Lupandu ludi lufuma kudi Yehowa
“Nzambi mulelela udi buetu tuetu Nzambi wa bienzedi bia lupandu.”—MUSAMBU 68:20, NW.
1, 2. (a) Bua tshinyi tudi mua kuamba ne: Yehowa m’Mpokolo wa lupandu? (b) Mmunyi muudi mua kumvuija Nsumuinu 21:31?
YEHOWA m’Mupandishi wa bantu badi bamunange. (Yeshaya 43:11) Davidi, Mukalenge muende lumu wa Izalele, uvua mumanyine bualu ebu ku bivuaye mudimuene nkayende, ne wakimba ne muoyo mujima ne: ‘Lupandu ludi lufuma kudi Yehowa.’ (Musambu 3:8) Muprofete Yona wakenza mudimu ne mêyi a muomumue mu disambila diende dienza ne disuminyina pavuaye munda mua mushipa munene.—Yona 2:9.
2 Solomo muana wa Davidi uvua kabidi mumanye ne: Yehowa ke Mpokolo wa lupandu, bualu wakamba ne: ‘Badi basuikila kabalu bintu bia mvita dituku dia kuluangana, kadi lupandu lulualua kudi Yehowa.’ (Nsumuinu 21:31) Ku Moyen-Orient wa kale, ngombe ivua ikoka nkasu ya kudima nayi, mpunda ivua yambula majitu, ne bantu bavua bendelapu, ne bavua batumika ne tubalu mu mvita. Kadi kumpala kua bena Izalele kubuelabu mu Buloba Bulaya, Nzambi wakatuma dîyi ne: muntu uvua ne bua kulua mukalenge wabu ‘kavua ne bua kudikumbajila tubalu tua bungi’ nansha. (Dutelonome 17:16) Tubalu tua mvita katuvua mua kuikala ne mushinga bualu Yehowa uvua ne bua kupandisha bantu bende.
3. Nnkonko kayi idi miakanyine bua tuetu kuyikonkonona?
3 Mukalenge Yehowa udi “Nzambi wa bienzedi bia lupandu.” (Musambu 68:20, NW) Bushuwa elu ndungenyi ludi lukolesha ku muoyo. Kadi ‘mbienzedi bia lupandu’ kayi bidi Yehowa muenze? Ne nnganyi udiye mupandishe?
Yehowa udi upandisha bantu bakane
4. Mmunyi mutudi bamanye ne: Yehowa udi upandisha bantu bimpe?
4 Bonso badi ne nsombelu muakane bu basadidi ba Nzambi badilambule badi mua kupeta busambi mu mêyi a mupostolo Petelo a se: “Yehowa mmumanye mua kupikula bantu bena bulamate kudi Nzambi mu diteta, kadi mmumanye mua kulama bantu bakena bakane bua dituku dia dilumbuluisha bua kubabutula.” Muikale ujadika muanda eu, Petelo wakamba ne: Nzambi “kakadikanda bua kunyoka bulongolodi bua kale, kadi wakalama Nowa, muyishi wa buakane, ne bakuabu muanda-mutekete pakatumaye mvula wa kabutu pa buloba bua bantu babi.”—2 Petelo 2:5, 9, NW.
5. Mmu nsombelu kayi muvua Nowa muenze mudimu bu “muyishi wa buakane”?
5 Fuanyikija ne: udi mu nsombelu ivuaku mu matuku a Nowa. Ba-demon bavuale mibidi ya bantu badi pa buloba. Bana ba banjelu aba batomboke badi bakengesha bantu ne tshikisu, ne ‘buloba mbûle tente ne malu mabi.’ (Genese 6:1-12) Nansha nanku, kabena mua kuenzeja Nowa bua kulekelaye mudimu wa Yehowa to. Udi mene “muyishi wa buakane.” Yeye ne dîku diende badi benza buatu, ne badi ne dishindika dia se: nebumbushe bubi buobu batshikale ne muoyo. Ditabuja dia Nowa didi dipisha bulongolodi abu. (Ebelu 11:7) Nsombelu idiku lelu’eu mmifuanangane ne ya mu matuku a Nowa, ne idi ivuija matuku etu aa matuku a nshikidilu wa ndongoluelu eu mubi wa malu. (Matayo 24:37-39; 2 Timote 3:1-5) Nenku anu bu Nowa, neudileje muena lulamatu bu muyishi wa buakane, wenza mudimu pamue ne bantu ba Nzambi eku muindile lupandu kudi Yehowa anyi?
