“Mapa mikale bantu” bua kulama mikoko ya Yehowa

“Pakabandaye muulu, wakaya ne bantu bakuata, wakafila mapa mikale bantu.”​—EFESO 4:8, NW.

1. Mmêyi kayi akamba muanetu wa bakaji kampanda bua bakulu ba mu tshisumbu tshiabu?

“TUASAKIDILAYI bua munudi nuditatshisha bua bualu buetu. Mimuemue yenu, musangelu wenu ne ditutabalela dienu mbia bushuwa menemene. Misangu yonso nutu pabuipi netu bua kututeleja ne kutuleja mêyi a mu Bible adi atukolesha ku muoyo. Ndi ndomba bua tshinupepeji musangu nansha umue.” Aa mmêyi avua muanetu wa bakaji kampanda mufundile bakulu ba mu tshisumbu tshiabu. Bulelela, dinanga divua nadi balami aba ba luse divua dilenge mutshima wende.​—1 Petelo 5:2, 3.

2, 3. (a) Bilondeshile Yeshaya 32:1, 2, mmunyi mudi bakulu ba luse balama mikoko ya Yehowa? (b) Ndîba kayi ditudi mua kuangata mukulu bu dipa?

² Yehowa mmufile bakulu bua balame mikoko yende. (Luka 12:32; Yone 10:16) Yehowa mmunange mikoko yende bikole menemene e kumufikishabi too ne ku diyisumba ku mashi a mushinga mukole a Yezu. Nenku kabiena bikemesha mudi Yehowa utamba kusanka padi bakulu balama mikoko yende bimpe. (Bienzedi 20:28, 29) Tangila diumvuija difila kudi muprofete bua bakulu aba anyi “bakokeshi”: ‘Muntu [yonso] neikale bu tshisokomenu ku tshipepele, ne tshinyemenu tshia ku tshipupu, neikale bu misulu ya mâyi mu muaba mûme, bu dileji dia dibue dinene mu buloba budi butondesha bantu.’ (Yeshaya 32:1, 2) Bushuwa, badi ne bua kukuba, kukolesha ne kusamba mikoko ya Nzambi. Bakulu badi balama mikoko ne luse badi badienzeja bua kukumbaja bidi Nzambi ubalomba.

³ Bible udi wakula bua bakulu aba bu “mapa mikale bantu.” (Efeso 4:8, NW) Paudi wakula bua dipa, udi umona tshintu tshifila bua kukumbaja dijinga kampanda anyi bua kusankisha muntu udi utshiangata. Tudi mua kuangata mukulu bu dipa padiye wenza mudimu ne bipedi biende bua kufila dikuatshisha didi dikengedibua ne kuvudija disanka dia mikoko. Mmunyi mudiye mua kuenza muanda eu? Diandamuna ditudi tusangana mu mêyi a Paulo adi mu Efeso 4:7-16 didi dileja mudi Yehowa uditatshisha ne dinanga bua disanka dia mikoko yende.

“Mapa mikale bantu”​—Mmafumine kuepi?

4. Mu dikumbaja Musambu 68:18, mmu mushindu kayi muvua Yehowa ‘mubande muulu,’ ne mbanganyi bavua “mapa mu tshimfuanyi tshia bantu”?

⁴ Pakenza Paulo mudimu ne tshiambilu etshi: “mapa mikale bantu,” uvua utela mêyi a Mukalenge Davidi akambaye bua Yehowa ne: ‘Wewe wakubanda muulu, wakuyamu ukoka bantu bawakukuata mu mvita kunyima kuebe; wakuangata mapa [“mu tshimfuanyi tshia,” NW] bantu.’ (Musambu 68:18) Kunyima kua bena Isalele bamane kuenza bidimu bungi kampanda mu Buloba Bulaya, mu ngakuilu wa mu tshimfuanyi, Yehowa ‘wakabanda’ pa Mukuna wa Siona ne kuvuijaye Yelushalema tshimenga tshikulu tshia bukalenge bua Isalele, buikale ne Davidi bu mukalenge. Kadi mbanganyi bavua ‘mapa mu tshimfuanyi tshia bantu’? Bavua bantu bakuata mu mvita mu tshikondo tshiakakuatabu buloba. Bamue ba ku bantu aba bakuata mu mvita bakabafila kudi bena Lewi bua kubambuluishabu mu mudimu wa ku tabernakle.​—Ezela 8:20.

