Lamayi buobumue mu matuku aa a ku nshikidilu
‘Bikadilu bienu bikale biakanangane ne lumu luimpe . . . , bajalame mu nyuma umue, ne batshinte popamue ne mutshima umue bua ditabuja dia lumu luimpe.’—FILIPOI 1:27.
1. Ndishilangana kayi didi pankatshi pa Bantemu ba Yehowa ne bulongolodi ebu?
TUDI mu “matuku a ku nshikidilu.” Kakuyi mpata, tudi mu “bikondo bia njiwu ne bikole mua kupita nabi.” (2 Timote 3:1-5, NW) Mu ‘tshikondo etshi tshia ku nshikidilu,’ ne nsangilu watshi wa bantu ukena mushindame, Bantemu ba Yehowa mbadileje bashilangane menemene bua ditalala ne buobumue bidibu nabi. (Danyele 12:4) Kadi muntu yonso udi muena mu dîku dia pa buloba bujima dia batendeledi ba Yehowa mmulombibue bua kutumika bikole bua kulama buobumue ebu.
2. Ntshinyi tshiakamba Paulo pa bidi bitangila dilama buobumue, ne mbualu kayi butuakonkonona?
2 Mupostolo Paulo wakabela bena nkristo nende bua kulamabu buobumue. Wakafunda ne: ‘Bikadilu bienu bikale biakanangane ne lumu luimpe lua Kristo; bua [nansha] bingalua kunumona anyi bingikala kukuabo, ngumvue bianyi lumu lua malu enu ne: Badi bajalama mu nyuma umue, ne badi batshinta popamue ne mutshima umue bua ditabuja dia lumu luimpe, ne kabena batshinyishibua nansha ku bualu bumue kudi bena lukuna. Bualu ebu budi tshilejilu tshia dibutuka diabo, kadi ntshia lupandu kunudi, ne luolu ludi lufuma kudi Nzambi.’ (Filipoi 1:27, 28) Mêyi a Paulo aa adi aleja patoke se: bu mutudi bena nkristo, tudi ne bua kutumika pamue. Nunku, ntshinyi tshiatuambuluisha bua kulama buobumue bua bena nkristo mu bikondo ebi bikole?
Nukokele disua dia Nzambi
3. Ntshikondo kayi ne mmunyi muakalua Bampangano ba kumpala bakena batengula balondi ba Kristo?
3 Mushindu umue wa kulama buobumue buetu nkukokela disua dia Nzambi misangu yonso. Ebi bidi mua kulomba diakaja kampanda dia ngelelu wetu wa meji. Tangila bayidi ba Yezu Kristo bena Yuda ba kumpala. Pakayisha mupostolo Petelo Bampangano bakena batengula bua musangu wa kumpala mu 36 B.B., Nzambi wakitshikijila bantu ba matunga makuabu aba spiritu munsantu, ne bakatambuishibua. (Bienzedi, nshapita wa 10) Too ne ku tshikondo atshi, amu bena Yuda, bena kuitabuja benyi ba ntendelelu wa bena Yuda, ne bena Samariya ke bakaavua balue balondi ba Yezu Kristo.—Bienzedi 8:4-8, 26-38.
4. Mumane kumvuija tshivua tshienzeke mu bualu buvua butangila Korneliyo, ntshinyi tshiakamba Petelo, ne nditeta kayi divua bualu ebu bujule bua bayidi ba Yezu bena Yuda?
