Edi ke dituku dia lupandu!

“Monayi! Mpindieu ke tshikondo tshianyisha mu mushindu wa pa buawu. Monayi! Mpindieu ke dituku dia lupandu.”​—2 KOLINTO 6:2, NW.

1. Ntshinyi tshidi tshikengedibua bua kuikala ne nsombelu muanyisha kudi Nzambi ne Kristo?

YEHOWA mmulongolole dituku dia kulumbuluisha bukua-bantu. (Bienzedi 17:31) Bua diodi kuikala dituku dia lupandu buetu tuetu, bidi bitukengela kuikala ne nsombelu muanyisha kudiye ne kudi Yezu Kristo Mulumbuluishi udiye muteke. (Yone 5:22) Nsombelu wa nunku udi ulomba kuikala ne tshikadilu tshiumvuangane ne Dîyi dia Nzambi ne ditabuja didi ditusaka bua kuambuluisha bakuabu bua bikale bayidi balelela ba Yezu.

2. Bua tshinyi bukua-bantu budi kule ne Nzambi?

² Bua mpekatu mupiana, bukua-bantu budi kule ne Nzambi. (Lomo 5:12; Efeso 4:17, 18) Pa nanku, aba batudi tuyisha badi mua kupeta lupandu anu buobu balengejangane nende. Mupostolo Paulo wakatokesha bualu ebu pakafundilaye bena nkristo ba mu Kolinto. Tukonkononayi 2 Kolinto 5:10–6:10 bua kumona tshiakamba Paulo bua dilumbuluisha, dilengejangana ne Nzambi ne lupandu.

‘Tudi tuitabijija bantu’

3. Mmunyi muvua Paulo ‘witabijija bantu,’ ne bua tshinyi tudi ne bua kuenza muanda eu lelu?

³ Paulo wakasuikakaja dilumbuluisha ne diyisha pakafundaye ne: “Tudi ne bua kumueneka bonso patoke ku tshilumbuluilu tshia Kristo, bua muntu yonso apete difutu dia pa bualu buimpe nansha bubi buvuaye muenze . . . ne mubidi wende. Nenku bu mutudi bamanye mua kutshina Mfumu, tudi tukeba mua kuitabijija bantu.” (2 Bena Korente 5:10, 11, MMM) Mupostolo ‘uvua witabijija bantu’ pa kuyisha lumu luimpe. Bidi munyi buetu tuetu? Bu mutudi kumpala kua nshikidilu wa ndongoluelu eu mubi wa malu, tudi ne bua kuenza muetu muonso bua kuitabijija bakuabu bafike ku diela bidia bidi bikengedibua bua kuanyishibua kudi Yezu ne Yehowa Nzambi, Mpokolo wa lupandu.

4, 5. (a) Bua tshinyi katuena ne bua kuditumbisha bua malu atudi benze mu mudimu wa Yehowa? (b) Mmunyi muvua Paulo mufike ku diditumbisha “bua Nzambi”?

⁴ Kadi bikala Nzambi mubeneshe mudimu wetu, katuena ne bua kuditumbisha nansha. Mu Kolinto bamue bavua baditambisha buabu buobu anyi bua bantu bakuabu, nenku bakeba matapuluka mu tshisumbu. (1 Kolinto 1:10-13; 3:3, 4) Ne meji matuma ku nsombelu eu, Paulo wakafunda ne: ‘Katuena tudimanyisha kunudi tshiakabidi, kadi tudi tunupa bua kuditumbisha nabu bua bualu buetu, bua nuenu numanye mua kuitaba kudi bantu badi batumba mu malu adi amueneka ku mêsu, [kaayi] a mu mutshima. Bituikala ne meji matshimbakane, budi bua Nzambi; anyi bituikala ne mitshima mipole, budi bua bualu buenu.’ (2 Kolinto 5:12, 13) Bena diambu kabavua basanka bua kumona tshisumbu mu buobumue ne mu nsombelu muimpe wa mu nyuma. Bavua basue kuditumbisha bua malu avua amueneka ku mêsu pamutu pa kuambuluisha bena kuitabuja nabu bua kuikala ne mitshima mimpe kumpala kua Nzambi. Bua nanku, Paulo wakakanyina tshisumbu ne pashishe kuambaye ne: ‘Kadi muntu udi utumba, atumbile biende mu Mukalenge.’​—2 Kolinto 10:17.

