TSHIBUTSHILU TSHIA MIKANDA TSHIA KU ENTERNETE tshia Watchtower
TSHIBUTSHILU TSHIA MIKANDA TSHIA KU ENTERNETE
tshia Watchtower
Tshiluba
  • BIBLE
  • MIKANDA
  • BISANGILU
  • w99 15/3 dib. 3-9
  • Dituku dia ndekelu dia muoyo wa Yezu pa buloba

Kakuena filme nansha umue mu tshitupa etshi to.

Tshilema ntshienzeke mu diambula dia filme.

  • Dituku dia ndekelu dia muoyo wa Yezu pa buloba
  • Tshibumba tshia Nsentedi tshidi tshimanyisha Bukalenge bua Yehowa—1999
  • Tumitu tua bualu
  • Bintu bia muomumue
  • Dinayi dilolo dia 14 Nisana
  • Musekelelu wa pa buawu
  • Mu budimi bua Getesemane
  • Ditanu mu dinda dia 14 Nisana
  • Lufu lua tshinyangu
  • Udi ne muoyo tshiakabidi!
  • Mudi malu aa ne dikuatshisha kuudi
  • Tulondololayi matuku a ndekelu a Yezu pa buloba
    Tshibumba tshia Nsentedi tshidi tshimanyisha Bukalenge bua Yehowa—1998
  • “Diba diakukumbana”
    Tshibumba tshia Nsentedi tshidi tshimanyisha Bukalenge bua Yehowa—2000
  • Malu adi ne bua kutusaka bua kunanga Yezu
    Longa malu kudi Mulongeshi Munene
  • Dilongolola dia mubidi wa Yezu ne diwujika
    Yezu udi njila ne bulelela ne muoyo
Tangila bikuabu
Tshibumba tshia Nsentedi tshidi tshimanyisha Bukalenge bua Yehowa—1999
w99 15/3 dib. 3-9

Dituku dia ndekelu dia muoyo wa Yezu pa buloba

Tudi ku dilolo mu Ditanu dia 14 Nisana 33 B.B. Bantu tshisumbu balume ne bakaji badi bakeba kujiika mulunda wabu musuibue. Umue wa ku bantu aba, Nikodemo, mmulue ne manananshi bua kulongolola tshitalu ne kutshijiika. Muntu kampanda dîna diende Yosefe mmufile tshilamba tshia mankenda tshia lin bua kujingilamu tshitalu tshitapa mputa ne tshiuuja.

BANTU aba mbanganyi, ne udibu bajiika nnganyi? Malu onso aa adi ne dikuatshisha kuudi anyi? Bua kuandamuna nkonko eyi, tuanji kupingana ku ntuadijilu wa dituku adi dia mushinga.

Dinayi dilolo dia 14 Nisana

Ngondo muikale tshitonga udi wenda upatuka, ukenkesha mu Yelushalema. Tshimenga etshi tshia bantu ba bungi tshidi tshibanga kutalala kunyima kua dituku dia midimu mivule. Dilolo edi dipembu dia mikoko idibu buosha ndikuatakane. Bushuwa, bantu binunu bivule badi badilongolola bua muanda wa pa buawu​—musekelelu wa ku tshidimu wa Pasaka.

Yezu Kristo ne bapostolo bende 12 mbadiadije ku mesa malongolola bimpe mu nzubu munene wa benyi. Teleja! Yezu udi wakula. Udi wamba ne: “Mvua mujinge ne dijinga dikole bua kudia nenu pasaka ewu bangabanga ne kumvua bisama.” (Lukas 22:15, Mukenji Mulenga) Yezu mmumanye ne: baluishi bende bena malu a Nzambi badi bakeba bua kumushipesha. Kadi kumpala kua kuenzekabi nanku, bualu bua mushinga wa bungi budi buenzeka dilolo edi.

Kunyima kua bamane kusekelela Pasaka, Yezu udi wamba ne: ‘Muanenu mukuabu neantungile tshitungu!’ (Matayo 26:21) Bualu ebu budi bubungamija bapostolo. Muntu au udi mua kuikala nganyi? Panyima pa dikonkoloja dikese pa muanda eu, Yezu udi wambila Yudasa Isakaliote ne: ‘Enza buudi wenza lukasa.’ (Yone 13:27) Nansha mudi bakuabu kabayi bajingulule tshidiye usua kuamba, Yudasa ke mutungidianganyi. Udi upatuka bua kuya kukumbaja mudimu wende mubi mu tshifufu tshielela Yezu.

