“Bikondo bia kujadikabo tshiakabidi malu” bikadi pabuipi!

Bamue balongi ba Yezu ba lulamatu bakamukonka katupa kakese kumpala kua kubandaye mu diulu ne: ‘Mukalenge, wewe neupingajile Isalele bukalenge katataka anyi?’ Yezu wakabandamuna ne: kuvua ne bua kupita tshikondo kampanda kumpala kua bukalenge kuluabu. Munkatshi mua tshikondo atshi, bayidi bende bavua ne bua kuikala ne mudimu wa bungi wa kuenza. Bavua ne bua kuikala bantemu ba Yezu ‘mu Yelushalema ne mu Yudaya yonso ne Samalea ne ku mfudilu kua buloba.’​—Bienzedi 1:6-8.

MUDIMU au kauvua mua kuenzeka mu matuku, mbingu anyi ngondo mibala ku minu to. Balongi bakatuadija kuyisha kakuyi dijingakana. Kadi kabavua balengulula tshilumbu tshia dijadika malu tshiakabidi to. Bua tshilumbu tshia dijadika malu tshiakabidi etshi, mupostolo Petelo wakambila musumba munene wa bantu bavua basangile mu Yelushalema ne: ‘Kudimunayi mitshima yenu, andamukayi kabidi, bua mibi yenu ijimijibue; bua bikondo bia kunukankamija bifume ku mêsu kua [Yehowa], ne bua yeye atume Kristo wakunusunguilaye, Yezu mene. Budiye nabu mbua kushala mu diulu too ne palua bikondo bia kujadikabo tshiakabidi malu onso akamba Nzambi mukana mua baprofete bende ba tshijila kale kale too ne katataka.’​—Disendamija miaku ndietu; Bienzedi 3:19-21.

“Bikondo [ebi] bia kujadikabo tshiakabidi malu” bivua ne bua kufikisha ku ‘bikondo bia dikankamija’ bidi bifumina kudi Yehowa. Dijadika dia malu tshiakabidi edi divuabu bamanyishe divua ne bua kulua mu bitupa bibidi. Tshia kumpala, kuvua ne bua kuikala dijadika tshiakabidi malu a mu nyuma didi dikankamija, didi dienda dienzeka mpindieu. Tshibidi, padi tshikondo tshia dijadika malu a mu nyuma etshi tshijika kudi ne bua kulua dijadika dia mparadizu mulelela pa buloba.

Tshikondo tshia dijadika malu tshiakabidi tshidi tshituadija

Anu muvua mupostolo Petelo muambile bantu bavua mu Yelushalema abu, ‘Yezu wakashala mu diulu.’ Wakashalamu nanku too ne mu 1914, dîba diakadiaye bumfumu ne kutuadijaye kukokesha, muikale Mukalenge muteka kudi Nzambi. Petelo wakamanyisha ne: mu tshikondo atshi, Yehowa uvua ne bua ‘kutuma’ Muanende mu mushindu wa se: wakitabila Yezu bua kukumbajaye mudimu wende wa muntu wa mushinga wa bungi mu dikumbana dia malu adi Nzambi mulongolole. Bible udi umvuija muanda eu mu ngakuilu wa mu tshimfuanyi ne: “Yeye [bulongolodi bua Nzambi bua mu diulu] wakalela muana, muana mulume mene [Bukalenge bua Nzambi budi mu bianza bia Yezu Kristo], udi ne bualu bua kukokesha bisamba bionso ne dikombo dia tshiamu.”​—Buakabuluibua 12:5.

Kadi bisamba kabiena bisue kukokela bumfumu bua Kristo nansha. Mbiditue mu diluisha bena lulamatu bende badi bakokela bumfumu ebu pa buloba, badi bamanyike ku dîna dia Bantemu ba Yehowa. Bantemu kabakajingakana bua kuangata mudimu wa “bumanyishi bua Yezu” anu bu muakenza bapostolo. (Buakabuluibua 12:17) Bakabanga kuluisha bikole mudimu uvuabu benza kudi bena Kristo balelela aba mu matunga a bungi. Mu 1918, bakakuata balombodi ba Société Watch Tower mu Brooklyn, ku New York. Bakabalumbuluisha ku kabadi, bababanda ne malu a mafi ne kubafundilabu bibawu binene bia buloko. Mu tshikondo kampanda, biakanji kumueneka bu se: mudimu wa diyisha too ‘ne ku mfudilu kua buloba’ mu matuku etu aa uvua mutangile ku difua.​—Buakabuluibua 11:7-10.