6. Mmunyi mudi 2 Petelo 2:7, 8 ujadika ne: Yehowa udi upandisha bantu bakane?
6 Petelo udi ufila tshijadiki tshikuabu tshia se: Yehowa udi upandisha bantu bakane. Udi wamba ne: ‘[Nzambi] wakasungila Lota, muntu muimpe, wakadi mubungame bua tshiendenda tshia bantu babi ba mu tshikondo tshiende; bualu bua muntu muimpe eu, wakadi ushikama munkatshi muabu, wakadi umona ne umvua malu aa ku dituku ku dituku. Nunku wakanyingalala bikole mu mutshima wende bua malu mabi akadibu benza.’ (2 Petelo 2:7, 8, MML; Genese 19:1-29) Mu matuku aa a ku nshikidilu, tshiendenda tshia masandi ntshilue mushindu wa nsombelu bua miliyo mivule ya bantu. Anu bu Lota, udi “mubungame bua tshiendenda” tshia bantu bapite bungi lelu’eu anyi? Biwikala mubungame, ne biwikala wenza malu a buakane, udi mua kuikala munkatshi mua bantu bapandisha Yehowa pabutulaye ndongoluelu eu mubi.
Yehowa udi usungila bantu bende ku tshianza tshia babakengeshi
7. Mmunyi mudi malu avua Yehowa muenzele bena Izalele mu Ejipitu ajadika ne: utu upikula bantu bende ku tshinyangu?
7 Patshidi anu ndongoluelu eu wa kale muikaleku, baluishi nebakengeshe ne nebanyaule basadidi ba Yehowa. Kadi badi mua kuikala bashindike ne: Yehowa neabapikule, bualu wakapandisha bantu bende bavuabu bakengesha kale. Fuanyikija ne: uvua muena Izalele ne badi bakukengesha kudi bena Ejipitu mu matuku a Mozese. (Ekesode 1:1-14; 6:8) Nzambi udi utumina bena Ejipitu bipupu bilondangane. (Ekesode 8:5–10:29) Padi tshipupu tshia lufu tshishipa banabute ba mu Ejipitu, Faraone udi witabila Izalele bua kuya, kadi panyima udi usangisha basalayi bende ne ubanga kulonda bena Izalele lubilu. Kadi katupa kîpi, yeye ne bantu bende badi bafua mu Mbuu Mukunze. (Ekesode 14:23-28) Wewe ne Mozese ne Izalele mujima nudi nuimba musambu eu: ‘Yehowa udi muena mvita; Yehowa ndîna diende. Wakela makalu a Palô ne bisumbu biende bionso mu mâyi manene, wakashipa tupita tuakasungulaye mu Dijiba Dikunze. Mâyi adi pa mutu pabu, bakadina mu mâyi a dijimba bu dibue.’ (Ekesode 15:3-5) Tshipupu tshia muomumue ntshindile bonso badi bakengesha bantu ba Nzambi mu matuku aa a ku nshikidilu.
8, 9. Ku diambuluisha dia mukanda wa Balumbuluishi, fila tshilejilu tshidi tshijadika ne: Yehowa utu usungila bantu bende ku tshianza tshia babakengeshi.
8 Bidimu bivule kunyima kua bena Izalele bamane kubuela mu Buloba Bulaya, banzuji ke bavua babalumbuluisha. Ku misangu bisamba bikuabu bivua bikengesha bantu ba Nzambi, kadi Nzambi uvua ukuata mudimu ne balumbuluishi bua kubapikula. Nansha mutudi mua ‘kutua mikemu [bia muomumue] padibu batukengesha ne batutatshisha,’ Yehowa neatupandishe kabidi bualu tudi basadidi bende ba bulamatshi. (Balumbuluishi 2:16-18; 3:9, 15) Bushuwa, mukanda wa mu Bible wa Balumbuluishi udi utupesha dishindika dia bualu ebu ne dia lupandu lutambe bunene luafila Nzambi ku diambuluisha dia Mulumbuluishi udiye muteke, Yezu Kristo.
