Tshisumbu tshia bena Kristo​—Mpokolo wa diambuluisha didi dikolesha

POPI, nsongakaji wa bidimu 20 ne pa mutu, uvua mubungame bua nsombelu mukole wa dibenga kuyukidilangana ne baledi bende mu dîku.a Kunyima kua yeye mumane kukuatshila mukulu muena Kristo kampanda ne mukajende malu avua mu mutshima wende, wakabafundila ne: “Ndi nnuela tuasakidila wa bungi bua munuvua bapete dîba dia kuyukila nanyi. Kanuena mua kuikala bamanye mudi dintabalela dienu dingambuluishe nansha. Ndi nsakidila Yehowa bua mudiye mumpeshe bantu bandi mua kueyemena ne kuyukila nabu.”

Toula, mukaji mufuishe bayende matuku adi panshi aa ne mushale ne bana bende babidi batekete, wakadimona mu nsombelu mukole udi upampakaja mutshima ne udi ne ntatu ya kupeta makuta. Pa tshibidilu, muanetu wa balume ne mukajende bena Kristo ba mu tshisumbu bavua balua kumutangila yeye ne bana bende bua kubakolesha ku muoyo. Kunyima kua nsombelu wende mumane kulongoloka biakane, wakabatumina mukanda, wamba ne: “Ntu nnuvuluka misangu yonso mu masambila anyi. Ndi mvuluka misangu mivule inuvua nungambuluisha ne nunkuatshisha.”

Imue misangu utuku umvua ne: udi ‘muzengeja ne bujitu’ kudi ntatu ya pa buloba apa idi yenda anu ivula anyi? (Matayo 11:28, NW) “Bikondo ne malu adi kaayi matekemena” mbinyange nsombelu webe ne mbikutuadile tunyinganyinga anyi? (Muambi 9:11, NW) Nenku, kuena nkayebe to. Kadi anu bu mukadi bantu binunu bivule bavua ne dibungama bafike ku dipeta dikuatshisha, wewe pebe udi mua kupeta diambuluisha dia mushinga mu tshisumbu tshia bena Kristo tshia Bantemu ba Yehowa. Mu siekele wa kumpala B.B., mupostolo Paulo wakamona ne: bamue bena kuitabuja nende bavua “diambuluisha didi dikolesha” buende yeye mu mushindu wa pa buawu. (Kolosai 4:10, 11, NW) Udi mua kupeta diambuluisha dia muomumue.

Dikuatshisha ne diambuluisha

Mu Mifundu ya tshiena-Greke ya bena Kristo, muaku “tshisumbu” mmukudimuina ku muaku a tshiena-Greke ek·kle·siʹa, udi umvuija bantu badi badisangishe pamue. Mu muaku eu mudi lungenyi lua kudienza tshintu tshimue ne kukuatshishangana.

Tshisumbu tshia bena Kristo tshidi dikunji dia bulelela bua mu Dîyi dia Nzambi ne tshidi tshimanyisha lumu luimpe lua Bukalenge buende. (1 Timote 3:15; 1 Petelo 2:9) Kadi tshisumbu tshidi kabidi tshifila dikuatshisha ne diambuluisha dia mu nyuma kudi bantu badimu. Muntu udi mua kupetamu balunda bavule ba dinanga, badi batabalelangana ne baditatshisha bua bakuabu, badiakaje ne basue bua kuambuluisha ne kusamba bakuabu mu bikondo bia dibungama.​—2 Kolinto 7:5-7.

Misangu yonso batendeledi ba Yehowa batu bapeta bukubi mu tshisumbu tshiende. Mufundi wa misambu wakaleja ne: uvua ne disanka ne udiumvua mu bukubi munkatshi mua bantu ba Nzambi bavua badisangishe. (Musambu 27:4, 5; 55:14; 122:1) Bia muomumue lelu’eu, tshisumbu tshia bena Kristo nnsangilu wa bena kuitabuja netu badi bakoleshangana ne bakankamijangana.​—Nsumuinu 13:20; Lomo 1:11,12.

Mbalongeshe bena mu tshisumbu bua ‘kuenzela bantu bonso bimpe, kadi bua kutamba kuenzela bena dîku dia bena kuitabuja [nabu] bimpe.’ (Galatia 6:10) Dilongesha diashila pa Bible didibu bapeta didi dibasaka bua kuleja dinanga dia buwetu ne disuangana dikole. (Lomo 12:10; 1 Petelo 3:8) Bana betu balume ne bakaji ba mu tshisumbu mbasakibue bua kuikala bena muoyo mulenga, bena ditalala ne bena mitshima ya luse. (Efeso 4:3) Pamutu pa kuikala batendeledi ba tshidingishilu patupu, badi baditatshisha ne dinanga bua bakuabu.​—Yakobo 1:27.