Musekelelu wa pa buawu

Mpindieu Yezu udi ubanjija musekelelu mupiamupia mu kabujima kawu​—musekelelu wavuluija lufu luende. Yezu udi wangata diampa, wela tuasakidila mu disambila ne udikosolola. Udi wambila bapostolo bende 11 ne: “Angatayi, nudie. Etshi tshidi tshiumvuija mubidi wanyi udi ne bua kufidibua bua bualu buenu.” Yonso wa kudibu mumane kudia tshitupa tshia diampa, Yezu udi wangata dikopo dia mvinyo mukunze ne udibenesha. Udi ubambila ne: “Nuayi buonso buenu,” ne ubumvuija ne: “Dikopo edi didi diumvuija tshipungidi tshipiatshipia tshijadika ku mashi anyi, adi ne bua kupueka bua bualu buenu.” Udi wambila bapostolo 11 ba lulamatu bavua bashale ne: “Tungunukayi ne kuenza nunku bua kumvuluka.”​—Matayo 26:26-28; Luka 22:19, 20; 1 Kolinto 11:24, 25, NW.

Dilolo adi, Yezu udi ulongolola bimpe bapostolo bende ba lulamatu bua malu adi mabindile ne udi ubajadikila dinanga diende diondoke. Udi umvuija ne: ‘Kakuena muntu udi ne dinanga didi ditambe edi, dia muntu udi ufuila balunda bende. Nenuikale balunda banyi, binuenza bu mundi nnuambila.’ (Yone 15:13-15) Bushuwa, bapostolo 11 mbaleje ne: mbalunda balelela mu dilamata Yezu mu mateta ende.

Butuku buile mutantshi mule​—pamu’apa bamane kupita mundankulu—​Yezu udi wenza disambila dia katshia ne katshia, kunyima kua disambila edi badi basamuna Yehowa ne misambu. Pashishe, mu bukenke bua ngondo muikale tshitonga, badi bapatuka mu tshimenga ne basambuka Tshibanda tshia Kidilona.​—Yone 17:1–18:1.

Mu budimi bua Getesemane

Kunyima kua katupa kîpi, Yezu ne bapostolo bende badi bafika mu budimi bua Getesemane. Yezu udi ushiya bapostolo muanda-mukulu ku tshibuelelu tshia budimi, wangata Petelo, Yakobo ne Yone, ubuela nabu munkatshi mua mitshi ya oleve. Udi wambila basatu aba ne: ‘Mutshima wanyi udi utamba kunyingalala, lufu ludi luntonda; nushale apa, nutabale.’​—Mâko 14:33, 34.

Bapostolo basatu aba badi bashala bindile padi Yezu ubuela mutantshi munkatshi mua budimi bua kusambila. Ne mbila mikole ne binsonji, udi ulomba ne: “Tatu, pawikala musue, ungumbushile dikopo edi.” Bujitu bunene budi pa makaya a Yezu. Mmunyipu mudibi bimubungamija padiye wela meji pa malu amba baluishi ba Yehowa papopelabu Muanende umuepele mulela ku mutshi bu muena tshibawu! Bualu budi butamba kutonda Yezu mmeji adiye wela bua bipendu bidibu mua kupenda Tatuende musuibue wa mu diulu bu yeye mupangile diteta edi ditambe bukole. Yezu udi usambila ne muoyo mujima ne umvua dibungama dikole mu mushindu wa se: bisululu biende bidi biandamuka bu mamata a mashi amata panshi.​—Lukase 22:42, 44, Mukanda wa Mvidi Mukulu.

Yezu udi ufuma ku dijikija disambila bua musangu muisatu. Mpindieu, bantu bambule bimunyi ne miendu badi basemena pabuipi. Udi kumpala kuabu ki mmunga muntu, kadi n’Yudasa Isakaliote. Udi ulua buludiludi too ne kudi Yezu. Udi wamba ne: “Labi, muoyo,” umutua mishiku ne diengeleka dionso. Yezu udi wamba ne: “Yudasa, udi utungila Muana wa muntu tshitungu ku kutuangana kua mishiku, anyi?”​—Matayo 26:49; Luka 22:47, 48; Yone 18:3.