9 Tupinganayi mu matuku a Mulumbuluishi Balaka. Bua ntendelelu wa dishima ne bua muvua Nzambi mubabenge, bena Izalele bavua benze bidimu 20 mu bukokeshi bua tshikisu bua Yabina, Mukalenge wa bena Kanâna. Sisela ke mfumu wa tshiluilu tshinene tshia bena Kanâna. Kadi ‘kakuena kumueneka nansha ngabu, nansha difuma munkatshi mua binunu makumi anayi bia bena Israele,’ nansha mudi tshisamba mua kuikala ne bantu batue ku miliyo inayi. (Baludiki 5:6-8, MMM) Bena Izalele badi badidila Yehowa muadi bikale banyingalala. Bu mudi Nzambi muleje ku butuangaji bua muprofete-mukaji Debola, Balaka udi usangisha balume 10 000 pa Mukuna wa Tabô, ne Yehowa udi unguija baluishi mu tshibanda kuinshi kua Tabô. Biluilu bia Sisela ne makalu ende a mvita 900 bidi bilua bienda bikungula mu mpata ne mu njila mukamakane wa musulu wa Kishona. Kadi mvula mukole udi udiundisha Kishona ne mâyi a bungi menemene. Padi Balaka ne bantu bende bapueka pa Mukuna wa Tabô kabayi bamueneka bua tshipepele tshikole tshidiku, badi bamona kabutu ka ku tshiji tshikole tshia Yehowa. Bantu ba Balaka badi bashipa bena Kanâna—bakuatshike buôwa bavua benda banyema—ku umue ku umue, ne muntu nansha umue kêna upanduka. Ndidimuija kayipu bua batukengeshi badi bela meji ne: badi baluisha Nzambi!—Balumbuluishi 4:3-16; 5:19-22.
10. Bua tshinyi tudi mua kuikala bashindike ne: Nzambi neasungile basadidi bende ba matuku etu aa ku tshianza tshia bonso badi babakengesha?
10 Yehowa neasungile basadidi bende ba matuku etu aa ku tshianza tshia baluishi babu badi babakengesha, anu bu muakapandishaye bena Izalele bavua bamutshina mu bikondo bia njiwu. (Yeshaya 43:3; Yelemiya 14:8) Nzambi wakapikula Davidi ‘mu bianza bia bantu bakadi nende lukuna.’ (2 Samuele 22:1-3) Nenku nansha buobu batusubisha anyi batukengesha bua mutudi bantu ba Yehowa, tuikalayi ne dikima, bualu Masiya Mukalenge wende neatupikule ku tshinyangu. Bushuwa, ‘neasungile mioyo ya bakengi. Neapikule mioyo yabu ku tshinyangu ne malu makole.’ (Musambu 72:13, 14) Bushuwa bupikudi abu bukadi pabuipi.
Nzambi udi upandisha bantu badi bamueyemena
11. Ntshilejilu kayi tshia dieyemena Yehowa tshiakafila nsonga Davidi?
11 Bua kumona lupandu lua Yehowa, tudi ne bua kumueyemena ne dikima. Davidi wakeyemena Nzambi ne dikima pakayaye bua kuluangana ne Goleyata muntu wa mpolondo. Ela meji: muena Peleshete au wa kafiondo mmuimane kumpala kua nsonga Davidi, udi wela lubila ne: ‘Wewe udi ulua kundi ne muele wa mvita ne difuma ne difuma dia kabenda, kadi meme ndualua kuudi mu dîna dia Yehowa, Nzambi wa bena mvita ba bena Izalele uwakufunyina bulobo kumpala kuende. Yehowa neakufile mu tshianza tshianyi lelu’eu: nenkushipe, nenkutule mutu webe; nendishe nyunyu ya muulu ne nyama ya mu tshisuku bitalu bia bena mvita ba bena Peleshete lelu; bantu bonso ba pa buloba nebamanye ne: Nzambi udi munkatshi mua bena Izalele bulelela; ne bantu bonso ba mu tshisumbu etshi nebamanye ne: Yehowa kêna usungila bantu bua muele wa mvita ne bua difuma, bualu bua mvita idi mu bianza bia Yehowa.’ Mutantshi mukese Goleyata mmufue, ne badi batshimuna bena Peleshete. Bushuwa Yehowa wakapandisha bantu bende.—1 Samuele 17:45-54.
