Dîku dia Yehowa didi dilabula buobumue bua mushinga mukole
“Monayi! Mmunyipu mudibi bilenga ne bisankisha bua bena muntu kusomba pamue mu buobumue!”—MUSAMBU WA 133:1, NW.
1. Mêku mavule adi mu nsombelu kayi lelu’eu?
DÎKU didi mu lutatu lelu’eu. Mu mêku mavule, bisuikidi bia dibaka bidi bienda bitukakana. Dishipa dibaka didi amu divulangana kuonso, ne bana ba bungi ba bena mabaka mashipa badi mu dibungama dikole. Miliyo ya mêku kaena ne disanka ne mmadiabulule. Pabi, kudi dîku dimue dìdì dilabula disanka dilelela ne buobumue bua bushuwa. Ndîku dialabale dia Yehowa Nzambi. Munda muadi, mbombo ya binunu bia banjelu bakena bamueneka badi bakumbaja midimu mibapesha mu diumvuangana ne disua dia Nzambi. (Musambu wa 103:20, 21) Kadi kudiku dîku kampanda pa buloba dìdì dilabula buobumue bua mushindu’eu anyi?
2, 3. (a) Mbanganyi badi mpindieu bena mu dîku dialabale dia Nzambi, ne tudi mua kufuanyikija Bantemu ba Yehowa bonso ne tshinyi lelu’eu? (b) Mmalu kayi atuakonkonona?
2 Mupostolo Paulo wakafunda ne: “Ndi ntua binu panshi kumpala kua Tatu, eu udi dîku dionso mu diulu ne pa buloba ne bua kupetela dîna diadi kudiye.” (Efeso 3:14, 15, NW) Mulongo wonso mulondangane wa mêku pa buloba udi upetela dîna diawu kudi Nzambi bualu yeye ke Mufuki. Nansha mudiku kakuyi mêku a bantu mu diulu, mu ngakuilu wa mu tshimfuanyi, Nzambi mmusele bulongolodi buende bua mu diulu, ne Yezu neikale ne mukaji musela wa mu nyuma mu buobumue nende mu muulu. (Yeshaya 54:5; Luka 20:34, 35; 1 Kolinto 15:50; 2 Kolinto 11:2) Bela manyi ba lulamatu batshidi pa buloba badi mpindieu bena mu dîku dialabale dia Nzambi, ne “mikoko mikuabu” ya Yezu, ìdì ne ditekemena dia kuikala ne muoyo pa buloba, neyivue bena mu dîku edi. (Yone 10:16; Lomo 8:14-17; Tshibumba tshia Nsentedi, 15 Tshiongo 1996, dibeji 31) Kadi, Bantemu ba Yehowa bonso lelu’eu badi mua kufuanyikijibua ne dîku dia pa buloba bujima dìdì mu buobumue.
3 Udi muena dîku dia dikema edi dia bukua-matunga dia basadidi ba Nzambi anyi? Pikalabi nanku, udi ulabula dimue dia ku mabenesha matambe bunene adi muntu kayi mua kupeta. Miliyo ya bantu idi mua kushindika se: dîku dia Yehowa dia pa buloba bujima—bulongolodi buende budi bumueneka—didi muaba wa tshitalela wa ditalala ne buobumue mu tshipela tshia pa buloba bujima tshia mvita ne matapuluka. Mmunyi mutudi mua kumvuija buobumue bua dîku dia Yehowa dia pa buloba bujima? Ne mmalu kayi adi alubuluja buobumue bua mushindu’eu?
Mmunyipu mudibi bilenga ne bisankisha!
4. Mu mêyi ebe nkayebe, mmunyi muumvuija tshìdì Musambu wa 133 wamba pa bidi bitangila buobumue bua buena-muntu?
4 Mufundi wa misambu Davidi wakanyisha bikole buobumue bua buena-muntu. Wakasakibua mene kudi spiritu bua kuimba bua bualu buabu! Anji kumufuanyikija ne lunzenze luende pavuaye wimba ne: “Monayi! Mmunyipu mudibi bilenga ne bisankisha bua bena muntu kusomba pamue mu buobumue! Bidi amu bu manyi mimpe mela pa mutu, àdì enda apueka pa muedi, muedi wa Aarone, àdì enda apueka ku nshingu wa bilamba biende. Bidi amu bu lumuma lua Hermone, ludi luenda lupueka pa mikuna ya Siyona. Bualu ku muaba au Yehowa wakatuma dîyi bua dibenesha dikaleku, muoyo bua bikondo bikena bijadika mene.”—Musambu wa 133:1-3, NW.
