Bakenza disua dia Yehowa

Mapa a ku budisuile adi atungunuja ntendelelu mukezuke

BENA Isalele bakadimuenena ne abu abidi muvua Yehowa mubapandishe ne bukole buonso. Bakamona muvua mâyi a Mbuu Mukunze makosoloke mu tshishima, kuendelabu pa buloba bûme ne kunyemabu tshiluilu tshia bena Ejipitu. Bimanyine dishiya, bakamona ku bule mushindu uvua mâyi amue-amue au malue kushipa bantu bavua benda babipata. Yehowa wakasungila mioyo yabu!​—Ekesode 14:21-31.

Kadi diakabi, bamue bena Isalele bakapepeja bualu buvua Nzambi wabu mubenzele. Pavua Mose ku mukuna wa Sinai, bakapesha Alona tukanu tuabu tua ngolo ne kumulombabu bua kubenzelaye lupingu lua buobu kutendelela. Mu dipingana, Mose wakasangana bantomboji aba tshisumbu tshinene badia, banua, baja maja ne bakukuila kana ka ngombe ka ngolo! Ku dîyi divua Yehowa mutume, bakashipa bantu batue ku 3 000, pamu’apa aba bavua bakebeshe buntomboji ebu. Dituku adi, bantu ba Nzambi bakapeta dilongesha dimpe pa bidi bitangila mushinga wa kuikala ne bulamate budi kabuyi buabanya kudi Yehowa.​—Ekesode 32:1-6, 19-29.

Katupa kakese kunyima kua muanda eu, Mose wakadilongolola bua kukumbaja mukenji wa Nzambi wa kuibaka tabernakle, ntenta muenza bua kutendelela uvuabu mua kuambula kuenda nende. Mudimu wa luibaku eu uvua ulomba bintu bia mushinga mukole ne benji ba mudimu bikale ne dimanya dimpe. Bionso ebi bivua mua kufumina penyi? Ne ntshinyi tshitudi mua kulongela ku muyuki eu wa mu Bible?

Difila mapa a bintu ne mamanya

Ku butuangaji bua Mose, Yehowa wakambila bena Isalele ne: ‘Usangishe kupa kua Yehowa munkatshi muenu; muntu yonso udi witabuja mu mutshima wende, alue biende ne kupa kua Yehowa.’ Nkupa kua mushindu kayi? Mu bintu biakatela Mose muvua or, argent, tshiamu tshia mitaku, manda, bilamba, biseba bia nyama, mitshi, ne mabue a mushinga mukole.​—Ekesode 35:5-9.

Bena Isalele bavua ne bintu bia bungi bua kufilabu mapa aa ne kalolo. Vuluka ne: pakapatukabu mu Ejipitu, bakaya ne bintu bia or ne argent, pamue ne bilamba bia bungi. Bushuwa, ‘bakapawula bena Ejipitu.’a (Ekesode 12:35, 36) Kumpala, bena Isalele bakanji kunyanga ku budisuile bilengejilu biabu bua kuenza lupingu bua ntendelelu wa dishima. Mpindieu bavuaku mua kuleja muvuabu ne muoyo wa kufila bintu bua kutuma ntendelelu mulelela kumpala anyi?

Tangila ne: Mose kavua muleje bungi bujalame bua bintu bivua muntu yonso ne bua kufila to, peshi kakanji kubapisha bua kushisha kubasaka bua kufila mapa. Kadi wakalomba patupu ‘muntu yonso udi witabuja mu mutshima wende.’ Bushuwa Mose wakamona se: kabivua bimpe kuenzeja bantu ba Nzambi ku bukole to. Uvua mutuishibue se: muntu yonso uvua ne bua kufila tshionso tshivuaye mua kuikala natshi.​—Tangila 2 Kolinto 8:10-12.

Kadi, mudimu wa luibaku kauvua ulomba anu difila bintu bia ku mubidi nansha. Yehowa wakambila kabidi bena Isalele ne: ‘Muntu yonso udi ne lungenyi lule alue biende bua kuenza bintu bionso biakunuambila Yehowa.’ Bushuwa, mudimu eu wa luibaku uvua ulomba benji ba mudimu bikale dimanya dia bungi. Bulelela, bavua dijinga ne “lungenyi lule lua kuenza n’alu midimu yonso”: ya mabaya, ya biamu ne ya bilengejilu, bua kuenza mudimu eu bimpe. Yehowa uvua ne bua kulombola lungenyi lua benji ba mudimu eu, ne yeye uvua mukumbane bua kuangata lumu luonso pavua mudimu eu ujika bimpe.​—Ekesode 35:10, 30-35; 36:1, 2.

Bena Isalele bakitaba ne disanka bua kufila mpetu yabu ne mamanya abu. Bible udi wamba ne: ‘Muntu yonso wakadi mutshima wende umuenzeja ne wakadi tshipapayi wakalua ne kupa kua Yehowa bualu bua mudimu wa nzubu wa tshitendelelu ne bintu bionso biakadi mu tshitendelelu ne bilulu bia tshijila. Balume ne bakaji bakalua bungi buabu bakadi bitabuja mu mitshima yabu.’​—Ekesode 35:21, 22.

Dilongesha buetu tuetu

Lelu’eu mudimu munene wa diyisha lumu luimpe lua Bukalenge bua Nzambi udi wenzeka ku diambuluisha dia mapa a budisuile. Pa tshibidilu mapa aa atu a makuta. Misangu mikuabu, bena Kristo balume ne bakaji batu bambuluisha ne dimanya didibu nadi bua kuibaka Nzubu ya Bukalenge, Nzubu ya Mpuilu ne ya filiale. Kudi kabidi mudimu udi wenzeka mu nzubu ya Betele mipite pa lukama mu buloba bujima, mudimu udi ulomba mamanya kabukabu. Bantu bonso ba mutshima wa budisuile badi bafile mapa a mushindu’eu bikale batuishibue ne: Yehowa kakupua mudimu wabu mukole muoyo to!​—Ebelu 6:10.

Bidi muomumue bua mudimu udi muena Kristo yonso wa kutudi wenza mu buambi. Bantu bonso mbalombibue bua kudisumbila tshikondo bua kuyisha ne lukunukunu. (Matayo 24:14; Efeso 5:15-17) Bamue mbambi ba lumu luimpe ba ku dîba ne ku dîba anyi bampanda-njila. Bua nsombelu idibu nayi, bakuabu kabatu ne mushindu wa kuenza mêba a bungi bu mutu bampanda-njila to. Nansha nanku, buobu pabu badi basankisha Yehowa. Anu bu muvuabi bua mapa a tabernakle, Yehowa ki mmukose bungi bua bintu bidi muntu yonso ne bua kufila nansha. Kadi, tshidiye ulomba ntshia se: yonso wa kutudi amuenzele mudimu ne mutshima wende wonso, ne anyima wende yonso, ne lungenyi luende luonso, ne bukole buende buonso. (Mâko 12:30) Bituikala tuenza nanku, tudi mua kuikala bashindike ne: neatufute bua mapa a budisuile atudi tufila bua kutua ntendelelu mulelela mpanda.​—Ebelu 11:6.

[Mêyi adi kuinshi]