde mu makasa ende.’ (1 Petelo 2:21) Katuena mua kulonda tshishiki tshilejilu tshiakashiya Yezu to, bualu yeye uvua mupuangane ne tuetu tudi bapange bupuangane. Nansha nanku, Yehowa mmutekemene bua tuetu kuenza muetu muonso. Tukonkononayi malu manene atanu a mu nsombelu ne mudimu wa Yezu adi bena nkristo badilambule ne bua kudienzeja bua kuidikija.

14. Kumanya Dîyi dia Nzambi kudi kumvuija tshinyi?

¹⁴ Yezu uvua ne dimanya dijalame ne diondoke dia Dîyi dia Nzambi. Mu mudimu wende wa buambi, misangu mivule Yezu uvua utela mêyi a mu Mifundu ya tshiena-Ebelu. (Luka 4:4, 8) Bushuwa, bamfumu babi ba bitendelelu bavuaku tshikondo atshi bavua pabu batela mêyi a mu Mifundu. (Matayo 22:23, 24) Dishilangana divua se: Yezu uvua mujingulule tshivua Mifundu ayi yumvuija, ne wakayitumikila mu nsombelu wende. Kavua anu ne ngumvuilu wa pa mutu pa mutu wa Mikenji to, kadi uvua kabidi mumanye diumvuija diayi dilelela. Mutudi tulonda tshilejilu tshia Yezu, tuetu petu tudi ne bua kudienzeja bua kumvua Dîyi dia Nzambi, kupeta ngumvuilu anyi diumvuija diadi dilelela. Mu dienza nenku, tudi mua kulua bena mudimu banyisha kudi Nzambi badi bakumbane bua ‘kumanyisha dîyi dia bulelela [bimpe] menemene.’​—2 Timote 2:15, Muanda Mulenga Lelu.

15. Mmunyi muvua Yezu mushiye tshilejilu mu diakula malu a Nzambi?

¹⁵ Kristo Yezu uvua wambila bakuabu malu a Tatuende wa mu diulu. Yezu kakadilamina nkayende dimanya dia mu Dîyi dia Nzambi. Nansha baluishi bende bavua bamubikila ne: “Muyishi,” bualu muaba wonso uvuaye uya uvua wambila bakuabu malu a Yehowa ne malongolola Ende. (Matayo 12:38) Yezu uvua uyisha patoke ku ntempelo, mu nsunagoga, mu bimenga ne mu misoko. (Mâko 1:39; Luka 8:1; Yone 18:20) Uvua ulongesha ne luse ne bulenga, uleja dinanga bua bantu bavuaye wambuluisha. (Matayo 4:23) Aba badi balonda tshilejilu tshia Yezu badi pabu bapeta miaba ne mishindu ya bungi ya kulongesha bakuabu malu a Yehowa Nzambi ne malongolola ende malenga.

16. Malanda a Yezu ne batendeledi nende ba Yehowa avua makole mushindu kayi?

¹⁶ Yezu uvua mu malanda mashême ne bantu bakuabu bavua batendelela Yehowa. Umue musangu pavua Yezu uyisha musumba wa bantu, mamuende ne bana babu bavua kabayi bena kuitabuja bakalua bua kuyukila nende. Bible udi ulonda ne: ‘Muntu wakamuambila ne: Mamuebe ne bana benu badi bimane kumbelu, bakeba kukuambila dîyi. Kadi yeye wakakonka wakamumanyisha ne: Mamu wanyi nnganyi? Bana betu mbanganyi? Wakoluela bayidi bende tshianza, wakamba ne: Monayi mamu wanyi ne bana betu! Muntu yonso wenza bu mudi Tatu wanyi wa mu diulu musue yeye udi muanetu mulume ne muanetu mukaji ne mamu wanyi.’ (Matayo 12:47-50) Ebi kabiena biumvuija ne: Yezu uvua mubenge dîku diende nansha, bualu malu akalua kuenzeka adi ajadika ne: kavua mudipidie to. (Yone 19:25-27) Kadi muyuki eu udi wela kashonyi pa dinanga divua nadi Yezu bua bena kuitabuja nende bakuabu. Bia muomumue lelu’eu, aba badi benda ne Nzambi badi badia bulunda ne basadidi bakuabu ba Yehowa ne bafika ku dibananga bikole.​—1 Petelo 4:8.

17. Mmunyi muvua Yezu umvua bua dienza disua dia Tatuende wa mu diulu, ne mmunyi mudi bualu ebu ne bua kuikala ne buenzeji kutudi?

¹⁷ Mu dienza disua dia Nzambi, Yezu wakaleja dinanga bua Tatuende wa mu diulu. Yezu wakatumikila Yehowa mu malu onso. Wakamba ne: ‘Bidia bianyi bidi kuenza bu mudi wakuntuma musue ne kushikija mudimu wende.’ (Yone 4:34) Kristo wakamba kabidi ne: ‘Matuku onso ntu ngenza malu adi asankisha [Nzambi].’ (Yone 8:29) Yezu uvua mutambe kunanga Tatuende wa mu diulu mu mushindu wa se: “wakadipuekesha ne kuluaye mutumikidi too ne ku lufu, lufu ku mutshi wa tshinyongopelu.” (Filipoi 2:8, NW) Nenku, Yehowa wakabenesha Yezu, kumupeshaye muanzu wa bukokeshi ne lumu bu muntu muibidi panyima pa Yehowa. (Filipoi 2:9-11) Bu Yezu, tudi tuleja dinanga dietu kudi Nzambi patudi tulama mêyi ende ne tuenza disua diende.​—1 Yone 5:3.