5. Bashindamene pa Musambu wa 133:1, 2, ndifuanyikija kayi ditudi mua kuenza pankatshi pa bena Izalele ne basadidi ba Nzambi ba matuku aa?
5 Mêyi awu avua atangila buobumue bua buena-muntu bulabula kudi tshisamba tshia kale tshia Nzambi, bena Izalele. Pavuabu mu Yeruzaleme bua mafesto abu asatu a ku tshidimu, bavua basomba pamue mu buobumue. Nansha muvuabu bafumine mu bisa kabukabu, bavua dîku dimue. Dikala pamue divua ne buenzeji buimpe kudibu, bienza anu bu manyi a kulaba mapeteshi a bukole àdì ne dipembu dimpe. Pavua manyi a nunku edibua pa mutu wa Aarone, avua apueka pa muedi wende ne aya ku nshingu wa tshilamba tshiende. Bua bena Izalele, dikala pamue divua ne buenzeji buimpe buvua bumueneka munkatshi mua tshisamba tshionso tshidisanga mu ka-bujima. Mapangakana avua ajikijibua, ne buobumue buvua bulubulujibua. Buobumue bua nunku budi mu dîku dia Yehowa dia pa buloba bujima lelu’eu. Didisangisha pamue pa tshibidilu didi ne buenzeji buimpe bua mu nyuma kudi benamu. Mapangakana kayi onso anyi ntatu bidi bijikijibua padibu balonda mibelu ya mu Dîyi dia Nzambi. (Matayo 5:23, 24; 18:15-17) Bantu ba Yehowa badi banyisha bikole dikankamijangana dia umue ne mukuabu dìdì difumina ku buobumue buabu bua buena-muntu.
6, 7. Mmunyi muvua buobumue bua Izalele bu lumuma lua Mukuna wa Hermone, ne mmuaba kayi udi dibenesha dia kudi Nzambi mua kupeteka lelu’eu?
6 Mmunyi muvua disomba pamue dia Izalele mu buobumue dikale kabidi bu lumuma lua ku Mukuna wa Hermone? Ee, bu mudi lusongo lua mukuna eu lutumbuke lupite metre 2 800, ndubuikila kudi neje pabuipi ne tshidimu tshijima. Lusongo lubuikila kudi neje lua Hermone ludi lukuatakaja lubungibungi lua butuku ne nunku lupatula lumuma luvulavulayi ludi lulama mitshi ne bisosa mu lupolo lule lua mushipu. Mpumpu ya kapepe ka mashika ìdì ifumina ku luseke lua Hermone idi mua kutuala lubungibungi lua nunku too ne kule ku sud bu mudi ku Yeruzaleme, muaba udiyi ikuatakana bua kuenza lumuma. Nunku mufundi wa misambu wakakula biakane bua ‘lumuma lua Hermone lùdì lupueka pa Mukuna wa Siyona.’ Ntshivuluiji kayipu tshimpe tshia buenzeji bupeteshi bua bukole buvua bulubuluja buobumue bua dîku dia batendeledi ba Yehowa!
7 Kumpala kua dijadikibua dia tshisumbu tshia bena nkristo, Siyona, peshi Yeruzaleme, uvua nsangilu wa ntendelelu mulelela. Nunku’eu, ke muaba uvua Nzambi mutume dîyi bua dibenesha dikaleku. Bu muvua Mpokolo wa mabenesha onso musombele mu mushindu wa mu tshimfuanyi mu sanktuere mu Yeruzaleme, mabenesha avua ne bua kufumina ku muaba au. Nunku, bu mudi ntendelelu mulelela katshiyi ukumbajibua muaba anu umue musunguluke, dibenesha, dinanga, ne buobumue bia basadidi ba Nzambi bidi mua kupetshibua lelu’eu pa buloba bujima. (Yone 13:34, 35) Ng’amue malu kayi àdì alubuluja buobumue ebu?