4 Pakamanya bapostolo ne bana betu bakuabu mu Yeruzaleme pa bidi bitangila dikudimuna mutshima dia Korneliyo ne bakuabu bantu ba matunga makuabu, bakasanka pa kuteleja luapolo lua Petelo. Pakamanaye kumvuija tshivua tshienzeke pa bidi bitangila Korneliyo ne bakuabu bena kuitabuja ba matunga makuabu, mupostolo eu wakakomesha ne mêyi aa: ‘Bikala Nzambi mubape [bena kuitabuja abu ba matunga makuabu] kupa [kua spiritu munsantu] kuakutupeye [tuetu bena Yuda] patuakitabuja Mukalenge Yezu Kristo, apu meme mvua nganyi bua kufuilangana ne Nzambi?’ (Bienzedi 11:1-17) Bualu ebu buvua diteta bua balondi ba Yezu Kristo bena Yuda. Bavua ne bua kukokela disua dia Nzambi ne kuitaba bena kuitabuja ba matunga makuabu bu batendeledi nabu anyi? Peshi buobumue bua basadidi ba Yehowa ba pa buloba buvua ne bua kutekibua mu njiwu?
5. Mmunyi muakandamuna bapostolo ne bana betu bakuabu pa bidi bitangila muanda wa se: Nzambi uvua mupeteshe bantu ba bisamba bia bende dikudimuna mutshima, ne ntshinyi tshitudi mua kulongela ku mmuenenu eu?
5 Muyuki udi wamba ne: ‘Pakumvuabu [bapostolo ne bana betu bakuabu] malu aa, bakapua, bakatumbisha Nzambi ne: Nzambi wakupa bisamba bia bende kabidi kukudimuna kua mutshima bua kuikalabu ne muoyo.’ (Bienzedi 11:18) Mmuenenu au wakakuba ne wakalubuluja buobumue bua balondi ba Yezu. Anu mu katupa kîpi, mudimu wa buambi wakaya kumpala munkatshi mua Bampangano, peshi bantu ba matunga makuabu, ne dibenesha dia Yehowa divua pa midimu ya nunku. Tuetu bine tudi ne bua kuitaba padi dieleshangana diboko dietu dikengedibua bua dienza dia tshisumbu tshipiatshipia anyi padi dimue diakaja dia teokrasi dienjibua ku bulombodi bua spiritu munsantu wa Nzambi. Dieleshangana diboko dietu ne mutshima wonso nedisankishe Yehowa ne nedituambuluishe bua kulama buobumue buetu mu matuku aa a ku nshikidilu.
Nulamate bulelela
6. Mbuenzeji kayi budi nabu bulelela pa buobumue bua batendeledi ba Yehowa?
6 Bu mutudi bena mu dîku dia batendeledi ba Yehowa, tudi tulama buobumue bualu tuetu bonso tudi “balongeshibue kudi Yehowa” ne tudi tulamata bikole bulelela buende busokolola. (Yone 6:45, NW; Musambu wa 43:3) Bu mudi malongesha etu mashila pa Dîyi dia Nzambi, tuetu bonso tudi tuakula mu diumvuangana. Tudi tuitaba ne disanka biakudia bia mu nyuma bitupetesha kudi Yehowa ku butuangaji bua “mupika wa lulamatu ne wa budimu.” (Matayo 24:45-47, NW) Dilongesha dia mumue dia mushindu’eu didi dituambuluisha bua kulama buobumue buetu pa buloba bujima.
7. Bituikala ne lutatu lua pa nkayetu bua kumvua dilongesha kampanda, ntshinyi tshitudi ne bua kuenza, ne ntshinyi tshitudi katuyi ne bua kuenza?
7 Ntshinyi tshitudi mua kuenza bituapeta tuetu nkayetu lutatu kampanda bua kumvua anyi kuitaba dilongesha kansanga? Tudi ne bua kulomba meji ne kuenza makebulula mu Mifundu ne mu mikanda ya Buena-nkristo. (Nsumuinu 2:4, 5; Yakobo 1:5-8) Diyukidilangana ne mukulu kampanda didi mua kutuambuluisha. Pikala bualu ebu kabuyi amu bumvuika, bidi mua kuikala bimpe bua kuanji kubuladikija. Bumue badi mua kulua kupatula mamanyisha a pa mutu pa tshiena-bualu etshi, ne apu ngumvuilu wetu kushisha kualabala. Kadi, nebikale bibi bituateta mua kutuisha bakuabu mu tshisumbu bua kuitababu mmuenenu mushilangane utudi nende. Nebikale dipangakajangana, ki nditumika bua kukuba buobumue. Mmunyipu mudibi bitambe buimpe bua “kutungunuka ne kuenda mu bulelela” ne kukankamija bakuabu bua kuenzabu nunku!—3 Yone 4, NW.
