Masanka adi afumina ku dinanga Dîyi dia Nzambi
‘Unange [meji], neakukube. Wewe muapete, neakupeteshe lumu.’—NSUMUINU 4:6, 8, MMM.
1. Kunanga Dîyi dia Nzambi menemene kudi kumvuija tshinyi?
KUBALA Bible kudi ne mushinga bua muena Kristo. Kadi kumubala nkayaku kakuena kuleja dinanga bua Dîyi dia Nzambi to. Tudi mua kuamba bishi bikala muntu ubala Bible, eku wenza malu adi Bible ubenga? Bushuwa, ki mmunange Dîyi dia Nzambi muvua mufundi wa Musambu wa 119 mudinange to. Kunanga Dîyi dia Nzambi kuakamufikisha ku ditumikila malu avuadi dilomba.—Musambu 119:97, 101, 105.
2. Mmasanka kayi adi afumina ku meji adi mashindamene pa Dîyi dia Nzambi?
2 Kutumikila Dîyi dia Nzambi kudi kulomba muntu bua ikale misangu yonso mulongolole ngelelu wende wa meji ne nsombelu wende. Kuenza nenku kudi kuleja meji malenga, adi mikale umvuija dienza mudimu bimpe ne dimanya ne dijingulula dia malu bidi muntu mupete mu dilonga dia Bible. ‘Unange [meji], neakukube. Unange meji bikole, neakutumbishe, wewe muapete, neakupeteshe lumu. Neakupeteshe tshifulu tshia butumbi, akuase tshikata tshia lumu ku mutu.’ (Nsumuinu 4:6, 8, 9, MMM) Edi ndikankamija dilenga bua kukolesha dinanga bua Dîyi dia Nzambi ne bua kuikala balombola kudidi! Nnganyi utu kayi musue bua bamukube, bamutumbishe ne bamupeshe lumu?
Bakuba ku bualu bubi budi bushala kashidi
3. Bua tshinyi bena Kristo badi dijinga ne bukubi kupita kumpala, ne kubakuba ku buenzeji bua nganyi?
3 Mmu mushindu kayi mudi meji adi muntu mupete mu dilonga ne mu ditumikila Dîyi dia Nzambi amukuba? Mmu mushindu wa se: meji aa adi amuepula ku buenzeji bua Satana Diabolo. Yezu wakalongesha bayidi bende bua kulomba bua babasungile kudi mubi, Satana. (Matayo 6:13) Lelu’eu, kabiena bikengela kujingakana bua kusambila Nzambi bua atusungile ku buenzeji bua Satana to. Pakavua tshidimu tshia 1914 tshimane kubanga, bakipata Satana ne ba-demon mu diulu, ne bua muanda eu Satana udi ‘ne tshiji tshikole, mmumanye ne: udi ne musangu muîpi.’ (Buakabuluibua 12:9, 10, 12) Pa kumona tshikondo tshitukadi, tshiji tshiende tshidi ne bua kuikala tshikole menemene, ne mmuditue mu diluisha bantu ‘badi batumikila mikenji ya Nzambi ne badi ne bumanyishi bua Yezu,’ kadi kakubatshimuna to.—Buakabuluibua 12:17.