Nenku, mu tshisumbu bantu badi bazengele badi bapetamu nsombelu wa musangelu bienze bu mu dîku. (Mâko 10:29, 30) Kuikala bamanye ne: badi mu tshisumbu tshia bantu badisuike pamue ne bikale ne dinanga kudi kubakolesha. (Musambu 133:1-3) Ku diambuluisha dia tshisumbu, “mupika wa lulamatu ne wa budimu” udi ufila “biakudia [bia mu nyuma bidi bikolesha] mu tshikondo tshiakanyine.”​—Matayo 24:45, NW.

Diambuluisha dia kudi batangidi ba dinanga

Bena mu tshisumbu badi mua kutekemena bua basanganamu balami ba dinanga, baditeki ba pa muaba wa bakuabu ne bakumbane badi bafila dikuatshisha ne dikankamija dia mu nyuma. Balami badi ne ngikadilu eyi badi bu ‘tshisokomenu ku tshipepele, ne tshinyemenu ku tshipupu.’ (Yeshaya 32:1, 2) Bakulu anyi batangidi bateka ku spiritu badi balama bantu ba Nzambi badi bu mikoko, bakankamija badi basama ne badi babungame, ne bakeba bua kupingaja aba badi bapambuke.​—Musambu 100:3; 1 Petelo 5:2, 3.

Bushuwa, bakulu ba tshisumbu kabena kasumbu ka bena mudimu wa diondapangana anyi badoktere, badi mua kuondopa masama a ku mubidi anyi a mpala adi bena kuitabuja nabu bapeta nansha. Mu ndongoluelu eu wa malu, babedi badi anu ‘bualu ne muondapi.’ (Luka 5:31) Nansha nanku, balami aba badi mua kuambuluisha bantu badi ne lutatu lua mu nyuma. (Yakobo 5:14, 15) Misangu yonso padiku mushindu, bakulu badi kabidi balongolola bua kufila dikuatshisha dikuabu.​—Yakobo 2:15, 16.

Nnganyi udi muenzeje ndongoluelu eu wa dinanga? N’Yehowa Nzambi nkayende! Muprofete Yehezekele udi uleja Yehowa wamba ne: ‘Meme nkayanyi nendonde mikoko yanyi, nenyikebe. Nenyisungile ku miaba kudiyi mitangadijibue. Nenyidishe ne nenyiladike.’ Nzambi udi kabidi uditatshisha bua mikoko idi kayiyi ne bukole ne idi mitekete.​—Yehezekele 34:11, 12, 15, 16.

Diambuluisha dilelela mu tshikondo tshiakanyine

Lelu’eu kudiku diambuluisha dilelela mu tshisumbu tshia bena Kristo anyi? Eyowa. Bilejilu bidi bilonda ebi bidi bileja mudi tshisumbu tshikale tshiambuluishangana mu nsombelu mishilangane.

◆ Difuisha munangibue kampanda. Bayende wa Anna wakafua kunyima kua disama dia munanunanu. Anna udi wamba ne: “Katshia bayanyi wafua, mbandeje dinanga dia musangelu kudi bana betu bena Kristo. Mêyi mimpe a dinkuatshisha ne dinkankamija nawu misangu yonso a kudi bena kuitabuja nanyi, ne dingela diabu mu tshitupa ne muoyo mujima, mbinkoleshe pamutu pa kutamba kumbungamija, ne ndi ngela Yehowa tuasakidila. Dinanga diabu ndimfikishe ku diumvua ne: mbankuatshishe bikole, mbalengeje bikole nsombelu wanyi wa mu nyuma ne mbantabalele ne dinanga dionso.” Wewe pebe, ukadi mua kuikala mupete dibungama bua lufu lua munangibue kampanda. Mu bikondo bia nunku, bena mu tshisumbu badi mua kutamba kukusamba ne kukukuatshisha bu mudibi bikengedibua.