5. (a) Mmunyi mudi Paulo uleja ne: Musambu 68:18 udi ukumbana mu tshisumbu tshia bena Kristo? (b) Mmu mushindu kayi muvua Yezu ‘mubande muulu’?

⁵ Mu mukanda wende mufundila bena Efeso, Paulo udi uleja ne: mêyi a mufundi wa misambu adi akumbana menemene mu tshisumbu tshia bena Kristo. Muikale umvuija mêyi a mu Musambu 68:18, Paulo udi ufunda ne: “Mpindieu mbapeshe yonso wa kutudi bulenga bukena butuakanyine bua Nzambi bilondeshile mudi Kristo mupime dipa dia tshianana. Ke bua tshinyi udi wamba ne: ‘Pakabandaye muulu, wakaya ne bantu bakuata, wakafila mapa mikale bantu.’” (Efeso 4:7, 8, NW) Apa Paulo udi wenza mudimu ne musambu eu bua Yezu Kristo bu muleji-mpala wa Nzambi. Yezu ‘wakapita ba pa buloba bukole’ ku nsombelu wende wa lulamatu. (Yone 16:33) Wakatshimuna kabidi lufu ne Satana bualu Nzambi wakamubisha ku bafue. (Bienzedi 2:24; Ebelu 2:14) Mu tshidimu tshia 33 B.B., Yezu mubisha ku bafue wakabanda ‘kuulu pa mutu pa muulu onso’​—kupita bifukibua bikuabu bionso bia mu diulu. (Efeso 4:9, 10; Filipoi 2:9-11) Bu muvuaye mutshimunyi, Yezu wakangata “bantu bakuata” munkatshi mua baluishi. Mushindu kayi nanku?

6. Kubangila mu Pentekoste mu tshidimu tshia 33 B.B., mmunyi muvua Yezu mumane kubanda muulu mutuadije kupawula nzubu wa Satana, ne ntshinyi tshiakenzaye ne “bantu bakuata”?

⁶ Pavuaye pa buloba, Yezu wakaleja muvuaye mupite Satana ku bukole pa kupikula bantu bavua ba-demon bakuate ku bupika. Bivua anu bu se: Yezu wakabuela mu nzubu mua Satana, kumusuikaye ne kumunyenga bintu biende. (Matayo 12:22-29) Anjibi kuela meji, pakamubishabu ku bafue ne kumupeshabu ‘bukokeshi buonso mu diulu ne pa buloba,’ mmunyipu muvua Yezu mua kupawula bintu tshikondo atshi! (Matayo 28:18) Kubangila mu Pentekoste, mu tshidimu tshia 33 B.B., bu muvuaye muleji-mpala wa Nzambi, Yezu mubande muulu wakatuadija kupawula nzubu wa Satana pa ‘kuya ne bantu bakuata’​—bantu bavua bashale mutantshi mule ku bupika bua mpekatu ne lufu ne bavua ku bukokeshi bua Satana. “Bantu [aba] bakuata” bakalua ‘bapika ba Kristo’ ku budisuile, ne badi benza disua dia Nzambi ne anyima wabu mujima. (Efeso 6:6) Bushuwa, Yezu wakabumbusha ku bukokeshi bua Satana ne, bu baleji-mpala ba Yehowa, wakabafila kudi tshisumbu bu “mapa mikale bantu.” Ela meji tshiji tshivua natshi Satana pakumbushabu bantu aba ku bukokeshi buende eku yeye muikalepu, kayi ne tshivuaye mua kuenza!

7. (a) Mmidimu kayi idi “mapa mikale bantu” enza mu tshisumbu? (b) Mmpunga kayi udi Yehowa mupeshe muntu yonso udi wambuluisha bu mukulu?

