“Kubuela mu mâyi manene mu tshikondo tshia tshipepele tshikole”

KUENAKU mua kumona bualu bua nunku bu muanda udi kauyi muakanyine, wa bupâle ne udi mua kufikisha ku kabutu anyi? Kadi, mu tshimfuanyi, bamue batu badibueja mu nsombelu wa mushindu’eu. Mu mushindu kayi nanku? Thomas Fuller, mufundi wa mu Angleterre wa mu siekele wa 17 wakamba ne: “Kuenji bualu nansha bumue pautshidi ne tshiji. Kudi bu kubuela mu mâyi manene mu tshikondo tshia tshipepele tshikole.”

Kuenza bualu kampanda pautshidi ne tshiji tshikole kudi mua kupatula bipeta bibi menemene. Bible udi ujadika bualu ebu pa kulonda muanda kampanda uvua muenzeke. Shimeona ne Lewi, bana ba Yakoba, nkambua wa kale, bakaditua mu tshinyangu ne tshiji tshikole bajinga kudisombuela bualu muanabu Dina uvua muenda nende masandi ku bukole. Tshipeta tshivua ne: bakashipa bantu ne bakapawula bintu bia bungi. Kabiena bikemesha muvua Yakoba mudiwule tshienzedi tshiabu tshibi, wamba ne: ‘Nuakuntatshisha, nuakumvuija bu tshintu tshibi munkatshi mua bena buloba.’​—Genese 34:25-30.

Mbia meji mudi Bible, Dîyi dia Nzambi, ulomba bua kuikala ne nsombelu mushilangane. Udi wamba ne: ‘Lekela kufua tshiji, upidie kuikala ne njiya. Kunyengabadi; bualu ebu budi mua kukuenzeja anu bualu bubi.’ (Musambu 37:8) Kulonda mubelu eu kudi mua kutuepula ku mpekatu minene.​—Muambi 10:4; tangila kabidi Nsumuinu 22:24, 25.