8. Mmuenenu kayi pa bulelela udi muakanyine?
8 Mu siekele wa kumpala, Paulo wakamba ne: “Mpindiewu tudi tumona bibuitshidile, bu muntu umona bintu mu lumuenu; kadi dituku diadia nebikale mpala ne mpala. Mpindiewu ndi mumanye amu nankunanku, kadi diba adio nemmanye [“mu mushindu mujalame,” NW] bu mudibo bammanye mpindiewu.” (1 Bena Korente 13:12, MMM) Nansha muvua bena nkristo ba kumpala kabayi bajingulule malu onso bijalame, bakashala mu buobumue. Mpindieu tudi ne ngumvuilu mutokesha menemene wa dilongolola dia Yehowa ne Dîyi diende dia bulelela. Nunku tuikalayi ne dianyisha bua bulelela butudi bapete ku butuangaji bua ‘mupika wa lulamatu.’ Ne tuikale kabidi ne dianyisha mudi Yehowa utulombola ku diambuluisha dia bulongolodi buende. Nansha mutudi katuyi misangu yonso ne dimanya bungi bua muomumue, katuena tufua ne nzala anyi ne nyota ya bintu bia mu nyuma. Bishilangane, Mulami wetu, Yehowa, udi utulama mu buobumue ne udi ututabalela bimpe.—Musambu wa 23:1-3.
Tumikayi bilenga ne ludimi!
9. Mmunyi mutudi mua kutumika ne ludimi bua kulubuluja buobumue?
9 Ditumika ne ludimi bua kukankamija bakuabu didi njila wa mushinga bua kulubuluja buobumue ne mmuenenu wa buena-muntu. Mukanda wakafila diandamuna pa tshilumbu tshia ditengula, mutuma kudi kasumbu kaludiki ka mu siekele wa kumpala, uvua mpokolo wa dikankamijibua. Pakawubalabu, bayidi ba matunga makuabu ba ku Antiokiya “bakasanka bu muakabakoleshawu mitshima.” Yuda ne Silase, bakatumibua ne mukanda kumbukila ku Yeruzaleme, “bakakula ne bana babo musangu mule bua kubakolesha mitshima ne kubakankamika.” Kakuyi mpata, dikalaku dia Paulo ne Barnabase diakakolesha ne kukankamika kabidi bena kuitabuja nabu ba ku Antiokiya. (Bienzedi 15:1-3, 23-32, Muanda mulenga lelu) Tudi mua kuenza petu bia bungi mushindu umue patudi tubuela mu bisangilu bia bena nkristo ne “tukoleshangana mitshima” ku dikala dietu muomu ne ku mandamuna miibakianganyi.—Ebelu 10:24, 25.
10. Bua kulama buobumue, ntshinyi tshidi ne bua kuenjibua pikalaku kupatuke bipendu?
10 Kadi, ditumika dibi ne ludimi didi mua kuteka buobumue buetu mu njiwu. “Ludimi nkatupa kakese ka mubidi ne kadi kaditumbisha bua malu aku manene,” ke muakafunda muyidi Yakobo. “Monayi! Mmunyipu mudibi bikengela amu kapia kakese bua kuosha ditu dipite bunene!” (Yakobo 3:5, NW) Yehowa udi ukina aba badi bajula matandu. (Nsumuinu 6:16-19) Diakula mushindu’eu didi mua kukebesha matapuluka. Nunku, ntshinyi tshitudi mua kuenza padiku dipendangana, mbuena kuamba ne: diunguijila muntu malu mabi anyi mene dimupatuila mêyi a bipendu? Bakulu nebatete bua kuambuluisha muenji wa bubi eu. Kadi, mupendianganyi udi kayi unyingalala udi ne bua kuipatshibua bua kumona mua kulama ditalala, bulongame, ne buobumue bia tshisumbu. Paulo mene wakafunda ne: “Kanumvuanganyi ne muntu udi udiamba ne mmuanetu muena Kristo, eku muikale . . . mupendianganyi . . . ; muntu wa mushindu ewu, kanuena nansha mua kudia nende kaba kamue to.”—1 Bena Korente 5:11, MMM.
