“Ngakamona muvuabu basombe mu ditalala”

MUNTU kampanda utu mumanye tshiena-Allemagne wakaya mu mpungilu mulongolola kudi Bantemu ba Yehowa bua “kubatentekela.” Bua tshinyi? Tshipatshila tshiende tshivua tshia “kuela kasumbusumbu aka patoke ne kuambuluisha balunda bende bua kabapambuki.” Yeye mumane kubuela mu mpungilu eu, wakafundila balunda bende mukanda udi ulonda eu:

“Pangakasemena pabuipi ne muaba uvua mpungilu wenzekela, ngakadiebeja bikalawu uvua wowu menemene. Kakuvua muntu muimane pambelu pa tshipalu, ne kakuvua butshiafu anyi tukopo tua maluvu tulekela panshi. Pangakafika pabuipi menemene, ngakamona nsongalume ibidi mimanye malu mimane ku tshibueledi tshia tshipalu. Yakangela muoyo ne kumbuejayi.

“Mvua mumanye ne: nengumvue mutoyi wa bantu binunu bivule bavua ne bua kuikalamu, kadi mu tshipalu muvua anu talalaa. Meme kudiambila ne: ‘Pamu’apa mudi anu bantu babala ku minu patupu badi batangalake muonso emu.’

“Pangakabuelamu, drama uvuabu banaya ku tshiakuidi uvua mukoka diakamue ntema yanyi. Anu kushòo ke meme kushisha kujingulula ne: tshipalu tshivua tshiûle tente ne binunu bivule bia bantu bavua bateleja ne ntema. Ngakamona muvuabu basombe mu ditalala. Malu angakateleja, angakamona ne angakumvua mu tshitupa tshivua tshishale tshia mpungilu akankemesha bikole.

“Pamvua munkatshi mua Bantemu, ngakamona mpala yabu ya disanka ne mêyi abu a dinanga. Diakamue, tshivua mua kupanga kuamba dîyi dimvua nadi dia se: ‘Bushuwa, aba mbantu ba Nzambi!’”

Pamutu pa ‘kuambuluisha balunda bende bua kabapambuki,’ nsongalume eu wakabalomba bua buobu kulonga nende Bible. Tshipeta tshidi ne: lelu’eu udi mukulu muena Kristo. Yeye ne dîku diende badi benza mudimu bimpe mu tshimue tshia ku bisumbu bia mu tshimenga tshia Zoug, mu Suisse.