Bamanyishi ba Bukalenge badi balonda

“Nzambi kêna ne kansungansunga”

KUKADI kupita bidimu 1 900, mupostolo Petelo wakamba ku diambuluisha dia spiritu ne: “Nzambi kêna ne kansungansunga, kadi mu ditunga dionso, muntu udi umutshina ne wenza malu makane mmuanyishibue kudiye.” (Bienzedi 10:34, 35) Munkatshi mua Bantemu ba Yehowa mudi musanganyibua bantu badi bafumina mu mêkala wonso a makoba ne bavua kale mu bitendelelu bishilangane. Badi bajinga buakane ne badi batshina Nzambi. Yehowa udi ubajingila buonso buabu dibuela dilenga mu nsangilu wa bantu mupiamupia pa buloba bujima, tshilejilu, anu bu muakenzaye bua mukaji kampanda mu ditunga dia Tchad.

Mukaji eu kavua musankishibue kudi tshitendelelu tshiende nansha. Katshia wangata mukanda wa: Votre jeunesse​—comment en tirer le meilleur parti, mupatula kudi Bantemu ba Yehowa kukadi kupita bidimu, wakaleja dianyisha bua mibelu minenke idi mu mukanda eu. Dilonga dia Bible diakatuadija ne uvuaku dituku dionso bua kulonga. Kadi pakamukankamijabo bua kubuela mu bisangilu bitu bienzekela mu Nzubu wa Bukalenge, kavua umuya nansha. Mbua tshinyi? Nansha muvua bayende kayi mumukandike bua kulonga [Bible], apo wakamukandika dibuela dia mu bisangilu bia mu Nzubu wa Bukalenge.

Pakajinga mukaji eu bua kuya kubuela mu mpuilu wa tshijengu, Ntemu wa Yehowa uvua ulonga nende Bible wakaleja bayende dibeji dia programme wa mpuilu, muikale unzangika mibelu yamufilabo. “Diakamue,” wakapesha mukajende dianyisha bua kuyaye. Wakabuela mu mpuilu ne malu wonso akapitamu akamusankisha. Kunyima kua yeye mumane kumvuija bayende bionso bikavuaye mulonge, kakamukandika kabidi to bua kuya kubuela mu bisangilu bikuabo. Wakakema pa kumona tshisumbu tshiuwule tente ne bantu bafumine mu bisa bishilangane, bikale mu buondoke buonso batabalelangana. Pashishe, pakabuelaye mu mpuilu wa distrike, wakakema bikole pakumona bana bende basombe pa binu bia Bantemu bavua bafumine mu matunga makuabo, badia biakudia pamue nabo, e kukemaye muvua bana aba banangibue bivule musombele bena dîku dimue dinene. Buende yeye bivua mbangilu wa dishintuluka.

Kadi bakatuadija dimuluisha. Nansha mudiye kayi utamba kuakula katshia ku tshilelelu, wakatuadija kufila mumvuija mu bisangilu eku muikale ne dikima dia kupiisha nadi biambamba bia kudi balela ne bena mutumba. Nansha mukavuaye mumane kusomba bidimu bia bungi ne bayende, bavu’anu baselangane bilondeshile malu a bu-nkambua. Mmunyi muvuaye mua kutuadija kuakula bualu budi butangila mushindu wa kufundisha dibaka diabu ku mikanda ya mbulamatadi? Kunyima kua kusambila Yehowa ne muoyo umue, wakabiambila bayende; yeye e kumuandamuna ne: neakebe mushindu wa kubikumbaja. Ndekelu wa bionso wakabikumbaja. Bubidi buabu bakadisuika mu dibaka bilondeshile mêyi ne mikandu bia mbulamatadi.

Bukonde buende uvuabo basombe nende wakabakebela bilumbu bivule, kadi mulume wakatua ku tshia mukajende. Pashishe, tatuende wa mulume wakavua kubakumbula. Wakatumina muanende dîyi bua kubengaye mukajende bu muvuaye mushintulula tshitendelelu. Tatu eu wakambila muanende ne: neamupe biuma bua [kuselaye] “mukaji wa malu mimpe.” Muana wakandamuna ne: “Nansha kakese, tshiakuenza nanku to. Yeye eu mmukaji muimpe. Pikalaye musue kuya, abu mbualu bukuabo, kadi tshiakumuambila to bua kuyaye.” Mukaji eu uvua unemeka bikole tatuende muenu, ne ukavua umvua bundu bua ngikadilu wende mubi. Kadi, pakapinganaye ku musoko wende, wakafundila muanende mukanda, umutumina dîyi dia ndekelu. Wakamba ne: pikala muanende mubenga kuipata mukajende, kakuikala kabidi muanende to. Muana wakatua tshiakabidi ku tshia mukajende. Fuanyikija disanka dia mukaji eu pakamonaye bayende wenza bualu bua mushindu’eu.

Mpindieu bana bende ba balume batekete babidi mbanange kuya ne mamuabo mu Nzubu wa Bukalenge. Badi balomba tatuabo tulavuanda bualu badi bamona bana betu buonso badi benza miyuki batuvuale. Lelu’eu, mukaji eu mmuanetu mutambushibue.

Ng’umue wa ku Bantemu 345 badi ne disanka mu Tchad badi bamanyisha lumu luimpe lua Bukalenge bua Yehowa, bikale bajadika ne dishindika dionso ne: bulelela, “Nzambi kêna ne kansungansunga.”