Nkonko ya babadi
Bu mudi Bible wamba ne: “Kanudisuiki ku tshikokedi tshimue tshidi katshiyi tshiakanangane ne badi kabayi bena kuitabuja,” mbiakne bua muena nkristo kudisangisha kudi eu udi kayi muena kuitabuja bua kuenda nende mushinga pamue anyi?
Tudi tusangana mubelu eu mu 2 Kolinto 6:14-16: “Kanudisuiki ku tshikokedi tshimue tshidi katshiyi tshiakanangane ne badi kabayi bena kuitabuja. Apo, mmalanda kayi adi pankatshi pa buakane ne dishipa dia mikenji? Peshi, mbuobumue kayi budi pankatshi pa butoke ne mîdima? Ku lukuabu luseke, ndiumvuangana kayi didi pankatshi pa Kristo ne Beliale? Anyi, ntshitupa kayi tshidi natshi muena kuitabuja ne udi kayi muena kuitabuja? Ndiumvuangana kayi didi pankatshi pa ntempelo wa Nzambi ne mpingu?”
Kakuena kabingila nansha kamue ka kuambila ne: mupostolo Paulo wakafila mubelu eu ne tshipatshila tshia kukosela bena nkristo makandika majadike, bu edi dia kudisangisha kudi eu udi kayi muena kuitabuja bua kuenda mushinga pamue nende. Kadi, mbia bushuwa se: mubelu wende uvua utangila muanda eu ne mikuabu kabidi.
Paulo wakatuma mubelu eu kudi bena nkristo nende ba ku Kolinto wa kale. Bu muvuabo basombele mu tshimenga tshivua tshiuwule tente ne bubi, bavua ku dituku ne ku dituku kumpala kua njiwu pa bidi bitangila bikadilu bilenga ne ngikadilu ya mu nyuma. Bu buobo bikale kabayi badimuke, bikadilu bibi bivua kumpala kuabo bivua mua kunyanga ku kakese ku kakese dipangadika diabo dia kuikala bantu bashilangane ne bakuabu, “tshisa tshisungula, bukalenge bua bakuidi, ditunga dinsantu, tshisamba tshidianjila kufunkuna bua kuikalatshi bumpianyi bua pa buabo, bua nuenu kumanyisha ngikadilu milenga ya eu wakanubikila ku mîdima bua kunubueja mu butoke buende bua dikema.”—1 Petelo 2:9.
Kumpala kua kufunda bidi mu 2 Kolinto 6:14-16, Paulo uvua muakule bua bualu bunene buvua munkatshi mua bena nkristo nende ba ku Kolinto. Bakanyisha bua muntu kampanda muena mpekato ya bundumba atungunuke ne kuikala munkatshi muabu, kadi Paulo wakabambila bua kuipata, anyi kupatula, muntu awu bu muvuaye kayi musue kulekela bubi buende. (1 Kolinto 5:1) Mpekato ya muntu awu ivua ileja ne: balunda babi anyi kudibueja kakuyi budimu mu malu a mu bulongolodi ebu bivua mua kuikala ne tshipeta tshibi kudi muena nkristo.
Bena nkristo ba ku Kolinto bavua ne tshia kuepuka dikumbula bantu bavua kabayi mu tshisumbu tshia Nzambi, kadi bivua bileja se: bavua ne bua kudisemeja kule ne aba bavua kabayi bena kuitabuja anyi? Bavua ne bua kuepuka malanda wonso ne aba bavua kabayi bena nkristo, pa kulua bu tshitendelelu kampanda tshifuanangane ne tshia bena Yuda bavua baya kusombela ku Kumran, pabuipi ne mbuu Mukamakane anyi? Tangilayi diandamuna dia Paulo: “Mvua munufundile mu mukanda wanyi ne: nulekele kutantshila bena masandi, tshivua ngakula nshindika bua bena masandi ba mu bulongolodi ebu to . . . Tshianana, bivua bikengela bua nuenu kupatuka mu bulongolodi ebu.”—1 Kolinto 5:9, 10.