12. Bua tshinyi bidi mua kuambuluisha bua kuvuluka Eleazâ muena bukole wa Davidi?
12 Patudi kumpala kua batukengeshi, pamu’apa bidi bitukengela “kusangisha dikima” ne kutamba kueyemena Nzambi tshishiki. (Yeshaya 46:8-13, NW; Nsumuinu 3:5, 6) Tangila bualu buakenzeka muaba udibu babikila ne: Pasa-damima. Izalele mmunyeme kumpala kua basalayi bena Peleshete. Kadi buôwa kabuena bupangisha Eleazâ tshia kuenza nansha. Yeye ng’umue wa ku bantu basatu ba Davidi ba bukole bua pa buabu. Udi wimana muaba wende mu budimi bua orge ne yeye nkayende udi ushipa bena Peleshete ne muele. Nenku ‘Yehowa udi usungila Izalele ne lupandu lunene.’ (1 Kulondolola 11:12-14; 2 Samuele 23:9, 10) Kakuena muntu udi wela meji ne: tudi mua kutshimuna tuetu nkayetu tshiluilu tshia basalayi. Pabi, imue misangu tudi mua kuikala nkayetu padibu batukengesha kudi baluishi. Ne muoyo mujima netueyemene Yehowa, Nzambi wa bienzedi bia lupandu anyi? Netukebe diambuluisha diende bua kuepuka diela bena kuitabuja netu patoke kumpala kua batukengeshi anyi?
Yehowa udi upandisha balami ba muoyo-mutoke
13. Bua tshinyi bivua bikole bua kulama muoyo-mutoke kumpala kua Nzambi mu bukalenge bua bisa dikumi bua Izalele?
13 Bua kupeta lupandu lua Yehowa, tudi ne bua kulama muoyo-mutoke kumpala kuende nansha bia munyi. Bantu ba Nzambi ba mu bikondo bia kale bakapeta ntatu kabukabu. Ela meji bua biuvua mua kuikala mumone bu wewe muikale ne muoyo mu bukalenge bua bisa dikumi bua Izalele. Tshikisu tshia Robowame tshiakasaka bisa dikumi bua kubenga kumutua kabidi nyama ku mikolo ne biakenza bukalenge bua Izalele bua ku Nord. (2 Kulondolola 10:16, 17; 11:13, 14) Ku bakalenge bende ba bungi, Yehu ke uvua mutambe buimpe, kadi nansha yeye ‘kakatamba kuenda mu njila wa mikenji ya Yehowa ne mutshima wende wonso’ to. (2 Bakelenge 10:30, 31) Nansha nanku, mu bukalenge bua bisa dikumi muvua balami ba muoyo-mutoke. (1 Bakelenge 19:18) Bakaleja ditabuja kudi Nzambi, ne Nzambi uvua nabu. Nansha ditabuja diebe dikale mu mateta, udi mulame muoyo-mutoke kumpala kua Yehowa anyi?
14. Mmunyi muvua Yehowa mupandishe bantu bende mu matuku a Mukalenge Hezikiya, ne ntshinyi tshiakafikisha bena Babilone ku ditshimuna Yuda?
14 Dibenga kuteleja Mikenji ya Nzambi divua ditangalake diakafikisha bukalenge bua Izalele ku dikenga. Pakabutshimuna bena Assyrie mu 740 K.B.B., kakuyi mpata bantu ba mu bisa dikumi bia bukalenge ebu bakanyemena mu bukalenge bua Yuda bua bisa bibidi, muvuabu mua kutendelela Yehowa mu ntempelo wende. Banayi ba ku bakalenge ba Yuda 19 ba mu mulongo wa Davidi—Asa, Yehoshafata, Hezikiya ne Yoshiya—bavua balamate Yehowa mu mushindu wa pa buawu. Mu matuku a Hezikiya, mulami wa muoyo-mutoke, bena Assyrie bakalua kuluisha Yuda ne tshiluilu tshikole. Mu diandamuna ku malomba a Hezikiya, Nzambi wakenza mudimu ne muanjelu umue patupu bua kushipa bena Assyrie 185 000 butuku bumue tshianana, nenku kupeshaye batendeledi Bende lupandu! (Yeshaya 37:36-38) Pashishe, bua dipanga kulama Mikenji dia bantu ne dibenga kuteleja madimuija a baprofete ba Nzambi, bena Babilone bakafika ku ditshimuna Yuda ne ku dibutula Yeruzaleme tshimenga tshiende tshikulu, ne ntempelo mu 607 K.B.B.
15. Bua tshinyi bena Yuda bena tshimuangi bavua bakengela ditantamana mu Babilone, ne mmunyi muvua Yehowa mubapikule ndekelu wa bionso?