Malu àdì alubuluja buobumue
8. Ntshinyi tshitudi tulonga pa bidi bitangila buobumue mu Yone 17:20, 21?
8 Buobumue bua batendeledi ba Yehowa mbushindamene pa ditumikila Dîyi dia Nzambi diumvua mu mushindu muakane, pa kukonga ne malongesha a Yezu Kristo. Pakatuma Yehowa Muanende pa buloba bua kufila bumanyishi pa bulelela ne kufua lufu lua mulambu, njila wakunzuludibua bua dienjibua dia tshisumbu tshidi mu buobumue tshia bena nkristo. (Yone 3:16; 18:37) Bualu bua se: kuvua ne bua kuikala buobumue bulelela munkatshi mua benamu buakalejibua patoke pakasambila Yezu ne: “Ndi ndomba, ki ng’anu bua aba nkayabu, apu kabidi ne bua aba bàvuà kungitabuja ku dîyi diabu; bua bonso bikale tshintu tshimue, bu muudi wewe, Tatu, muikale nanyi mu buobumue ne meme muikale nebe mu buobumue, bua buobu pabu bikale netu mu buobumue, bua bukua-bantu buitabuje ne: udi muntume.” (Yone 17:20, 21, NW) Balondi ba Yezu bakafika ku buobumue bua mumue ne ebu budi pankatshi pa Nzambi ne Muanende. Biakenzeka nunku bualu bavua batumikila Dîyi dia Nzambi ne malongesha a Yezu. Mmuenenu wa muomumue eu udi bualu bua mushinga mu buobumue bua dîku dia Yehowa dia pa buloba bujima lelu’eu.
9. Mmudimu kayi udi spiritu munsantu ukumbaja pa bidi bitangila buobumue munkatshi mua bantu ba Yehowa?
9 Bualu bukuabu bùdì busuika pamue bantu ba Yehowa mbua se: tudi ne spiritu munsantu wa Nzambi, peshi bukole buenzeji buende. Spiritu eu udi utuambuluisha bua kujingulula bulelela busokolola bua Dîyi dia Yehowa ne tumona nunku mua kumusadila mu buobumue. (Yone 16:12, 13) Spiritu eu udi utuambuluisha bua kuepuka midimu ya ku mubidi ìdì itapulula bu mudi diluangana, lubabu, biji, ne matandu. Bishilangane, spiritu wa Nzambi udi utupetesha mushindu wa kupatula mamuma àdì asangisha pamue bu mudi dinanga, disanka, ditalala, muoyo-mule, bulenga, buimpe, ditabuja, bupole-malu ne didikanda.—Galatia 5:19-23.
10. (a) Ndifuanyikija kayi ditudi mua kuenza pankatshi pa dinanga dìdì mu dîku kampanda dia bantu dìdì mu buobumue ne dinanga dìdì dimueneka patoke munkatshi mua aba bàdì balamate Yehowa? (b) Mmunyi muakumvuija muena mu Kasumbu Kaludiki umue didiumvua diende pa bidi bitangila dikala mu bisangilu pamue ne bana babu ba mu nyuma?
10 Bena dîku dìdì mu buobumue mbanangangane ne badi basanka pa kuikala pamue. Mu mushindu mufuanangane, aba bàdì mu dîku disuikakane dia batendeledi ba Yehowa mbamunange, banange Muanende, ne bena kuitabuja nabu. (Mâko 12:30; Yone 21:15-17; 1 Yone 4:21) Anu bu mudi dîku dia ku mubidi disanka pa kudia pamue, aba bàdì balamate kudi Nzambi badi ne disanka dia bungi pa kuikala mu bisangilu, mu mpuilu mikese ne minene bua kupetela masanka ku bulunda buimpe ne biakudia bia mu nyuma bitambe buimpe. (Matayo 24:45-47; Ebelu 10:24, 25) Muena mu Kasumbu Kaludiki ka Bantemu ba Yehowa kampanda wakamba umue musangu nunku’eu: “Buanyi meme, kudisangisha pamue ne bana betu ndimue dia ku masanka matambe bunene mu nsombelu ne mmpokolo wa dikankamijibua. Ndi munange kufika kumpala kua bonso ku Nzubu wa Bukalenge, ne kumbuka ku ndekelu kua bonso, padiku mushindu. Ndi ngumvua disanka munda muanyi pandi ngakula ne bantu ba Nzambi. Pandi munkatshi muabu ndi ndiumvua anu bu ndi kuanyi ne dîku dianyi.” Mmuudi umvua pebe anyi?—Musambu wa 27:4.
11. Mmu mudimu kayi mudi nangananga Bantemu ba Yehowa bapetela disanka, ne ntshinyi tshìdì tshipeteka ku divuija mudimu wa Nzambi tshipatshila tshimuepele tshia mu nsombelu wetu?
