2000: Ntshidimu tshia pa buatshi anyi?
KUDIKU bualu kampanda bua pa buabu bua tshidimu tshia 2000 anyi? Bantu ba bungi ba mu matunga a ku Mputu badi batshiangata bu tshidimu tshia kumpala tshia milenyume muisatu anyi bidimu tshinunu bialonda tshidimu tshia 2000. Bantu badi munkatshi mua dilongolola bintu bia bungi bua kumona mua kutshisekelela. Badi munkatshi mua diasa mêba manene adi enda ne nzembu bua kubalawu tusunsa (anyi sekonde) too ne patuadija bidimu tshinunu bipiabipia anyi bidimu bia 2000. Badi balongolola bibilu bia mikukuku bienzabu dia muladilu wa Tshidimu atshi Tshipiatshipia. Bakadi batuadije kusumbisha mu magazen a mu bimenga binene ne bikese mipila mifunda miaku idi ileja mutukadi ku ndekelu kua bidimu tshinunu bikadi pa kujika ebi.
Bitendelelu bikese ne binene nebidisangishe bua kuenza bibilu munkatshi mua tshidimu atshi tshionso. Ku ntuadijilu kua tshidimu tshilualua, Pape Jean Paul II neenze luendu mutangile mu ditunga dia Isalele bua kulombola bena Katolike mu tshidibu babikila ne: “Musekelelu wa disanka wa Ekleziya wa bena Katolike ka bena Roma bua bidimu tshinunu bikadi pa kutuadija.” Badi batshinka ne: bantu batue ku miliyo ibidi ne tshitupa ne bamusua-luendu miliyo isambombo, batendeledi ne bantu badi baya bua kubandila patupu, badi badilongolola bua kuya mu Isalele tshidimu tshidi kumpala.
Bua tshinyi bantu ba bungi badi badilongolola bua kuya mu Isalele? Pavuaye wakula bua pape, Kardinale Roger Etchegaray, muena mudimu mu Vatican, wakamba ne: “Tshidimu tshia 2000 mmusekelelu wa Kristo ne wa muoyo wende mu ditunga edi. Nenku bidi bikengela ne: Pape alue munemu.” Ndiumvuangana kayi didi pankatshi pa tshidimu tshia 2000 ne Kristo? Bantu ba bungi badi bela meji ne: bidimu 2 000 bidi bikumbana mu tshidimu tshia 2000, kubangila ku diledibua dia Yezu. Mbia bushuwa anyi? Netumone bualu ebu.
Bena bimue bitendelelu badi mene bangata tshidimu tshia 2000 ne mushinga wa bungi. Mbatuishibue ne: mu tshidimu tshialua anyi tshikuabu tshialonda, Yezu neapingane pa Mukuna wa Olive, ne mvita ya Armagedone idibu batele mu mukanda wa Buakabuluibua, nebayiluangene mu tshibanda tshia Megido. (Buakabuluibua 16:14-16) Mu dindila malu aa, bantu binunu ne binunu badi basombele mu États-Unis badi munkatshi mua disumbisha mpangu ne bintu biabu bia bungi ne baya mu Isalele. Bua kuambuluisha bantu bonso badi kabayi mua kushiya mpangu yabu, badi baleja mudi mpasata kampanda muende lumu mu États-unis mulaye bua kuleja bimpe menemene dipingana dia Yezu ku televizion!
Mu matunga a ku Mputu, bantu badi benda badilongolola bikole bua kubuela mu bidimu bia 2000. Kadi mu matunga makuabu, bantu badi batungunuka ne midimu yabu ya buatshiabuila. Bantu aba—tshibungi tshia badi pa buloba—kabena bitaba ne: Yezu wa mu Nazaleta uvua Masiya to. Kabatu nansha bitaba mbadilu wa matuku wa K.K.-A.D.a Tshilejilu, ba-Mizilman ba bungi batu ne kabu kalandriye, ne bilondeshile kalandriye aku, tshidimu tshidi tshilua netshikale tshia 1420, ki ntshia 2000 nansha. Bua kubala bidimu, ba-Mizilman batu babangila ku dituku divua muprofete Muhamede munyeme mu Mecque mutangile mu Médine. Pa buloba bujima bantu badi ne tulandriye tutue ku 40.
Tshidimu tshia 2000 tshidi ne bua kumvuija bualu kampanda bua bena Kristo anyi? Dituku dia 1 Tshiongo 2000 nedikale ne diumvuija dia pa buadi anyi? Netuandamune nkonko eyi mu tshiena-bualu tshidi tshilonda.
[Mêyi adi kuinshi]
a Mu mbadilu wa matuku wa K.K.-A.D., malu akenzeka kumpala kua diledibua dia Yezu badi baamba ne: ng’a mu bidimu bia “K.K.” (Kumpala kua Kristo); bua akenzeka kunyima kua diledibua edi badi baamba ne: ng’a mu bidimu bia “A.D.” (Anno Domini—“mu tshidimu tshia Mukalenge wetu.”) Kadi, bamue bamanyi badi balonge bikole batu basue mbikidilu udi kayi wa bena bitendelelu wa: “K.B.B.” (kumpala kua Bikondo Bietu) ne “B.B.” (Bikondo Bietu.)