Diakamue, bapostolo badi bajingulula tshidi tshienzeka. Badi bakeba kukuata Mfumu udi kabidi mulunda wabu musuibue! Nenku, Petelo udi wangata muele wa nkanza ne ukosa ditshi dia mupika wa muakuidi munene. Ne lukasa luonso, Yezu udi wela lubila ne: “Lekelayi.” Wolola tshianza, udi wondopa mupika ne utumina Petelo dîyi ne: ‘Pingaja muele webe mu muaba wawu; bualu bua bonso badi bangata muele nebashipibue ku muele.’ (Lukase 22:50, 51, MMM; Matayo 26:52) Banene ba bena Yuda ne basalayi badi bakuata Yezu ne bamusuika. Bua buôwa ne dilubakana, bapostolo badi bashiya Yezu ne badiela pafiike.​—Matayo 26:56; Yone 18:12.

Ditanu mu dinda dia 14 Nisana

Tukadi bapite mundankulu ne tudi mpindieu mu mêba a patshiatshia, mu Ditanu. Badi banji kuya ne Yezu kua Ana, uvua Muakuidi Munene kale, utshidi ne buenzeji ne bukole bua bungi. Ana udi umuela nkonko ne pashishe umutuma kua Muakuidi Munene Kayafa, muaba udi bena kabadi ka Sanhedrin badisangishe.

Mpindieu bamfumu ba bitendelelu badi bakeba bantemu bua kutumpila Yezu tshilumbu. Kadi, bantemu ba dishima aba kabena bapetangana ku mêyi mu malu adibu bajadika to. Mutantshi wonso eu, Yezu udi anu mupuwe. Kayafa udi ushintulula mayele ende, ukonka ne: ‘Ndi nkutshipisha mu dîna dia Nzambi udi ne muoyo, udi biebe Kristo Muana wa Nzambi anyi?’ Ebu mbualu budi kabuyi kuvila, nenku Yezu udi wandamuna ne dikima ne: ‘Mmeme; nenumone Muana wa muntu mushikame ku tshianza tshia balume tshia bukole, ulua biende ne matutu a mu diulu.’​—Matayo 26:63; Mâko 14:60-62.

Kayafa udi wela lubila ne: ‘Mmupende Nzambi; tudi ne bualu bua bamanyi [bantemu] kabidi kudi kunyi?’ Mpindieu, bamue badi batapa Yezu mapi ku mêsu ne bamutuila mate. Bakuabu badi bamututa mbata ne bamuamba mêyi mabi. (Matayo 26:65-68; Mâko 14:63-65) Mpindieu mu Ditanu mu dinda, bena Sanhedrin badi badisangisha tshiakabidi, imue misangu bakeba bua kubingisha dimulumbuluisha dia butuku dibengangane ne mikenji. Kabidi, Yezu udi uleja ne dikima ne: udi Kristo, Muana wa Nzambi.​—Luka 22:66-71.

Pashishe, bakuidi bamfumu ne bakulu badi baya ne Yezu bua bamulumbuluishe kudi Ponsio Pilato, ngovena muena Lomo uvua ukokesha mu Yudeya. Badi babanda Yezu ne: udi utombola bena ditunga, ukandika bua bantu kabalambudi Kaisa bitadi ne ‘wamba kabidi ne: Meme ndi Kristo mukalenge.’ (Luka 23:2; tangila Mâko 12:17.) Mumane kuela Yezu nkonko, Pilato udi wamba ne: “Tshiena musangane muntu eu ne bualu.” (Luka 23:4) Padi Pilato umvua ne: Yezu mmuena Galela, udi umutuma kua Helode Antipa, mukokeshi wa Galela, udi mulue mu Yelushalema bua Pasaka. Tshipatshila tshia Helode katshivua tshia kulondeshisha buakane to. Mmusue anu bua kumona mudi Yezu wenza tshishima. Bu mudi Yezu kayi ukumbaja dijinga diende ne ushala mupuwe, Helode ne basalayi bende badi bamuseka ne bamupingaja kua Pilato.

Pilato udi webeja kabidi ne: ‘Muntu eu wakuenza bualu bubi kayi? Tshiena mumusangane ne bualu buafuilaye; nemmukume, nemmulekele.’ (Luka 23:22) Nenku, udi welesha Yezu mfimbu muluka ne mikaba ya bungi ya biseba idi itapa Yezu mputa panyima. Pashishe basalayi badi bamuasa tshifulu tshia meba ku mutu. Badi bamuseka ne bamukuma ne dilenga dikole, babueja bikole tshifulu tshia meba etshi mu dikoba dia mutu wende. Mu dikenga ne bipendu bionso ebi kabiyi kumvuija, Yezu udi uleja bunême ne bukole bua pa buabu.