◆ Masama. Arthur, mutangidi muena ngendu mufumine mu ditunga dia Pologne, uvua ukumbula pa tshibidilu bisumbu bia mu Asia wa Pankatshi bua kubikolesha mu nyuma. Mu dimue dia ku makumbula aa, disama dikole diakamukuata ne bivua bikole menemene bua kumvuaye bimpe. Arthur udi wamba ne dianyisha dia bungi ne: “Ndi musue kunulondela muvua bana betu ba mu [tshimenga tshia mu ditunga dia Kazakhstan] bantabalele. Bana betu ba balume ne ba bakaji nansha basankididi ba bulelela, bavule ba kudibu tshivua mubamanye to, bakantuadila makuta, bia-kudia ne manga. . . . Ne bakalua nabi ne disanka dia bungi.

“Elayi meji mumvua mumvue pangakapeta amvelope muikale ne ndambu wa makuta munda ne mukanda udi ulonda eu: ‘Muanetu musuibue, ndi nkuela mioyo ya musangelu. Mamu uvua mumpeshe makuta bua kusumba kreme, kadi ndi musue bua kukupeshawu bua usumbe manga. Suaku umvua bimpe pa lukasa. Yehowa udi netu dijinga bua mutantshi mule. Ndi nkujingila diakalenga. Utulondele amue mayuki mimpe adi alongesha. Vova.’” Bushuwa, anu bu mudi tshilejilu etshi tshileja, bansonga ne bakulumpe ba mu tshisumbu badi mua kufila diambuluisha didi dikolesha mu bikondo bia masama.​—Filipoi 2:25-29.

◆ Dibungama. Teri uvua ne dijinga dikole dia kuenza mudimu bu mpanda-njila, anyi mumanyishi wa Bukalenge wa ku dîba ne ku dîba. Kadi bua ntatu ivuaye nayi, uvua ne bua kuimanyika bumpanda-njila. Udi wamba ne: “Ngakadiumvua muikale ne dipila dia bungi bua mungakakeba bua kuenza mudimu eu ne kupanga kuenzamu nansha tshidimu tshimue.” Teri uvua mutupakane bua kuela meji ne: dianyishibua kudi Yehowa divua disuikila anu ku bungi bua mudimu uvuaye umuenzela. (Sulakaja ne Mâko 12:41-44.) Bu muvuaye mubungame, wakaditola pa nkayende. Kadi diambuluisha didi dikankamija diakafumina mu tshisumbu.

Teri udi uvuluka ne: “Muanetu wa bakaji, mpanda-njila wa kale wakangambuluisha pa lukasa ne wakanteleja pamvua mumukuatshile malu amvua nawu munda. Pangakumbuka kuende, ngakumvua bu bantule bujitu bumvua muambule. Kubangila pine apu, muanetu wa bakaji eu mpanda-njila ne bayende, mukulu mu tshisumbu, bakampesha diambuluisha dia mushinga. Bavua bangela nshinga dituku dionso bua kumanya mumvua muladile. . . . Imue misangu bavua bangitabila bua kubuela mu dilonga diabu dia mu dîku, diakandeja mushinga wa kushala badisuike pamue mu mêku.”

Kubungama, kuteketa mu maboko anyi kuditola mmalu atu afikila bantu ba bungi pa tshibidilu, nansha bena Kristo badilambule. Mmunyipu mutudi mua kuikala ne dianyisha bua mutudi tupeta diambuluisha dia kalolo ne dia dinanga mu tshisumbu tshia Nzambi!​—1 Tesalonike 5:14.

◆ Bipupu ne njiwu. Diteka pa muaba wa bena dîku banayi bakajimija bintu biabu bionso pakuoshika nzubu wabu. Katupa kakese bakamona tshiakabikilabu ne: “bualu buvua bukankamija buakatulenga ku muoyo bua kashidi ne buakatuleja dinanga dilelela didi munkatshi mua bantu ba Yehowa.” Badi bumvuija ne: “Diakamue bana betu ba mu nyuma bakatuela nshinga misangu ne misangu bua kutukuatshisha ne kutuleja muvuabu batumvuila luse. Telefone uvua udila misangu yonso. Diditatshisha ne dinanga dilelela dia muntu yonso biakatamba kututua ku muoyo mu mushindu wa se: tuakabanga kupuekesha binsonji bua kuleja dianyisha.”

Mutantshi kawanji kulepa, bakulu ba tshisumbu bavua balongolole tshisumbu tshia bana betu ba balume ba bungi, ne mu matuku makese, bakibakila dîku edi nzubu mupiamupia. Muena mutumba kampanda wakakatshila ne: “Monayi! Bantu ba mishindu yonso badi benza mudimu muaba eu​—balume, bakaji, bafiike ne bantu badi bafumine mu Amerike wa ku Sud!” Etshi tshivua tshijadiki tshia patoke tshia dinanga dia buwetu.​—Yone 13:35.

