Tshintu tshimpe kupita bia dilengeja nabi mubidi

MUMANE kuakula bua ‘bilengejilu bia pambidi’ bitu bantu bakaji balaba bua kutamba kulua balenga, mupostolo Petelo wakabela ne: “Kadi bulengele buenu buikale bua munda mua mitshima yenu, buikale bulengele budi kabuyi bujimina bua muoyo mupole ne wa ditalala, bua mushinga munene ku mesu kua [“Nzambi,” NW].”​—1 Petelo 3:3, 4, Muanda Mulenga Lelu.

Bualu budi bukoka ntema mbua se: pakafunda mupostolo bua didilengeja dia pa mutu, uvua muenze mudimu ne muaku wa tshiena-Greke kosmos, kudi kufumina kabidi muaku wa mu Mfualansa “cosmetique,” (bilabu) mmumue ne: “kudilengeja mubidi, nangananga mpala.” Petelo uvua ukandika bantu bakaji bena Kristo bua kabalabi bilabu ne bintu bikuabu bia dilengeja mubidi anyi? Kakuena tshintu nansha tshimue mu Dîyi dia Nzambi tshidi tshileja nanku to. Kadi, Bible udi witaba bua muntu nkayende adiangatshile dipangadika pa bualu ebu, ke bua tshinyi muntu yonso udi ne biende bintu bia didilengeja nabi bidiye yeye nkayende musue.

Kadi, biela muntu kalela mu dilaba bilabu, anyi biadilabaye mu mushindu udi utonda bantu bakuabu ba bungi, abi bidi bileja tshinyi? Kabienaku bimubipisha, bileja dipanga budipope, bimuvuija mubi, mudileji, udi wenza anu bidi bimusankisha anyi? Bushuwa, bidi mua kupuekesha mushinga wa mmuenekelu wa muntu mukaji, pamu’apa bifila lungenyi lua se: kêna ne tshikadilu tshimpe nansha.​—Tangila Yehezekele 23:36-42.

Bua bualu ebu, mukaji ‘udi wamba ne: udi utshina Nzambi’ biasuaye bua kulaba bintu bia dilengeja nabi mubidi, neadienzeje bua mpala wende aleje ngikadilu wa meji malenga, bupole-malu, bulenga ne budipope. Ngikadilu eyi neivudije bulengele buende. Bushuwa, nansha biasuaye anyi biabengaye kulaba bilabu, nealeje bunême ne buimpe bua mu mutshima. Anu mudi mêyi a Petelo matela kuulu eku umvuija, ngikadilu eyi neileje dimanya diende dia ne: kudi tshintu tshimpe kupita bia dilengeja nabi mubidi.​—1 Timote 2:9, 10.