4. Mmunyi mudi bena Kristo bakubibue ku buenzeji bua Satana ne ku mateyi ende?
4 Bua tshiji tshidiye natshi, Satana udi utungunuka ne kujudila bena Kristo aba tshimvundu ne kusaka bantu bua kubakengesha ne tshikisu peshi udi ukeba kupumbisha mudimu wabu mu mishindu mikuabu. Mmusue kabidi kufikisha bamanyishi ba Bukalenge ku dishindamena pa malu bu mudi: lumu lua panu, lulèngù, kupeta bintu bia ku mubidi ne kukeba masanka, pamutu pa kushindamena pa mudimu wa diyisha Bukalenge. Ntshinyi tshidi tshiambuluisha basadidi ba Nzambi ba lulamatu bua kukandamena buenzeji bua Satana anyi bua kubenga kukuatshika mu mateyi ende? Bushuwa, disambila, malanda mashême ne Yehowa ne ditabuja dia se: milayi yende neyikumbane, bidi ne mushinga wa bungi. Kadi bionso ebi mbisuikila ku dimanya dia Dîyi dia Nzambi ne ku dipangadika dia kuteleja malu adidi dituvuluija. Malu aa adi afumina ku dibala dia Bible ne mikanda idi imumvuija, dibuela mu bisangilu bia bena Kristo, diteleja mibelu ya mu Mifundu idi muena kuitabuja netu utupesha anyi ku dielangana meji ne muoyo mujima pa mêyi a mu Bible adi nyuma wa Nzambi utuvuluija.—Yeshaya 30:21; Yone 14:26; 1 Yone 2:15-17.
5. Mmu mishindu kayi mudi meji adi mashindamene pa Dîyi dia Nzambi atukuba?
5 Bantu badi banange Dîyi dia Nzambi mbakubibue mu mishindu mikuabu. Tshilejilu, badi bepuka tunyinganyinga ne masama adi afumina ku bintu bu mudi dinua dia diamba ne mfuanka ne ku tshiendenda tshia masandi. (1 Kolinto 5:11; 2 Kolinto 7:1) Kabena banyanga malanda abu pa kujanangana anyi pa kuikala ne ngakuilu mubi nansha. (Efeso 4:31) Kabena badifila mu dikeba kumanya nkindi ya dishima ya meji a bena panu idi ifikisha bantu ku dilua bedi ba mpata nansha. (1 Kolinto 3:19) Dinanga didibu nadi bua Dîyi dia Nzambi didi dibakuba ku malu adi mua kubanyangila malanda abu ne Nzambi ne ditekemena diabu dia muoyo wa tshiendelele. Mbadifile mu mudimu wa diambuluisha bantu nabu bua bikale ne ditabuja mu milayi milenga idi mu Bible, bamanye ne: mu dienza nenku ‘nebadisungile buobu ne bantu badi bumvua mêyi abu.’—1 Timote 4:16.
6. Mmunyi mudi meji adi mashindamene pa Dîyi dia Nzambi atukuba nansha mu nsombelu mikole?
6 Bulelela, “bikondo ne malu adi kaayi malongolola” bidi mua kufikila muntu yonso, nansha aba badi banange Dîyi dia Nzambi. (Muambi 9:11, NW) Bua bamue ba munkatshi muetu, kakuena mushindu wa kuepuka bipupu bia ku bintu bifuka, masama makole, njiwu anyi lufu lua tshikoso. Nansha nanku, tudi mu bukubi. Kakuena tshipupu tshidi mua kuenzela muntu udi munange Dîyi dia Nzambi bualu bubi budi bushala kashidi to. Ke bua tshinyi katuena ne bua kutamba kupampakana bua tshidi mua kutufikila mu matuku atshilualua. Kunyima kua tuetu bamane kuangata mapangadika onso adi makanyine, mbimpe tushiye malu mu bianza bia Yehowa ne katulekedi njiwu idiku lelu itupangisha bua kuikala ne ditalala to. (Matayo 6:33, 34; Filipoi 4:6, 7) Vuluka ne: ditekemena dia dibika dia bafue mbualu bulelela, kabidi nekuikale nsombelu muimpe mutambe pikala Nzambi mua ‘kuvuija bintu bionso bipiabipia.’—Buakabuluibua 21:5; Yone 11:25.