11 Dîku dìdì mu buobumue didi dipeta disanka pa kuenza malu pamue. Bia muomumue, aba bàdì mu dîku dia batendeledi ba Yehowa badi bapeta disanka pa kuenza mu buobumue mudimu wabu wa dimanyisha Bukalenge ne wa dienza bayidi. (Matayo 24:14; 28:19, 20) Didifila pa tshibidilu mu mudimu eu didi ditusemeja pabuipi menemene ne Bantemu bakuabu ba Yehowa. Divuija mudimu wa Nzambi tshipatshila tshimuepele tshia mu nsombelu wetu ne ditua midimu yonso ya bantu bende nyama ku mikolo bidi kabidi bilubuluja mmuenenu wa dîku utudi nende munkatshi muetu.
Bulongame bua teokrasi budi ne mushinga mukole
12. Dîku dia disanka ne dìdì mu buobumue didi dimanyika ku tshinyi, ne nndongoluelu kayi wakalubuluja buobumue mu bisumbu bia bena nkristo bia mu siekele wa kumpala?
12 Dîku dìdì ne bumfumu bukole, kadi bua dinanga, ne dìdì dikale ne bulongame didi mua kuikala mu buobumue ne disanka. (Efeso 5:22, 33; 6:1) Yehowa udi Nzambi wa bulongame bua ditalala, ne bonso badi mu dîku diende badi bamuangata bu “Mutambe Bunene wa mu diulu.” (Danyele 7:18, 22, 25, 27; 1 Kolinto 14:33) Badi kabidi banyisha mudiye muteke Muanende, Yezu Kristo, bu mupianyi wa bintu bionso ne mumupeshe bukokeshi buonso mu diulu ne pa buloba. (Matayo 28:18; Ebelu 1:1, 2) Bu muditshi ne Kristo bu Mfumu watshi, tshisumbu tshia bena nkristo mbulongolodi budi ne bulongame, ne buobumue. (Efeso 5:23) Bua kulombola midimu ya bisumbu bia mu siekele wa kumpala, kuvua kasumbu kaludiki kenza kudi bapostolo ne bakuabu “bakulu” bapie mu nyuma. Bisumbu ne bisumbu bivua ne batangidi bateka, anyi bakulu, ne basadidi ba midimu. (Bienzedi 15:6; Filipoi 1:1) Ditumikila aba bavua ku mutu diakalubuluja buobumue.—Ebelu 13:17.
13. Mmunyi mudi Yehowa ukoka bantu, ne mbipeta kayi bìdì bimueneka ku dienza nunku?
13 Kadi bulongame buonso ebu budiku bufila lungenyi lua se: buobumue bua batendeledi ba Yehowa budi mua kufumina ku bumfumu buenzeji, bukena bua musangelu anyi? Nansha kakese! Kakuena tshintu tshikena tshia dinanga pa bidi bitangila Nzambi anyi bulongolodi buende. Yehowa udi ukoka bantu kudiye pa kuleja dinanga, ne ku tshidimu tshionso bantu binunu nkama badi balua ku budisuile ne disanka dionso bena mu bulongolodi bua Yehowa pa kuangata batismo bu tshimanyinu tshia diditshipa diabu ne muoyo mujima kudi Nzambi. Mmuenenu wabu udi bu eu uvua nende Yoshua, wakabela binende bena Izalele ne: “Lelu nusungule unudi basue kukuatshila mudimu . . . ; kadi meme ne ba mu n[z]ubu muanyi, netukuatshile Yehowa mudimu.”—Yoshua 24:15.
14. Bua tshinyi tudi mua kuamba ne: bulongolodi bua Yehowa budi bua teokrasi?
14 Bu mutudi bena mu dîku dia Yehowa, katuena amu ne disanka kadi tudi kabidi bakubibue. Bidi nunku bualu bulongolodi buende mbua teokrasi. Bukalenge bua Nzambi budi teokrasi (mu tshiena-Greke the·osʹ, nzambi, ne kraʹtos, bukokeshi). Mbukokeshi bua kudi Nzambi, bulongolola ne bujadika kudiye. “Ditunga dinsantu” diela manyi dia Yehowa didi dikokela bukokeshi buende ne nunku’eu didi padi dia teokrasi. (1 Petelo 2:9, NW) Bu mutudi ne Muena Teokrasi Munene, Yehowa, bu Mulumbuluishi wetu, Mutueledi wa mikenji, ne Mukalenge wetu, tudi ne bua kudiumvua bakubibue. (Yeshaya 33:22) Kadi, nebikale munyi pikala amue matandu majuke ne mateke disanka dietu, dikubibua, ne buobumue buetu mu njiwu?
