Bamanyishi ba Bukalenge badi balonda
Kuyisha “patshidi tshikondo tshimpe tshikaleku anyi paditshi katshiyiku”
PAVUA mvita misunsule ditunga dia Bosnie-Herzégovine, bantu binunu bivule bakapeta ntatu mikole. Mu tshikondo atshi tshikole, Bantemu ba Yehowa bakenza madikolela abu onso bua kukankamija bantu ne kubapesha ditekemena. Malu adi alonda aa avua mu mukanda mufunda kudi Ntemu uvua muenze mudimu mu tshimenga tshia Sarajevo tshikondo kampanda.
“Nsombelu mmukole munemu, kadi bantu badi batamba kuitaba bulelela bua mu Bible. Bantemu ba munu badi tshilejilu tshilenga tshia dinanukila. Kabena ne bintu bivule bia ku mubidi, kadi badi ne mmuenenu mulenga. Pabuipi ne bansonga bonso ba mu tshisumbu badi mu mudimu wa ku dîba ne ku dîba. Lukunukunu elu ndukankamije bamanyishi bapiabapia. Kabiena bikemesha padibu benza mêba 60 anyi mapite apu ku ngondo mu buambi, anu patshidibu batuadija mudimu mu ngondo wabu wa kumpala.
“Kusakidila ku diyisha dia ku nzubu ne ku nzubu, tudi benze mudimu ne mishindu mikuabu ya bungi bua kupeta bantu. Tshilejilu, tudi bapatule bipeta bimpe mu diabanya mikanda idi yumvuija Bible mu nkita ya bungi ya mu tshimenga.
“Tudi bayishe kabidi mu mpitadi. Mu Tshibambalu tshia Masama a mioyi tshia mu lupitadi lua mu Sarajevo, doktere mutangidi wakitaba bua kuangata Réveillez-vous! wa dia 8 Tshisua-munene 1996, uvua ne tshiena-bualu etshi pa tshizubu: ‘Crise cardiaque: Que faire?’ (Disama dia mioyi—Tshia kuenza ntshinyi?) Wakalomba bibejibeji bikuabu bua kupesha ba-doktere bakuabu. Pashishe wakitaba bua Bantemu kukumbulabu babedi bonso ba mu tshibambalu tshiende. Nenku, mu mutantshi wa dîba dijima ne minite pa mutu, tuakabanya bibejibeji bipite pa 100 ku bulalu ne ku bulalu. Babedi ba bungi bakamba ne: uvua musangu wa kumpala bua kumona muntu ubakumbula mu lupitadi bua kubakankamija ne kubapesha ditekemena.
“Musangu mukuabu, tuakaya ku Tshibambalu tshia masama a bana. Tuvua ne bibejibeji bivua ne biena-bualu biakanyine bana. Doktere mutangidi wakitaba bua kuangata kabidi mikanda mikese ya Miyuki ya mu Mukanda wa Nzambi bua kuyiteka mu nzubu wa dibadila mikanda. Mpindieu bamamu badi balua kutangila bana babu mu lupitadi elu batu babadila bana babu aba miyuki ya mu Bible dituku dionso. Tuakalongolola kabidi bua kuya kutangila doktere eu kumbelu kuende.
“Mu Sarajevo mudi binunu bivule bia basalayi ba bulongolodi bua OTAN [Organisation du traité de l’Atlantique Nord] bafumine mu matunga mashilangane. Buobu aba pabu tuakabayisha bikole. Imue misangu tutu tuya ku mashinyi a mvita onso, tuenda tuenza mudimu ne broshire wa Une bonne nouvelle pour toutes les nations pamue ne bibejibeji bia Tshibumba tshia Nsentedi ne Réveillez-vous! mu miakulu mishilangane. Tuakabanya bibejibeji bipite pa 200 mu tumponya tua basalayi bena Italie. Bualu budi bukemesha, basalayi ba bungi bena Italie bakamba ne: kabavuaku banji kuyikila ne Bantemu ba Yehowa nansha. Bushuwa, tuakapetangana nabu mu Sarajevo.
“Dimue dituku, bavua bimanyike mashinyi a mvita kumpenga kua njila. Ngakakonkolaku ne dikumbi dimvua nadi, ne musalayi wakapatukamu. Ngakamupesha Tshibumba tshia Nsentedi tshivua ne tshiena-bualu tshia: ‘Batuadi ba mukenji wa ditalala—Mbanganyi?’ Musalayi kuntangilaye ne kungebeja ne: ‘Udi Ntemu wa Yehowa anyi?’ Pangakitaba, wakandamuna ne: ‘Bualu bua dikema. Nudi kabidi munemu! Kudiku muaba udi Bantemu bashiye pa buloba apa anyi?’”
Mupostolo Paulo udi utukankamija ne: “Ambila bantu diyi dia [“Nzambi,” NW] ne udimanyishe ne dinanukila, patshidi tshikondo tshimpe tshikaleku anyi paditshi katshiyiku.” (2 Timote 4:2, Muanda Mulenga Lelu) Bu bena kuitabuja nabu ba pa buloba bujima, Bantemu ba Yehowa ba mu Sarajevo badi benza nanku, nansha ku bulalu ne ku bulalu, ne ku mashinyi a mvita amue ne ku makuabu!