Mu buobumue mu njila mutambe buimpe wa muoyo
Bikala bungi bua bantu butungunuka ne kuvula, mu katupa kakese emu nekuikale bantu miliyare isambombo pa buloba. Nansha mudibu bonso bafumine kudi nkambua umue, bidi bimueneka ne: ba bungi kabena bitaba ne: mbena mu dîku dia pa buloba bujima, bikale ne malu a kubadila Mufuki wa meji ne wa dinanga. Dipanga buobumue ne dikokangana pankatshi pa bena matunga, bena makoba ne nshidimukilu mishilangane didi dileja bubi bua nsombelu eu wa dibungama.
BILONDESHILE nsombelu idiku lelu pa buloba, buobumue bua buloba bujima budi mua kumueneka bu bualu budibu kabayi mua kukumbaja. Mukanda kampanda udi wamba ne: “Ku lukonko lua mushinga mukole pa mushindu wa kusomba pamue, bantu ba mu tshikondo tshietu etshi kabena ne lungenyi lupialupia nansha lumuepele lua kufila, nansha lumue.”—The Columbia History of the World.
Pabi, difila buobumue munkatshi mua bonso badi basombe pa buloba kadiena dilomba lungenyi lupialupia nansha. Njila udi ufikisha ku buobumue mmuleja mu Mifundu Minsantu. Mmushindamene pa ntendelelu wa Eu wakafuka buloba ne bintu bia muoyo bionso bidipu. Munkatshi mua bantu ba Nzambi mudi buobumue bulelela bua mu lungenyi, tshipatshila ne nsombelu. Bapite pa miliyo itanu ne tshitupa mu matunga 233, bantu ba Nzambi badi mu buobumue bualu mbatuishibue ne: njila wa muoyo wa Nzambi ke njila mutambe buimpe. Bu mufundi wa misambu, badi basambila ne: ‘Unyishe njila webe, Yehowa, bua ngende mu bushuwa buebe; uvuije mutshima wanyi mutshima umue udi utshina dîna diebe.’—Musambu 86:11.
Buobumue ebu bua bantu mu ntendelelu mukezuke bukavua bumanyisha mutantshi mule kudi muprofete Yeshaya. Wakafunda ne: ‘Mu matuku atshidi alua mukuna wa nzubu wa Yehowa neujadikibue bu mukuna mupite mikuabu bule, neubandishibue pa mutu pa mikuna mikese; ne ba mu bisamba bionso nebabuelemu. Bantu ba bungi nebayeku, nebambe ne: Luayi bienu, tubande ku mukuna wa Yehowa, tubuele mu nzubu wa Nzambi wa Yakoba; bua yeye atuyishe bienzedi biende, ne bua tuetu tuende mu njila yende.’—Yeshaya 2:2, 3.
Buobumue bua Bantemu ba Yehowa mbua pa buabu. Mu bisumbu bipite pa 87 000 bidi pa buloba bujima, badi badia biakudia bia mu nyuma bia muomumue mu bisangilu biabu bia ku lumingu luonso. (Matayo 24:45-47) Kadi kumbukila munkatshi mua 1998 too ne ku ntuadijilu kua 1999, Bantemu bakaleja buobumue buabu mu mushindu mukuabu—mu didisangisha mu mpungilu yabu ya matuku asatu ya “Njila wa Muoyo wa Nzambi” pa buloba bujima. Mu matunga 13, mu masangila aa muvua bantu bipite bungi ba mu matunga kabukabu ne bavua baabikila ne: mpungilu ya bukua-matunga. Makuabu bavua baabikila ne: mpungilu ya distrike. Kadi mpungilu yonso eyi ivua ne ndongamu wa muomumue wa bintu bilenga bia mu nyuma.
Mmunyipu muvuabi bisankisha bua kumona bantu bikale ne disanka ne bavuale bimpe babuela mu nzubu minene ne mu bipalu bua kulongeshibua kudi Yehowa! Bu tshilejilu, umvua mêyi a muntu umue uvua mubuele mu mpungilu wa bukua-matunga mu tshimenga tshia Michigan, ku États-Unis. Wakamba ne: “Bivua bienza disanka bua kumona bana betu bafume ku ntengu yonso ya buloba bupukilangana: mu République tchèque, Barbade, Nigeria, Hongrie, Angleterre, Hollande, Éthiopie, Kenya, ne mu matunga makuabu a bungi. Bivua bilenga bua kumona bana betu basombe pamue mu buobumue, bapuekesha binsonji bia disanka bua dinanga didibu nadi umue bua mukuabu ne bua Yehowa, Nzambi wabu munene.” Tshiena-bualu tshidi tshilonda netshikonkonone ndongamu wa mpungilu uvua bantu miliyo mivule balonde pa buloba bujima.
[Mêyi a dianyisha bua tshimfuanyi mu dibeji 3]
Mountain High Maps® Copyright © 1997 Digital Wisdom, Inc.