Pilato​—mutekemene pamu’apa ne: bu muvuabu bamueneshe Yezu mabika ne mala, bamue bantu nebumvue luse—​udi umuleja kabidi kumpala kua musumba wa bantu. Pilato udi wela dîyi ne: “Ke meme ewu nnupatuilaye pambelo bua numanye ne: tshiena mumusangane ne bualu to.” Kadi bakuidi bamfumu badi bela mbila ne: “Umupopele pa mutshi wa tshibawu! Umupopele pa mutshi wa tshibawu!” (Yowanese 19:4-6, MMM) Bu mudi musumba wa bantu ulomba ne disuminyina, Pilato udi uteketa ne ufila Yezu bua bamupopele ku mutshi.

Lufu lua tshinyangu

Mpindieu tudi dîba dia misasa, imue misangu tukadi pabuipi ne mujalamu. Badi bapatuka ne Yezu pambelu pa Yelushalema baya nende muaba udibu babikila ne: Gologota. Badi bangata misonso minene ne bapopela bianza ne makasa ende ku mutshi wa tshinyongopelu. Mêyi kaena mua kumvuija bisama padibu bimanyika mutshi wa tshinyongopelu, bujitu bua mubidi wende budi bupanda mputa ya misonso. Bantu musumba badi bunguila bua kubandila Yezu ne bena tshibawu babidi badibu bapopela ku mutshi. Bantu ba bungi badi bapenda Yezu. Bakuidi bamfumu ne bantu bakuabu badi bamuseka bamba ne: “Yeye wakadi usungila bakuabo, kena mumanye mua kudisungila.” Nansha basalayi ne bena tshibawu babidi bapopela ku mutshi badi pabu baseka Yezu.​—Matayo 27:41-44.

Diakamue, pa dîba dia mujalamu, kunyima kua Yezu mumane kunenga mutantshi ku mutshi, mîdima mikuate buôwa mienzeja kudi Nzambi idi ifiikisha ditunga munkatshi mua mêba asatu.a Pamu’apa muanda eu ke udi usaka umue wa ku benzavi bua kukanyina mukuabu. Pashishe, utangila Yezu, udi umulomba ne: “Umvuluke pawabuela mu bukalenge buebe.” Nditabuja kayipu didi dikemesha kumpala kua lufu lukadi pabuipi! Yezu udi umuandamuna ne: “Bulelela ndi nkuambila lelu ne: Newikale nanyi mu Mparadizu.”​—Luka 23:39-43, NW.

Bu pa dîba isatu mu mapingaja, Yezu udi umvua ne: nshikidilu wende ukadi pabuipi. Udi wamba ne: “Ndi ne nyota.” Pashishe udi wela lubila ne dîyi dikole ne: “Nzambi wanyi, Nzambi wanyi, wakundekela tshinyi?” Yezu udi umvua bienza bu se: Tatuende mmulekele bua kumukuba bua batete muoyo-mutoke wende too ne ku ndekelu, ne udi utela mêyi a Davidi. Muntu kampanda udi utua musukula mu mvinyo wa buanji ne umutuawu ku mishiku. Mumane kulabula ndambu wa mvinyo, Yezu udi wamba ne: ‘Bualu buakujika.’ Kunyima udi wela lubila ne: “Tatu, ndi nteka muoyo wanyi mu bianza biebe,” winyika mutu ne ukula muoyo.​—Yone 19:28-30; Matayo 27:46; Luka 23:46; Musambu 22:1.

Bu mutukadi mu mapingaja, dîba dimane kufika pa mpulumuku, badi balongolola malu lukasalukasa bua kujiika Yezu kumpala kua Nsabatu (dia 15 Nisana) kutuadijaye padi dîba dibuela. Yosefe wa ku Alimataya, muena mu Sanhedrin mumanya bimpe, muyidi wa Yezu mu musokoko, udi upeta dianyisha bua kumujiika. Nikodemo, muikale pende muena mu Sanhedrin uvua muitabuje Yezu mu musokoko, udi ufila kilo 33 ya manananshi a mulo ne alo. Badi baladika bimpe tshitalu tshia Yezu mu lukita lua tshivulukilu lupialupia ludi pabuipi apu.

Udi ne muoyo tshiakabidi!