⁵ Paulo muine kavua uditumbisha anyi? Bamue badi mua kuikala bele meji nanku bua tshiakambaye bua dikala mupostolo. Kadi uvua ne bua kuditumbisha “bua Nzambi.” Uvua uditumbisha bua bimanyinu bivua bimujadika bu mupostolo, bua bena Kolinto kabalekedi Yehowa nansha. Paulo wakenza nenku bua kubapingaja kudi Nzambi bualu bapostolo ba dishima bavua babatangija mu njila mubi. (2 Kolinto 11:16-21; 12:11, 12, 19-21; 13:10) Kadi misangu yonso Paulo kavua ukeba bua kukemesha muntu yonso ne malu avuaye muenze nansha.​—Nsumuinu 21:4.

Dinanga dia Kristo didi dikuenzeja anyi?

6. Mmunyi mudi dinanga dia Kristo ne bua kuikala ne buenzeji kutudi?

⁶ Bu muvuaye mupostolo mulelela, Paulo wakalongesha bakuabu bua mulambu wa tshia-bupikudi wa Yezu. Mulambu eu uvua ne buenzeji pa nsombelu wa Paulo, bualu wakafunda ne: ‘Dinanga dia Kristo didi dituenzeja; bua tuakajingulula bualu ebu ne: Bualu bua umue wakafuila bonso, nunku bonso bakafua; ne yeye wakafuila bonso bua badi ne muoyo kabikadi nawu bua bualu buabu nkayabu, kadi bikale nawu [bua] yeye wakafua ne wakabika ku lufu kabidi bua bualu buabu.’ (2 Kolinto 5:14, 15) Ndinanga kayipu divua Yezu muleje mu difila muoyo wende bua bualu buetu! Bushuwa didi ne bua kuikala ne bukole budi butuenzeja mu nsombelu wetu. Dianyisha kudi Yezu bua mudiye mufile muoyo wende bua bualu buetu didi ne bua kutusaka bua kuenza mudimu wa lukunukunu mu diyisha lumu luimpe lua lupandu lufila kudi Yehowa ku butuangaji bua Muanende munangibue. (Yone 3:16; fuanyikija ne Musambu 96:2.) ‘Dinanga dia Kristo’ didi dikuenzeja bua kudifila ne lukunukunu mu mudimu wa dimanyisha Bukalenge ne wa divuija bantu bayidi anyi?​—Matayo 28:19, 20.

7. ‘Kubenga kumanya bantu ku mubidi’ kudi kumvuija tshinyi?

⁷ Mu dikuata mudimu ne mioyo yabu mu mushindu udi uleja dianyisha bua tshidi Yezu mubenzele, bela manyi ‘kabatshiena ne muoyo bua bualu buabu nkayabu, kadi buende yeye.’ Paulo wakamba ne: ‘Nunku mu malu atshidi kumpala katuena bamanye bantu ku mibidi yabu; bituamana kumanya Kristo ku mubidi wende diambedi, katataka katuena bamumanye nunku kabidi.’ (2 Kolinto 5:16) Bena nkristo kabena ne bua kumuenena bantu mu mubidi, pamu’apa kuangata bena Yuda ne mushinga kupita Bampangano anyi babanji kupita balanda. Bela manyi ‘ki mbamanye bantu ku mibidi yabu,’ bualu malanda abu a mu nyuma ne bena kuitabuja nabu ke adi ne mushinga. Aba bavua ‘bamanye Kristo ku mubidi’ kabavua anu bantu bavua bamone Yezu pavuaye pa buloba to. Nansha muvua bamue bantu bavua batekemene Masiya bamone Yezu kale mu mubidi wende, kabavua mua kumumona kabidi to. Wakafila mubidi wende bu tshia-bupikudi ne uvua mubishibue bu spiritu udi ufila muoyo. Bakuabu bajula ku lufu bua kuikala ne muoyo mu diulu bavua ne bua kushiya mibidi yabu ya bumuntu kabayiku banji kumona Yezu Kristo mu mubidi.​—1 Kolinto 15:45, 50; 2 Kolinto 5:1-5.

