“Muoyo mukole uvua ditabuja difila”

MU 1998 bakapatula mukanda mupiamupia mu Mfualansa uvua bedi ba mpata banyishe bikole, muikale ne mutu wa bualu wa se: Les Témoins de Jéhovah face à Hitler (Bantemu ba Yehowa ne Hitler), mufunda kudi Guy Canonici. Mu mêyi ende a mbangilu mu mukanda eu, François Bédarida, mufundi wa malu a kale mutambe kunemekibua wa bena France, wakamba ne: “Eu mmukanda udi utamba kusankisha. Ki ng’anu bualu udi wamba avua kaayi mamba, kadi bualu mmufike mu tshikondo tshiawu. . . . Pa kumbusha bashikuluji ba malu a kale, nnganyi mukuabu udi mumanye makenga a Bantemu ba Yehowa mu [bukokeshi bua] Reich Muisatu? Pabi, munkatshi mua bidimu 12 bia bukokeshi ebu, bakabakengesha ne luonji ne tshikisu tshia katshi ku dînu. Bakamona pabu malu makuate buôwa a mu tumponya tua disubishilangana. Bakabakengesha kabidi bikole bua ditabuja ne malongesha abu. Bua tshinyi kabena bakula bua bena Kristo aba mu miyuki ya kale? . . .

“Bua tshinyi bakalongolola bua kukengesha ne tshikisu kasumbu aka kakese kadi katangalake, paku kikale kenza ne bantu badi kabayi benzelangana bibi? Ke muaba udi tshilumbu eu. Kabivu’anu bualu Bantemu bavua bakese pa kubafuanyikija ne bungi bua bantu bavua mu Allemagne​—bishiferi bidi bileja ne: mu bantu bapite pa miliyo 60 bavua mu ditunga edi, Bantemu bavua batue ku 20 000—​ne buonso buabu bavua bamuena-muabu ba ditalala bavua banemeka mikenji, bavua kabayi baluisha muntu nansha umue, ne bavua basue anu kuenza mudimu ne kukolesha bimpe bana babu. . . .

“Dibakengesha edi diakalua kutuilangana ne dikandamana dia mu nyuma dikole ne dia butshimunyi dia bena kuitabuja bakatantamena makenga makole akabavuila ku diambuluisha dia bukole bua ditabuja diabu mu Yezu Kristo, kubangila ku dibanyanga tshizubu dia bampulushi ba Mbulamatadi​—[malu aa] akabafikisha ku dileja dikima dikole ne ku difuila ditabuja.”

Muyuki wa Bantemu ba Yehowa bakakenga bua ditabuja diabu dia bena Kristo pavuabu bakandike bitendelelu udi ne buenzeji bukole. Mu dikonkonona diatshi dia mukanda eu, tshikandakanda tshinene tshia La Croix tshia bena Katolike tshia mu Mfualansa, tshiakasakidila malu aa adi alenga ku muoyo ne: “Bua muyuki wabu udi kauyi mutambe kumanyika bimpe, Guy Canonici mmusangishe bijadiki bia bungi bidi bipangisha bantu tshia kuamba kumpala kua muoyo mukole uvua ditabuja difila mu mêyi mapepele menemene, ditabuja divua kadiyi kunyanga too ne ku ndekelu, divua nansha kudi bana batekete. Tshivulukidi etshi tshidi ne bua kujikija mpata idi nayi bantu bua Buena-Kristo bua Bantemu ba Yehowa.”