Bakenza disua dia Yehowa

Paulo udi utshimuna lutatu

PAULO udi mu nsombelu mukole kayi kutekemena. Yeye ne bantu bakuabu 275 badi mu buatu buvua munkatshi mua tshipepele tshitambe bukole tshia mu mbuu wa Méditerranée tshidibu babikila ne: Eulakulo. Tshipepele etshi ntshikole menemene, bualu nansha dîba kadiena dimueneka mundamunya, nansha mitoto kayena imueneka butuku to. Bidi biumvuika mushindu udi bena luendu bikale ne buôwa bua mioyo yabu. Kadi, Paulo udi ubakankamija pa kubalondela bualu buvua Nzambi mumusokoluele mu tshilota ne: “Muoyo wa muntu [nansha] umue wa munkatshi muenu kawena ujimina, anu buatu.”​—Bienzedi 27:14, 20-22.

Pakalua butuku bua dikumi ne buinayi bua tshipepele etshi, bendeshi ba buatu badi basokolola bualu kampanda bua dikema​—mâyi avua muondoke bule bua maboko 20 patupu.a Panyima pa bamane kuya kumpala kakese, bakateta kabidi bule bua mâyi. Musangu eu bule bua mâyi buvua bua maboko 15. Bakadi pabuipi ne ku mukuna! Kadi lumu luimpe elu ludi ne bualu budi buelesha meji. Bu mudi buatu ebu butankakana butuku pa mâyi mîpi, budi mua kudikuma ku mabue ne kukosekangana. Ne meji onso, bendeshi ba buatu badi bela luongo. Bamue ba kudibu mbasue kutulula buatu bukese bua kubuelamu, bateka mioyo yabu mu njiwu pa mâyi manene bua kudipandisha.b Kadi Paulo udi ubalekesha. Udi wambila kapitene wa basalayi ne basalayi bine ne: ‘Bikala bantu aba kabayi bashale mu buatu, kanuena mua kusungidibua.’ Kapitene udi uteleja Paulo, ne mpindieu bena luendu bonso 276 badi bindila ne muoyo kuulu kuulu bua butuku kutshiabu.​—Bienzedi 27:27-32.

Buatu budi butshibuka

Dinda didi dilonda, bena luendu badi mu buatu badi bamona diapa dia mâyi dikale ne muelelu. Bapeta tshiakabidi ditekemena, bendeshi ba buatu badi bakosa mionji ya luongo ne babandisha tshilamba tshia kumpala kua buatu bua kukuata lupepele. Buatu budi butuadija kuya ku muelelu wa mâyi​—kakuyi mpata, bena luendu aba badi munkatshi mua diela mbila ya disanka.​—Bienzedi 27:39, 40.

Nansha nanku, diakamue buatu budi buimana pa mushiki wa lusenga mu mâyi. Kadi bualu bubi menemene, mavuala makole adi atuta ku tshitaku tshia buatu ebu, abutshibula bitupa bitupa. Bena luendu bonso badi bapatukamu! (Bienzedi 27:41) Kadi bualu ebu budi bufila lutatu kampanda. Bavule ba ku bantu badi mu buatu​—pamue ne Paulo—​mbena buloko. Mu mikenji ya bena Lomo, musalayi udi ulekela muena buloko unyema udi ne bua kupeta dinyoka difundila muena buloko au. Tshilejilu, mushipianganyi yeye munyeme, musalayi wa ditanaji uvua mumulame uvua ne bua kufua.

Bikale ne buôwa bua manyoka aa, basalayi badi bapangadija bua kushipa bena buloko bonso. Kadi, bu mudi kapitene wa basalayi umvuangana ne Paulo, udi ubakandika. Udi wambila bantu bonso badi bamanye kuowela bua badiele pa mâyi ne baye ku mukuna. Aba badi kabayi mua kuowela badi ne bua kukuata ku mabaya anyi ku bintu bikuabu bia mu buatu. Umue ku umue, bantu bavua mu buatu ebu badi bafika ku muelelu wa mâyi. Mêyi a Paulo mmalelela, muoyo nansha umue ki mmujimine to!​—Bienzedi 27:42-44.