8. Mmunyi mudi bantu bafike ku dikala ‘badisange ne Kristo’?

⁸ Muikale anu wambila bela manyi, Paulo udi usakidila ne: ‘Pikala muntu mudisange ne Kristo, udi tshifukibua tshipiatshipia; [“bintu bia,” NW] kale mbijimine, [“bintu,” NW] bipiabipia ke bidiku.’ (2 Bena Korente 5:17, MMM) Kuikala ‘mudisange ne Kristo’ kudi kumvuija kuikala nende mu buobumue. (Yone 17:21) Muntu wakafika ku dikala mu malanda aa pavua Yehowa mumukoke kudi Muanende ne mumulele ne spiritu munsantu. Bu muana wa Nzambi mulela ku spiritu, uvua “tshifukibua tshipiatshipia” muikale ne ditekemena dia kukokesha ne Kristo mu Bukalenge bua mu diulu. (Yone 3:3-8; 6:44; Galatia 4:6, 7) Mbapeshe bena nkristo aba bela manyi disanka dinene dia mudimu.

“Lengejanganayi ne Nzambi”

9. Ntshinyi tshidi Nzambi muenze bua bantu kufikabu ku dilengejangana nende?

⁹ Mmunyipu mudi Yehowa muanyishe “tshifukibua tshipiatshipia”! Paulo udi wamba ne: “Bionso ebi bidi bifuma kudi [“Nzambi,” NW] utudi balengejangane nende ku diambuluisha dia Kristo, mutupe mudimu wa kufikisha bakuabo ku dilengejangana. Bualu [“Nzambi,” NW] ke uvua mupingaje bantu kudiye bualu bua Kristo, kayi utangila kabidi bilema biabo; [“wakatupesha dîyi dia kulengejangana,” NW].” (2 Bena Korente 5:18, 19, MMM) Bukua-bantu budi kule ne Nzambi katshia Adama wenza mpekatu. Kadi ne dinanga dionso Yehowa wakela tshidia mu diunzulula njila wa kulengejangana nende ku diambuluisha dia mulambu wa Yezu.​—Lomo 5:6-12.

10. Mbanganyi badi Yehowa mupeshe mudimu wa dilengejangana nende, ne ntshinyi tshidibu benze bua kuukumbaja?

¹⁰ Yehowa mmupeshe bela manyi mudimu wa kulengejangana nende, ke bua tshinyi Paulo udi wamba ne: “Nenku tudi milopo pa muaba wa Kristo, bienze bu se: Nzambi udi usengelelangana ku butuangaji buetu. Bu bapinganyi pa muaba wa Kristo tudi tulomba ne: ‘Lengejanganayi ne Nzambi.’” (2 Kolinto 5:20, NW) Kale, bavua batuma milopo nangananga mu bikondo bia bimvundu bua kumona bikalaku kuvua mushindu wa kuepuka mvita. (Luka 14:31, 32) Bu mudi bantu bapange bupuangane bikale kule ne Nzambi, mmutume milopo yende miela manyi bua kumanyisha bantu malu adiye mulongolole bua kulengejangana nende. Bu bapinganyi pa muaba wa Kristo, bela manyi badi balomba ne: “Lengejanganayi ne Nzambi.” Disengelelangana edi mmubelu wa luse bua kukeba ditalala ne Nzambi ne kuitaba lupandu ludiye ufila ku butuangaji bua Kristo.

11. Bua ditabuja mu tshia-bupikudi, mbanganyi badi ndekelu wa bionso bafike ku dipeta nsombelu muakane kumpala kua Nzambi?

¹¹ Bantu bonso badi baleja ditabuja mu tshia-bupikudi badi mua kulengejangana ne Nzambi. (Yone 3:36) Paulo udi wamba ne: ‘Yeye [Yezu] nguakadi kayi mumanye bubi, Nzambi wakamuvuija bubi bua bualu buetu; bua tuetu tuikale buakane bua Nzambi [“ku diambuluisha,” NW] diende.’ (2 Kolinto 5:21) Muntu mupuangane Yezu uvua mulambu mufila bua mpekatu ya bana bonso ba Adama badi bapikudibua ku dikala bena mpekatu dia ku tshilelelu. Badi balua “buakane bua Nzambi” ku diambuluisha dia Yezu. Buakane ebu, anyi nsombelu muakane kumpala kua Nzambi, budi bulua bangabanga kudi bantu 144 000 bapianyi pamue ne Kristo. Mu Bukokeshi buende bua Bidimu Tshinunu, bana ba pa buloba ba Yezu Kristo, Tatu wa Tshiendelele nebapete nsombelu muakane bu bantu bapuangane. Neabafikishe ku nsombelu muakane mu bupuangane bua bamone mua kudileja bena lulamatu kudi Nzambi ne kupeta dipa dia muoyo wa kashidi.​—Yeshaya 9:6; Buakabuluibua 14:1; 20:4-6, 11-15.

