Bamanyishi ba Bukalenge badi balonda

Didiunda dia mudimu wa Bukalenge mu Namibie

LUMU luimpe lua Bukalenge bua Nzambi luakabuela bua musangu wa kumpala mu ditunga dia Namibie ku ndekelu kua bidimu bia 1920. Kubangila mu tshikondo atshi, bantu ba mutshima mululame nkama mivule mbitabe mukenji wa Nzambi wa lupandu. Malu adi alonda aa adi aleja mudi Yehowa wenda usangisha bintu bilengele ebi mu tshisumbu tshiende tshia mikoko.​—Hagai 2:7.

◻ Paulus, tshidime udi musombele ku Nord-Est kua Namibie, wakayukila bua musangu wa kumpala ne Bantemu ba Yehowa pavuaye muye mu Windhoek, tshimenga tshikulu tshia ditunga edi. Ne lukasa luonso Paulus wakatuishibua bua se: uvua mupete bulelela. Wakapingana kuende ne mukanda wa Udi mua kuikala ne muoyo wa kashidi pa buloba bukudimuna mparadizu. Pashishe, pavuaye uya ku Rundu, tshimenga tshivua ne Nzubu wa Bukalenge tshivua pabuipi menemene, Paulus wakasanganamu Bantemu ne kubalombaye bua kulua kumutangila.

Kadi, kakuvua mushindu wa Bantemu kuya kumutangila lumingu luonso to, bualu muaba uvuaye musombele uvua kule be. Paulus kakateketa mu mikolo to, wakatuadija kudilongela Bible. Kabidi, uvua uyisha bantu bakuabu malu avuaye ulonga ne lukunukunu. Mu bungi bua matuku, bakenza kasumbu ka dilonga dia Bible. Pakumvua kasumbu aka kakese ku tshisanji bamba se: Bantemu ba Yehowa bavua ne bua kuenza mpuilu mu Rundu, bakasangisha tukuta tukese tuvuabu bapete ne kudilongololabu bua kufuta njila kuya kubuela mu mpuilu eu.

Ndisankapu kayi divuabu nadi bua kudisangisha ne Bantemu ba Yehowa bua musangu wa kumpala! Anu pinapu, bakalongolola bua bana betu bapie mu nyuma kuikalabu baya kutangila kasumbu aka pa tshibidilu. Patudi tuakula apa, kudi bamanyishi basambombo mu musoko udi Paulus musombele.

◻ Dijinga divua nadi Johanna bua kumanya malu a bungi adi atangila dîna dia Nzambi diakajuka pakumvuaye muntu mukuabu upetula Bantemu ba Yehowa. Udi wamba ne: “Musangu wa kumpalampala ungakumvua dîna dia Yehowa, diakashala dilamate mu meji, ne ngakabanga kudiebeja bua kumanya ne: Yehowa nnganyi? Mvua nsombela ne mbayanyi pabuipi ne tshimenga tshia Walvis Bay tshivua ku tshitudilu tshia mazuwa. Umue musangu tuakaya mu tshimenga etshi, ne meme kumona bamue Bantemu babanya tshibejibeji tshia Tshibumba tshia Nsentedi mu njila. Ngakapeta tshianyi tshimue ne meme kubalomba bua kundongeshabu Bible, bualu mvua ne nkonko bungi tshianana. Ngakadila pakangambilabu ne: kabavua ne mushindu wa kulua to, bualu mashinyi abu avua manyanguke. Matuku ne ndepe, bayanyi kufuaye, meme e kuya kusombela mu tshimenga tshia Keetmanshoop. Bakatumamu mpanda-njila wa pa buende (muambi wa lumu luimpe wa ku dîba ne ku dîba), ne yeye kumpesha mukanda wa Bulelela budi bufikisha ku muoyo wa kashidi. Anu ntshituadijilaku, meme kujingulula ne: mvua mupete bulelela.

“Kunyima bakangambila bua kuyisha, kadi meme buôwa eku buamba kunshipa. Pamvua nya ku nzubu ne ku nzubu, mvua ndomba Yehowa bua andekele mfue pamutu pa meme kuyisha. Bua musangu wa kumpala pangakatuadija kuenza buambi bua mu njila, ngakasokoma mu kajila kavua pankatshi pa nzubu, ngela meji ne: muntu kavua mua kummona to. Ndekelu wa bionso, ngakapeta dikima dia bungi bua kupesha mupitshi wa njila tshibejibeji, ne ke mungakabanga kuakula ne bantu. Dituku adi, ne diambuluisha dia kudi Yehowa, ngakamanyisha bantu ba bungi ditekemena dianyi dia mu Bible.

“Lelu’eu, kunyima kua bidimu 12, nansha mundi mupele, ntshidi nganyisha bikole mudimu wa bumpanda-njila ne ndi ntungunuka ne kupeta disanka kadiyi kuamba didi difumina ku diambila bantu bakuabu bulelela.”