11. Bua tshinyi budipuekeshi budi ne mushinga bituikala bambe bualu budi bujule matandu pankatshi petu ne muena kuitabuja netu?
11 Dilama ludimi didi dituambuluisha bua kulama buobumue. (Yakobo 3:10-18) Kadi fuanyikija ne: bualu kampanda butudi bambe mbujudije matandu pankatshi petu ne muena nkristo netu. Kabiakuikalaku biakanyine bua kudianjila kuela tshiidia bua kukeba ditalala ne muanetu eu, pa kumulomba luse pikalabi bikengedibua anyi? (Matayo 5:23, 24) Bushuwa, kuenza nunku kudi kulomba bupuekele, anyi budipuekeshi bua mu lungenyi, kadi Petelo wakafunda ne: “Luatayi nuenu bine budipuekeshi bua mu lungenyi umue kudi mukuabu, bualu Nzambi udi upidia baditambishi, kadi udi upa badipuekeshi bulenga bukena butuakanyine.” (1 Petelo 5:5, NW) Budipuekeshi nebutusake bua ‘kuipatshila ditalala’ ne bana betu, pa kuitaba bilema bietu ne pa kulomba luse mu mushindu muakanyine. Kuenza nunku kudi kuambuluisha bua kulama buobumue bua dîku dia Yehowa.—1 Petelo 3:10, 11, NW.
12. Mmunyi mutudi mua kutumika ne ludimi bua kulubuluja ne kulama buobumue munkatshi mua bantu ba Yehowa?
12 Tudi mua kukolesha mushindu utudi tuangata dîku munkatshi mua aba bàdì mu bulongolodi bua Yehowa bituatumika bilenga ne ludimi luetu. Ke tshiakenza Paulo, nunku uvua mua kuvuluija bena Tesalonike ne: “Nudi bamanye bimpe bua se: anu bu tatu bua bana bende, tuakatungunuka ne kukankamija yonso wa kunudi, tuakanusamba ne tuakafila bumanyishi kumpala kuenu, bua nuenu kumona mua kutungunuka ne kuenda mushindu udi muakanyine Nzambi.” (1 Tesalonike 2:11, 12, NW) Bu muakafilaye tshilejilu tshimpe mu bualu ebu, Paulo uvua mua kubela bena nkristo nende bua ‘kukolesha badi ne mitshima yamba kupanga.’ (1 Tesalonike 5:14) Ela meji bua bipeta bilenga biamueneka pa kutumika ne ludimi luetu bua kusamba, kukankamija, ne kuibaka bakuabu. Ee, ‘dîyi diamba mu tshikondo tshiakane ndiakane!’ (Nsumuinu 15:23) Kabidi, diakula mushindu’eu didi diambuluisha bua kulubuluja ne kulama buobumue bua bantu ba Yehowa.
Fuilanganayi luse!