⁷ Tudiku tumona lelu’eu “mapa [aa] mikale bantu” mu tshisumbu anyi? Eyowa! Tudi tuamona ambuluisha bu bakulu, enza mudimu mukole bu “bamuangalaji ba mukenji mulenga, balami nansha balongeshi” mu bisumbu bia bantu ba Nzambi bipite pa 87 000 pa buloba bujima. (Efeso 4:11, MMM) Satana udi mua kusanka bikole yeye mumone bakulu bakengesha mikoko. Kadi atshi ki ntshidi Nzambi mubafidile mu tshisumbu ku butuangaji bua Kristo nansha. Pamutu pa nanku, Yehowa mmufile balume aba bua diakalenga dia tshisumbu, ne nebalue kumupesha luapolo bua mikoko idiye mubapeshe. (Ebelu 13:17) Biwikala wambuluisha bu mukulu, Yehowa mmukupeshe mpunga mulenga bua wewe kuleja ne: udi dipa anyi dibenesha bua bana benu. Udi mua kuleja muanda eu pa kukumbaja midimu inayi ya mushinga.

Padibi bikengela “kululamija”

8. Mmu mishindu kayi mutudi tuetu bonso dijinga ne ditululamija imue misangu?

⁸ Tshia kumpala: Paulo udi wamba ne: “mapa mikale bantu” mmafila “bua kululamija bansantu.” (Efeso 4:12, NW) Muaku wa tshiena-Greke mukudimuna ne: “kululamija” udi umvuija “kuolola tshintu kampanda.” Bu mutudi bantu bapange bupuangane, tuetu bonso tutu imue misangu tujinga bua batululamije bua ngelelu wetu wa meji, mmuenenu ne tshikadilu tshietu bikale ‘bilulamija’ mu diumvuangana ne ngelelu wa meji ne disua dia Nzambi. Bua dinanga diende, Yehowa mmufile “mapa mikale bantu” bua kutuambuluisha bua kulongolola malu adi akengedibua. Mmunyi mudibu benza muanda eu?

9. Mmunyi mudi mukulu mua kuambuluisha bua kululamija mukoko udi mupambuke?

⁹ Imue misangu badi mua kubikila mukulu bua kuambuluisha mukoko udi mupambuke, udi pamu’apa ‘muele tshidia tshibi kauyi mumanye.’ Mmunyi mudi mukulu mua kuwambuluisha? Galatia 6:1 (NW) udi wamba ne: ‘Keba bua kululamija muntu wa mushindu’eu mu bitulu.’ Nenku padiye ufila mibelu, mukulu kêna ne bua kutandisha muntu udi mupambuke anyi kumuamba mêyi mashile nansha. Mibelu idi ne bua kukankamija pamutu pa ‘kutshingisha’ muntu udi uyiteleja. (2 Kolinto 10:9; tangila Yobo 33:7.) Pamu’apa muntu eu udi ne bundu, nenku mulami wa dinanga udi wepuka ditekesha muntu wa mushindu’eu mu maboko. Kupesha muntu udi mupambuke mibelu ne dinanga anyi kumukanyina ne dîsu dikole kudi pamu’apa mua kululamija ngelelu wende wa meji anyi tshikadilu tshiende, kumupingaja mu njila.​—2 Timote 2:4.

10. Kululamija bakuabu kudi kumvuija tshinyi?

¹⁰ Mu difila “mapa mu bantu” bua kutululamija, Yehowa uvua mulongolole bua se: bakulu bikale bakoleshanganyi mu nyuma badi bantu bende mua kuidikija. (1 Kolinto 16:17, 18; Filipoi 3:17) Kululamija bakuabu kakuena anu kumvuija kubela aba badi balonda njila mubi to, kadi kudi kabidi kumvuija kuambuluisha bena lulamatu bua batungunuke mu njila muimpe.a Lelu’eu, bua ntatu mipite bungi idi itekesha mu maboko, bantu ba bungi badi dijinga ne dikankamija bua kushala bakole. Bamue badi mua kuikala dijinga ne diambuluisha dia dinanga bua kufikisha ngelelu wabu wa meji ku diumvuangana ne wa Nzambi. Tshilejilu, bamue bena Kristo ba lulamatu badi baluangana ne meji adi abavuila a se: kabena ne mushinga anyi ki mbakumbane to. “Anyima [eyi] mibungame” idi mua kuela meji ne: Yehowa kêna mua kuyinanga ne nansha yoyi mienze madikolela a mushindu kayi bua kumusadila, Nzambi kêna mua kuyitaba nansha kakese. (1 Tesalonike 5:14, NW) Kadi ngelelu wa meji wa mushindu’eu kêna umvuangana ne mushindu udi Nzambi wangata batendeledi bende nansha.

