‘Mafesto a bidia bia dinanga’​—Ntshinyi?

BIBLE kêna umvuija mafesto aa a bidia bia dinanga anyi uleja bungi bua misangu ivuabu baenza nansha. (Yuda 12) Yezu anyi bapostolo bende kabavua bambe bua kuenza to, ne bidi bimueneka ne: katuena ne bua kuangata bu bualu bulomba anyi budi ne bua kushala kashidi. Bamue badi bamba ne: didia edi divua bikondo bivua bena Kristo babanji benza mafesto, bavua babikilamu bena kuitabuja nabu bapele. Bana ba nshiya, bakamba, babanji ne bantu ba dimona dikese, bonso pamue bavua badia biakudia bia bungi mu nsombelu wa buena-muntu.

Tertullien, mufundi wa mu siekele muibidi ne muisatu, udi ufila diumvuija dia mafesto a bidia bia dinanga, ulonda ne: bantu bavua babuelamu, kumpala kua buobu kudia, bavua basambila Nzambi. Bavua badia ne banua pa nnuinu, bikumbane anu bua kujikija nzala ne nyota, bavuluka ne: nansha butuku badi ne bua kutendelela Nzambi. Mayuki abu avua bu a bantu bavua bamanye ne: Mukalenge uvua ubateleja. Muntu yonso uvua wimba musambu, ne difesto divua dijika ne disambila.​—Apology, XXXIX, 16-18.

Muanda wa se: kumpala bavua benza mafesto aa ne tshipatshila tshimpe mmuleja kudi muaku udibu benze nawu mudimu bua kuumvuija​—a·gaʹpe. A·gaʹpe mmuaku wa tshiena-Gelika muenza nawu mudimu bua kuleja dinanga ditambe kutumbuka, dinanga dishindamene pa mêyi-maludiki. Bible udi wamba ne: “Nzambi udi” dinanga dia mushindu’eu. (1 Yone 4:8) Mbaditele bu dimuma dia nyuma mu Galatia 5:22 ne mbadiumvuije mu bualabale mu 1 Kolinto 13:4-7.

Ki n’Didia dia Dilolo dia Mukalenge nansha

Kakuena kabingila nansha kamue bua kusuikakaja mafesto aa a bidia bia dinanga ne Didia dia Dilolo dia Mukalenge (Tshivulukilu), bu mudi bamue benze, bamba ne: mafesto a bidia bia dinanga avua enzeka kumpala anyi panyima pa musekelelu wa Tshivulukilu. Didia dia Dilolo dia Mukalenge mmufikilu udi wenzeka ku tshidimu tshionso dituku dia muomumue, dia 14 dia ngondo wa Nizan. Kadi bidi bimueneka ne: mafesto a bidia bia dinanga avua enzeka misangu mivule ne kabiyi nangananga mu ndongamu kampanda wa pa tshibidilu. Yeye mumane kudiwula buenzavi buvua bufumina ku dilua ne biakudia muaba uvuabu ne bua kuenzela Didia dia Dilolo dia Mukalenge, Paulo wakafundila bena Kolinto ne: ‘Kanuena ne nzubu bua nuenu kudiamu ne bua nuenu kunuamu anyi? Bikala muntu ne nzala, adie kuende.’ (1 Kolinto 11:22, 34) Edi divua dilolo divuabu ne bua kuangata ne mushinga ne kuelangana meji bua diumvuija diadi. Katshivua tshikondo tshia kudia ne kunua muaba wa bisangilu nansha.

Mafesto aa a bidia bia dinanga kaena nansha muomumue ne ‘didia biakudia’ (‘ditshibula diampa,’ MMM) dileja mu Bienzedi 2:42, 46 ne 20:7 nansha. Pa tshibidilu mu bikondo abi bavua benza mampa a bipeyipeyi. Kabidi mampa kaayi mela luevene avua mûme bikole. Kabavua bakosa diampa to, kadi bavua baditshibula, ke tshiakapatula tshiambilu tshia ‘kutshibula diampa,’ misangu ya bungi padibu bakula bua didia biakudia bia pa tshibidilu.​—Malu menza 2:46, MMM; fuanyikija ne NW.

Bamue bavua benza mudimu bibi ne bikondo ebi

Bu muvuamu biakudia biena dîna, bantu bavua kabayi ne mmuenenu muimpe wa mu nyuma bakabueja bilele bibi mu mafesto aa a bidia bia dinanga. Bu muvua Mukalenge Yezu Kristo anyi bapostolo bende kabayi bambe bua kuenza mafesto aa, kadi mikale tshilele patupu, bakalua kualekela. Mêyi a Yuda adi aleja ne: bamue bavua babuela mu mafesto aa ne meji mabi: ‘Aba mbuobu badi mabue masokome mu [“mafesto,” NW] a bidia bia dinanga pakadiabu nenu; badi balami ba mikoko badi badidisha kabayi ne ditshina.’ (Yuda 12) Petelo udi uleja didifinya dia benji ba malu mabi ne dia bantu bavua balongesha malu a dishima munkatshi mua bena Kristo balelela, wamba ne: ‘Badi babala kutamba kudia kuabu ne kunua kuabu kua mu munya bu disanka; badi matoba ne bilema, batamba kudia ne kunua ku bidia bia dinanga padiabu nenu.’ (2 Petelo 2:13) Nansha mudi too ne lelu’eu bena Kristo batungunuke ne kusomba pamue ne binabu mu disanka ne bambuluishangana ne bintu bia ku mubidi bilondeshile dimona diabu, kakuena kabingila nansha kamue bua kujululula mafesto a bidia bia dinanga bu tshilele mu tshisumbu tshia bena Kristo nansha.​—Yakobo 1:27; 2:15.