Kasumbu kaludiki kadi katumika
15, 16. Ndipanga kumvuangana kayi diakajuka mu siekele wa kumpala, ne bivua bua bualu kayi?
15 Bua kukuba buobumue bua dîku, bidi mua kulomba imue misangu kujikija matandu. Nunku, fuanyikija ne: lutatu kampanda lua mu nyuma luvua ne bua kujikijibua bua kukuba buobumue bua dîku dia batendeledi ba Nzambi mu siekele wa kumpala B.B. Bavua ne bua kuenza tshinyi? Kasumbu kaludiki kakatumika, pa kuangata mapangadika mu malu a mu nyuma. Tudi ne muyuki wa mu Mifundu wa tshienzedi tshia nunku.
16 Bu mu 49 B.B., kasumbu kaludiki kakadisangisha mu Yeruzaleme bua kujikija lutatu kampanda lunene bua kulama nunku buobumue bua “tshiota tshia Nzambi.” (Efeso 2:19) Bu bidimu 13 kumpala, mupostolo Petelo ukavua muyishe Korneliyo, ne Bampangano ba kumpala, peshi bantu ba matunga makuabu, bakalua pashishe bena kuitabuja batambule. (Bienzedi, nshapita wa 10) Mu luendu lua kumpala lua bu-misionere lua Paulo, Bampangano ba bungi bakitabuja Buena-nkristo. (Bienzedi 13:1–14:28) Eyowa, tshisumbu tshia bena nkristo ba matunga makuabu tshikavua tshiashibue ku Antiokiya, mu Syrie. Bamue bena nkristo bena Yuda bavua bitabuja ne: Bampangano bakudimune mitshima bavua ne bua kutengudibua ne kulonda Mikenji ya Mozese, kadi bakuabu kabavua bitaba. (Bienzedi 15:1-5) Dipanga kumvuangana edi divua mua kufikisha ku ditapulukangana dijima, nansha mene ku dienjibua dia bisumbu bitapuluke bia bena Yuda ne bia bena matunga makuabu. Nunku kasumbu kaludiki kakatumika ne lukasa luonso bua kukuba buobumue bua bena nkristo.
17. Nngenzelu kayi wa dipungakaja nende malu wa teokrasi udi muleja mu Bienzedi nshapita wa 15?
17 Bilondeshile Bienzedi 15:6-22, “bapostolo ne bakulu bakadisangisha pamue bua kulondabo bualu ebu.” Muvua kabidi bakuabu, bu mudi batumibue ba ku Antiokiya. Petelo wakumvuija kumpala ne: ‘bisamba bia bende biakumvua dîyi dia lumu luimpe mukana muende ne kuitabujabi.’ Pashishe “buonso buabo” bakateleja pavua Barnabase ne Paulo balonda ‘bua bimanyinu ne malu a kukema biakenza Nzambi ku butuangaji buabu munkatshi mua bisamba bia bende,’ peshi Bampangano. Pashishe Yakobo wakafila lungenyi pa mushindu uvua bualu ebu ne bua kujikijibua. Pakamana kasumbu kaludiki kuangata dipangadika, badi batuambila ne: ‘Bapostolo ne bakulu ne bena ekleziya bonso bakelangana meji ne: Mbimpe tusungule ba mu tshisumbu tshietu, tubatume ne Paulo ne Barnabase ku Antiokiya.’ ‘Bantu basungula’ aba—Yuda ne Silase—bakatuadila bena kuitabuja nabu mukanda mukankamiji.
18. Kasumbu kaludiki kakangata dipangadika kayi dìvuà ditangila Mikenji ya Mozese, ne dipangadika edi divua ne buenzeji kayi kudi bena nkristo bena Yuda ne ba matunga makuabu?
