Udi muvuluke anyi?

Udiku muanyishe dibala dia nimero ya Tshibumba tshia Nsentedi ya matuku aa anyi? Nanku, tangila né udi mua kuandamuna nkonko idi ilonda eyi:

◻ Bua tshinyi tshiambilu tshia Paulo tshia: “milopo pa muaba wa Kristo” ntshiakanyine bena Kristo bela manyi? (2 Kolinto 5:20, NW)

Kale, bavua batuma milopo nangananga mu bikondo bia mvita bua kumona né kuvua mushindu wa kuyepuka. (Luka 14:31, 32) Bu mudi bantu bapange bupuangane bikale kule ne Nzambi, mmutume milopo yende miela manyi bua kumanyisha bantu malu adiye mulongolole bua kulengejangana nende, ibasengelela bua kukeba ditalala ne Nzambi.​—15/12, dibeji 18.

◻ Mmalu anayi kayi akakolesha ditabuja dia Abalahama?

Bua kumpala: wakaleja ditabuja diende kudi Yehowa pa kuteleja pavua Nzambi wakula (Ebelu 11:8); buibidi: ditabuja diende divua disuikila bikole ku ditekemena diende (Lomo 4:18); buisatu: misangu mivule Abalahama uvua wakula ne Yehowa; ne buinayi: Yehowa wakapesha Abalahama dikuatshisha pavuaye ulonda buludiki buende. Malu a muomumue adi mua kukolesha ditabuja dietu lelu’eu.​—1/1, mabeji 17, 18.

◻ Tshiambilu tshia: “Kutufidi mu ditetshibua” tshidi tshiumvuija tshinyi? (Matayo 6:13, MM)

Tudi tulomba Nzambi bua katulekedi tupona patudi batetshibue bua kubenga kumutumikila. Yehowa udi mua kutulombola bua katuteketshi ne bua Satana, “muena bubi,” katutshimunyi nansha. (1 Kolinto 10:13)​—15/1, dibeji 14.

◻ Ntshinyi tshidi muntu ne bua kuenza bua Nzambi kumubuikidilaye mibi?

Udi ne bua kutondela Nzambi bubi ne kuleja dinyingalala pamue ne ‘mamuma adi makanangane ne dikudimuna dia mutshima.’ (Luka 3:8) Lungenyi lua dinyingalala ne dijinga dia kulongolola tshilema nebitusake kabidi bua kukeba diambuluisha dia mu nyuma dia kudi bakulu bena Kristo. (Yakobo 5:13-15)​—15/1, dibeji 19.

◻ Bua tshinyi tudi ne bua kudienzeja bua kuikala bena budipuekeshi?

Muena budipuekeshi utu ne lutulu ne muoyo-mule, ne kêna udiangata ne mushinga mutambe kupita nansha. Budipuekeshi budi bukupetesha balunda balelela badi bakunange. Kupita apu, budi bukupetesha mabenesha a Yehowa. (Nsumuinu 22:4)​—1/2, dibeji 7.

◻ Ndishilangana dinene kayi didi pankatshi pa lufu lua Yezu ne lua Adama?

Lufu lua Adama luvua lumukumbanyine, bualu wakabenga kutumikila Mufuki wende ku budisuile. (Genese 2:16, 17) Kadi lufu lua Yezu kaluvua lumukumbanyine nansha kakese, bualu “kakenza bualu bubi.” (1 Petelo 2:22) Nenku, pakafua Yezu, uvua ne tshintu tshia mushinga mupite bunene tshivua Adama muenji wa mpekatu kayi natshi pakafuaye​—bukenji bua kuikala ne muoyo mupuangane wa bumuntu. Nenku, lufu lua Yezu luvua ne mushinga mu difila tshia-bupikudi bua bukua-bantu.​—15/2, mabeji 15, 16.

◻ Mu tshikena-kumona tshia Yehezekele, musoko udi tshimfuanyi tshia tshinyi?

Bu mudi musoko muikale munkatshi mua buloba bua tshianana (kabuyi bua tshijila), udi ne bua kuikala tshintu kampanda tshia pa buloba. Pa nanku, udi umueneka muikale tshimfuanyi tshia bulombodi bua pa buloba budi buambuluisha bonso badi benza nsangilu wa bantu bakane pa buloba.​—1/3, dibeji 18.

◻ Bua tshinyi Yezu wakowesha bayidi bende mâyi ku makasa pavuabu basekelela Pasaka mu 33 B.B.?

Yezu kavua ujadika tshilele tshia dioweshangana mâyi ku makasa to. Kadi uvua wambuluisha bapostolo bende bua bikale ne mmuenenu mupiamupia​—wa budipuekeshi ne budisuile bua kuenzela bana babu bena Kristo midimu mitambe kupuekela.​—1/3, dibeji 30.

◻ Patudi tulongesha bakuabu, ntshinyi tshidi ne mushinga wa bungi kupita makokeshi a ku tshilelelu?

Ngikadilu itudi nayi ne bibidilu bia mu nyuma bitudi nabi ke bidi balongi mua kuidikija. (Luka 6:40; 2 Petelo 3:11)​—15/3, mabeji 11, 12.

◻ Mmunyi mudi bangamba-malu ba patoke mua kulengeja dibala diabu dia Mifundu?

Pa kudibidija. Bushuwa, pa kubala ne dîyi dikole misangu ne misangu too ne pafikabu ku dibala kakuyi lutatu. Bikalaku bande ya dibala dia Bible mu muakulu wenu, mbimpe kuteleja tshikuma tshia mubadi ne mushindu udiye ushintulula dîyi, ne kulondesha mushindu udiye ushindumuna mêna ne miaku idi kayiyi ya pa tshibidilu.​—15/3, dibeji 20.

◻ Mmunyi mudi ‘mupuya wa muoyo [spiritu] upingana kudi Nzambi’ padi muntu ufua? (Muambi 12:7)

Bu mudi spiritu muikale bukole bua muoyo, udi ‘upingana kudi Nzambi’ mu ngumvuilu wa se: ditekemena dionso dia kupeta muoyo tshiakabidi bua muntu au didi mpindieu mu bianza bia Nzambi. Anu Nzambi ke udi mua kupingaja spiritu anyi bukole bua muoyo, kufikisha muntu au ku dipeta kabidi muoyo. (Musambu 104:30)​—1/4, dibeji 17.