Bamanyishi ba Bukalenge badi balonda

Buambi mu tshikondo tshia ndululu

MUPOSTOLO Paulo wakadianjila kumanyisha ne: “palua matuku a ku nshikidilu bikondo bia njiwu ne bikole mua kupita nabi nebikaleku.” (2 Timote 3:1, NW) Mmushindu kayipu wadisokolodi bujalame bua mêyi aa! Bena El Salvador mu Amerike wa pankatshi mbapetangane ne nsombelu eu mukole. Bua bidimu bipite pa dikumi, ditunga adi divua diditue mu mvita ya bena ditunga yakakebela bantu binunu ne binunu dikenga ne lufu. Mpindieu, mvita yajiki, kadi dikenga ditshidiku. Dibunda bibawu ndivule bikole kunyima kua mvita. Kamona-kamba kampanda wa ku televizion wa muaba awu mmuambe matuku adi panshi aa ne: “Mpindieu, tshikisu ne buivi mmampa etu a dituku dionso.”

Bantemu ba Yehowa ki mbepula ku buenzeji bua divula ne dimuangalaka bia dibunda bibawu edi nansha. Bîvi mbabuele ku bukole mu Nzubu ya Bukalenge mivule ne mbibe biamu bia mêyi. Misangu ya bungi, bisumbu bia bantomboji bienza kudi bansonga bavua ne bingoma mbibuele ku bukole mu Nzubu ya Bukalenge dîba divua bisangilu bia bena nkristo bienzeka, biba mfranga, mêba a ku maboko, ne bintu bikuabo bia mushinga bia bateleji. Dîba divuabo badifile mu midimu yabo ya dituku dionso, Bantemu bakuabo mbashipibue mene kudi bîvi.

Nansha mudiku bipumbishi ebi, Bantemu ba Yehowa mu El Salvador badi batungunuka ne kutumika bikole mu dimanyisha lumu luimpe. Badi benza mudimu eu mu ditumikila dîyi-dituma edi didi mu Mifundu: “Mu bisamba bionso lumu luimpe ludi ne bua kumanyishibua diambedi.” (Mâko 13:10, NW) Kutshidi bantu ba bungi mu ditunga edi badi ne dijinga dikole dia ditekemena dia Bukalenge didi Bible upetesha, ne Bantemu badi benza madikolela bua kupetangana ne yonso wa kudibo. Bumanyishi bua ku mpukapuka budi buenda budisokolola mudibo ntumikilu mupatudi wa bipeta bimpe mu buambi.

Pavuaye udiondapisha mu lupitadi kampanda, Ntemu kansanga wakababidila tshikondo kayi tshionso bua kuyukila ne babedi bakuabo pa bidi bitangila malaya a Nzambi bua matuku atshilualua, bu mudiwo asanganyibua mu Bible. Mubedi kampanda uvua usama bikole wakadiabakena ne kanyinganyinga kuonso ne: “Mu katupa kîpi emu, ndi mfua!” Kadi tshilunji tshia dibungama tshia mubedi katshiakapumbisha Ntemu eu bua kuabanyangana lumu luimpe lua Bukalenge bua Nzambi to. Pamutu pa nunku, wakabadila ne dîyi dikole mulume eu kumbukila mu mukanda wa Udi mua kuikala ne muoyo wa kashidi pa buloba bukudimuna mparadizu, mupatula kudi Bantemu ba Yehowa. Matuku makese kunyima, Ntemu eu wakapatuka mu lupitadi, wela meji ne dibungama dionso ne: mulume awu uvua pa bulalu buende bua lufu.

Bidimu binayi kunyima, Ntemu eu uvua ne bua kudiondapisha mu lupitadi lukuabo. Patshivuaye mu lupitadi alu, mubedi kampanda wakasemena pabuipi nende ne kuamba ne: “Utshidi umvuluka anyi?” Uvua mulume wakatutakenaye nende kukadi bidimu binayi, mulume uvuaye mufuanyikije se: neafue! Mbualu kayipu bua dikema ne disanka pakamuela mulume eu mu tshitupa ne kusakidila ne: “Mpindieu ndi panyi umue wa ku Bantemu ba Yehowa!” Mulume eu wakitabuja ditekemena dia Bible bua matuku atshilualua, kulonga Bible ne Bantemu ba Yehowa, ne kulambula muoyo wende kudi Yehowa. Kavua anu Ntemu patupu kadi ukavua mumane kudifila mu mudimu wa ku dîba ne ku dîba bu mpanda-njila wa pa tshibidilu munkatshi mua bidimu bitue ku bibidi.

Mu tshilejilu etshi, mamiinu a bulelela akakunyibua mu mpukapuka akabuela mu mutshima mudiakaje bua kuandamuna bilenga. Muabi eu wa diambuluisha bantu bua kufika ku dimanya dia bulelela udi usaka bena nkristo balelela ku ditungunuka ne mudimu wa buambi nansha mudiku “bikondo bia njiwu ne bikole mua kupita nabi” ebi.