Bena Kristo netu bakapesha kabidi dîku edi bilamba, biakudia ne makuta. Tatu udi wamba ne: “Tuvua mu tshikondo tshia Nowele dîba didi muntu yonso upeshangana bintu, kadi tudi mua kuamba mu bulelela ne: kakuvua muntu mukuabu uvuabu baleje kalolo kavule ka bushuwa bu kavuabu batuleje nansha.” Ne badi basakidila ne: “Malu adi atuvuluija mudilu adi enda ajimina ku kakese ku kakese ne baapingana kudi malu atudi basue bu mudi: bienzedi bilenga ne balunda bimpe. Tudi tusakidila Yehowa wa mu diulu, Tatu wa dinanga bua mutudi ne dîku dilenga dia bana betu badi mu buobumue pa buloba, ne tudi ne dianyisha dia bungi bua kuikala mu dîku edi!”

Bushuwa, kufila diambuluisha bu edi kakuena mua kuenzeka misangu yonso itudi mu dikenga dia mushindu eu nansha, anyi katuena mua kuditekemena dîba dionso to. Kadi tshilejilu etshi tshidi tshileja bushuwa dikuatshisha didi tshisumbu mua kufila.

Meji adi afuma muulu

Bantu ba bungi mbapete mpokolo mukuabu wa diambuluisha ne wa bukole mu tshisumbu tshia bena Kristo. Mmpokolo kayi au? Mmikanda milongolola kudi “mupika wa lulamatu ne wa budimu.” Tshibumba tshia Nsentedi ne Réveillez-vous! ke bidi biende lumu ku mikanda eyi. Bua kumona mua kufila mibelu ya busunguluji ne dilongesha didi dikuatshisha, mikanda eyi mmishindamene nangananga pa meji a Nzambi adi mu Bible. (Musambu 119:105) Ku malu a mu Mifundu badi basakidilamu malu makuabu mapeta ku diambuluisha dia makebulula a kueyemena pa biena-bualu bu mudi: dibungama, disanguluka kunyima kua muanda wa tshinyangu, ntatu kabukabu ya mu nsombelu ne ya mpetu, ntatu idi bansonga bapetangana nayi ne malu a mu matunga mapele. Pa mutu pa bionso, mikanda eyi idi ileja njila wa Nzambi bu njila wa muoyo mutambe buimpe.​—Yeshaya 30:20, 21.

Tshidimu tshionso, Société Watch Tower udi upeta mikanda binunu ne binunu ya dileja nayi dianyisha. Tshilejilu, bua tshiena-bualu tshia mu Réveillez-vous! tshivua tshiakula bua didishipa, nsongalume kampanda wa mu ditunga dia Russie wakafunda ne: “Bua dibungama dimvua nadi, . . . misangu mivule mvua ngela meji bua kudishipa. Tshiena-bualu etshi tshiakakolesha ditabuja dianyi dia se: Nzambi neangambuluishe bua kujikija ntatu yanyi. Mmusue bua ngikale ne muoyo. Ndi mmusakidila bua dikuatshisha didiye mumpeshe ku diambuluisha dia tshiena-bualu etshi.”

Bikala ntatu mivule ya pa buloba ebu imueneka mikole mua kupita nayi, udi mua kuikala mujadike ne: kudi muaba wa kusokomena mu tshisumbu tshia bena Kristo. Bushuwa, bikala nsombelu mufuane tshipela wa mu ndongoluelu eu mubule dinanga ukupangisha bukole, udi mua kupeta muaba wa tshitalela udi ufila bukole mu bulongolodi bua Yehowa. Kunyima kua wewe mumane kupeta dikuatshisha edi, udi pebe mua kuamba bu muakamba muntu mukaji muena Kristo wakatantamena disama dikole dia bayende ne wakafunda ne: “Bua dinanga ne ditabalela bivuabu batuleje, ndi ngumvua anu bu ne: Yehowa mmutuambule mu tshianza tshiende bua kutupatula mu dikenga edi. Ndi ne dianyisha dia bungi bua mundi mu bulongolodi bulenga bua Yehowa.”

[Mêyi adi kuinshi]

[Bimfuanyi mu dibeji 26]

Tudi mua kufila diambuluisha didi dikolesha kudi babedi, bantu bafuishe ne bakuabu