Bamanyishi ba Bukalenge badi balonda

“Diakalenga ndia muntu udi mupete meji”

BULELELA bua lusumuinu elu mbumueneke mu ditunga dia Corée, mudi mpindieu Bantemu ba Yehowa ba musangelu bapita pa 71 000. (Nsumuinu 3:13) Tshintshikilayiku: bamanyishi 42 pa 100 ba ku basadidi aba badi mu mudimu wa ku dîba ne ku dîba. Malu adi alonda aa adi aleja bua se: aba badi bakeba meji a bushuwa badi bapeta diakalenga.

Mukaji kampanda wa ku Pusan uvua utantshila Ekleziya kansanga wa bena bukua-buena-nkristo kukadi kupite bidimu 16. Wakalama mikenji mivule idi kayiyi ya mu Bible ne wakatuadija kuitaba ne: Nzambi kavuaku. Ku luseke lukuabo, kavua mua kuvila dikalaku dia Nzambi ku budisuile to, pabi, wakamusambila bua amuambuluishe bua kupetaye Ekeleziya mulelela, bikalayiku. Musangu umue, meji ende akaya kudi Bantemu ba Yehowa; wakavuluka muvua Ekleziya wende ubapepeja ne udimuija bena kuitabuja bua kabanyishi Bantemu ba Yehowa, bualu kabatu bitaba Trinité anyi Busatu-Bunsantu, kapia ka inferno ne malongesha makuabo a bukua-buena-nkristo. Misangu mikuabu, buobo ke badi benza Ekleziya mulelela anyi? Ku diambuluisha dia muena mutumba nende, wakapeta muaba uvua Nzubu wa Bukalenge. Dituku diakalonda, wakabuela mu tshisangilu.

Bulongame buvua mu tshisangilu atshi buakamukemesha. Bishilangane ne bivua bienzeka mu Ekleziya wende, kakuvua mutoyi nansha misambu minekesha. Bakamupesha muanetu kampanda wa bakaji bua kulongaye nende Bible, ne dilonga dia kumpala diakanenga mêba a bungi, bua bungi bua nkonko ivuaye wela. Pa dilonga dibidi, wakamanyisha ne: nealekele kuya mu Ekleziya wende bua kuluaye Ntemu. Wakambila muanetu wa bakaji eu ne kavua kabidi ne dijinga dia kulonga to ne neikale amu ubuela mu bisangilu tshianana. Kadi muanetu eu wakamuleja mushinga wa dilonga dia muntu pa nkayende dia Bible pa kumbusha dibuela dia mu bisangilu. Wakitaba ne wakadibueja ne kasuki mu dilonga diende ne, pakakumbana dîba, wakatambushibua.

Udi mpindieu ne disanka dikole bualu mmupete meji a Nzambi wa bushuwa, Yehowa, ne udi utekemena muoyo wa kashidi mu bulongolodi bupiabupia bubiye mulaye.

Jenerale kampanda wa biluilu muena pansió wapetshi bulelela

Mukaji wa jenerale kampanda wa biluilu wakapeta batismo mu 1962. Ku ntuadijilu, bayende wakabenga, kadi kunyima wakalua muntu wa bupole. Bidimu 28 biakalonda, bana betu ba balume bakalonga nende, bavu’anu bateta mua kujula dijinga diende dia kumanya bia bungi bua bulelela. Ku mpukapuka, uvua ubuela mu bimue bisangilu ne mu mpuilu, kadi, anu bu bantu ba bungi, kavua wangata bulelela ne mushinga nansha. Mu 1990, mukajende ne yeye bakaya mu Japon bua kubuela mu mpuilu wa distrike. Mu mpuilu eu, wakateleja miyuki yonso ne ntema​—kavua muanji kuenza nunku kumpala to. Miyuki ivua ileja patoke bitendelelu bia mafi yakamulenga ku muoyo, kadi, yakamunzulula mêsu pa dikala ne mpala ibidi dia bukua-buena-nkristo. Bulongame buvua munkatshi mua basadidi ba Nzambi bena Japon ne musangelu bivuabo nabi biakamukemesha, dikema edi wakadiumvua diambedi mu Koré. Pakapinganaye kuende, wakalonga Bible ne muoyo umue, ne ndekelu wa bionso, wakatambushibua.

Kunyima kua batismo wende wakenza tshinyi? Wakalekela mudimu wende wa bu mulombodi wa tshilala-benyi tshia bena ngendu ya kudisankisha tshimanyike bikole, e kuluaye musadidi wa ku dîba ne ku dîba, bu mukajende. Udi wamba ne: kuikala mpanda-njila wa pa tshibidilu mmushindu mulenga wa kupingaja bivuaye mujimije munkatshi mua bidimu 28 patshivuaye upitshisha dîba patupu.

Mpindieu wajadiki se: lusumuinu elu ludi lumutangila pende: “Diakalenga ndia muntu udi mupete meji.”