Tungunuka ne kuyisha ne dikima
1 Tuetu bena Kristo tudi bamanye ne: bantu bonso kabakutuakidila bimpe patudi tuyisha to. (Mat. 10:14) Nansha nanku, katualukidi tshianyima anu bualu bantu kabena batuakidila bimpe nansha. (Nsu. 29:25) Ntshinyi tshidi mua kutuambuluisha bua kutungunuka ne kuyisha ne dikima?
2 Mupostolo Paulo uvua munange “bualu bua mushinga mukole bua dimanya dia Kristo Yezu.” Ke bua tshinyi wakakula ne “kumanya kujalame” anyi ne dituishibua dionso. (Filip. 3:8 MMM; 1 Tes. 1:5) Nansha muvua bamue bamone malu avuaye uyisha bu a tshianana, Paulo uvua mujadike ne: avua ‘bukole bua Nzambi bua lupandu kudi muntu yonso udi witabuja.’ (Lomo 1:16) Ke bualu kayi, nansha pavua bantu bamuela mpata, uvua utungunuka amu ne ‘kuakula ne dikima, mueyemena kudi Nzambi bikole.’—Bien. 14:1-7, MMV; 20:18-21, 24.
3 Kutudi tupetela bukole: Paulo kavua mua kuyisha ne dikima ku bukole buende yeye nkayende to. Wakamba buende yeye ne Sila ne: ‘Patuakakenga ne pakatuenzelabu bibi mu Filipoi, tuakakolesha mitshima mu Nzambi wetu bua kunuambila lumu luimpe lua Nzambi mu kuluangana kua bungi.’ (1 Tes. 2:2; Bien. 16:12, 37) Pashishe, pavua Paulo mu buloko ku Lomo, wakambila bena Kristo nende bua bamulombele Nzambi bua atungunuke ne ‘kuambila bantu [lumu luimpe] ne dikima bu muvuaye ne bua kuluamba.’ (Ef. 6:18-20) Paulo wakatungunuka ne kuyisha ne dikima bualu kavua mudieyemene to, kadi uvua mueyemene Yehowa.—2 Kol. 4:7; Filip. 4:13.
4 Ke mudibi kabidi lelu’eu. Tshilejilu, muanetu mukuabu uvua kumpala ne buôwa bua kudimanyisha ne: utu Ntemu wa Yehowa ku mudimu ne bua kuyisha padi mpunga umueneka wakasambila bua bualu ebu ne kutuadija kuyisha. Muena mudimu nende mukuabu wakabenga bivuaye umuambila, kadi pakumvuaye bua dibika dia bantu ku lufu wakitaba bua kulonga Bible. Kutuadijila anu dituku adi, muanetu eu ukadi utabalela mpunga yonso udi umueneka bua kuyisha. Pakapetaye mudimu mukuabu, wakafikisha bena mudimu nende 34 ku ditambula munkatshi mua bidimu 14. Tuikalayi bajadike ne: Yehowa neatukoleshe petu bua tuetu kutungunuka ne ‘kuamba dîyi diende ne dikima dikole.’—Bien. 4:29.