18. Mmu mushindu kayi muvua Yezu mushiye tshilejilu bua disambila?

¹⁸ Yezu uvua muenji wa masambila. Wakasambila dîba dia batismo wende. (Luka 3:21) Kumpala kua kusungulaye bapostolo bende 12, wakapitshisha butuku bujima usambila. (Luka 6:12, 13) Yezu wakalongesha bayidi bende mushindu wa kusambila. (Luka 11:1-4) Butuku bua kumpala kua lufu luende, pamue ne bayidi bende wakasambila bua bualu buabu. (Yone 17:1-26) Disambila divua ne muaba wa mushinga mu nsombelu wa Yezu, anu mudidi ne bua kuikala nawu kabidi mu nsombelu wetu bualu tudi balondi bende. Ndumu kayipu lua kuyukila ne Mfumu Mukulu wa Bionso mu disambila! Kabidi, Yehowa utu wandamuna ku masambila, bualu Yone wakafunda ne: ‘Edi [“ndieyemena,” NW] ditudi nadi kudiye ne: Bituamulomba tshintu tshionso bu mu disua diende, yeye udi utumvuila. Bituamanya ne: Yeye udi utumvuila bituamulomba tshintu tshionso, nunku tudi bamanye ne: tudi ne [“bua kupeta bintu,” NW] bituakamulomba.’​—1 Yone 5:14, 15.

19. (a) Nngikadilu kayi ya Yezu itudi ne bua kuidikija? (b) Mmu mishindu kayi mutudi tupetela disanka ku dilonga nsombelu ne mudimu wa Yezu?

¹⁹ Kudi malu a bungi menemene a kulongela ku dikonkonona ne ntema nsombelu ne mudimu wa pa buloba wa Yezu Kristo. Elangana meji pa ngikadilu yakalejaye: dinanga, luse, bulenga, bukole, nkatshinkatshi, butshintshikidi, budipuekeshi, dikima ne diditatshisha bua bakuabu. Patudi tutamba kulonga malu adi atangila Yezu, tudi tupeta dijinga ditambe bunene dia kuikala balondi bende ba lulamatu. Kumanya Yezu kudi kabidi kutusemeja pabuipi menemene ne Yehowa. Tuamba eku tuela kuaka, Yezu uvua tshimfuanyi tshipuangane tshia Tatuende wa mu diulu. Uvua mulamate Yehowa bikole, kufikaye ne ku diamba ne: ‘Wakuntangila meme wakutangila Tatu.’​—Yone 14:9.

Eyemena Nzambi bua akukuatshishe

20. Mmunyi mutudi mua kupeta dishindika mu dienda ne Yehowa?

²⁰ Padi bana batuadija kulonga luendu, bidia biabu kabitu bishindame nansha. Mmunyi mutubu balonga mua kuenda ne dishindika? Anu pa kudibidija ne kunanukila. Aba badi benda ne Yehowa badi badienzeja bua kuenda mu diela bidia bishindame. Bualu ebu budi kabidi bulomba dîba ne dinanukila. Paulo wakaleja mushinga wa dinanukila mu dienda ne Nzambi pakafundaye ne: ‘Nunku bana betu, tshiashadidi mpindieu, tudi tunulomba ne tudi tunusengelela mu Mukalenge Yezu ne: Bu munuakangata diyisha kutudi dinuleja bu munudi ne bua kuenda ne bua kusankisha Nzambi, mbu munudi nuenda kabidi,​—bua nuenu nutambe kukumbanakumbana mu malu aa.’​—1 Tesalonike 4:1.

21. Patudi tuenda ne Yehowa, mmabenesha kayi atudi mua kupeta?

²¹ Bituikala badifile ne muoyo mujima kudi Nzambi, neatuambuluishe bua kutungunuka ne kuenda nende. (Yeshaya 40:29-31) Kakuena tshintu tshidi bulongolodi ebu bufila tshidi mua kufuanangana ne mabenesha adiye upesha bantu badi benda mu njila yende. Yeye ke ‘Udi utuyisha bua tuetu tuikale ne diakalengele, udi utulombola mu njila utudi ne bua kuendela. Ne bitumvua mikenji yende, ditalala dietu nedikale bu musulu, ne buakane buetu nebuikale bu mavuala a mâyi manene.’ (Yeshaya 48:17, 18) Mu ditaba lubila lua kuenda ne Nzambi ne mu dienda nende ne lulamatu, tudi mua kuikala nende mu ditalala bua kashidi.

Newandamune munyi?

◻ Bua tshinyi kuenda ne Nzambi mulelela kudi ne lumu?

◻ Bua tshinyi dilonga, didilambula ne batismo mbidia bia ntuadijilu bua kuenda ne Yehowa?

◻ Mmunyi mutudi mua kulonda mu makasa a Yezu?

◻ Mmunyi mutudi bamanye ne: Yehowa neatukuatshishe patudi tuenda nende?

[Bimfuanyi mu dibeji 13]

Dilonga, didilambula ne batismo mbidia bia ntuadijilu bua kuenda ne Nzambi