15 Bena Yuda bena tshimuangi bavua bakengela ditantamana bua kumona mua kulama muoyo-mutoke kumpala kua Nzambi pavuabu mu bupika mu Babilone munkatshi mua bidimu bia dibungama bitue ku 70. (Musambu 137:1-6) Mulami wa muoyo-mutoke mumanyike uvua muprofete Danyele. (Danyele 1:1-7; 9:1-3) Ela meji bua disanka divuaye nadi pakatumikilabu dîyi divua Sirise Mukalenge wa bena Perse mutume mu 537 K.B.B., upesha bena Yuda dianyisha dia kupingana mu Yuda bua kuibakulula ntempelo. (Ezela 1:1-4) Danyele ne bakuabu bavua batantamane munkatshi mua bidimu bia bungi, kadi ndekelu wa bionso bakamona ditonkoka dia Babilone ne bupikudi bua bantu ba Yehowa. Muanda eu udi ne bua kutuambuluisha bua kuleja ditantamana bu mutudi bindile kabutu ka ‘Babilone Munene,’ nsangilu wa bitendelelu bia dishima bia buloba bujima.—Buakabuluibua 18:1-5.
Misangu yonso Yehowa utu upandisha bantu bende
16. Mmunyi muakapandisha Nzambi bantu bende mu matuku a Mukalenge-mukaji Estere?
16 Misangu yonso Yehowa utu upandisha basadidi bende padibu bashale balamate dîna diende. (1 Samuele 12:22; Yeshaya 43:10-12) Tupingane mu matuku a Mukalenge-mukaji Estere—mu siekele muitanu K.B.B. Mukalenge Ahashawelosha (Xerxès I) mmuteke Hamana bu kavula-mbedi. Muikale ne tshiji bua mudi Môdekayi muena Yuda mubenge bua kumutuila binu, Hamana udi umuelela tshifufu bua kumushipa yeye ne bena Yuda bonso ba mu Ampire wa bena Perse. Udi wamba mudibu bashipi ba mikenji, usua kufila makuta bua kusaka mukalenge ku ditaba bualu ebu, ne udi upeta dianyisha dia kuenza mudimu ne mpeta wa mukalenge bua kutua tshitampi pa mukanda udi ufila bukenji bua kubashipa. Ne dikima Estere udi usokoluela mukalenge mudiye muena Yuda ne utandula tshifufu tshia Hamana tshia kushipangana. Mutantshi mukese badi bowela Hamana ku mutshi muine uvuaye mulongolole bua kushipelaku Môdekayi. Badi bateka Môdekayi kavula-mbedi, ne bapesha bena Yuda bukenji bua kudisungila. Bushuwa badi batshimuna baluishi babu. (Esetê 3:1–9:19) Muanda eu udi ne bua kukolesha ditabuja dietu dia se: Yehowa neenze malu a lupandu bua kupandisha basadidi bende bena butumike ba mu matuku etu aa.
17. Mmunyi muvua butumike buikale ne mushinga mu dipanduka dia bena nkristo bena Yuda ba mu siekele wa kumpala bavua basombele mu Yudeya?
17 Kabingila kakuabu kadi Nzambi upandishila bantu bende kadi se: badi bamutumikila yeye ne Muanende. Ditekabi pa muaba wa bayidi ba Yezu bena Yuda ba mu siekele wa kumpala. Yezu udi ubambila ne: “Panuamona tshimenga tshia Yeruzaleme tshijingila kudi biluilu bia mvita, numanye ne: kabutu katshio kadi pabuipi. Diba adio, bantu bikala mu Yudeya banyeme, baye ku mikuna.” (Lukase 21:20-22, MMM) Bidimu bidi bipita, ne udi udiebeja dîba diakumbana mêyi aa. Pashishe mu 66 B.B. bena Yuda badi batomboka. Basalayi bena Roma balombola kudi Cestius Gallus badi bajingila Yeruzaleme ne basemena too ne ku bimanu bia ntempelo. Diakamue, bena Roma badi bapingana kakuyi tshidibu bayila tshimanyike. Bena nkristo bena Yuda nebenze tshinyi? Mu mukanda wende kampanda (Ecclesiastical History [Mukanda III, nshapita V, 3]), Eusèbe udi wamba ne: bakanyema mu Yeruzaleme ne mu Yudeya. Bakapanduka bualu bakatumikila didimuija dia tshiprofete dia Yezu. Utu ne lukasa lua kutumikila buludiki bua mu Mifundu bufila ku butuangaji bua “mulami wa lulamatu” muteka pa mutu pa “bintu” bia Yezu anyi?—Luka 12:42-44, NW.