Kadi mu 1919, bakapatula balombodi ba Société abu mu buloko ne kunyima bakababingisha ku malu onso avuabu bababanda nawu. Bakatuadijulula diakamue mudimu wa dijadika tshiakabidi malu a mu nyuma. Katshia anu dîba adi, bantu ba Yehowa mbaye kumpala mu nyuma bikole bia dikema.

Bakatuadija mudimu wa kulongesha bantu ba mu bisamba bionso bua kutumikilabu malu onso avua Kristo muambile balongi bende. (Matayo 28:20) Bushuwa, bivua bikankamija bua kumona bamue bantu bavua kumpala ne ngikadilu mifuane ya nyama ya lonji bashintulula mmuenenu wabu wa malu! Bakavula bumuntu bukulukulu, butu bufikisha ku bienzedi bu mudi ‘tshiji,’ ‘bipendu’ ne ‘mêyi a bundu,’ ne bakavuala bumuntu bupiabupia, ‘budi buvuijibua bupiabupia mu dimanya dilelela, bu mudi tshifuanyikiji tshia [Nzambi] mubufuki.’ Mêyi a muprofete Yeshaya adi enda akumbana mpindieu mu nyuma: ‘Tshimungu [muntu uvua kumpala ne ngikadilu mifuane ya tshimungu] netshilale mu nzubu umue ne muana wa mukoko [muntu udi ne bupuekele], ne nkashama nealale popamue ne muana wa mbuji. Muana wa ngombe ne nyama wa ntambue ne nyama udi ne manyi neyidie mashinde mu muaba umue.’​—Kolosai 3:8-10; Yeshaya 11:6, 9.

Dikuabu dijadika malu tshiakabidi dikadi pa buipi!

Pa kumbusha dijadika malu tshiakabidi didi difikishe ku mparadizu wa mu nyuma lelu, tshikondo tshidi tshienda tshisemena ne lubilu tshikala buloba ebu mua kuandamuka mparadizu muena dîna. Yehowa uvua muteke bankambua betu Adama ne Eva mu budimi bua Edene, tshitupa tshikese tshia buloba tshivua mparadizu. (Genese 1:29-31) Ke bua tshinyi tudi tuamba ne: nebajadike mparadizu tshiakabidi. Kadi kumpala kua mparadizu eu kuenzeka, badi ne bua kuanji kumbusha bitendelelu bia dishima bidi bipendesha Nzambi pa buloba. Bena tshididi ke bakumbaja bualu ebu. (Buakabuluibua 17:15-18) Pashishe bena tshididi ne bangenda-mushinga, pamue ne bantu badi babatue mu nyima nebabutuke pabu. Bua kujikija, Satana Diabolo ne bademon bende (ba ndekelu ba ku baluishi ba Nzambi) nebabakange midimu munkatshi mua bidimu tshinunu, tshikondo tshianenga mudimu wa dijadika malu tshiakabidi. Mu tshikondo atshi, ‘tshipela ne buloba bûme nebikale ne disanka; tshipela tshia lusenga netshisanke; netshimeneshe bintu bu mudi tshilongo tshia nsungubidi tshienza.’ (Yeshaya 35:1) Kakuakuikala kabidi tshimvundu pa buloba bujima to. (Yeshaya 14:7) Nansha bantu miliyo ne miliyo badi bafue, nebabishibue bua kuikalabu kabidi ne muoyo pa buloba. Bantu bonso nebapete masanka a ku mulambu udi upikula bantu ku mpekatu. (Buakabuluibua 20:12-15; 22:1, 2) Kakuakuikala bampofo, bampudi matshi anyi balema pa buloba to. ‘Muena musoko kêna wamba ne: ndi ne disama.’ (Yeshaya 33:24) Katupa kakese pajika Bidimu Tshinunu bia Bukokeshi bua Kristo, nebalekele Diabolo ne bademon bende bua tshitupa tshîpi ne nebamone muikala malu adi Nzambi mulongolole bua buloba akumbana mu tshikondo atshi. Ndekelu wa bionso, nebabashipe.​—Buakabuluibua 20:1-3.

Pajika bidimu tshinunu bia dijadika malu tshiakabidi pa buloba, ‘bintu bionso bidi bipuyakana’ nebitumbishe Yehowa, nebimutumbishe kashidi too ne tshiendelele. (Musambu 150:6) Newikale pebe munkatshi mua bintu ebi anyi? Udi mua kuikala pebe munkatshi muabi.