Bamanyishi ba Bukalenge badi balonda
Nsombelu muimpe wa mu dîku udi ufikisha bakuabu ku dimanya Nzambi
YEHOWA wakapesha Yosefe meji a bungi ne busunguluji. (Bienzedi 7:10) Ke bua tshinyi lungenyi lutue luvua nalu Yosefe ‘luakadi luimpe ku mêsu kua Palô ne ku mêsu kua bantu bende bonso.’—Genese 41:37.
Lelu’eu kabidi, Yehowa udi upesha bantu bende lungenyi lutue ne busunguluji padibu balonga Bible. (2 Timote 3:16, 17) Meji ne busunguluji ebi bidi bipatula bipeta bimpe padi bantu batumikila mibelu ya mu Bible. Ngikadilu wabu muakane utu misangu ne misangu ‘muimpe ku mêsu kua bantu badi bamumona,’ anu mudi malu avua menzeke mu ditunga dia Zimbabwe adi alonda aa aleja.
• Muntu mukaji mukuabu uvua mudie mutumba ne Ntemu wa Yehowa. Nansha muvuaye kayi munange Bantemu, uvua wanyisha ngikadilu wabu, nangananga nsombelu wabu wa mu dîku. Wakamona ne: mulume ne mukajende bavua balamatangane bikole ne bana babu bavua babatumikila. Tshiakatamba kumukemesha mmushindu uvua mulume eu munange mukajende.
Mu Afrike mulume yeye mutambe kunanga mukajende, batu bela meji ne: bumue mukaji au mmumudishe misenga. Nunku muntu mukaji eu wakebeja Ntemu au ne: “Bu wewe ne bua kusua, kuena mua kumpeshaku panyi misenga iudi mudishe bayebe ayi bua wanyi annange panyi bikole bu mudi webe mukunange anyi?” Ntemu e kumuandamuna ne: “Ee, nenkutuadilayi malaba mu mapingaja.”
Butshia, muanetu wa bakaji kuyaye katangila muena mutumba nende ne “misenga” ivuaye mumulombe. Tshivua tshinganyi? Bible ne mukanda wa Dimanya didi difikisha ku muoyo wa kashidi. Kunyima kua bamane kukonkonona malu adi mu tshiena-bualu tshia mu mukanda wa Dimanya eu tshidi tshiamba ne: “Mushindu wa kuibaka dîku didi diambika Nzambi lumu,” wakambila muntu mukaji au ne: “Ki ‘misenga’ ituvua badie eyi bua ‘kutekeshangana,’ ne ke bua tshinyi tudi banangangane bikole.” Anu pinapu, dilonga dia Bible dikavua dituadije, ne muntu mukaji au wakalonga Bible ne lukasa, kudilambula kudi Yehowa ne pashishe kutambula.
• Bampanda-njila ba pa buabu babidi bavuabu batume mu tshisumbu tshivua ne bamanyishi bakese tshivua lua ku Nord-est kua ditunga dia Zimbabwe (ku mikalu ne dia Mozambique) bakapangila mua kuyisha ku nzubu ne ku nzubu munkatshi mua mbingu ibidi mijima. Bua tshinganyi? Bualu bantu bavua badivuila kudibu bua kuteleja malu avuabu bayisha. Umue wa ku bampanda-njila aba udi uleja bua tshinyi bantu bavua badivuila kudibu wamba ne: “Tuvua tuenda mutantshi wa kilometre 15 ku lumingu luonso bua kufika kumbelu kua muntu mukuabu uvua ulonga netu Bible. Kabivua bipepele bua tuetu kufika muaba au to. Tuvua tuendela mu bitotshi, ne tuvua kabidi tusabuka misulu minene ivua ne mâyi atukuatshila mu nshingu. Tuvua tusuikila bilamba ne bisabata bietu pa mitu, tusabuka ne pashishe tubivuadilula dia muamua.
“Bena mutumba ba muntu utuvua tulonga nende Bible au bavua bakema bikole bua kumona mutuvua basuminyine. Munkatshi muabu muvua mfumu wa tshitendelelu tshia mu musoko au. Wakambila bena kuitabuja bende ne: ‘Kanuenaku basue kuikala ne tshisumi bu tshia bansongalume babidi Bantemu ba Yehowa aba anyi?’ Dituku diakalonda, bena mu tshitendelelu tshiende ba bungi bakalua kuetu bua kumanya bua tshinyi tuvua tunanukila nanku. Kabidi, mu mbingu ibidi ne pamutu, bantu ba bungi bakalua kututangila ne katuvua nansha ne dîba dia kulamba biakudia to!”
Mu mbingu ayi ibidi, mfumu wa tshitendelelu au uvua pende mu bantu bakadiyila kua bampanda-njila abu. Anji kuelayibi meji disanka divua bampanda-njila abu ne bua kuikala nadi pakitaba mfumu eu bua kuikala ulonga nabu Bible ku nzubu kuende!