11. Ntshinyi tshidi bakulu mua kuenza bua kuambuluisha bantu badi badiumvua kabayi ne mushinga?

¹¹ Bakulu, ntshinyi tshinudi mua kuenza bua kuambuluisha bantu ba mushindu’eu? Ne bulenga buonso nubaleje mudi Mifundu ijadika ne: Yehowa udi uditatshisha bua musadidi wende yonso ne nubashindikile ne: mvese eyi ya mu Bible idi ibatangila buobu. (Luka 12:6, 7, 24) Nubambuluishe bua kumvua ne: bu mudi Yehowa ‘mubakoke’ kudiye, udi ne bua kuikala ubangata ne mushinga. (Yone 6:44) Nubajadikile ne: kabena nkayabu nansha​—basadidi ba bungi ba Yehowa bena lulamatu bavua bapete pabu meji a muomumue. Umue musangu muprofete Eliya uvua mubungame bikole, e kujingaye mene bua kufua. (1 Bakelenge 19:1-4) Bamue bena Kristo bela manyi ba mu siekele wa kumpala bakumvua mitshima yabu ‘ibapisha.’ (1 Yone 3:20) Bidi bikolesha ku muoyo pa kumvua ne: bena lulamatu ba mu bikondo bifundilebu Bible bavua ‘bantu bu mutudi emu.’ (Yakobo 5:17, Muanda Mulenga Lelu) Nudi kabidi mua kukonkonona pamue ne bantu aba badi babungame biena-bualu bidi bikankamija bia mu Tshibumba tshia Nsentedi ne Réveillez-vous! Nzambi udi munufile bu “mapa mikale bantu” kakupanga kumona madikolela a dinanga anudi nuenza bua kuambuluisha bantu aba bua bapetulule dieyemena diabu.​—Ebelu 6:10.

“Kuibaka” mikoko

12. Tshiambilu etshi: “kuibaka mubidi wa Kristo” tshidi tshileja tshinyi, ne ntshinyi tshidi tshikengedibua bua kuibaka mikoko?

¹² Tshibidi: “mapa mikale bantu” mmafila bua “kuibaka mubidi wa Kristo.” (Efeso 4:12, MMM) Muaba eu Paulo udi wenza mudimu ne ngakuilu wa mu tshimfuanyi. “Kuibaka” kudi kuvuluija luibaku, ne “mubidi wa Kristo” udi uleja bantu badi mu tshisumbu tshia bena Kristo bela manyi. (1 Kolinto 12:27; Efeso 5:23, 29, 30) Bakulu badi ne bua kuambuluisha bana babu bua kukola mu nyuma. Tshipatshila tshiabu ntshia ‘kukolesha [mikoko] mu ditaba, ki ntshia kuyibutula’ nansha. (2 Kolinto 10:8, MMM) Bua kukolesha mikoko bidi bilomba dinanga, bualu ‘dinanga didi didiundisha mu ditabuja.’​—1 Kolinto 8:1, MML.

13. Kuikala muena luse kudi kumvuija tshinyi, ne bua tshinyi mbia mushinga bua bakulu baleje luse?

¹³ Luse ke tshitupa tshimue tshia dinanga tshidi mua kuambuluisha bakulu bua kuibaka mikoko. Kuikala muena luse kudi kumvuija kuditeka pa muaba wa bakuabu​—kumvua meji ne mmuenenu yabu, kuangata ne mushinga mikalu yabu. (1 Petelo 3:8) Bua tshinyi bidi ne mushinga bua bakulu bikale ne luse? Tshia kumpala, bualu Yehowa udi ufila “mapa mikale bantu” udi Nzambi wa luse. Padi bantu bende bakenga anyi batata, udi uditeka pa muaba wabu. (Ekesode 3:7; Yeshaya 63:9) Udi wangata mikalu yabu ne mushinga. (Musambu 103:14) Kadi mmunyi mudi bakulu mua kuleja luse?

