“Yisha muana”

BUDIMI budi bupatula biakudia bimpe butu bulomba malu a bungi kupita dimiamina dia amue mamiinu mu buloba ne kupingana panyima pa ngondo mikese bua kunowa. Bidi bikengela mudimu mukole wa bungi bua kubundulula buloba, kukuna mamiinu, kumiamina mâyi ne kudisha bikunyibua bua bimone mua kukola.

Mudimu eu udi uleja ne: Nsumuinu 22:6 udi wamba bulelela padiye ubela ne: ‘Yisha muana mu njila udiye ne bua kuendela; nunku pakoleye, kêna umukamu.’ Bushuwa, dilongesha dia baledi mbualu bua mushinga mukole mu dikolesha dimpe dia bana.

Kadi mu bulongolodi ebu bua tshidi muoyo musue, baledi ba bungi kabena bateleja mubelu eu nansha. Padibu balonda meji adi matangalake a se: bana badi ne bua kulonga mua kudijikijila malu nkayabu, batu balekela misangu ya bungi bana babu baditabalela. Nsombelu wa nunku udi uteka bansonga mu njiwu ya buenzeji bubi bua bantu badi kabayi balonda meyi-maludiki.​—Nsumuinu 13:20.

Mmunyipu mudibi bitambe buimpe bua baledi kubuejabu mêyi-maludiki a bena Kristo mu lungenyi lua bana babu ku diambuluisha dia dilongesha dia kudi Nzambi patshidibu bapuekele! Tutuadije dîba kayi? Mupostolo Paulo udi wamba ne: “Kubangila ku buana.” Ke muvuabi bua nsonga Timote. Mamuende Eunike, ne kakuende mukaji Loi bakabueja “mifundu minsantu” mu lungenyi luende mu mushindu wa se: ‘wakafika ku dimanya’ ne uvua ‘mutuishibue bua kuitaba.’ Tshipeta tshivua tshinyi? Dilongesha edi divua ne mushinga mukole mu dimuvuija “muena meji bua lupandu.”​—2 Timote 1:5; 3:14, 15, NW.

Bia muomumue lelu’eu, baledi badi kabayi ‘bapungila bua kuenza malu mimpe’ nebanowe masanka a bungi bikalabu ‘kabayi batekete.’ (Bena Ngalate 6:9, MMM) Solomo Mukalenge wa meji udi wamba ne: “Tatu wa muntu muakane neatambe kusanka.”​—Nsumuinu 23:24.