Ditshimuna malu mabi

‘MBUA eu mufue udi ne bua kupenda mukalenge wanyi nunku bua tshinyi? Ndi nkusengelela ne: witabuje bua meme kuya kudiye bua kukosa mutu wende.’ Dilomba edi divua dia Abishai, mfumu wa tshiluilu muena Isalele. Wakamba nenku ne tshiji pakumvuaye bapenda mfumuende Mukalenge Davidi kudi Shimei, muena Benyamina.​—2 Samuele 16:5-9.

Abishai uvua ulonda lungenyi ludi nalu bantu ba bungi lelu’eu​—lua kupingaja bubi ku bubi. Bushuwa, Abishai uvua musue kushipa Shimei bua bipendu bivuaye mulakule nabi Davidi.

Kadi, ntshinyi tshiakenza Davidi? Davidi wakakandika Abishai, wamba ne: “Mulekela, ampende.” Nansha muvua Shimei umupenda kakuyi bualu buvuabu bamuenze, ne bupuekele buonso, Davidi wakakandamena lungenyi lua kupingaja bubi ku bubi. Pamutu pa nanku, wakateka bualu abu mu bianza bia Yehowa.​—2 Samuele 16:10-13.

Pakapingana Davidi mu nkuasa wa bumfumu panyima pa dinyema buntomboji bujula kudi muanende wa balume, Shimei uvua munkatshi mua bantu ba kumpala bakalua bua kumuela muoyo ne kumulomba luse. Abishai wakasua kabidi bua kumushipa, kadi Davidi kakitaba nansha.​—2 Samuele 19:15-23.

Mu muanda eu, Davidi uvua tshimfuanyi tshiakanyine tshia Yezu Kristo, uvua mupostolo Petelo mufunde bualu buende ne: ‘Pakamupendabu, yeye kakabapenda kabidi; kadi wakadifila mu bianza bia udi ulumbulula biakane.’​—1 Petelo 2:23.

Lelu’eu, mbabele bena Kristo bua bikala ne ‘mitshima mipuekele; kabayi bashintakaja bubi ku bubi anyi tshipendu ku tshipendu.’ (1 Petelo 3:8, 9) Pa kulonda tshilejilu tshia Davidi ne Yezu Kristo, tuetu petu tudi mua ‘kuenza malu mimpe bua kutshimuna bubi.’​—Bena Roma 12:17-21, MMM.