Leja ne: udi “buloba buimpe”
7. Mmufuanu kayi uvua Yezu mulondele misumba ya bantu bavua balue kumuteleja?
7 Mushinga wa kuikala ne mmuenenu muimpe bua Dîyi dia Nzambi uvua muleja patoke mu umue wa ku mifuanu ya Yezu. Pavua Yezu uyisha lumu luimpe mu Palestine, misumba ya bantu ivua yunguila bua kumuteleja. (Luka 8:1, 4) Kadi bantu bonso kabavua banange menemene Dîyi dia Nzambi to. Kakuyi mpata, ba bungi bakalua bua kumuteleja bualu bavua basue kumona bishima peshi bualu bavua basue ndongeshilu wende mulenga. Bua nanku Yezu wakalondela misumba eyi ya bantu mufuanu eu: ‘Mumiaminyi wakaya bua kumiamina mamiinu ende; pakadiye umiamina, mamiinu makuabu akamata kukala kua njila; bantu bakaadiata mu makasa, nyunyu ya mu diulu yakaazokola. Makuabu akamata pa dibue; pakatolokawu, akafubidila, bualu bua kaakadi ne tshitelela. Makuabu akamata mu mionji ya meba, mionji yakadiunda nawu, yakaanyengela. Makuabu akamata mu buloba buimpe, akadiunda, akavudija mamiinu makuabu lukama.’—Luka 8:5-8.
8. Mu mufuanu wa Yezu, mamiinu ntshinyi?
8 Mufuanu wa Yezu wakaleja ne: diyisha dia lumu luimpe divua ne bua kupatula bipeta bishilangane bilondeshile mutshima wa muteleji. Mamiinu adibu bamiamina ‘ndîyi dia Nzambi.’ (Luka 8:11) Anyi bilondeshile mudi muyuki mukuabu wa mufuanu eu uleja, mamiinu ‘ndîyi dia bukalenge.’ (Matayo 13:19) Ku biambilu ebi, Yezu uvua mua kuenza mudimu ne tshionso tshivuaye musue, bualu tshiena-bualu tshia Dîyi dia Nzambi m’Bukalenge bua mu diulu bulombola kudi Mukalenge Yezu Kristo buikala Yehowa mua kubingisha nabu bumfumu buende ne kuvuija nabu dîna diende dinsantu. (Matayo 6:9, 10) Nenku mamiinu mmukenji wa lumu luimpe udi mu Bible. Bantemu ba Yehowa batu bamanyisha mukenji wa Bukalenge ebu padibu bamiamina mamiinu mu didikija Yezu Kristo Mumiaminyi wa kumpala. Mmushindu kayi utu bantu bakidila mukenji eu?
9. Ntshinyi tshidibu baleja kudi mamiinu akamata (a) kukala kua njila? (b) pa dibue? (c) munkatshi mua meba?
9 Yezu wakamba ne: amue mamiinu adi amata kukala kua njila ne bantu badi baadiata mu makasa. Adi aleja bantu badi kabayi ne dîba nansha dikese bua mamiinu a Bukalenge kuelawu miji mu mitshima yabu. Kumpala kua buobu kubanga kunanga Dîyi dia Nzambi, ‘Diabolo ulualua, udi unyenga dîyi mu mitshima yabu [bua] ne: kabitabuji, kabasungidibu.’ (Luka 8:12) Amue mamiinu adi amata pa dibue. Adi aleja bantu badi banyisha mukenji wa mu Bible kadi kabayi baulekela ulenga mitshima yabu to. Padi buluishi bulua peshi padibu bamona bikole bua kutumikila mibelu ya mu Bible, “badi basesuka” bualu kabena ne miji nansha. (Luka 8:13) Pashishe kudi badi bumvua dîyi kadi babajingakaja kudi “ntatu, biuma ne masanka a panu.” Anu bu mutu bikunyibua binyengela kudi meba, ndekelu wa bionso ‘badi babakutakaja.’—Luka 8:14, MMM.
10, 11. (a) Mbanganyi badi tshimfuanyi tshia buloba buimpe? (b) Ntshinyi tshitudi ne bua kuenza bua ‘kulama bikole’ Dîyi dia Nzambi mu mitshima yetu?
