Udi ne dîna dia mushindu kayi?

MU BIBLE, muaku ‘dîna’ utu imue misangu umvuija lumu lua muntu. Tshilejilu, Solomo Mukalenge wa meji wakafunda ne: ‘Dîna dimpe didi dipita manyi a mushinga mukole buakane, dituku dia lufu ndipita dia kuledibua bulengele.’ (Muambi 7:1; fuanyikija ne Nsumuinu 22:1.) Bilondeshile mêyi a Solomo, muntu katu uledibua ne dîna dimpe to. Kadi mmu matuku ende a muoyo mudiye upeta lumu lua bushuwa. Dîna diende didi dimufunkuna ne dileja ngikadilu yende ya nsungasunga, bikalaye muena kalolo anyi muena budisui, muena luse anyi kayi musangelu, mudipuekeshi anyi muditambishi, muakane anyi muntu mubi.

Tangila Davidi. Mu bukokeshi buende, wakadileja muntu wa bukole ne mushindame. Nansha nanku, ne budipuekeshi Davidi wakitaba bilema biende ne wakanyingalala bua mpekatu yende minene. Muprofete wa Yehowa uvua muambilemu pakambaye ne: Davidi uvua ‘muntu uvua mutshima [wa Nzambi] musue.’ (1 Samuele 13:14) Nsongalume Davidi ukavua ne dîna dimpe ku mêsu kua Nzambi.

Kadi Yeholama Mukalenge wa mu Yuda yeye wakapeta dîna dibi. Wakumbusha bantu bende ku ntendelelu wa Yehowa ne wakashipesha mene bana babu basambombo ne bamue ba ku bamfumu ba mu Yuda. Ndekelu wa bionso, Yehowa wakatua Yeholama disama dikole diakamufikisha ku lufu. Bible udi wamba ne: Yeholama “wakumuka, bantu kabayi bamunange,” peshi anu bu mudi nkudimuinu mukuabu (Mukanda wa Mvidi Mukulu) wamba: “pavuaye mufue, bantu nanshabo kunyingalala bualu buende.”​—2 Kulondolola 21:20.

Nsombelu wa Davidi ne wa Yeholama udi uleja bulelela bua lusumuinu lua mu Bible lua se: “Tshivulukidi tshia muntu muakane tshidi tshivudija disanka, kadi dina dia bantu babi nedibole.” (Nsumuinu 10:7) Pa nanku, yonso wa kutudi udi ne bua kukonkonona lukonko elu ne ntema: ‘Ndîna dia mushindu kayi dindi nadi ku mêsu kua Nzambi ne kua muntu nanyi?’