“Tshikondo tshianyisha mu mushindu wa pa buawu”

12. Mmudimu kayi wa mushinga udibu bakumbaja kudi milopo ne batumibue ba Yehowa?

¹² Bua kupeta lupandu, tudi ne bua kuenza malu mumvuangane ne mêyi a Paulo aa: “Tuenza mudimu pamue nende [Yehowa], tudi kabidi tunusengelela bua kanuitabi bulenga bua Nzambi bukena butuakanyine ne kupanga tshipatshila tshiabu. Bualu udi wamba ne: ‘Mu tshikondo tshianyisha ngakakuteleja, ne mu dituku dia lupandu ngakakuambuluisha.’ Monayi! Mpindieu ke tshikondo tshianyisha mu mushindu wa pa buawu. Monayi! Mpindieu ke dituku dia lupandu.” (2 Kolinto 6:1, 2, NW) Milopo miela manyi ya Yehowa ne batumibue bende “mikoko mikuabo,” kabena bitaba bulenga bukena bubakanyine bua Tatuabu wa mu diulu ne bapanga tshipatshila tshiabu to. (Yone 10:16) Ku tshikadilu tshiabu tshiakane ne ku mudimu wabu wa lukunukunu mu “tshikondo tshianyisha,” badi bakeba dianyisha dia kudi Nzambi ne badi bamanyisha bantu badi basombe pa buloba ne: edi ke “dituku dia lupandu.”

13. Yeshaya 49:8 udi umvuija tshinyi, ne mmunyi muakakumbanaye musangu wa kumpala?

¹³ Paulo udi utela Yeshaya 49:8, utudi tubala ne: ‘Yehowa udi wamba dîyi edi ne: Mu tshikondo tshia diakalengele ngakitaba kuudi, ne mu dituku dia lupandu ngakakukuatshisha; [ngakatungunuka ne] kukulama [bua] nkufile kudi bantu bu tshipungidi tshiabu, bua kujadika buloba, bua kubapesha mapianyi akadi mashale makolo.’ Mulayi eu wakakumbana kumpala pakapatuka bena Izalele mu bupika mu Babilone ne kupinganabu pashishe mu buloba buabu bunyangakaja.​—Yeshaya 49:3, 9.

14. Mmunyi muvua Yeshaya 49:8 mukumbanyine mu Yezu?

¹⁴ Mu dikumbana dikuabu dia mulayi wa Yeshaya, Yehowa wakafila “musadidi” wende Yezu bu “butoke bua bukua bisamba, bua kufikisha lupandu [lua Nzambi] too ne ku ntengu ya buloba.” (Yeshaya 49:6, 8, MMM; fuanyikija ne Yeshaya 42:1-4, 6, 7; Matayo 12:18-21.) Bushuwa “tshikondo tshia diakalengele,” anyi “tshikondo tshianyisha” tshivua tshitangila Yezu pavuaye pa buloba. Wakasambila, ne Nzambi ‘wakitaba kudiye.’ Adi diakamueneka dikale “dituku dia lupandu” bua Yezu bualu wakalama muoyo-mutoke mupuangane ne nenku ‘kuluaye muenzeji wa lupandu lua tshiendelele kudi bonso badi bamutumikila.’​—Ebelu 5:7, 9; Yone 12:27, 28.

15. Nkubangila mu tshikondo kayi mudi bena Izalele wa mu nyuma badienzeje bua kudileja bakumbanyine bulenga bua Nzambi bukena butuakanyine, ne bavua ne tshipatshila kayi?

¹⁵ Paulo udi utumika ne Yeshaya 49:8 bua bena nkristo bela manyi, ubasengelela ‘bua kabapangidi tshipatshila tshia bulenga bua Nzambi bukena butuakanyine’ pa kubenga mua kukeba diakalengele diende mu “tshikondo tshianyisha” ne mu “dituku dia lupandu” didiye ufila. Paulo udi usakidila ne: “Monayi! Mpindieu ke tshikondo tshianyisha mu mushindu wa pa buawu. Monayi! Mpindieu ke dituku dia lupandu.” (2 Kolinto 6:2, NW) Katshia mu Pentekoste wa mu 33 B.B., bena Izalele wa mu nyuma mbadienzeje bua kudileja bakumbanyine bulenga bua Nzambi bukena butuakanyine bua “tshikondo tshianyisha” tshikale “dituku dia lupandu” buabu buobu.