Mêyi aa mmatoke. Paulo uvua mumanye ne: bena nkristo bavu’anu pa buloba, basombe munkatshi mua aba badi kabayi bena kuitabuja, kabidi ne: ku dituku ne ku dituku bapetangana ne bantu babi bavua ne mmuenenu mushilangane ne wabu. Bu muvuaku kakuyi mushindu wa kuepuka bantu’abu babi, bena nkristo bavua ne bua kumanya ne: njiwu ivua mua kufumina kudibu.
Mpindieu, tutangilayi tshiakabidi mukanda muibidi wa Paulo wakatuminaye bena Kolinto. Wakaleja se: bena nkristo bela manyi mbakumbanyine bua kuikala ba-ministre ba Nzambi, bena-mpala pa muaba wa Kristo. Wakabambila bua kabalenduishi muntu, abi bivua mua kupendesha mudimu wabu. (2 Kolinto 4:1 too ne 6:3) Mu buludi buonso, Paulo wakasaka bena nkristo nende bena Kolinto, bavua bu bana bende ba mu nyuma, bua kudiundisha malunda abu. (2 Kolinto 6:13) Ke pakabakankamijaye ne: “Kanudisuiki ku tshikokedi tshimue tshidi katshiyi tshiakanangane ne aba badi kabayi bena kuitabuja.” Wakatela mulongolongo wa bintu bibengangane bua kushindika muanda eu.
Dibala dia mvese idi ku mutu ne idi kuinshi didi dileja se: kavua mushindamene amu pa bualu bumue to, tshilejilu, bungenda-mushinga peshi midimu kampanda kavua mubikandike menemene to. Kadi, uvua upesha bena nkristo nende basuibue mubelu udi ne mishindu yonso ya meji, ne wa mushinga.
Tshilejilu, mubelu eu, uvua mua kulondibua bikala muena nkristo ne dijinga dia kusela anyi? Eyowa. Mu mukanda wende wa kumpala, mupostolo wakabela bena Kolinto bavua basua kusela bua babienze “anu mu Mukalenge.” (1 Kolinto 7:39) Wakaleja meji adi mu mêyi aa bualu kunyima wakabifunda kabidi mu 2 Kolinto 6:14-18. Pavua muena nkristo wela meji bua kuselaye muntu udi kayi usadila Yehowa ne kayi mulondi wa Kristo, uvua udisuika pamue ne eu udi kayi muena kuitabuja. (Tangila Lewitike 19:19; Dutelonome 22:10.) Mbimueneke patoke ne: dipanga diumvuangana diabu nedikale mpokolo wa ntatu, nangananga mu nyuma. Misangu mikuabo, tshilejilu, muntu eu ukena muena kuitabuja udi mua kuikala utendelela nzambi wa mafi, peshi neikale ne bua kuenza nunku mu matuku atshilualua. Paulo wakela meji nenku’eu: “Ndiumvuangana kayi didi pankatshi pa Kristo ne Beliale?”
Kadi, netuambe tshinyi pa bidi bitangila tshitupa tshikuabu tshia mu nsombelu: malanda a bungenda-mushinga ne eu udi kayi muena kuitabuja? Misangu mikuabu, muena nkristo udi mua kuela meji se: bua kukumbajaye majinga ende ne bidi dîku diende dikengela, udi ne bua kudisangisha bua kuenda mushinga pamue ne muntu udi kayi muena nkristo. (1 Timote 5:8) Tutangilayi bilejilu bikuabu:
Pamu’apa, muena nkristo udi mua kujinga kusumbisha bintu kampanda, kadi kudi anu mushindu umue wa kubienza: kumvuangana ne muntu udi ne makokeshi a kufika muaba utu bintu abi peshi udi ne mfranga idi ikengedibua. Muena nkristo mukuabo mmusue kudimisha madimi (anyi kumuna nyama); kadi, bu mudiye kayi ne buloba, bidi bikengela kumvuangana ne muntu udi mua kuitaba bua ne: afutshile tshitupa tshia buloba, pashishe, kuabanyanganabu makasa. Mu matunga makuabu, muena nkristo kêna mua kuenza mudimu wa kuenza peshi kulongolola milonda ya mâyi anyi milonda itu ipatula mishi bualu Kayisa peshi mbulamatadi udi upatula mikanda ya mudimu eu bungi bukese, ne mbamane kuangata yonso; diambuluisha didi mua kufika amu ku diumvuangana ne muledi kampanda udi kayi muena kuitabuja udi ne mikanda eyi.—Mako 12:17.
