Nowele ku Asia
• KUKADI BIDIMU NKAMA IBIDI, mumanyi mupiluke kampanda wa mu ditunga dia Corée wakaya mu tshimenga tshia Pékin (mu ditunga dia Chine). Mu nzubu umue munene wa Mvidi Mukulu, wakatangila muulu e kumona bazole tshimfuanyi tshia Mariya muambule Yezu. Pakatangilaye tshimfuanyi atshi tshidi tshikemesha, wakamba ne:
“Mukaji uvua muambule muana wa mvula mitue ku itanu anyi isambombo pambidi, muana umueneka bu uvua usama. Mukaji eu uvua umueneka bu uvua kayi ne bukole bua kubanduluka, bienze bu se: kavua mua kukolesha muoyo bua kutangila muanende uvua muikale umuenza luse. Ne mutantshi mule panyima pabu kuvua mikishi ya bungi ne bana ba mu maboko bikale ne mapuapua benda banyunguluka. Pangakashala mubatangile muulu, mvua mmona anu bu bavua mua kunkulukila tshiyi mumanye. Biakangenza buôwa, ne meme kuboluela tshianza bua kubakuata.”
MUANDA eu wakenzeka mutantshi mule kunyima kua Dishintuluka dia malu dimane kutuadija ku Mputu, mutantshi mule kunyima kua tshikondo tshia mîdima tshia mu Moyen Âge. Kadi bantu ba bungi ba mu Asia kabavua bamanye Buena-Kristo to, nansha tshine tshimfuanyi atshi. Kadi malu mmashintuluke be! Dîba dionso didiku Nowele, batu baleja bimfuanyi bia Yezu muikale muana mutoke. Bena mu Asia mbalue kuibidilangana ne bimfuanyi ebi, ne mene njila ya bungi idibu balengejamu ne bilongo bia Nowele idi ifuanangana ne ya ku Mputu.
Ku dilolo dia mu dia 25 wa Kasuabanga 1998, ngondo umue kumpala kua Nowele, njila munene wa Champs-Élysées mu tshimenga tshia Paris uvua mukenkesha kudi miendu mipite pa 100 000 miasa ku mitshi 300 idi miele mulongo ku mielelu ya njila eu muende lumu. Kabidi, mu njila kampanda wa munkatshi mua tshimenga tshia Séoul, mu Corée, bena mu magazen kampanda manene bakasa mutshi mule wa Nowele, ne bakatuadija kutemesha miendu butuku mu tshimenga tshikulu etshi. Pashishe bakalengeja njila ya mu tshimenga tshia Séoul etshi ne bilongo bia Nowele.
Televizion, bisanji ne bikandakanda bivua biakula bua malu a Nowele dituku dionso. Bua disanka divuabu nadi bua Nowele, bantu ba mu ditunga dijima bakaditua mu disankidila ndekelu wa tshidimu. Bakalengeja ne lukasa bitanda bia nzambi bia mu tshimenga tshia Séoul bitu bikemesha bantu batu bayamu bua bungi buabi. Mushindu’au ke uvua Nowele mutuadije kubuela mu Corée ne mu matunga makuabu a mu Asia mu tshikondo tshivua États-Unis muditue mu musekelelu wende wa Dituku dia Diela Tuasakidila ku ndekelu kua ngondo wa dikumi ne umue.
Bukua-buena-Kristo ki mbutangalake bikole mu matunga a bungi a mu Asia to. Tshilejilu, ku bantu bonso badi mu ditunga dia Corée, anu bantu 26,3 pa lukama ke badi badiamba mudibu bena Kristo. Mu ditunga dia Hong Kong badi 7,9 pa lukama, mu Taïwan badi 7,4 pa lukama ne mu Japon mudi anu muntu 1,2 patupu pa lukama. Mbilelela bua se: bantu ba bungi ba mu Asia kabatu balonda Buena-Kristo to, kadi bidi bimueneka ne: kabatu babenga bua kusekelela Nowele to. Misangu mivule batu basankidila Nowele bikole kupita bena mu matunga adi itaba Yezu. Tshilejilu, Hong Kong mmumanyike bimpe bua disekelela Nowele ne tshikuma, nansha mudi bantu bavule ba mu ditunga edi bikale bena Buddha anyi bena Tao. Nansha mu ditunga dia Chine, mudi anu muntu 0,1 pa lukama muikale udiamba mudiye muena Kristo, Nowele udi wenda utangalaka ne lukasa luonso munkatshi mua bantu ba bungi.
Bua tshinyi badi basekelela Nowele miaba ya bungi mu Asia? Bua tshinyi bantu badi kabayi bitaba ne: Yezu udi Masiya mbabange kudia Nowele udi bantu bavule badi bamba mudibu bena Kristo bamona bu dituku dia diledibua diende? Bena Kristo balelela badi ne bua kulonda mmuenenu udi nende bantu aba bua Nowele anyi? Netupete mandamuna a nkonko eyi bituamanya muvua Nowele mutangalake mu Corée, ditunga dia kale dia mu Asia.