‘Tudimanyishayi bu bena mudimu ba Nzambi’

16. Mmu nsombelu kayi ya lutatu muvua mupostolo Paulo mudimanyishe bu muena mudimu wa Nzambi?

¹⁶ Bamue bantu bakadisangisha ne tshisumbu tshia mu Kolinto kabavua badileje bakumbanyine bulenga bua Nzambi bukena butuakanyine nansha. Bavua bashiminyina Paulo malu ne tshipatshila tshia kunyanga bukokeshi buende bu mupostolo, nansha muvuaye wepuka bua ‘kulenduisha muntu mu bualu.’ Bushuwa wakadimanyisha bu muena mudimu wa Nzambi ‘mu ditantamana dia bungi, ne mu makenga, ne mu malu avua mamukolele, ne mu tunyinganyinga; ne mu mibundabunda, ne mu nzubu ya lukanu, ne mu mayoyo, ne mu midimu mikole, ne mu kutentekela, ne mu kujila kua biakudia.’ (2 Kolinto 6:3-5) Pashishe, Paulo wakelangana meji ne: bikala baluishi bende bavua bena mudimu, yeye uvua “mubatambe” bua maloko, dipangila dia bintu, mitutu ne njiwu.​—2 Kolinto 11:23-27.

17. (a) Tudi mua kudimanyisha bu bena mudimu ba Nzambi mu dileja ngikadilu kayi? (b) “Bia-mvita bia buakane” mbinganyi?

¹⁷ Anu bu Paulo ne banyanende, tudi mua kudimanyisha bu bena mudimu ba Nzambi. Mushindu kayi? “Mu bukezuke” anyi bunonoke, ne mu dienza malu mumvuangane ne dimanya dijalame dia mu Bible. Tudi mua kudimanyisha “ku muoyo-mule,” pa kutantamena malu mabi anyi mayobo ne lutulu, ne “ku bulenga” patudi tuenza malu adi ambuluisha bakuabu. Kupita apu, tudi mua kudimanyisha bu bena mudimu ba Nzambi pa kuitaba buludiki bua spiritu wende, kuleja “dinanga kadiyi ne lubombo,” kuamba bulelela, ne kueyemena Nzambi bua kupeta bukole bua kukumbaja nabu mudimu wende. Bidi bisankisha muvua Paulo mufile bijadiki bia muaba wende mu mudimu “ku diambuluisha dia bia-mvita bia buakane ku tshianza tshia balume ne ku tshia bakaji.” Mu mvita ya kale, pa tshibidilu tshianza tshia balume tshivua tshitula muele eku tshia bakaji tshikuate ngabu. Mu diluangana mvita ya mu nyuma ne balongeshi ba dishima, Paulo kakenza mudimu ne bia-mvita bia mubidi wa mpekatu nansha​—bu mudi malu makondakane ne a muinshimuinshi, ne mashimi. (2 Kolinto 6:6, 7, NW; 11:12-14; Nsumuinu 3:32) Wakenza mudimu ne “bia-mvita” anyi mishindu miakane, bua kutuma ntendelelu mulelela kumpala. Ke mutudi ne bua kuenza petu.

18. Bituikala bena mudimu ba Nzambi, netuikale ne nsombelu wa mushindu kayi?

¹⁸ Bituikala bena mudimu ba Nzambi, netuikale ne nsombelu wa buena wa Paulo ne benzejanganyi nende ba mudimu. Netuenze malu bu bena nkristo nansha bantu batunemeka anyi batupetula. Malu mabi adibu batuamba kaakuimanyika mudimu wetu wa buambi nansha, peshi katuakulua bena diambu bu buobu mua kututua makumbu. Netuambe bulelela ne kabidi bantu badi mua kutuanyisha bua midimu mimpe itudi tuenza. Patudi mu njiwu ya lufu bua mvita mituela kudi baluishi, netueyemene Yehowa. Ne netuitabe dikela ne dianyisha dionso.​—2 Kolinto 6:8, 9.

