Bamanyishi ba Bukalenge badi balonda

“Nzambi udi mumanye mua kuenza malu onso”

MÊYI adi kuulu eku, atudi tusangana mu Matayo 19:26, akamueneka malelela bua nsongakaji kampanda wa mu ditunga dia Venezuela. Kunyima kua yeye mumane kulonga bua kueyemena Yehowa bikole, wakapeta mushindu wa kutshimuna lutatu lukole luvuaye nalu. Udi ulonda ne:

“Kaku mukaji uvua muntu muimpe ne uvua ne dinanga dia bungi. Bia dibungama, wakafua pantshivua ne bidimu 16 patupu. Lufu luende luakantonda bikole. Lungenyi luakabanga kulubakana, tshivua nansha musue kupatuka pambelu bua kusomba mu lubanza to. Ndekelu wa bionso ngakashala muditole pa nkayanyi.

“Tshivua nya mu kalasa anyi ngenza mudimu nansha. Mvua musombe anu mu nzubu. Ngakabungama bikole mumvua anu nkayanyi ne tshiyi ne balunda. Ngakadimona tshiyi ne mushinga nansha mukese ne mvua musue kudishipa. Mvua anu ndiebeja ne: ‘Bua tshinyi ndi ne muoyo?’

“Mamu uvua ne tshibidilu tshia kupeta tshibejibeji tshia Tshibumba tshia Nsentedi ne tshia Réveillez-vous! bivuabu bamutuadila kudi nsongakaji kampanda Ntemu, diende Gisela. Dimue dituku mamu wakamona Gisela upitshila pabuipi ne kuetu ne wakamuebeja né uvua mua kungambuluisha. Gisela wakitaba, kadi ngakabenga bua kumonangana nende. Dibenga dianyi edi kadiakatekesha Gisela nansha. Wakamfundila mukanda ne kungambilaye ne: uvua musue kulua mulunda wanyi ne se: munga muntu wa mushinga wa bungi kumupita yeye uvua musue kulua kabidi mulunda wanyi. Wakamba ne: muntu au uvua Yehowa Nzambi.

“Bualu ebu buakandenga ku muoyo, ne ngakandamuna ku mukanda wende. Tuakafundilangana munkatshi mua ngondo isatu. Kunyima kua Gisela mumane kumpesha mibelu ya bungi, ke pangakashisha kupeta dikima dia kumonangana nende. Patuakamonangana bua musangu wa kumpala, Gisela wakandongesha Bible ku diambuluisha dia mukanda wa Udi mua kuikala ne muoyo wa kashidi pa buloba bukudimuna mparadizu. Kunyima kua dilonga, wakambikila bua kubuela mu tshisangilu ku Nzubu wa Bukalenge wa muaba au. Biakankemesha. Kukavua bidimu binayi bimvua tshiyi mupatuke mu nzubu, ne mvua ne buôwa bua kuenda mu njila.

“Gisela uvua nanyi lutulu lua bungi. Wakanjadikila ne: kakuvua bualu bua kutshina nansha, ne se: tuvua ne bua kuya nende mu tshisangilu atshi. Ndekelu wa bionso ngakitaba. Patuakafika ku Nzubu wa Bukalenge, ngakatuadija kuzakala ne kutuka tshisululu. Tshiakela muntu nansha umue muoyo. Nansha nanku, ngakitaba bua kutungunuka ne kubuela mu bisangilu. Ne Gisela uvua anu ulua kuntangila lumingu luonso.

“Bua kungambuluisha bua kujikija buôwa bumvua nabu, Gisela uvua uya nanyi mu bisangilu kumpala kua dîba menemene. Tuvua tuimana pabuipi ne tshiibi ne tuela muntu yonso uvua ulua muoyo. Mushindu au mvua ntangila muntu anu umue anyi babidi musangu wonso pamutu pa kutangila tshisumbu tshijima musangu umue. Pamvua ngumvua ne: tshivua mua kukokesha bua kuenza kabidi nanku, Gisela uvua untelela Matayo 19:26: ‘Bantu kabena bamanye bua kuenza bualu ebu, kadi Nzambi udi mumanye mua kuenza malu onso.’

“Nansha muvuabi bikole, ndekelu wa bionso ngakafika ku dibuela nansha mu tshisangilu tshinene tshia bantu, mu mpuilu wa tshijengu. Atshi tshivua tshidia tshinene buanyi meme! Mu Kabitende 1995, ngakapeta muoyo mukole bua kuyukila ne bakulu bua meme kubanga kuenza mudimu wa ku tshiibi ne ku tshiibi. Kunyima kua ngondo isambombo, mu Tshisanga 1996, ngakaleja didilambula dianyi kudi Yehowa ku batismo wa mu mâyi.

“Matuku adi panshi aa pavua muntu ungebeja bua kumanya mushindu umvua mupete dikima dia kuenza bualu ebu, mvua ngandamuna ne: ‘Dijinga dianyi dia kusankisha Yehowa ndipite buôwa bundi nabu.’ Nansha muntshidi ne dibungama ku misangu, ndi ne disanka dia bungi bualu ndi ngenza mudimu bu mpanda-njila wa pa tshibidilu. Pandi mvuluka, ndi ne bua kuitaba mêyi a Gisela. Mpindieu ndi ne Mulunda udi uditatshisha bua bualu buanyi ne udi ‘umpesha bukole.’”​—Filipoi 4:13, MMM.

[Bimfuanyi mu dibeji 8]

“Dijinga dianyi dia kusankisha Yehowa ndipite buôwa bundi nabu”