Bionso ebi mbilejilu patupu. Katuena tuteta kunyunguluka mishindu kabukabu yonso to, nansha kufila mmuenenu wetu. Kadi, patudi ne bilejilu ebi mu lungenyi, nudi bamone bua tshinyi mbimpe kulonda mubelu udi mu 2 Kolinto 6:14-18 anyi?
Muena nkristo udi wenda mushinga pamue ne muntu udi kayi muena kuitabuja, muanabu kayi yonso anyi muntu kayi muanabu, udi mua kupetangana ne mateta ne ntatu ya ku mpukapuka. Pamu’apa, bua kupeta makasa a bungi, muntu awu udi mua kushima makasa atubu bapeta peshi kuangata bantu ku mudimu mu musokoko, nansha biobi bikengela kushipa mikandu ya ditunga. Udi wanyisha kusumba bintu kakuyi faktire. Wewe muena nkristo, udi pebe musue bua kudibueja mu malu a mushindu’eu anyi? Ne newenze tshinyi pa kutua kua biala mu mikanda ya mbulamatadi idi itangila kumpanyi wenu?—Ekesode 23:1; Lomo 13:1, 7.
Peshi, muntu eu ukena muena kuitabuja udi ukeba kulama bintu bia mafesto a bampanganu, anyi utuma twarte tua kujingila natu bantu mafesto malenga mu dîna dia kumpanyi ne wakaja nzubu wa disumbishila bua mafesto a bitendelelu bia mu bulongolodi ebu. Paulo wakebeja ne: “Ndiumvuangana kayi didi pankatshi pa ntempelo wa Nzambi ne mpingu? Bualu tudi ntempelo wa Nzambi wa muoyo.” Mêyi adi alonda aa mmakumbanyine: “Ke bua tshinyi Yehowa udi wamba ne: ‘Patukayi munkatshi muabu, ne semenayi kule nabu, kanulengi kabidi tshintu tshipange bukezuke’; ‘ne nennuakidile.’” (2 Kolinto 6:16, 17) Bu mudibu balonda mubelu eu wa meji, bena nkristo bavule badi basungula midimu idi kayiyi ibateka kumpala kua mateta.—Ebelu 13:5, 6, 18.
Mudimu wa tshisumbu kawena wa kukenketa anyi kukonkonona midimu ya ku mubidi ya bena nkristo nansha, nansha buobo bikale bena mudimu anyi bikale ne bintu biabu nkayabu. Eyowa, padi muena nkristo mudibuejakaje mu bubi (tshilejilu, kutua ditendelela dia mpingu nyama ku mikolo peshi mafi anyi buivi), tshisumbu tshidi ne bua kuangata mapangadika bua bantu banemeke mêyi-maludiki a Yehowa.
Kadi, tshidi ne bualu ntshia se: mubelu wa Paulo eu mmufila ku butuangaji bua spiritu wa Yehowa: “Kanudisuiki ku tshikokedi tshimue tshidi katshiyi tshiakanangane ne badi kabayi bena kuitabuja,” udi mua kuambuluisha bena nkristo bua kuepuka bilumbu ne kuepuka manyokibua. Nebapete meji a kuteka mubelu eu ku muoyo ne nebepuke mishindu yonso idi mua kubafikisha ku dishipa dia mêyi-maludiki a mu Bible. Padi muena nkristo wenda-mushinga pamue ne muntu udi kayi muena kuitabuja, bena nkristo kabakumujana ne lukasa luonso anyi bamona bibi; kadi bamanye ne: udi ne bua kuambula bujitu budi buluila ku disungula diende. Paulo kakakandika diumvuangana ne muntu udi kayi muena nkristo nansha. Kadi tulondayi mubelu wende. Nzambi wakamupesha spiritu wende bua kufundaye mu Bible mubelu eu bua diakalenga dietu. Bidi bia meji bua kulonda mubelu eu.