13. Bua tshinyi tudi ne bua kufuilangana luse?
13 Difuila muenji wa bubi luse padiye ululomba didi ne mushinga mukole bituikala basue kulama buobumue bua bena nkristo. Kadi mmisangu bungi munyi itudi ne bua kufuilangana luse? Yezu wakambila Petelo ne: ‘Tshiena nkuambila ne: too ne ku misangu muanda mutekete, ndi nkuambila ne: too ne ku misangu makumi muanda mutekete ne muanda mutekete.’ (Matayo 18:22) Bituikala katuyi tufuilangana luse, katuakupeta tuetu bine masanka. Mmunyi nanku? Ee, lukuna ne dilaminangana tshiji nebituibe ditalala dia mu tshieledi tshia lungenyi. Ne bitualua kumanyika bu bena ngikadilu ya tshikisu ne ikena ya difuilangana luse, tudi mua kudikebela tuetu bine dikenga. (Nsumuinu 11:17) Dilaminangana tshiji kaditu disankisha Nzambi ne didi mua kufikisha ku mpekatu munene. (Lewitiki 19:18) Vuluka se: Yone Mubatiji wakakoshibua mutu bua tshitungu tshimuelela kudi Herodiase wa muoyo mubi, ‘uvua mumulamine tshiji.’—Markuse 6:19-28, MMM.
14. (a) Matayo 6:14, 15 udi utulongesha tshinyi pa bidi bitangila difuilangana luse? (b) Tudi ne bua kuindila misangu yonso dilomba luse kumpala kua kufuila muinetu luse anyi?
14 Disambila dia tshitembelu dia Yezu didi ne mêyi aa: ‘Utujimijile mibi yetu, bualu bua tuetu tudi tulekelela muntu yonso udi netu dibanza.’ (Luka 11:4) Bituikala katuyi tufuilangana luse, kudi njiwu ya se: dimue dituku Yehowa Nzambi neabenge pende kutulekelela mpekatu yetu, bualu Yezu wakamba ne: “Nuenu balekele bantu bilema bidibo banuenzela, Tatuenu wa mu diulu neanulekele bienu kabidi. Kadi nuenu kanuyi balekele bantu bilema biabo, Tatuenu kakunulekela bienu penu nansha.” (Matewuse 6:14, 15, MMM) Nunku bituasua bushuwa kuenza tshietu tshitupa mu dilama buobumue mu dîku dia batendeledi ba Yehowa, netuikale ne bua kufuilangana luse, bumue pa kupua muoyo patupu tshilema kampanda tshidi mua kuikala tshienjibue ku dipanga kuela meji ne katshiyi tshienza bua muoyo mubi. Paulo wakamba ne: “Tungunukayi ne kulekelelangana ne kufuilangana luse ku budisuile pikala umue ne bualu bua kudiabakena kudi mukuabu. Anu bu muakanufuila Yehowa luse ku budisuile, nuenu penu nuenze muomumue.” (Kolosai 3:13, NW) Patudi tufuilangana luse, tudi tuambuluisha bua kulama buobumue bua mushinga mukole bua bulongolodi bua Yehowa.
Buobumue ne mapangadika a muntu pa nkayende
15. Ntshinyi tshidi tshiambuluisha bantu ba Yehowa bua kulama buobumue padibu badiangatshila mapangadika?
15 Nzambi wakatuenza ne budikadidi bua kudisunguila tshia kuenza pamue ne diakalenga ne bujitu bua kudiangatshila mapangadika. (Dutelonome 30:19, 20; Galatia 6:5) Kadi, tudi mua kulama buobumue buetu bualu tudi tutumikila mikenji ne mêyi-maludiki bia mu Bible. Tudi tubiangata ne mushinga patudi tudiangatshila mapangadika etu nkayetu. (Bienzedi 5:29; 1 Yone 5:3) Fuanyikija ne: muanda ùdì utangila ndubidilu mmujuke. Tudi mua kudiangatshila nkayetu dipangadika pa kuvuluka se: katuena “ba mu bulongolodi ebu” ne se: tukadi ‘bafule miele yetu ya mvita bua kuyivuija nkasu ya kudima nayi.’ (Yone 17:16, NW; Yeshaya 2:2-4) Bia muomumue, patudi ne bua kudiangatshila dipangadika dìdì ditangila malanda etu ne Mbulamatadi, tudi tutangila tshidi Bible wamba pa bidi bitangila dipingajila “Nzambi bintu bia Nzambi,” eku tukokela tuetu bine “bakokeshi badi ku mutu” mu malu a ku mubidi. (Luka 20:25; Lomo 13:1-7; Tito 3:1, 2) Eyowa, diangata mikenji ne mêyi-maludiki a mu Bible ne mushinga patudi tudiangatshila mapangadika etu nkayetu didi diambuluisha dilama buobumue buetu bua bena nkristo.
