Tshidimu tshiakabanyabu Bible mipite bungi

BANTU ba bungi mpindieu badi ne Bible kupita muvuabi kumpala. Ke tshidi luapolo kampanda lua Société Misanga ya Bible lumvuija, bualu mu 1998 Bible ivuabu babanye ivua mipite pa tshitupa tshia muliyo; bungi butambe bua ivuabu babanye mu 1997. Pa kusangisha yonso, bavua babanye pa buloba bujima Bible mipite pa 585 000 000​—mu kabujima kayi anyi bitupa. Badi bamba mu luapolo alu ne: “Ebu mbualu budi bukankamija. Lelu’eu Dîyi dia Nzambi didi kudi bantu ba bungi.”

Bushuwa, kuikala ne Bible ne kumubala mmalu abidi mashilangane. Tshilejilu, dikonkonona kampanda divuabu benze diakaleja ne: bena Amerike bapite 90 pa lukama badi ne Bible, ne kabidi bantu bapite 90 pa lukama badi bitabuja ne: Bible mmukanda muimpe udi ulongesha bikadilu bilenga. Kadi, anu bantu 59 pa lukama ke bakamba muvuabu banyemena mu Bible bua kupeta mibelu. Ne bantu 29 pa lukama bakitaba ne: mbamanye Bible anu “kakese” anyi ki mbamumanye mene “nansha kakese.”

Bantemu ba Yehowa kabatu anu bapatula Bible ne bayabanya to, kadi batu kabidi balombola malonga a Bible mu matunga mapite pa 230 ne bantu kabayi babafutshisha mfranga. Bantu miliyo mivule pa buloba bujima badi bapetela dikuatshisha ku ndongamu eu wa dilongesha dia Bible. Badi babambuluisha bua kutantamena ntatu idibu bapeta mpindieu, ne badi balonga malu adi Bible wamba bua matuku malengele atshilualua mu Bukalenge bua Nzambi.​—Yeshaya 48:17, 18; Matayo 6:9, 10.

[Bimfuanyi mu dibeji 32]

Malonga a Bible mu (bangila kuulu ku dia bakaji mutu milonda ya Dîba yenda) Bolivie, Ghana, Sri Lanka ne mu Angleterre