14. Mmu mishindu kayi mudi bakulu mua kuleja luse kudi bakuabu?

¹⁴ Padi muntu udi mutekete mu maboko ulua kudibu, badi bateleja, bitaba ne: bidi muntu au umvua mbilelela. Badi bakeba bua kumvua nsombelu, bumuntu ne malu a bana babu. Nenku padi bakulu bafila mibelu idi ikolesha miangatshila mu Mifundu, mikoko neimone bipepele bua kuyitaba bualu mibelu eyi nya kudi balami badi babamanye ne badi baditatshisha bua bualu buabu. (Nsumuinu 16:23) Luse ludi kabidi lusaka bakulu bua kuangata ne mushinga mikalu ya bakuabu ne meji adi mua kubavuila afumina ku mikalu eyi. Tshilejilu, bamue bena Kristo ba muoyo mujima badi mua kudiumvua bapile bualu kabena mua kuenza bia bungi mu mudimu wa Nzambi, pamu’apa bua dikulakaja anyi bua masama. Ku lumue luseke, bamue badi mua kuikala dijinga ne dikankamija bua balengeje mudimu wabu. (Ebelu 5:12; 6:1) Luse nelusake bakulu bua kuikala ne ‘mêyi adi asankisha’ bua kukolesha bakuabu. (Muambi 12:10) Mikoko ya Yehowa yoyi mibaka ne misaka ku dienza bualu kampanda, dinanga diayi bua Nzambi nediyisake bua kuenza muayi muonso bua kumusadila!

Bantu badi bakankamija buobumue

15. Tshiambilu etshi: “tshintu tshimue mu ditaba” tshidi tshiumvuija tshinyi?

¹⁵ Tshisatu: “mapa mikale bantu” mmafila bua ‘tufike bonso pamue ku dienza tshintu tshimue mu ditaba ne mu dimanya dia Muana wa [“Nzambi,” NW].’ (Efeso 4:13, MMM) Tshiambilu etshi: “tshintu tshimue mu ditaba” tshidi tshiumvuija buobumue ki ng’anu bua mitabuja, kadi bua bena kuitabuja kabidi. Aka nkabingila kakuabu kadi Nzambi mutupeshile “mapa mikale bantu,” bua kukankamija buobumue munkatshi mua bantu bende. Mmunyi mudibu bakumbaja bualu ebu?

16. Bua tshinyi bidi ne mushinga bua bakulu balame buobumue munkatshi muabu?

¹⁶ Bangabanga, badi ne bua kulama buobumue munkatshi muabu buobu bine. Balami buobu bapanduluke, badi mua kufika ku dilengulula mikoko. Bisangilu ne mayuki male adi kaayi ne dikuatshisha bidi mua kudia patupu dîba dia mushinga mukole dia kupitshisha nansha mu mudimu wa dilama mikoko. (1 Timote 2:8) Pamu’apa bakulu kabakumvuangana pa muanda wonso udibu bakuila, bualu badi ne bumuntu bushilangane bikole. Buobumue kabuena bubapangisha bua kuikala ne mmuenenu mishilangane anyi bua kuyileja ne nkatshinkatshi padibu bayukilangana. Bakulu badi balama buobumue buabu pa kutelejangana ne kanemu kakuyi didianjila kubuka bidi munda mua bakuabu. Kuoku kakuyi dîyi-diludiki dia mu Bible didibu basambuke, mukulu yonso udi ne bua kuikala mudiakaje bua kuitaba ne kutua dipangadika dia ndekelu dia kasumbu ka bakulu nyama ku mikolo. Kuitaba dipangadika diangata kudi kuleja ne: “meji a muulu,” adi mikale “a ditalala, a butshintshikidi” adi abalombola.​—Yakobo 3:17, 18, NW.

17. Mmunyi mudi bakulu mua kuambuluisha bua kulama buobumue mu tshisumbu?

¹⁷ Bakulu badi kabidi ne ntema bua kukankamija buobumue mu tshisumbu. Padi malu atu atapululangana​—bu mudi dijanangana, ditumpilangana malu anyi tshilele tshia kutandangana—​binyanga ditalala, kabena bajingakana bua kufila mibelu idi yambuluisha. (Filipoi 2:2, 3) Tshilejilu, bakulu badi mua kuikala bamanye bantu batu batamba kujanangana anyi batu ne tshilele tshia kubuela mu malu a bende. (1 Timote 5:13; 1 Petelo 4:15) Bakulu nebakebe bua kuambuluisha bantu ba mushindu’eu bua bumvue ne: tshilele etshi tshidi tshibengangana ne bidibu batulongeshe kudi Nzambi, ne se: muntu yonso udi ne bua ‘kudiambuila bujitu buende.’ (Galatia 6:5, 7; 1 Tesalonike 4:9-12) Pa kuenza mudimu ne Mifundu, bakulu nebumvuije ne: Yehowa mmulekeele kuondo ketu ka muoyo malu a bungi, ne muntu nansha umue wa kutudi kêna ne bua kulumbuluisha bakuabu bua malu aa. (Matayo 7:1, 2; Yakobo 4:10-12) Bua kuenza mudimu pamue mu buobumue, tudi ne bua kueyemenangana ne kunemekangana mu tshisumbu. Pa kufila mibelu ya mu Mifundu padibi bikengedibua, “mapa mikale bantu” adi atuambuluisha bua kulama ditalala ne buobumue buetu.​—Lomo 14:19.