16. Mmunyi mutudi mua kufika ku dilama buobumue patudi tuangata mapangadika adi kaayi makane anyi mabi bilondeshile Mifundu? Fila diumvuija.
16 Tudi mua kufika ku dilama buobumue bua bena nkristo nansha patudi tuangata mapangadika àdì atutangila amu tuetu nkayetu, kaayi makane anyi mabi bilondeshile Mifundu. Mmunyi nanku? Pa kuleja diditatshisha dia dinanga bua bakuabu bàdì dipangadika dietu mua kuikala ne buenzeji kudibu. Tshilejilu: Mu tshisumbu tshia mu Kolinto wa kale, muakajuka muanda uvua utangila munyinyi mulambula bintu bia ditendelela. Bushuwa, muena nkristo kavua mua kudifila mu tshibilu tshia ditendelela bintu. Kadi, kabivua mpekatu pa kudia munyinyi mushale wa nyama mukosa muminu bimpe wa mushindu eu uvuabu bapana mu tshisalu tshinene. (Bienzedi 15:28, 29; 1 Kolinto 10:25) Nansha nanku, tuondo tua muoyo tua bamue bena nkristo tuvua tulubakana pa bualu bua kudia munyinyi eu. Nunku Paulo wakabela bena nkristo bakuabu bua kuepuka dibalenduisha. Bushuwa, wakafunda ne: “Pikala tshiakudia tshilenduisha muanetu, tshiena kabidi mua kudia munyinyi musangu nansha umue, bua tshivu kulenduisha muanetu.” (1 Bena Korente 8:13, MMM) Nunku, nansha pikalabi kabiyi bitangila mukenji anyi dîyi-diludiki kampanda dia mu Bible, mmunyipu mudibi bia dinanga bua kuvuluka bakuabu patudi tudiangatshila mapangadika adi mua kuikala ne buenzeji pa buobumue bua dîku dia Nzambi!
17. Ntshinyi tshidi tshiakanyine kuenza patudi ne bua kudiangatshila mapangadika?
17 Bituikala katuyi bajadike tshia kuenza, bidi bia meji bua kuangata dipangadika mu mushindu udi mua kutushiya ne kuondo ka muoyo kakezuke, ne bakuabu badi ne bua kunemeka dipangadika dietu. (Lomo 14:10-12) Bushuwa, patudi ne bua kudiangatshila dipangadika, tudi ne bua kukeba buludiki bua Yehowa mu masambila. Anu bu mufundi wa misambu, tudi mua kusambila ne dieyemena dionso ne: ‘Teleja matshi ebe kundi, . . . Bualu bua wewe udi dibue dianyi ne ngumbu yanyi ya mvita; nunku, bualu bua dîna diebe wikale mulombodi wanyi, undombole mu njila.’—Musambu wa 31:2, 3.
Lamayi misangu yonso buobumue bua bena nkristo
18. Mmunyi muakumvuija Paulo buobumue bua tshisumbu tshia bena nkristo?
18 Mu 1 Kolinto nshapita wa 12, Paulo wakatumika ne mubidi wa muntu bua kumvuija buobumue bua tshisumbu tshia bena nkristo. Wakazangika disuikakana ne mushinga wa tshitupa ne tshitupa tshionso tshia mubidi. ‘Bu bitupa ebi bionso bikale anu tshitupa tshimue, mubidi uvua kuikala kuepi?’ ke muakakonka Paulo. ‘Kadi katataka bitupa bidi bia bungi, kadi mubidi udi umue. Dîsu kadiena dimanye mua kuambila tshianza ne: Tshiena nebe bualu; ne mutu kabidi kawena mumanye mua kuambila makasa ne: Tshiena nenu ne bualu.’ (1 Kolinto 12:19-21) Bia muomumue, tuetu bonso mu dîku dia batendeledi ba Yehowa katuena mua kukumbaja mudimu wa muomumue. Kadi, tudi mu buobumue, ne tudi dijinga ne dikuatshisha dia umue ne mukuabu.