10 Bua kujikija, kudi mamiinu adi amata pa buloba buimpe. Adi aleja bantu badi bitaba mukenji ne “mitshima mimpe ne ya kalolo.” Bulelela, yonso wa kutudi mmusue kuikala buloba buimpe. Kadi bua kuamba bualu pa bualu, tshidi ne mushinga mmuenenu wa Nzambi. (Nsumuinu 17:3; 1 Kolinto 4:4, 5) Dîyi diende didi diamba ne: ‘mutshima muimpe ne wa kalolo’ ntshintu tshitudi tulejila ku bienzedi bietu kubangila ku mpindieu too ne ku lufu luetu peshi too ne pikala Nzambi mua kubutula ndongoluelu eu mubi wa malu. Bituikala ku ntuadijilu tudi banyishe mukenji wa Bukalenge, abu mbualu buimpe. Kadi bantu badi ne mutshima muimpe ne wa kalolo badi bitaba Dîyi dia Nzambi ne ‘badilama bikole, [ne] badi bavudija mamiinu bua dinanukila diabu.’—Luka 8:15.
11 Mushindu umuepele mulelela wa kulama bikole Dîyi dia Nzambi mu mitshima yetu ng’wa kudibala ne kudilonga pa nkayetu ne patudi ne bena kuitabuja netu. Bidi biumvuija kudia biakudia bia mu nyuma bifidila mu njila mujadika bua kutangila midimu ya mu nyuma ya bayidi balelela ba Yezu. (Matayo 24:45-47) Ku diambuluisha dia njila eu, bantu badi balama bikole Dîyi dia Nzambi mu mitshima yabu mbasakibue kudi dinanga bua ‘kuvudija [mamuma] bua dinanukila diabu.’
12. Mmamuma kayi atudi ne bua kukuama ne dinanukila?
12 Mmamuma kayi adi buloba buimpe bupatula? Lelu’eu mu malu a madimi, mamiinu atu akola ne alua bikunyibua bidi bikuama mamuma adi ne mamiinu a mushindu wa muomumue, adibu mua kumiamina kabidi bua kukuamawu mamuma makuabu. Bia muomumue, bua bantu badi ne mutshima muimpe ne wa kalolo, mamiinu a dîyi adi akola munda muabu, abafikisha ku dikola mu nyuma too ne padibu pabu mua kufika ku dikuna mamiinu mu mitshima ya bantu bakuabu. (Matayo 28:19, 20) Ne badi bamueneka ne dinanukila mu mudimu wabu wa dimiamina. Yezu wakaleja mushinga wa dinanukila mu mudimu eu pakambaye ne: ‘Wananukila too ne ku nshikidilu neasungidibue. Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’—Matayo 24:13, 14.
‘Tukuame mamuma mu mudimu wonso muimpe’
13. Ndisambila kayi diakenza Paulo diakasuikakaja mamuma ne dimanya dia Dîyi dia Nzambi?
13 Mupostolo Paulo pende wakakula bua mushinga wa kukuama mamuma, ne wakasuikakaja dikuama mamuma ne Dîyi dia Nzambi. Wakalomba bua bena kuitabuja nende ‘buujibue tente ne kumanya kua disua [dia Nzambi] mu meji onso ne dijingulula bia nyuma; ne bua [buobu] bende mu bienzedi bidi biakanangane ne Mukalenge ku dimusankisha dionso, ne bua [buobu] bakuame mamuma mu mudimu wonso muimpe.’—Kolosai 1:9, 10; Filipoi 1:9-11.
14-16. Mu diumvuangana ne disambila dia Paulo, mmamuma kayi adi bantu badi banange Dîyi dia Nzambi bakuama?
14 Nenku Paulo udi uleja ne: kupeta dimanya dia mu Bible nkayaku ki ndekelu to. Kadi, dinanga ditudi nadi bua Dîyi dia Nzambi didi ditusaka bua ‘kuenda mu bienzedi bidi biakanangane ne Mukalenge’ pa kutungunuka ne ‘kukuama mamuma mu mudimu wonso muimpe.’ Mmudimu muimpe kayi? Kuyisha lumu luimpe lua Bukalenge mmudimu wa pa buawu bua bena Kristo mu matuku aa a ku nshikidilu. (Mâko 13:10) Kabidi, bantu badi banange Dîyi dia Nzambi badi benza muabu muonso bua kuikala bafila mapa a mfranga bua kukuatshisha mudimu eu. Badi basanka bua kuenza muanda eu, bamanye ne: ‘Nzambi udi musue muena kupa udi ufila ne disanka.’ (2 Kolinto 9:7) Mapa adibu bafila adi ambuluisha bua makuta adi atuka mu mudimu udi wenzeka mu nzubu ya Betele mipite pa lukama, mudibu balombuela mudimu wa diyisha Bukalenge, ne mu imue ya kudiyi badi bapatuilamu Bible ne mikanda idi imumvuija. Mapa abu adi kabidi ambuluisha bua makuta atu atuka bua kuenza mpungilu minene ya bena Kristo ne kukuatshisha batangidi bena ngendu, ba-misionere ne bambi ba lumu luimpe bakuabu ba ku dîba ne ku dîba.