18 Mukanda mumanyishi wa dipangadika dia kasumbu kaludiki uvua utuadija ne mêyi aa: “Bapostolo ne bakulu, bana benu, kudi bana betu aba ba mu Antiokiya ne mu Syrie ne mu Cilicie bàdì ba mu bisamba [bia bende]: Mioyo yenu!” Bakuabu bakabuela mu tshisangilu etshi tshiende lumu, kadi mbimueneke se: kasumbu kaludiki kavua kenza amu kudi “bapostolo ne bakulu.” Spiritu wa Nzambi wakabaludika, bualu mukanda udi wamba ne: “Spiritu munsantu ne tuetu bine tuamonyi ne: ki mbimpe bua kunutekela bukuabu bujitu anu malu aa àdì akengedibua: kutungunuka ne kudilama ku bintu bilambula mpingu, ne ku mashi, ne ku bintu bifiekela mu nshingu ne ku masandi.” (Bienzedi 15:23-29, NW) Bena nkristo kabavua balombibue bua kutengudibua ne kulama Mikenji ya Mozese. Dipangadika edi diakambuluisha bena nkristo bena Yuda ne ba bisamba bikuabu bua kuenza malu ne kuakula mu buobumue. Bisumbu biakasanka, ne buobumue bua mushinga mukole buakatungunuka ne kukubibua, anu bu mudibu butungunuke ne kukubibua mu dîku dia pa buloba bujima dia Nzambi lelu’eu ku bulombodi bua mu nyuma bua Kasumbu Kaludiki ka Bantemu ba Yehowa.—Bienzedi 15:30-35.
Sadilayi mu buobumue bua teokrasi
19. Bua tshinyi buobumue mbulubuluke mu dîku dia batendeledi ba Yehowa?
19 Buobumue budi bulubuluka padi bena dîku beleshangana diboko. Bidi bia muomumue mu dîku dia batendeledi ba Yehowa. Bu muvuabu bena teokrasi, bakulu ne bakuabu mu tshisumbu tshia mu siekele wa kumpala bavua basadila Nzambi mu dieleshangana diboko tshishiki ne kasumbu kaludiki ne bavua bitaba mapangadika aku. Ne diambuluisha dia kasumbu kaludiki, bakulu ‘bavua bamba dîyi’ ne bena mu bisumbu mu tshi-bungi ‘bavua bamba dîyi diodimue.’ (2 Timote 4:1, 2; 1 Kolinto 1:10) Nunku malelela amue amue a mu Mifundu avua alongeshibua mu mudimu wa buambi ne mu bisangilu bia bena nkristo, mu Yeruzaleme, Antiokiya, Roma, Kolinto, anyi muaba kayi wonso mukuabu. Buobumue bua teokrasi bua nunku budiku kabidi lelu’eu.
20. Bua kukuba buobumue buetu bua bena nkristo, ntshinyi tshitudi ne bua kuenza?
20 Bua kukuba buobumue buetu, tuetu bonso bena mu dîku dia Yehowa dia pa buloba bujima tudi ne bua kuenza madikolela bua kuleja dinanga dia teokrasi. (1 Yone 4:16) Tudi tukengela kukokela disua dia Nzambi ne kuleja kanemu kondoke bua ‘mupika wa lulamatu’ ne bua Kasumbu Kaludiki. Anu bu diditshipa dietu kudi Nzambi, bushuwa butumike buetu budi bua ku budisuile ne mbua disanka. (1 Yone 5:3) Mmunyipu mudibi biakanyine muakasuika mufundi wa misambu disanka pamue ne butumike! Wakimba ne: “Aleluya! Wa diakalenga mmuntu udi utshina [“Yehowa,” NW], udi munange bikole mikenji yende.”—Musambo wa 112:1, MMM.
21. Mmunyi mutudi mua kudileja tuetu bine se: tudi bena teokrasi?
21 Yezu, Mfumu wa tshisumbu, udi muena teokrasi wa dilambu ne misangu yonso utu wenza disua dia Tatuende. (Yone 5:30) Nunku, tulondayi Tshitembelu tshietu pa kuenza disua dia Yehowa bilondeshile teokrasi ne mu buobumue pa kueleshangana diboko ne bulongolodi Buende. Pashishe ne disanka ne dianyisha bìdì bifumina mu mutshima, tudi mua kupunguluja mêyi a mufundi wa misambu aa: “Monayi! Mmunyipu mudibi bilenga ne bisankisha bua bena muntu kusomba pamue mu buobumue!”
Mmunyi muwandamuna?
◻ Mmunyi mutudi mua kusuikakaja buobumue buetu bua bena nkristo ku Musambu wa 133?
◻ Ng’amue malu kayi adi alubuluja buobumue?
◻ Bua tshinyi bulongame bua teokrasi budi ne mushinga wa bungi pa bidi bitangila buobumue bua bantu ba Nzambi?
◻ Mmunyi muakatumika kasumbu kaludiki ka mu siekele wa kumpala bua kukuba buobumue?
◻ Kusadila mu buobumue bua teokrasi kudi kumvuija tshinyi buebe wewe?
[Tshimfuanyi mu dibeji 13]
Kasumbu kaludiki kakatumika bua kukuba buobumue