19. Mmunyi mutudi mua kupetela masanka ku biakudia bia mu nyuma bia kudi Nzambi, ne ntshinyi tshiakamba muanetu kampanda mukulumpe pa bualu ebu?
19 Anu bu mudi mubidi ukengela biakudia, diutabalela, ne bulombodi, tudi tukengela biakudia bia mu nyuma bidi Nzambi utupesha ku diambuluisha dia Dîyi diende, spiritu wende, ne bulongolodi buende. Bua kupetela masanka ku biakudia ebi, tudi ne bua kuikala bena mu dîku dia pa buloba dia Yehowa. Kunyima kua bidimu bivule mu mudimu mukuatshila Nzambi, muanetu kampanda wakafunda ne: “Ndi ntamba kuikala ne dianyisha mundi ne nsombelu udi mu diumvuangana ne dimanya dia malongolola a Yehowa kumbukila ku matuku a kumpala kua 1914 mene pavua malu onso kaayi matambe kutokeshibua . . . too ne ku lelu padi bulelela bukenka amu bu dîba dia munda-munya. Bikalaku tshintu kampanda tshia mushinga ku mêsu kuanyi, ndulamatu luanyi lukole ku bulongolodi bua Yehowa budi bumueneka. Dimonamona dianyi dia malu dia diambedi diakanjadikila ne: kueyemena ngelelu ya meji ya bantu ntshilema tshinene. Diakamue pakamana lungenyi kuimana pa muanda eu, ngakangata dipangadika dia kushala mulamate anu ku bulongolodi bua lulamatu. Mmushindu kayipu mukuabu udi muntu mua kupeta dianyishibua ne dibeneshibua kudi Yehowa?”
20. Bu mutudi bantu ba Yehowa, ntshinyi tshitudi ne bua kuikala bapangadije bua kuenza pa bidi bitangila buobumue buetu?
20 Yehowa mmubikile bantu bende kumbukila mu mîdima ne matapuluka bia mu bulongolodi ebu. (1 Petelo 2:9) Mmutufikishe mu buobumue bubenesha pamue nende ne pamue ne bena kuitabuja netu. Buobumue ebu nebuikaleku mu ndongoluelu mupiamupia wa malu ukadi mpindieu pabuipi menemene. Nunku, mu matuku aa makole mua kupita nawu a ku nshikidilu, tutungunukayi ne ‘kuluata dinanga’ ne kuenza tshionso tshitudi mua kuenza bua kulubuluja ne kulama buobumue buetu bua mushinga mukole.—Kolosai 3:14.
Mmunyi muwandamuna?
◻ Bua tshinyi kuenza disua dia Nzambi ne kulamata bulelela bikole bidi mua kutuambuluisha bua kulama buobumue?
◻ Mmunyi mudi buobumue busuikakaja ku ditumika dimpe ne ludimi?
◻ Difuilangana luse didi diumvuija tshinyi?
◻ Mmunyi mutudi mua kulama buobumue patudi tudiangatshila mapangadika?
◻ Bua tshinyi kulama buobumue bua bena nkristo?
[Tshimfuanyi mu dibeji 16]
Anu bu mudi mulami eu ulama tshisumbu tshiende tshia mikoko pamue, ke mudi Yehowa ulama bantu bende mu buobumue
[Bimfuanyi mu dibeji 18]
Pa kulomba luse ne budipuekeshi buonso patudi benzelangane bibi, tudi tuambuluisha bua kulubuluja buobumue