15 Midimu mikuabu mimpe nya kuibaka ne kulama bimpe miaba ya ntendelelu mulelela. Dinanga bua Dîyi dia Nzambi didi disaka batendeledi bende bua kuikala bashindike ne: ki mbalengulule Nzubu ya Mpuilu ne Nzubu ya Bukalenge to. (Tangila Nehemiya 10:39.) Bu mudi dîna dia Nzambi dimueneka ku nzubu eyi, mbimpe bua munda ne pambelu pikala palama ne mankenda ne nzubu eyi ikale ikoka bantu, ne kabidi se: bantu badi batendelelamu bikale kabayi kadiwu. (2 Kolinto 6:3) Bamue bena Kristo badi ne mushindu wa kuenza bivule. Dinanga didibu nadi bua Dîyi dia Nzambi didi dibasaka bua kuya mitantshi mile ne kuambuluisha mu luibaku lua miaba mipiamipia ya ntendelelu mu matunga mudi dijinga dinene, difumine ku bupele peshi bualu bantu badimu ki mbamanye mudimu au nansha.—2 Kolinto 8:14.
16 ‘Kukuama mamuma mu mudimu wonso muimpe’ kudi kabidi kumvuija kuambula majitu a dîku ne kuleja mutudi tuditatshisha bua bena Kristo netu. Dinanga dia Dîyi dia Nzambi didi ditusaka bua kuikala ne muoyo wa luse patudi tumona “bena kuitabuja netu” bikale mu lutatu ne “kulonga mua kunanga bena nzubu [wetu].” (Galatia 6:10; 1 Timote 5:4, 8, MML) Mu muanda eu, kusamba babedi ne kukolesha badi badila mmudimu muimpe. Ne bakulu ba tshisumbu ne bena mu Komite ya Diumvuangana ne Mpitadi badi benza mudimu mulenga mu diambuluisha bantu badi mu nsombelu mikole mu malu a luondapu. (Bienzedi 15:29) Pashishe, kudi bipupu bidi bienda buvulangana—bimue mbia ku bintu bifuka ne bikuabu mbikebesha kudi bupâle bua bantu. Ku diambuluisha dia nyuma wa Nzambi, Bantemu ba Yehowa mbende lumu luimpe mu matunga a bungi a pa buloba bua mudibu bambuluisha ne lukasa bena kuitabuja nabu ne bakuabu bantu badi bapetakane ne bipupu ne njiwu. Bionso ebi mmamuma mimpe adi bantu badi banange Dîyi dia Nzambi baleja.
Masanka a mpatshi mu matuku atshilualua
17, 18. (a) Ntshinyi tshidi mudimu wa dimiamina mamiinu a Bukalenge ukumbaja? (b) Mmalu kayi a tshikuma ikala bantu badi banange Dîyi dia Nzambi mua kumona mu katupa kîpi emu?
17 Dimiamina mamiinu a Bukalenge didi ditungunuka ne kupesha bukua-bantu masanka a bungi. Mu bidimu bidi panshi ebi, bantu bapite pa 300 000 ku tshidimu tshionso mbitabe bua mukenji wa mu Bible kuelawu miji mu mitshima yabu, mbafike too ne ku dilambula mioyo yabu kudi Yehowa ne mbaleje didilambula edi pa kutambula. Malu malenga mmabindile mu matuku atshilualua!
