Ditalala dia buloba bujima​—Nedifumine penyi?

TULASA ne bitendelelu nebifile ditalala dia buloba bujima pa kulongesha malu a muomumue mu matunga a bungi anyi? Etshi tshivua tshipatshila tshinene tshia Doktere Robert Muller, muntu uvua sekretere jenerale muambuluishi wa bulongolodi bua Matunga Masanga (ONU) ne wakapeta Difutu kudi bulongolodi bua UNESCO bua dilongesha malu adi atangila ditalala mu 1989. Bu muvuabu bamanyishe mu tshikandakanda kampanda, Doktere Muller “mmutuishibue ne: badi ne bua kulongesha balongi bonso ba pa buloba bujima malongesha a malu malelela ne a ngikadilu ya mushinga adi atangila buloba, bukua-bantu ne dibenga tshinyangu.” (The Vancouver Sun) Udi wela meji ku dituku dikala bilongelu bionso bia pa buloba bujima mua kulongesha bana malu a Matunga Masanga bu ditekemena ditambe buimpe bua ditalala. Tshikandakanda tshia Sun etshi tshidi tshimanyisha muvuaye wamba kabidi ne: “bitendelelu bionso bia pa buloba bujima bidi ne bua kuenza bulongolodi bupiabupia buenze bu bulongolodi bua Matunga Masanga budibu babikila ne: Bitendelelu Bisanga.” Pashishe “malongesha onso a bitendelelu nealongeshe dibenga tshinyangu.”

Ditalala dia buloba bujima nedilueku bualu bulelela anyi? Bushuwa menemene! Kadi ki nku diambuluisha dia ndongoluelu kayi yonso wa bantu to. Kukadi bidimu bipite pa 2 700, mufundi kampanda muenzeja ku spiritu wakaleja mpokolo mutumbuke wa dilongesha didi difila ditalala pakadianjilaye kuamba ne: bantu ba muoyo muimpe bavua ne bua kuikala “balongesha kudi Yehowa,” ne ditalala diabu divua ne bua kuikala “divule.”​—Yeshaya 54:13, NW.

Bible udi wamba ne: Nzambi ke “udi ufila ditalala.” (Lomo 16:20, NW) Nansha mpindieu, kudi ndongamu wa dilongesha dilenga dia buloba bujima udi Yehowa ulongesha nende bantu bende bua ‘kukeba ditalala ne kudilonda,’ bua ‘kufula nkasu ya kudima nayi ku miele yabu ya mvita,’ ne ‘kabayi bayila lungenyi lua kuluangana nalu mvita kabidi.’​—1 Petelo 3:11; Yeshaya 2:2-4.

Nzambi udi wanyisha ne ubenesha ntendelelu udi mushindamene pa bulelela, udi kayi wa lubombo ne mashimi. (Matayo 15:7-9; Yone 4:23, 24) Anu ntendelelu mulelela, udi umvuangana tshishiki ne Dîyi dia Nzambi, ke udi mua kupatula bantu badi mua kusomba mu ditalala ne mu buobumue, ne badi ne dinanga dia bushuwa dia umue ne mukuabu.​—Yone 13:35.

Bua kumanya bia bungi pa tshidi Dîyi dia Nzambi diamba bua ditalala dia buloba bujima, tudi tukulomba bua umonangane ne bapatudi ba tshikandakanda etshi.