Mudimu ne dijikija lutetuku bikumbanyine

DIJIKIJA lutetuku ntshilamba tshilengele, tshidibu kabayi mua kuvuala dîba dionso to.” Mêyi aa a mufundi kampanda adi tshimfuanyi tshimpe tshia mushinga wa dijikija lutetuku. Kadi, udi usua kuamba ne: muntu udi ne bua kuleja nkatshinkatshi pankatshi pa dijikija lutetuku ne mudimu utuye wenza.

Solomo, umue wa ku bafundi ba Bible benzeja kudi spiritu wakakula pende bua muanda eu. Mukalenge wa meji eu wakaleja mishindu mibi ibidi itudi ne bua kuepuka. Tshia kumpala, wakafunda ne: “Mutshimbakane udi uvunga maboko pa tshiadi, udibutula yeye muine.” (Muambi 4:5, MMM) Bushuwa, bufube budi mua kufikisha muntu ku bulanda. Ndekelu wa bionso, bufube budi mua kunyanga makanda a mubidi a muena lulèngù, nansha kufikisha muoyo wende mu njiwu. Ku lukuabu luseke, kudi bamue badi balekela malu onso bua kuditua anu mu midimu mikole. Solomo wakumvuija mudimu wabu mukole eu udi kauyi ndekelu wamba ne: ng’wa ‘patupu ne nkuipata kua lupepele.’​—Muambi 4:4.

Mbia meji pavua Solomo muleje mushinga wa kumanya mua kutshintshikila malu pakambaye ne: ‘Dianza diule tente ne [diikisha, NW] didi dipita manza abidi mûle tente ne mudimu mukole ne kuipata kua lupepele.’ (Muambi 4:6) Muntu udi ne bua ‘kusankisha mutshima wende [bua mudimu wende mukole, NW]’​—mmumue ne: udi ne bua kupeta dîba mu bimue bikondo dia kusankila mu bidiye mupete. (Muambi 2:24) Ne kudi ne bua kuikala malu makuabu mu nsombelu pa kumusha mudimu wa ku mubidi. Tudi ne bua kupitshisha amue mêba pamue ne dîku dietu. Solomo wakaleja ne: bujitu buetu bua kumpala ki mmudimu wa ku mubidi to, kadi nkuenzela Nzambi mudimu. (Muambi 12:13) Udiku munkatshi mua aba badi ne mmuenenu mukumbanyine wa mudimu anyi?