18 Mu katupa kîpi emu, banangi ba Dîyi dia Nzambi mbamanye ne: Yehowa Nzambi neajuke bua kutumbisha dîna diende. Neabutule “Babulona Munene,” nsangilu wa bitendelelu bia dishima bia buloba bujima. (Buakabuluibua 18:2, 8) Pashishe, Mukalenge Yezu Kristo neabutule bantu badi babenga bua kutumikila Dîyi dia Nzambi. (Musambu 2:9-11; Danyele 2:44) Kunyima, Bukalenge bua Yehowa nebumbushe buenzavi, mvita ne bipupu bikuabu bua kashidi. Kabiakuikala kabidi ne mushinga bua kusamba bantu bua kanyinganyinga, masama ne lufu to.—Buakabuluibua 21:3, 4.
19, 20. Mmalu kayi malenga adi mindile bantu badi banange menemene Dîyi dia Nzambi mu matuku atshilualua?
19 Bushuwa, dîba adi bantu badi banange Dîyi dia Nzambi nebenze midimu mimpe ya mpatshi! Bantu bapanduka ku Armagedone nebatuadije mudimu muimpe wa kukudimuna buloba ebu mparadizu. Nebikale ne diakalenga dia kulongolola bintu bua bantu bafue badi bikishe mpindieu mu nkita, badi Nzambi muvuluke ne baluaye kubisha ku bafue. (Yone 5:28, 29) Mu tshikondo atshi, bantu bikale pa buloba nebapete mikenji mipuangane ya kudi Yehowa, Mukalenge Munene, ku butuangaji bua Muanende Yezu Kristo. ‘Nebabulule mikanda,’ yaleja mikenji ya Yehowa bua bukua-panu bupiabupia.—Buakabuluibua 20:12, MMM.
20 Mu tshikondo tshidi Yehowa mujadike, neapeshe kasumbu kajima ka bena Kristo bela manyi ba lulamatu difutu diabu mu diulu bu ‘bapianyi tshiapamue ne Kristo.’ (Lomo 8:17) Mu Bukokeshi bua Bidimu Tshinunu bua Kristo, bantu bonso badi pa buloba badi banange Dîyi dia Nzambi nebabafikishe ku bupuangane bua lungenyi ne bua mubidi. Kunyima kua buobu bamane kuleja lulamatu mu diteta dia ndekelu, nebabafute muoyo wa tshiendelele ne nebikale ne “butumbi bua bana ba Nzambi.” (Lomo 8:21; Buakabuluibua 20:1-3, 7-10) Atshi netshikale tshikondo tshilenga tshia dikema! Bulelela, nansha bikala Yehowa mutupeshe ditekemena dia kupeta muoyo mu diulu anyi pa buloba, dinanga dikole bua Dîyi diende ne dipangadika dia kuikala ne nsombelu mumvuangane ne meji malenga nebitukube. Mu matuku atshilualua, meji aa ‘neatupeteshe lumu bualu tudi baapete.’—Nsumuinu 4:6, 8, MMM.
Udi mua kumvuija anyi?
◻ Mmunyi muatukuba dinanga dia Dîyi dia Nzambi?
◻ Mamiinu a mu mufuanu wa Yezu adi aleja tshinyi, ne mmunyi mudibu baamiamina?
◻ Mmunyi mutudi mua kuleja ne: tudi “buloba buimpe”?
◻ Mmasanka kayi adi banangi ba Dîyi dia Nzambi mua kutekemena?
[Tshimfuanyi mu dibeji 16]
Mamiinu avua Yezu muambe mu mufuanu wende adi aleja mukenji wa lumu luimpe udi mu Dîyi dia Nzambi
[Mêyi a dianyisha]
Garo Nalbandian
[Tshimfuanyi mu dibeji 17]
Bantemu ba Yehowa badi bidikija Mumiaminyi Munene
[Bimfuanyi mu dibeji 18]
Bantu bapanduka ku Armagedone nebadie mamuma a mu buloba