19. Mmunyi mutudi mua ‘kuvuija ba bungi babanji’ mu nyuma?

¹⁹ Mu dijikija muyuki wende wa mudimu wa kulengejangana, Paulo wakakula buende yeye ne bua binende ‘bu badi ne kanyinganyinga ka mutshima, kadi bikale basanka misangu yonso; bu bapele, kadi bikale bavuija ba bungi babanji; bu badi kabayi ne bintu, kadi bikale ne bintu bionso.’ (2 Kolinto 6:10) Nansha muvua bena mudimu abu bikale ne kabingila ka kubungama bua makenga abu, bavua ne disanka mundamunda. Bavua bapele ku mubidi, kadi bavua ‘bavuije ba bungi babanji’ mu nyuma. Bushuwa, ‘bavua ne bintu bionso’ bualu ditabuja diabu diakabapesha bubanji bua mu nyuma​—bu mudi mene ditekemena dia kulua bana ba Nzambi ba mu diulu. Ne bavua ne nsombelu mulenga ne wa disanka bu bena mudimu bena nkristo. (Bienzedi 20:35) Bu buobu, tudi mua ‘kuvuija ba bungi babanji’ mu dienza mudimu wa kulengejangana kubangila anu ku mpindieu​—mu dituku edi dia lupandu!

Eyemena lupandu lua kudi Yehowa

20. (a) Ndijinga kayi dikole divua nadi Paulo, ne bua tshinyi kakuvua dîba dia kujimija? (b) Ntshinyi tshidi tshileja dituku dia lupandu ditudi mpindieu?

²⁰ Pavua Paulo mufundile bena Kolinto mukanda wende muibidi bu mu 55 B.B., kuvua kushale anu bidimu 15 bua ndongoluelu wa malu wa bena Yuda kufika ku ndekelu. Ne muoyo mujima mupostolo uvua musue bua bena Yuda ne Bampangano balengejangane ne Nzambi ku butuangaji bua Kristo. Adi divua dituku dia lupandu, ne kakuvua dîba dia kujimija nansha. Bushuwa, tudi bikale ku nshikidilu wa muomumue wa ndongoluelu wa malu katshia mu 1914. Mudimu wa diyisha Bukalenge pa buloba bujima udi wenzeka mpindieu udi uleja dituku edi bu dia lupandu.

21. (a) Mmvese kayi utudi basungule bua tshidimu tshia 1999? (b) Ntshinyi tshitudi ne bua kuikala tuenza mu dituku edi dia lupandu?

²¹ Bantu ba bisamba bionso badi bajinga kuteleja malu adi atangila ndongoluelu wa Nzambi bua dipeta lupandu ku butuangaji bua Yezu Kristo. Kakuena dîba dia kujanguluka nansha. Paulo wakafunda ne: “Monayi! Mpindieu ke dituku dia lupandu.” Mêyi au a mu 2 Kolinto 6:2 (NW) neikale mvese wa tshidimu tshia 1999 bua Bantemu ba Yehowa. Bushuwa mêyi aa mmakanyine bualu tudi kumpala kua muanda mutambe bubi kupita mene kabutu ka Yeruzaleme ne ntempelo wende. Kumpala kuetu kudi nshikidilu wa ndongoluelu eu mujima wa malu. Nshikidilu eu udi utangila muntu yonso udi pa buloba. Mpindieu​—ki mmakelela nansha—​ke tshikondo tshia kuenza bualu. Bituitaba ne: lupandu ludi lufumina kudi Yehowa, bituamunanga, ne bituangata muoyo wa tshiendelele ne mushinga, katuakupanga tshipatshila tshia bulenga bua Nzambi bukena butuakanyine. Bikale ne dijinga dikole dia kutumbisha Yehowa, netuleje ku mêyi ne ku bienzedi ne: tudi bushuwa bumvue bualu ebu patudi tuamba ne: “Monayi! Mpindieu ke dituku dia lupandu.”

Newandamune munyi?

◻ Bua tshinyi kulengejangana ne Nzambi kudi ne mushinga wa bungi?

◻ Milopo ne batumibue badi baditue mu mudimu wa dilengejangana mbanganyi?

◻ Mmunyi mutudi mua kudimanyisha bu bena mudimu ba Nzambi?

◻ Mvese wa tshidimu tshia 1999 wa Bantemu ba Yehowa udi umvuija tshinyi buebe wewe?

[Bimfuanyi mu dibeji 17]

Bu Paulo, utu uyisha ne lukunukunu ne wambuluisha bakuabu bua kulengejanganabu ne Nzambi anyi?

États-Unis

France

Côte d’Ivoire

[Tshimfuanyi mu dibeji 18]

Mu dituku edi dia lupandu, udi munkatshi mua misumba idi yenda ilengejangana ne Yehowa Nzambi anyi?