Tudi mu Dia lumingu mu dinda, panshi patshidi pafiike menemene padi Mariya wa ku Magadala ne bakaji bakuabu baya ku lukita lua Yezu. Kadi tangila! Dibue divua ku lukita ndiumbusha. Bushuwa, lukita ludi munda mutupu! Mariya wa ku Magadala udi unyema lubilu bua kuambila Petelo ne Yone. (Yone 20:1, 2) Katupa kîpi kunyima kua yeye mumane kumbuka, muanjelu udi umuenekela bakaji bavua bashale. Ne udi ubambila ne: “Nuenu kanutshinyi to.” Udi ubalomba kabidi ne: “Ndayi lukasa, nuambile balongi bende ne: Mmubike ku bafue.”​—Matewuse 28:2-7, MMM.

Padibu baya bonso lubilu, badi basambakena ne Yezu! Udi ubambila ne: ‘Yayi bienu, nuambile bana betu.’ (Matayo 28:8-10) Pashishe, Mariya wa ku Magadala udi ku lukita udila padi Yezu umumuenekela. Mbikole bua kukuataye disanka diende, udi unyema lubilu bua kuambila bayidi bakuabu lumu elu lua disanka. (Yone 20:11-18) Bushuwa, misangu itanu mu Dia lumingu adi kadiyi kupua muoyo, Yezu mubisha ku bafue udi umuenekela bayidi bashilangane, kayiku ubashiya ne mpata bua se: udi ne muoyo tshiakabidi!

Mudi malu aa ne dikuatshisha kuudi

Mmunyi mudi malu akenzeka kukadi bidimu 1 966 mikale ne dikuatshisha kutudi lelu’eu utukadi pabuipi ne siekele wa 21? Ntemu kampanda wa mianda eyi udi umvuija ne: ‘Mu muanda eu dinanga dia Nzambi diakamueneshibua bua bualu buetu, bualu bua Nzambi wakatuma Muana wende umuepele pa buloba bua tuetu tuikale ne muoyo bua bualu buende. Mu muanda eu mudi dinanga, ki mbua tuetu tuakananga Nzambi, kadi bua yeye wakatunanga, wakatuma Muana wende bu mulambu wa kubuikila nawu mibi yetu.’​—1 Yone 4:9, 10.

Mmu mushindu kayi mudi lufu lua Kristo luikale ‘mulambu wa kubuikila nawu mibi’? Lufu elu mmulambu wa kubuikila nawu mibi bualu ludi luenzeja bua tuikale mu malanda mimpe ne Nzambi. Muntu wa kumpala, Adama, wakatombokela Nzambi ne pa nanku kushilaye ndelanganyi yende bumpianyi bua mpekatu ne lufu. Ku luende luseke, Yezu wakafila muoyo wende bu tshia-bupikudi bua kufuta mushinga bua mpekatu ne lufu lua bantu, nenku kujadikaye nshindamenu bua Nzambi kulejaye luse ne bulenga. (1 Timote 2:5, 6) Mu dileja ditabuja mu mulambu wa Yezu udi ubuikila mpekatu, udi mua kupikudibua ku tshibawu tshiudi mupiane kudi Adama muenji wa mpekatu. (Lomo 5:12; 6:23) Kabidi, mulambu eu udi unzulula njila mulenga bua wewe kupeta malanda mimpe ne Yehowa Nzambi, Tatuebe wa dinanga wa mu diulu. Mu tshikoso, mulambu wa Yezu mutambe bulenga udi mua kukupesha muoyo udi kauyi ndekelu.​—Yone 3:16; 17:3.

Malu aa ne makuabu a mushindu’eu nebaakonkonone mu Dinayi dilolo dia 1 Tshisanga, mu miaba makumi a binunu pa buloba bujima pikala bantu miliyo mivule badisangishe bua kuvuluka lufu lua Yezu Kristo. Tudi tukubikila bua wikalepu. Bantemu ba Yehowa ba tshitupa tshiudi musombele nebakuambile ne disanka muaba ne dîba diudi mua kubuelamu. Kakuyi mpata, dikalapu dîba adi nedikoleshe dianyisha diebe bua malu adi Nzambi wetu wa dinanga ne Muanende musuibue benze mu dituku dia ndekelu dia muoyo wa pa buloba wa Yezu.

[Mêyi adi kuinshi]

a Mîdima eyi kayivua mua kuikala mienzeja kudi disambakena dia dîba ne ngondo nansha, bualu Yezu wakafua ngondo muikale tshitonga. Disambakena dia dîba ne ngondo ditu dinenga anu minite mikese ne ditu dienzeka padi ngondo muikale pankatshi pa buloba ne dîba, padiye ubala.

