Dinanga dikole kupita dia mamu

MU BITUDILU bia njila ya muinshi mua buloba, anyi mu nkumba, peshi mu misesu idi ne bantu ba bungi, bamamu batu bimansha bana badibu bafuma ku dilela. Imue misangu, bunguiji ba butshiafu batu mene basangana bana mu bipanza binene bidibu bela butshiafu, batshioke bua didila bamamuabu. Tshikandakanda kampanda tshidi tshiamba ne: “bungi bua bana bimansha mu misesu budi buenda buvula.” Bushuwa, mamu utshidi nsonga udi mua kudiela meji kushòo bua dipangadika diende. Udi wimansha muanende, nansha mudi muana eu mua kufua.​—O Estado de S. Paulo.

Udi mua kudiebeja ne: ‘Mmunyi mudi mamu mua kuela mene meji a kuimansha muanende kayi mujadike tshiamufikila?’ Bible udi ukuata mudimu ne nsombelu eu wa dibungama bu tshimfuanyi bua kuleja dishilangana dinene dia mudi Mufuki wetu umvua bua bantu bende, wamba ne: “Mukaji udi mua kupua muanende mutekete muoyo anyi? Udi mua kubenga kunanga muana wa munda muende anyi? Pikala bakaji bapua bana babo muoyo, meme tshiakukupua muoyo to.”​—Yeshaya 49:15, MMM.

Bushuwa, kupita mamu kayi yonso, Nzambi udi ne dinanga diondoke kutudi ne udi umvua luse bua bitudi tukengela. Nansha wewe nsonga anyi muntu mukole, nansha wewe mu lutatu lua mushindu kayi, manya ne: kuena nkayebe to. Mukufuki webe mmusue kukuambuluisha ne udi uditatshisha bua diakalenga diebe. Mêyi a mufundi wa misambu adi amba ne: “nansha biandekela tatu wanyi ne mamu wanyi, Yehowa neangambule.”​—Musambu 27:10.

Pa buloba bujima, batu bapatula bibejibeji bia Tshibumba tshia Nsentedi ne Réveillez-vous! bua kufila dimanya dia Yehowa ‘Nzambi umuepele mulelela,’ ne dia Muanende Yezu Kristo. Dimanya edi didi mua kumvuija muoyo wa tshiendelele bua bantu badi badiangata ne dianyisha.​—Yone 17:3.