Badi bakuba mikoko

18, 19. (a) “Mapa mikale bantu” adi atukuba ku bantu kayi? (b) Bidi bikengela kukuba mikoko ku njiwu kayi mikuabu, ne ntshinyi tshidi bakulu benza bua kukuba mikoko?

¹⁸ Tshinayi: Yehowa udi ufila “mapa mikale bantu” bua kutukuba ku buenzeji bua “lupepele luonso lua dilongesha ne didinga dia bantu, ne mayele mu dikuatakaja dia tshilema.” (Efeso 4:14, NW) Muaku wa tshiena-Greke udi mukudimuna ne: “didinga” udi umvuija “kuibila mu dinaya dia mibela,” “kumanya mua kutua mibela ne budimu.” Abi kabienaku bituvuluija mudi batontolodi benza malu ne budimu anyi? Pa kufila bijadiki bidi bilobesha, badi benza mudimu ne Mifundu bua kupambuisha bena Kristo balelela ku ditabuja diabu. Bakulu badi ne bua kushala badimuke bua “nkashama idi ne luonji” ya mushindu’eu!​—Bienzedi 20:29, 30.

¹⁹ Bidi bikengela kukuba mikoko ya Yehowa ku njiwu mikuabu kabidi. Ne dikima dionso Davidi mulami wa kale uvua ukuba mikoko ya tatuende ku nyama ya luonji. (1 Samuele 17:34-36) Lelu’eu kabidi, bikondo bidi mua kumueneka bidi balami bena Kristo ne bua kuleja dikima bua kumona mua kukuba mikoko ku bantu bonso badi bakeba kutatshisha anyi kukengesha mikoko ya Yehowa, nangananga idi kayiyi mua kukandamana. Bakulu kabena ne bua kujingakana bua kumbusha bantu badi benza mpekatu ku budisuile mu tshisumbu, nansha badi bibila ku bukole, bashima ne benza malu ne mayele bua kumona mua kutungunuja bubi.b​—1 Kolinto 5:9-13; tangila Musambu 101:7.

20. Bua tshinyi tudi mua kudiumvua bakubibue padi “mapa mikale bantu” atulama?

²⁰ Mmunyipu mutudi ne dianyisha bua “mapa [aa] mikale bantu”! Padibu batulama ne dinanga, tudi mua kudiumvua bakubibue, bualu badi batululamija ne bulenga buonso, batuibaka ne dinanga, kabayi bajingakana bua kulama buobumue buetu ne badi batukuba ne dikima. Kadi mmunyi mudi “mapa mikale bantu” mua kumona mudimu wawu mu tshisumbu? Ne mmunyi mutudi mua kuleja ne: tudi tuanyisha mapa aa? Netuandamune nkonko eyi mu tshiena-bualu tshidi tshilonda.

[Mêyi adi kuinshi]

Udi muvuluke anyi?

◻ Mbanganyi badi “mapa mikale bantu,” ne bua tshinyi Nzambi mmubafile kudi tshisumbu ku butuangaji bua Kristo?

◻ Mmunyi mudi bakulu bakumbaja mudimu wabu wa kululamija mikoko?

◻ Ntshinyi tshidi bakulu mua kuenza bua kuibaka bena kuitabuja nabu?

◻ Mmunyi mudi bakulu mua kulama buobumue bua tshisumbu?

[Tshimfuanyi mu dibeji 10]

Luse ludi luambuluisha bakulu bua kukankamija bantu badi batekete mu mikolo

[Tshimfuanyi mu dibeji 10]

Buobumue munkatshi mua bakulu budi bufila buobumue mu tshisumbu