Tshishima ku Melita

Tshisumbu tshia bantu aba bapungile ntshipete muaba wa kutudila mu tshidiila tshidibu babikila ne: Melita (Malte). Benamu mbantu ba “muakulu muenyi,” muaku ku muaku ‘basenji’ (barʹba·ros mu tshiena-Greke).c Kadi bena mu Melita kabena ne tshikisu nansha. Pamutu pa nanku, Luka, uvua mu luendu ne Paulo, udi umanyisha ne: “kutuleja muoyo muimpe wa buena muntu; kutubikilabo bonso bua kuota kapia kavuabo batemeshe, bua mvula uvua muloke ne bua mashika.” Paulo muine udi wangula nkunyi pamue ne bena mu Melita bua kuela mu kapia.​—Malu menza 28:1-3, MMM.

Diakamue, nyoka udi ulamata Paulo ku tshianza! Bena mu tshidiila atshi badi bela meji ne: Paulo udi ne bua kuikala mushipianganyi. Pamu’apa badi bela meji ne: Nzambi utu unyoka benji ba mpekatu pa kunyanga tshitupa tshiabu tshia mubidi tshivuabu benze natshi mpekatu au. Kadi monayi! Bualu budi butamba kukemesha bena ditunga, Paulo udi ukupa nyoka mu kapia. Muyuki mulonda kudi Luka, ntemu wa bualu ebu, udi wamba ne: ‘bakadi batekemena ne: [Paulo] neuule, anyi neapone panshi lukasa mufue.’ Bena mu tshidiila badi bashintulula meji abu ne batuadija kuamba ne: Paulo udi ne bua kuikala nzambi.​—Bienzedi 28:3-6.

Paulo udi wenza ngondo isatu idi ilonda mu Melita. Mu ngondo eyi udi wondapa tatuende wa Popolio, muntu munene wa mu tshidiila atshi wakakidila Paulo, ne udi wondapa kabidi bantu bakuabu badi ne masama. Kabidi, Paulo udi ukuna ntete ya bulelela, idi mifikishe bena mu Melita bakididianganyi ku dipeta mabenesha a bungi.​—Bienzedi 28:7-11.

Dilongesha buetu tuetu

Mu mudimu wende, Paulo wakapeta ntatu mivule. (2 Kolinto 11:23-27) Mu muyuki udi kuulu eku, uvua muena buloko bualu uvua wamba lumu luimpe. Nenku, uvua ne bua kupeta mateta avuaye kayi muelele meji: tshipepele tshikole ne dikosekangana dia buatu diakalonda. Mu bionso ebi, Paulo kavuaku ne dielakana mu dipangadika diende dia kuikala muyishi wa lumu luimpe wa lukunukunu nansha. Bilondeshile malu avuaye mumone, wakafunda ne: ‘Mu mianda yonso ngakamana kuyila bualu busokoka bua kuikala ne difu diukute, ne mua kuikala ne nzala, ne mua kuikala ne bintu bitambe bungi, ne bua kuikala ne bintu bitambe kukepa. Ndi mumanye mua kuenza malu onso mu Mukalenge udi unkolesha.’​—Filipoi 4:12, 13.

Ntatu ya mu nsombelu kayena ne bua kutekesha dipangadika dietu dia kuikala bena mudimu ba lukunukunu ba Nzambi mulelela nansha! Padi diteta kampanda kadiyi dielela meji dimueneka, tudi tupuila Yehowa bujitu abu. (Musambu 55:22) Pashishe, tudi tuindila ne lutulu bua kumona mushindu udiye wenza bua tuetu kutantamena diteta adi. Mu dindila, tudi tutungunuka ne kumuenzela mudimu ne lulamatu, bashindike ne: udi ututabalela. (1 Kolinto 10:13; 1 Petelo 5:7) Pa kushala bashindame, nansha biatuluila malu a mushindu kayi, tudi mua kutshimuna lutatu bu Paulo.

[Mêyi adi kuinshi]