Tudi ba ku badi ne ditabuja

Badi bamanyisha mukenji udi usamba bantu mu Italie

YEHOWA udi “Nzambi wa busambi buonso.” Padi basadidi bende balonga mua kumuidikija, badi ‘bamanya mua kusamba bakuabu mu makenga abu onso.’ (2 Kolinto 1:3, 4; Efeso 5:1) Etshi ntshimue tshia ku bipatshila binene bia mudimu wa diyisha udi Bantemu ba Yehowa benza.

Badi bambuluisha mukaji kampanda uvua mu dikenga

Nangananga mu bidimu bidi panshi ebi, bua bupele, mvita ne dijinga dia kuikala ne bintu bilenga bia didikuatshisha nabi, bantu ba bungi mbamuangale ne mbaye mu matunga adi ne bubanji bua bungi. Kadi ki mbipepele bua kuibidilangana ne nsombelu ya ku babende to. Manjola uvua musombele mu musoko wa Borgomanero pamue ne bana babu bena ku Albanie. Bu muvuaye mu Italie kayi ne mikanda ya mbulamatadi mikumbane, uvua utshina bua kuyikila ne Wanda, Ntemu wa Yehowa. Dimue dituku, Wanda wakalongolola bua kuyikila ne Manjola. Nansha muvuabi bimutatshisha bua dipanga dia muakulu, Manjola wakitaba diakamue bua kulonga Dîyi dia Nzambi. Kadi kunyima kua misangu mikese ya dimutangila, Wanda kakasangana kabidi muntu nansha umue kumbelu aku, kuenza amu bu baye kale. Mbualu kayi buvua buenzeke? Wanda wakalua kumanya ne: bena ku nzubu aku bonso bavua banyeme bualu umue wa kudibu​—nsongalume kampanda uvua mulunda wa Manjola—​uvua mushipangane ne bavua benda bamukeba!

Kunyima kua ngondo inayi, Wanda wakapetangana kabidi ne Manjola. Wanda udi uvuluka wamba ne: “Mutokoloke mbidi ne munyane, kuîsu kua Manjola kuvua bu kua muntu uvua mu ntatu mikole.” Manjola wakamuambila ne: nsongalume au uvua mu buloko, kabidi ne: ku balunda kuvuaye munyemene kuakamulelela dikenga dikole. Mumane kushikila, wakalomba Nzambi bua amuambuluishe. Ke yeye kushisha kuvuluka Wanda, uvua mulongeshi wende wa Bible. Pakamumonaye tshiakabidi, Manjola e kumvua disanka ne mu nzadi!

Bakabangulula kulonga Bible, ne katupa aka, Manjola e kutuadija kubuela mu bisangilu bia bena Kristo. Wakapeta mikanda ya mbulamatadi ivua imuanyishila bua kushala mu Italie. Kunyima kua tshidimu tshimue, Manjola wakalua Ntemu mutambule. Bu muvua malu adi Nzambi mulaye mamukoleshe ku muoyo, wakapingana kuabu ku Albanie bua kumanyisha bena kuabu mukenji wa mu Bible udi usamba bantu.

Badi bayisha mu kamponya ka bena tshimuangi

Bisumbu bia bungi bia mu Italie mbilongolole bua kuyisha bena tshimuangi bu mudi Manjola. Tshilejilu, tshisumbu tshia mu tshimenga tshia Florence tshivua tshilongolole bua kuikala kuya pa tshibidilu mu kamponya kampanda ka bena tshimuangi. Bantu ba bungi bavua mu kamponya aka mbafumine ku Mputu wa ku Est, ku Makedonia ne Kosovo ne bavua mu ntatu mikole. Bamue bavua bapete ntatu bua dinua bintu bu diamba anyi maluvu makole. Ba bungi bavua biba tumue tuntu bua kumona mua kudiambuluisha.

Kuyisha bantu abu kakuvua kupepele to. Kadi, Paola muambi wa lumu luimpe wa ku dîba ne ku dîba wakatutakena ne Jaklina, mukaji muena Makedonia. Kunyima kua diyukila nende misangu mikese, Jaklina wakakankamija mulunda wende Susanna bua kulonga Bible. Susanna wakayikila pende ne balela bende bakuabu. Kunyima kua katupa kîpi, bena mu dîku batanu bakavua balonga Bible pa tshibidilu, babuela mu bisangilu bia bena Kristo ne batumikila malu avuabu balonga. Nansha mudibu ne ntatu, Yehowa udi ubasamba ne Dîyi diende.

Yehowa udi usamba mudiambike kampanda

Mu tshimenga tshia Formia, Assunta muambi wa lumu luimpe wa ku dîba ne ku dîba wakayikila ne mukaji kampanda uvua wenda ne lutatu. Mukaji au uvua mudiambike wa mu bulongolodi kansanga bua malu a nzambi butu buambuluisha babedi ne balema mu mpitadi ne ku nzubu yabu kabidi.

Assunta wakambila mudiambike au ne: “Ndi mumone se: wewe pebe udi ukenga bikole, ki mmuomu anyi? Bia dibungama, tuetu bonso tudi tuluangana ne ntatu.” Utshitula dîyi, mudiambike au e kutuadija kupuekesha binsonji ne kumumvuija ne: uvua usama bikole. Assunta wakamukankamija, umuambila ne: Nzambi wa mu Bible udi mua kumusamba. Mudiambike au wakitaba bibejibeji bishindamene pa Bible bivua Assunta mumupeshe.

Musangu wakalonda, mudiambike au dîna diende Palmira, wakitaba ne: disama divua dimukengesha bikole. Uvua muenze matuku a bungi mu nzubu kampanda wa badiambike bakaji. Pakanjiye kupatukamu bua mutantshi mukese bua disama divua dimutatshisha, kabakitaba bua yeye kupingana kabidi to. Kadi, bua mitshipu ya budiambike ivuaye muenze, Palmira uvua utungunuka ne kudiumvua mudisuike kudi Nzambi. Wakanyemena kudi buondapianganyi bua “kumvuaye bimpe,” kadi bualu buakamonaye buakamutatshisha bikole mu lungenyi. Palmira wakitaba bua kulonga Bible ne wakabuela mu bisangilu bia bena Kristo tshidimu tshijima. Pashishe wakamuangala ne Ntemu eu kakamanya kabidi kuvuaye muye to. Kunyima kua bidimu bibidi, Assunta e kumupetaye tshiakabidi. Balela ne bamfumu ba tshitendelelu bakakengesha Palmira bikole bitambe. Nansha nanku, wakabangulula dilonga diende dia Bible, kudiunda mu nyuma ne kuluaye Ntemu wa Yehowa mutambule.

Eyowa, mukenji wa ‘Nzambi udi ufila busambi’ udi ukankamija bantu ba bungi. (Lomo 15:4, 5) Nenku, Bantemu ba Yehowa ba mu Italie mbapangadije bua kutungunuka ne kuidikija Nzambi pa kusamba bantu bakuabu ne mukenji wende mulenga.