Tulamayi lumu luimpe

MUNTU udi mua kusanka padiye utangila tshimfuanyi tshizola. Padiye utshikenketa bimpe menemene, udi mua kumona mushindu uvua muzodi mufite buloso njila ne njila bua kulaba mekala kabukabu pa tshintu tshidiye uzolela.

Bia muomumue, muntu kêna mua kupeta lumu luimpe ku tshilabilu tshimue tshia buloso bunene to, kadi batu balupetela ku malu makese atudi tuenza munkatshi mua tshikondo kampanda. Bushuwa, ku kakese ku kakese tudi tulengeja lumu luetu ku diambuluisha dia bienzedi bietu.

Kadi, tuetu bapitshishile buloso pa muaba udi kauyi ukengedibua, bidi mua kukepesha mushinga wa tshimfuanyi tshitubu bazole. Ke mudibi kabidi bua lumu luetu. Solomo Mukalenge wa meji wakamba ne: “Muntu mutatakane udi unyanga bienzedi biende.” (Nsumuinu 19:3, Mukanda wa Mvidi Mukulu) Bidi bilomba anu dipanga meji dikese bua kunyanga lumu lulenga ludi nalu muntu; pamu’apa bidi mua kuikala ditayika bikole ne tshiji, dinua maluvu dipite pa nnuinu, anyi dienda masandi. (Nsumuinu 6:32; 14:17; 20:1) Nenku, bidi ne mushinga wa bungi bua kudienzeja bua kupeta lumu luimpe ne kuenza madikolela bua kulama lumu elu.​—Tangila Buakabuluibua 3:5.