Bakapeta dikima
KABITU anu bitekete bua kupeta dikima dia kuyisha nadi to. Mupostolo Paulo wakamba ne: umue musangu wakapeta dikima “mu kuluangana kua bungi.” (1 Tesalonike 2:2) “Kuluangana” bua kuyisha kudiku ne mushinga anyi? Katuena tudianjila kujadika ne: muntu neapatule bipeta bia pa buabi to, kadi bantu badi batshina Nzambi batu misangu mivule ne disanka bua muvuabu bapete dikima. Tangila bimue bilejilu.
Tara, muana wa bakaji wa bidimu muanda-mukulu wakateleja ne ntema pavua mulongeshi wabu wambila balongi ne: mu Mvita Mibidi ya Buloba bujima, bena Yuda bavua mu tumponya tua disubishilangana bavua bavuale Mutoto wa Davidi muenzela pa kalamba ka mubidi wa manyimanyi. Tara wakadiebeja bikalabi bivua bikengela bua yeye kuleja mmuenenu wende pa bualu ebu. Udi wamba ne: “Ngakasambila mêsu mabulula.” Pashishe wakela tshianza muulu e kuamba ne: Bantemu ba Yehowa bavua pabu mu tumponya atu, bavua bavuale kalamba kakunzubile ka matumba asatu. Mulongeshi wakasanka ne kumuelaye tuasakidila. Diumvuija diakafila Tara diakunzulula njila bua kuyukila malu makuabu ne mulongeshi eu wakalua mene kuleja kalasa kende kajima bande wa video wa: Les Témoins de Jéhovah face à la persécution Nazie.
Mu Guinée, ditunga dia mu Afrike wa kudi dîba dibuelela, Irène, muambi wa lumu luimpe kayi muanji kutambula wakajinga bua kulengeja mudimu wende wa buambi. Misionere uvua umulongesha Bible wakamukankamija bua kuabanyina balongi nende ba mu kalasa bibejibeji bia Tshibumba tshia Nsentedi ne Réveillez-vous! Irène uvua welakana bualu balongi babu kabavua basue kumuteleja to. Kadi, bua mubelu uvua misionere eu mumupeshe, Irène wakapangadija bua kuyukila kumpala ne mulongi uvua umueneka utamba kubenga. Irène wakakema muakamuteleja mulongi au wa bakaji ne muakitabaye mene ne bibejibeji ne muoyo mujima. Balongi bakuabu bakitaba pabu bibejibeji. Ngondo au Irène wakashiya bibejibeji bipite bia ngondo mishale itanu bionso bisangisha pamue.
Mu tshisanga tshia Trinité, mukulu kampanda uvua welakana bua kuyukila ne mulombodi wa tshilongelu kansanga bua kumuleja mushindu udi malu adi mu tshibejibeji tshia Réveillez-vous! mikale ambuluisha. Nansha nanku, wakapeta dikima. Mukulu eu udi wamba ne: “Ngakasambila pangakabuela mu lupangu. Biakankemesha bikole pa kumona disanka dia pa buadi divua nadi mulombodi wa tulasa eu.” Wakitaba tshibejibeji tshia Réveillez-vous! wa: “Quel espoir pour les jeunes?” (Nditekemena kayi didiku bua bansonga?) ne wakitaba mene bua kulongesha natshi balongi. Kubangila ku tshikondo atshi, ukadi muangate nimero ya bibejibeji 40.
Patshivuaye nsonga, misangu yonso Vaughn uvua umona buambi bumukolele. Udi wamba ne: “Mvua ngumvua lukanku, mu bianza muvua muntuka tshisululu, ne mvua ngakula lubilu-lubilu tshiyi ntukija to.” Kadi wakalua muambi wa lumu luimpe wa ku dîba ne ku dîba. Nansha nanku, kabivua anu bitekete bua yeye kuakula. Dimue edi, kunyima kua yeye mumane kutambakana dituku dijima mu dikeba dia mudimu, kadi kayi muupete, Vaughn wakajinga bua kuyisha muntu kampanda uvua mu kawulu ka njila wa muinshi mua buloba, “bua se: dituku edi dibi ni divuaku mua kupatula tshipeta tshimpe.” Kadi uvua utshina bangenda-mushinga bavua mu kawulu aku bavua bamueneka bantu ba lumu lua bungi. Ndekelu wa bionso, wakapeta dikima dia kuakula ne mukulakaje uvua ku luseke luende. Bakayukila nende mutantshi mule. Ngenda-mushinga au wakamuambila ne: “Ke muudi ne miyuki mimpe nunku pebe utshidi nsongalume, utu mulonge kalasa ka ba-mpasata anyi?” Vaughn wakamukudimuna ne: “Too, ndi Ntemu wa Yehowa.” Au kutua mimuemue wamba ne: “Aaang, ngumvu mpindieu.”
Bantemu bonso aba ne bakuabu bungi kabuyi kubala badi ne disanka muvuabu bapete dikima bua kuyisha. Newenze pebe bia muomumue anyi?
[Tshimfuanyi mu dibeji 25]
Tara
[Tshimfuanyi mu dibeji 25]
Vaughn