Lupandu ludi lufikisha ku muoyo wa kashidi
18, 19. (a) Lufu lua Yezu luakunzulula njila wa lupandu kayi, ne bua banganyi? (b) Ntshinyi tshivua mupostolo Paulo mupangadije bua kuenza?
18 Diteleja didimuija dia Yezu diakapandisha mioyo ya bena nkristo bena Yuda ba mu Yudeya. Kadi lufu lua Yezu ke luakunzuila “bantu bonso” njila wa lupandu ludi lufikisha ku muoyo wa kashidi. (1 Timote 4:10) Bukua-bantu buakatuadija kukengela tshia-bupikudi pakenza Adama mpekatu, kujimijaye muoyo wende yeye ne kusumbishaye bukua-bantu mu bupika bua mpekatu ne lufu. (Lomo 5:12-19) Milambu ya nyama mifila mu Mikenji ya Mozese ivua anu dibuikila mpekatu dia pa mutu pa mutu. (Ebelu 10:1-4) Bu muvua Yezu kayi mulela kudi tatu wa pa buloba, ne spiritu munsantu ‘mubuikile [Mariya] bu ditutu’ katshia ku dîba diakimitaye too ne ku diledibua dia Yezu, uvua muledibue kayi mupiane mpekatu anyi dipanga bupuangane. (Luka 1:35; Yone 1:29; 1 Petelo 1:18, 19) Pakafua Yezu bu muntu mupuangane mulami wa muoyo-mutoke, wakafila muoyo wende mupuangane bua kusumba ne kupikula bukua-bantu. (Ebelu 2:14, 15) Nenku Kristo “wakadifila bu tshia-bupikudi tshiakanangane bua bonso.” (1 Timote 2:5, 6, NW) Bantu bonso kabakupetela masanka ku ndongoluelu eu wa lupandu nansha, kadi Nzambi udi wanyisha bua kufila mabenesha a tshia-bupikudi etshi kudi aba badi batshitaba ne ditabuja dionso.
19 Pa kuleja mushinga wa mulambu wa tshia-bupikudi tshiende kudi Nzambi mu diulu, Kristo wakasumba ndelanganyi ya Adama. (Ebelu 9:24) Nenku Yezu udi upeta Mukaji, muenza ne balondi bende bela manyi 144 000 bajula ku lufu bua kupeta muoyo mu diulu. (Efeso 5:25-27; Buakabuluibua 14:3, 4; 21:9) Udi kabidi ulua “Tatu wa Tshiendelele” bua bantu badi bitaba mulambu wende ne bapeta muoyo wa kashidi pa buloba. (Yeshaya 9:6, 7; 1 Yone 2:1, 2) Nndongoluelu kayipu wa dinanga! Dianyisha dia Paulo bua ndongoluelu eu ndimueneke patoke mu mukanda wende muibidi mupudija ku spiritu uvuaye mutumine bena nkristo ba mu Kolinto, anu bu mualeja tshiena-bualu tshidi tshilonda. Bushuwa, Paulo uvua mupangadije bua kubenga kulekela tshintu nansha tshimue tshimupangisha bua kuambuluisha bantu bua bapetele masanka ku ndongoluelu mulenga wa Yehowa wa lupandu ludi lufikisha ku muoyo wa kashidi.
Newandamune munyi?
◻ Ntshijadiki kayi tshia mu Mifundu tshidi tshileja ne: Nzambi udi upandisha bantu bende bakane?
◻ Mmunyi mutudi bamanye ne: Yehowa udi upandisha bantu badi bamueyemena ne balama muoyo-mutoke wabu?
◻ Nndongoluelu kayi udi Nzambi muenze bua lupandu ludi lufikisha ku muoyo wa kashidi?
[Tshimfuanyi mu dibeji 12]
Davidi wakeyemena Yehowa, “Nzambi wa bienzedi bia lupandu.” Kadi wewe?
[Tshimfuanyi mu dibeji 15]
Yehowa utu amu usungila bantu bende, bu muakenzaye mu matuku a Mukalenge-mukaji Estere