[Tablo/​Bimfuanyi mu dibeji 7]

LUFU NE DIBIISHIBUA DIA YEZU

NISAN 33 B.B.

14 Dinayi ku dilolo

MIANDA: Musekelelu wa Pasaka; Yezu udi wowesha bapostolo bende mâyi ku makasa; Yudasa udi upatuka bua kupangila Yezu; Kristo udi ubanjija Tshivulukilu tshia lufu luende (Tshidibu basekelela tshidimu etshi mu Dinayi dia 1 Tshisanga, kunyima kua dibuela dia dîba); mêyi a dikankamija bua kulongolola bapostolo bua diya diende

MUNTU MUTAMBE BUNENEb: 113, tshik. 2 too ne 117, tshik. 1

Mundankulu too ne patshiatshia

MIANDA: Panyima pa disambila ne misambu ya ditumbisha nayi Nzambi, Yezu ne bapostolo badi baya mu budimi bua Getesemane; Yezu udi usambila ne muadi mukole ne binsonji; Yudasa Isakaliote udi ulua ne musumba munene wa bantu ne upangila Yezu; bapostolo badi banyema padibu basuika Yezu ne baya nende kua Ana; badi baya ne Yezu kua Muakuidi Munene Kayafa bua kulumbululaye kumpala kua kabadi ka Sanhedrin; badi bamukosela tshibawu tshia lufu; badi bamuamba mêyi mabi ne bamukengesha; Petelo udi uvila Yezu misangu isatu

MUNTU MUTAMBE BUNENE: 117 too ne 120

Ditanu mu dinda

MIANDA: Pa lunkelu, Yezu udi kabidi kumpala kua Sanhedrin; badi baya nende kua Pilato; bamutuma kua Helode; bamupingaja kua Pilato; badi bamuela mfimbu, bamupenda ne bamunyanga mubidi; bua dimutondesha dia bantu, Pilato udi umufila bua bamupopele ku mutshi; badi baya nende ku Gologota bua kumushipa dîba ditangile ku mujalamu

MUNTU MUTAMBE BUNENE: 121 too ne 124

Mundamunya too ne munkatshi mua mapingaja

MIANDA: Badi bamupopela ku mutshi katupa kîpi kumpala kua mujalamu; mîdima idi yenzeka kubangila ku mujalamu too ne ku dîba bu isatu padi Yezu ufua; tshikumina tshikole tshidi tshienzeka; tshilamba tshia mu ntempelo tshidi tshipandika mu bitupa bibidi

MUNTU MUTAMBE BUNENE: 125, 126

Ku dilolo menemene

MIANDA: Badi baladika tshitalu tshia Yezu mu lukita lua mu budimi kumpala kua Nsabatu

MUNTU MUTAMBE BUNENE: 127, bik. 1-7

15 Ditanu dilolo

MIANDA: Nsabatu udi utuadija

Disambombo

MIANDA: Pilato udi witaba bua balame lukita lua Yezu

MUNTU MUTAMBE BUNENE: 127, bik. 8-9

16 Dia lumingu

MIANDA: Mu dinda menemene, badi basangana lukita lua Yezu munda mutupu; Yezu mubiisha ku bafue udi umuenekela (1) kasumbu ka bayidi bakaji, pamue ne Salome, Yoana ne Mariya mamuende wa Yakobo; (2) Mariya wa ku Magadala; (3) Kleopa ne mulunda wende; (4) Simona Petelo; (5) mu tshisangilu tshia bapostolo ne bayidi bakuabu

MUNTU MUTAMBE BUNENE: 127, tshik. 10 too ne 129, tshik. 10

[Mêyi adi kuinshi]

b Bitudi bafunda muaba eu mbishiferi bidi bileja nshapita mu mukanda wa Muntu mutambe bunene wa katshia ne katshia. Tablo udi ne mvese mishilangane ya mu Mifundu idi yakula bua mudimu wa ndekelu wa Yezu, udi mu mukanda wa “Toute Écriture est inspirée de Dieu et utile,” dibeji dia 290. Mikanda eyi mmipatula kudi Société Watchtower.

    Mikanda ya mu Tshiluba (1982-2024)
    Patuka
    Buela
    • Tshiluba
    • Tumina bakuabu
    • Biudi musue
    • Copyright © 2025 Watch Tower Bible and Tract Society of Pennsylvania
    • Malu a kulonda
    • Mikenji ya mua kulama malu masokoka
    • Biudi witaba bua kuenzekabi mu tshiamu
    • JW.ORG
    • Buela
    Tumina bakuabu